संविधान सभा अध्यक्ष लिसे नेकपा एमालेया उपाध्यक्ष सुवास नेम्वाङयात बिचाः हायेगु निति शीर्ष नेतापि एमाले केन्द्रीय कार्यालय च्यासलय् वःगु दु।

प्रधानमन्त्री नाप नेकपा माओवादी केन्द्रया अध्यक्ष पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा, नेकपा एकीकृत समाजवादीया अध्यक्ष माधव कुमार नेपाल लगायतया नेतापि नेम्वाङयात बिचाः हाय्कूगु दु। व स्वया न्ह्यः नेकपा एमालेया अध्यक्ष केपी शर्मा ओलीं नेम्वाङया पार्थिव शरीरय् पार्टीया ध्वाँय् तयादीगु खः।

पूर्वराष्ट्रपति विद्यादेवी भण्डारीं राष्ट्रिय ध्वाँय् तयादीगु खः। एमालें पार्टीया उपाध्यक्ष नेम्वाङ मदुगुलि स्वन्हु तक छु न औपचारिक ज्याझ्वः मयायेगु व पार्टीया ध्वाँय् स्वन्हु तक क्वछुकेगु निर्णय याःगु खः।

एमालें असोज २ गते शोक सभा यायेगु निर्णय न याःगु दु।

पत्रकार नापं च्वमि राजेन्द्र पराजुली मन्त । यलया ग्वार्कोय् च्वंगु बी एण्ड बी अस्पतालय् वासः याकाच्वंम्ह पराजुली थौं मंगलवाः सुथय् मदूगु खः ।

पराजुलीया बाखं सफू जन्तरमन्तर, अघोरी, कोटेश्वरको केटो, शुक्रराज शास्त्रीको चश्मा, अनायिका, सपनामा माक्र्स, जाडोमा भोक, भ्रष्ट संवेदना, विकल्प यात्रा लिसेंया कृति पिदनेधुंकूगु दु अथेहे वयकलं पत्रकारीता ख्यलय् राजधानी, नेपाल समाचारपत्र, नागरिक, आर्थिक दैनिक पत्रिका व बाह्रखरी लिसेंया अनलाइनय् नं ज्या यायेधुंकूम्ह खः।

वयकःयात थौं मंगलवाः न्हिनय् पशुपति दीपय् अन्तिम संस्कार याइगु जूगु दु ।

राष्ट्रिय सभाया अध्यक्ष गणेशप्रसाद तिमिल्सिनां सुवास नेम्वाङं पविधानसभाय् म्हितूगु भूमिकायात न्ह्यावलय् लुमकेगु जुइ धका धयादीगु दु ।

नेम्वाङ मदुगुलि बिचाः हाय्कादीसे वयकलं २०६२÷६३ या जनआन्दोलनलिपा पुर्नस्थापित संसदय् सभामुख व न्हापागु लिपागु संविधानसभाया अध्यक्ष कथं नेम्वाङं म्हितूगु नेतृत्वदायी भूमिका अनुकरणीय दुगु धका धयादीगु खः।

नेपाःया शान्ति प्रक्रिया व संविधानसभापाखे नेपाःया संविधान जारी यायेत नेम्वाङया तधःगु भूमिका दु धका धयादीसे, ‘वयकलं सुझबुझपूर्ण ढंगं दक्कोनाप सहज संवादया माध्यमपाखे सहमति कायम यासे विवाद निरुपण यायेगु पहःयात दक्कोसिया लुमेक्यगु याइ।’

अथेहे वयकः धयादीगु दु ‘राष्ट्रं छम्ह सिद्धान्तनिष्ठ देशभक्त इमानदार नेता गुमे याःगु दु’

 राष्ट्रपति रामचन्द्र पौडेलं संविधानसभाया अध्यक्ष सुवास नेम्वाङ मदुगुलि थः मर्माहत व स्तब्ध जूगु दु धका धयादीगु दु ।

वयकलं नेम्वाङप्रति श्रद्धाञ्जली बियादीसे बिचाः हाय्का दीगु दु।

प्रधानमन्त्री पुष्पकमल दाहाल ‘प्रचण्ड’ न नेकपा एमालेया उपाध्यक्ष सुवास नेम्वाङ मदुगुलि थः तसकं मर्माहत जूगु दु धका धयादीगु दु।

सामाजिक सञ्जाल एक्सय् वयकलं च्वयादीगु दु नेम्वाङ मत्यकं मदुगुलि मर्माहत जुगु धका धयादीगु खः।

वयकः धयादीगु दु, ‘मदुम्ह कमरेड नेम्वाङप्रति भावपूर्ण श्रद्धान्जली अर्पण यासे शोकाकुल परिवारपिन्त बिचाः हायेका च्वना।’

वंगु १ बजे हृदयघात जुगुलि वयकःयात त्रिवि शिक्षण अस्पतालय् यकूगु खः।