शेयर बजाः थौं सोमवाः थहावःगु दु। शेयर बजाः परिसूचक नेप्से थौं २२ दशमलव ६५ अङ्कं थहावना १ हजार ९ सय ४९ दशमलव ०६ विन्दुइ थ्यःगु दु।

थौं दक्को समूहया शेयर कुहावःगु दु। २ सय ५८ गु कम्पनीया ५२ लाख ५५ हजार कित्ता शेयर १ अर्ब २९ करोड ८५ लाख रुपैयाँया कारोबार जूगु दु।

दकलय् अप्पो आईएमई जनरल इन्सुरेन्सया शेयर ७ करोड ६३ लाख रुपैयाँ न किनबेच जुगु दु। दकलय् अप्पो युनिक नेपाल लघुवित्तया शेयर १० प्रतिशत व न्यादी हाइड्रो पावर कम्पनीया शेयर झन्डै ८ प्रतिशतं थहावःगु दु।

समग्रमा बजाः थहावःसा दकलय् अप्पो सपोर्ट माइक्रोफाइनान्सया शेयर साढे ५ प्रतिशतं घटे जूगु दु।

लुँया भाः थौं तोलां न्ह्यसः कुहावःगु दु। थौं न्ह्यसः कुहावया १ लाख ९ हजार ३ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथे हे, थौं वहः तोलां न झीन्यातका कुहावःगु दु। वहः तोलां झीन्यातका कुहावया १ हजार ३ सय ३० रुपैयाँ न कारोबार जूगु दु धका महासङ्घं धाःगु दु।

न्याम्ह मिसापिन्त छगु ज्याझ्वः दथुइ शुभ अभियान मिडियापाखे हना ज्याझ्वःयाःगु दु।

मिडियाया संचालक प्रेरणा शाक्यया सभाध्यक्षताय् जुगु उगु ल्याझ्वलय् उद्यमी राज्यलक्ष्मी शाक्य, साहित्यकार लोचनतारा तुलाधर, शिक्षा सेवी विद्या चित्रकार, समाजसेवी दिलकुमारी डंगोलपिन्त हंगु खः। ज्याझ्वःया मूपाहाँ श्रद्धाचारी गुरुमांपाखें हनापौ लःल्हाना दिगु खःसा विशेष पाहाँ बागमती प्रदेश सभाया सांसद हरिप्रभा खड्गी श्रेष्ठपाखें स्वामां न्ययकादीगु खः।

उगु ज्याझ्वलय् मूपाहाँ श्रद्धाचारी गुरुमां, बागमती प्रदेशया सांसद श्रेष्ठ, शैलेन्द्रमान बज्राचार्य, नेवाः पत्रकार राष्ट्रिय दबू केन्द्रीय नायः नृपेन्द्रलाल श्रेष्ठ, पूर्व सांसद जीवन डंगोलपिन्स थःपिनिगु नुगँ खः तयादीगु खः।

राष्ट्रपति रामचन्द्र पौडेलयात नेपाःया लागि अमेरिकी राजदूत डीन आर.थम्पसनं नापलागु दु।

थौं सोमबाः राष्ट्रपति भवन शीतल निवासय् राजदूत थम्पसनं राष्ट्रपति पौडेलयात नापलागु खः।

नापलायेगु झ्वलय् नेपाः व अमेरिका दथुइ जुया वयाच्वंगु निगुपक्षीय सम्बन्ध, थःपिनिगु हितया विषय खँल्हावल्हा जुगु धका राष्ट्रपतिया कार्यालयं धाःगु दु।

प्रतिनिधिसभाया बैठक छवाःया लागि स्थगित जूगु दु। सोमबाः च्वंगु बैठकय् प्रधानमन्त्री पुष्पकमल दाहाल प्रचण्डं विश्वासया मत काःगु खः।

प्रधानमन्त्री प्रचण्डं विश्वासया मत कायेत ताःलागु घोषणा यासे सभामुख सभामुख देवराज घिमिरे न आः मेगु बैठक थ्व हे चैत १२ गतेया लागि तःगु दु।

सोमबाः प्रधानमन्त्रीं थःत प्रतिनिधिसभाय् विश्वास दु धका तःगु प्रस्तावया पक्षय् १७२ म्ह सांसदपिन्स समर्थन बिःगु खः।

८९ म्ह सांसदपिन्स उगु प्रस्तावया विपक्षय् मत बिःगु खः।