ब्लड डोनर्स एशोसिएसन नेपाल (ब्लोदान) या भातृसंगठन क्लब २५ या न्हुधाः जूगु दु

थौं महेन्द्र भृकुटी मा.बि.एकान्तकुना, यलय् किशोर सिख्राकारया अध्यक्षताय् न्हुगु ज्यासना पुचः गठन जूगु दु। १९ म्ह सदस्यया न्हुगु ज्यासना पुचः गठन जूगु खः।

उगु ज्याझ्वलय् ब्लोदानया केन्द्रिय अध्यक्ष सानुबाबु प्रजापति नाप केन्द्रिय सदस्य व क्लब २५ या इन्चार्ज बिनोद तुलाधर लगायत केन्द्रिय पदाधिकारीपि व सदस्यपिनिगु उपस्थिति दुगु खः।

प्रधानमन्त्री पुष्पकमल दाहाल प्रचण्डया भारत भ्रमणया औपचारिक घोषणा जूगु दु।

नेपाःया परराष्ट्र मन्त्रालय व भारतया विदेश मन्त्रालयं छक्वलं प्रधानमन्त्री प्रचण्डया थ्व हे वइगु जेष्ठ १७ निसे २० तक जुइत्यःगु भ्रमणया औपचारिक तिथि घोषणा जूगु दु। भारतीय समकक्षी नरेन्द्र मोदीया मैत्रीपूर्ण निमन्त्रणाय् जुइत्यःगु प्रधानमन्त्री प्रचण्डया प्यन्हु यकं भ्रमणया झ्वलय् भारतीय राष्ट्रपति द्रौपदी मुर्मु व उपराष्ट्रपति जगदीप धनखरनाप शिष्ट्राचार भेट जुइगु ज्याझ्वः दु।

प्रधानमन्त्री प्रचण्ड नेतृत्वय् भ्रमण टोली स्वकीय सचिव गंगा दाहाल, नेपाल सरकारया मन्त्री, सचिव व वरिष्ठ अधिकारी सहभागी जुइगु धका परराष्ट्र मन्त्रालयं धाःगु दु । भ्रमणया निन्हु कुन्हु जेष्ठ १८ गते प्रधानमन्त्री प्रचण्ड व भारतीय समकक्षी नरेन्द्र मोदी दथुइ हैदरावाद हाउसय् प्रतिनिधिमण्डल स्तरीय वार्ता जुइ।

वार्ता लिपा निम्हं प्रधानमन्त्रीपिन्स मंकाः कथं पत्रकार सम्मेलन याइ। उगु हे दिं मोदीं प्रधानमन्त्री प्रचण्ड व वयागु प्रतिनिधिमण्डलया सम्मानय् दिवाभ्वँय् याइगु ज्याझ्वः दु। अथेहे, प्रधानमन्त्रीया भ्रमणय् स्वन्हु कुन्हु जेष्ठ १९ गते भारतया मध्य प्रदेशय् उज्जैन व इन्दोरया न भ्रमण ज्याझ्वः दु।

नेपाःया प्रधानमन्त्रीया रुपय् प्रचण्डयागु थ्व प्यक्वःगु भारत भ्रमण खः।

येँ महानगरपालिका जनप्रतिनिधि पिनिगु पद बहाली जूगु दँच्छि दुगु लसताय् थौं ३२ गु वडाय् सरसफाइ याःगु दु।

थौं वडा नं १ य् कमलपोखरी, २ य् नारायणगोपाल मार्ग, ३ य् लाजिम्पाट, ४ य् बालुवाटार व ५, ६, ७ य् वडा भवन न्ह्यने सरसफाइ याःगु खः।

अथेहे, वडा नं ८ य् पशुपति क्षेत्र, ९ य् बत्तीसपुतली, १० य् वडा कार्यालय परिसर, वडा नं ११ य् माइतीघर मण्डला, १२ य् ओन्दे, १३ य् ताहाचाः ताँय्, १४ य् कुलेश्वर भलिबल मैदान, १५ य् भगवान पाउ व १६ य् सोह्रखुट्टे चुकय् सरसफाइ याःगु खः।

अथेतु, महानगरया वडा नं १७ लुँतिइ, १८ य् वडा कार्यालय न्ह्यने, १९ य् दमाइ त्वाः, २० य् भीमसेन स्थान, २१ य् जैसीदेवल, २२ य् टेबहाः, २३ य् यङ्गाः, २४ य् हनुमानध्वाका, २५ य् असं दबू, २६ य् सञ्चय कोष भवन न्ह्यने, २७ य् असं, २८ य् कमलादी गणेशस्थान, २९ य् ढुङ्गेधारा, ३० य् वडा भवन न्ह्यने, ३१ य् भीमसेन गोला व वडा नं ३२ य् कोटेश्वर चुकः (प्रहरी वृत्त) य् सरसफाइ याःगु खः

लुँया भाः थौं तोलां न्यासः कुहावःगु दु। लुँ तोलां थौं न्यासः कुहावया १ लाख ८ हजार ३ सय रुपैयाँ न कारोवार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोला न न्यातका कुहावःगु दु। वहः तोलां न्यातका कुहावया १ हजार ३ सय ४५ रुपैयाँ न किनबेच जूगु दु धका महासङ्घं धाःगु दु।

सरकारं संघीय संसदपाखे पारित याःगु राष्ट्रपति कार्यालयय् अलपत्र जुयाच्वंगु नागरिकता विधेयक प्रमाणीकरणया लागि राष्ट्रपतियात इनाप यायेगु निर्णय याःगु दु।

शुक्रवाः च्वंगु मन्त्रिपरिषदया बैठकं वःगु असोजनिसे राष्ट्रपति कार्यालय निर्णयविहीन जुयाच्वंगुलि विधेयक प्रमाणीकरण यायेत इनाप यायेगु निर्णय याःगु खः।

निवर्तमान राष्ट्रपति विद्या भण्डारीं प्रमाणीकरण मयासे राष्ट्रपतिया कार्यालय अलपत्र याःगु नागरिकता विधेयक गये याना टुग्यें यायेगु धइगु बारे राष्ट्रपति रामचन्द्र पौडेलं कानूनी परामर्श याःगु खः।

वयकलं विधेयक प्रमाणीकरण यायेगु आधार व कानूनी धरातलवारे न्ह्यसः तयाच्वंगु खः। प्रधानमन्त्री पुष्पकमल दाहालं महान्यायाधीवक्ता नाप संवैधानिक मामिलाया कानुन व्यवसायपि नाप विधेयक न्ह्यने यकिइगु वारे परामर्श याना वयाच्वंगु खः।