थापाथलीइ च्वंगु परोपकार प्रसूति लिसे स्त्रीरोग अस्पातलं थौंनिसे अनलाइन टिकेटिङ सेवा सुरु या:गु दु।

बिरामी पिनिगु चाप अप्पो वंगुलि अस्पतालं थौं बुधवानिसे अस्पतालय् छगु छगु बिलिङ, टिकट काउन्टर व फार्मेसी काउन्टर तक थपे याना सञ्चालन या:गु दु।

अस्पतालय् आ: जनरलपाखे ४५० शैय्या नि:शुल्क या:गु दु धका अस्पताल निर्देशक श्रीप्रसाद अधिकारीं धा:गु दु। अस्पतालय् स्वीकृत शैय्या ४१४ दगु ख:सा बिरामीपिनिगु चापया कारण ४८९ शैय्या सञ्चालनय् हया:गु ख: धका धा:गु दु।

वंगु आर्थिक दँय् अस्पतालपाखे १ लाख ८० हजार ८९० म्हेसिया ओपीडी व २४ हजार ६७२ म्हेसिया प्रसुति सेवा का:गु ख:। अथेहे, वंगु आर्थिक दँय् १ हजार ७७९ म्ह मिसापिन्स नि:शुल्क सुरक्षित गर्भपतन सेवा का:गु दु धका अस्पतालया तथ्यांकं धा:गु दु। 

प्रधानमन्त्री पुष्पकमल दाहाल प्रचण्ड व एमाले अध्यक्ष केपी ओली दथुइ सिंहदरबारय् नापलायेगु ज्या जूगु दु। प्रधानमन्त्रीं सःतूगुलि प्रमुख प्रतिपक्षी दल एमालेया अध्यक्ष ओली मंगलवाः न्हिनय् प्रधानमन्त्री कार्यालयय् वंगू खः।

सिंहदरबारया स्रोतं धाःगु कथं संसदय् सहलह यायेत विधेयक लगायत विषय खँ ल्हायेगु निति अथे नापलायेगु ज्या जूगु दु ।

प्रधानमन्त्रीया विदेश भ्रमण जःखः थथे खँ जूगु खः धका न अनुमान याःगु दु।

येँ महानगरपालिकाया मेयर बालेन्द्र शाह न सामाजिक सञ्जालय् विवादित स्टाटस चिइकूगु दु।

प्यखेरं आलोचना जुइवं साह नं वंगु शनिवाः चान्ह्यः ‘सिंहदरबार च्याकेगु’ धका च्वंगू स्टाटस थौं सोमवाः सुथय् चिइकूगु दु।

छवाः न्ह्यःनिसे कुहावना च्वंगु सेयर बजाः परिसूचक नेप्सें थौं छगू अंकं थहावःगु दु। सोमवाः सेयर बजाः ७.०४ अंक (० दशमलव ३५ प्रतिशत) न थहावःगु दु।

सोमवाः नेप्से परिसूचक १९६७.८३ बिन्दुइ थहावना बन्द जूगु खः। सोमवाः २७० सूचीकृत धितोपत्रय् ३२ हजार ५३३ गु कारोबारपाखे ३४ लाख ३२ हजार २६७ कित्ता धितोपत्रया कारोवार जुगु खः।

१ अर्ब ९ करोड ९१ लाख ४० हजार रुपैयाँ बराबरया कारोबार जूगु खः। सोमवाः थ्री स्टार हाइड्रोपावरया कारोबार सकारात्मक सर्किट लेबलयय् थ्यःगु दु। थुगु भाः १० प्रतिशतं थहावना २७९.५० य् थ्यःगु दु।

अथेहे दोल्ती पावर कम्पनी, ग्रीन भेन्चर लिमिटेड, रुरु जलविद्युत परियोजना, आशा लघुवित्त वित्तीय संस्थाया नं धितोपत्रया भाः थहावंगु दु।

लिबर्टी इनर्जी कम्पनी, कुमारी धनवृद्धि योजना, सिक्लेस हाइड्रोपावर,आरबीबी म्युचुअल फन्ड २, ग्लोबल आईएमई फन्ड १ लगायतया धितोपत्रया भाः यक्को कुहावःगु दु।

जिल्ला प्रशासन कार्यालय येँ न राष्ट्रसेवक कर्मचारी वा सुरक्षाकर्मीपिनिगु कर्तव्य पालनाय् पगं मजुइगु कथं व सामाजिक सञ्जालय् न्ह्यंलाथे वक्तव्यबाजी मयायेत सकसित इनाप याःगु दु। सहायक प्रमुख जिल्ला अधिकारी खड्गबहादुर श्रेष्ठं थौं छगु प्रेस विज्ञप्ति जारी यासे अथे इनाप याःगु खः।

येँ महानगरपालिकाया मेयर बालेन शाहया जहान च्वनावंगु सरकारी नम्बर प्लेटया गाडी शनिवाः चान्ह्यः कोटेश्वरय् ट्राफिक प्रहरी चेकिङइ लाःगु दु। चालकनाप सवारी पास मदुगुलि आवंनिसे सवारी पास ज्वना जक वयेगु याः धासे ट्राफिक प्रहरीं त्वःता बिःगु खः।

सोमवाः जिल्ला प्रशासन कार्यालयं विज्ञप्ति जारी यासे छु खँ दु सा तथ्य प्रमाणनापं सम्बन्धित निकायया प्रमुख वा गुनासो न्यनेगु अधिकारीसमक्ष जानकारी बिइत व यःयःथे वक्तव्यबाजी मयायेत धाःगु दु। विज्ञप्तिइ धाःगु दु, ‘लिपागु इलय् बालागु मनसायपाखे सम्पादन जूगु सरकारी ज्या व अज्यागु ज्याय् खटे जूपि राष्ट्रसेवकपिन्त निरुत्साहित यायेगु कथं सामाजिक सन्जालय् व्यक्त जूगु अभिव्यक्तिइ थुगु कार्यालयया गम्भीर ध्यानाकर्षण जूगु दु।

अथहे थःगु पदीय जिम्मेवारी व कर्तव्य पालना याइपि राष्ट्रसेवक कर्मचारीपिन्स कर्तव्य पालना यायेगु लागि पंगः मथ्यनेत व थीथी सामाजिक सञ्जालय् यःयःथे वक्तव्यबाजी मयायेगु÷मयाकेत सम्बन्धित सकसितं इनाप यानाच्वना।