लुँ तोलां थौं सच्छि थहावगु दु। लुँ तोलां सच्छि थहावना १ लाख ११ हजार १ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

वहःया भाः थौं न स्थिर जुया १ हजार ३ सय ७५ रुपैयाँ न हे कारोबार जुगु दु धका महासङ्घं धाःगु दु।

किपूया प्यंगःथामय् स्थापना याःगु बुगंद्यया व याकःमिसाया मूर्ति विवादय् येँ महानगरपालिकां च्यूता तःगु दु।

यल व किपू दथुइ उगु मूर्तियात कया सांस्कृतिक विवाद जुयाच्वंगु यलय् येँ महानगर न आः स्वागु दु । किपूया प्यंगःथामय् सुखी गँछेः समाजं वंगु २०७९ मंसिर १५ गते उगु मूर्ति स्थापना याःगु खः ।

उगु ज्याझ्वलय् येँ महानगरया मेयर बालेन शाह थः हे ब्बतिकाःगु खः। निगु शहर दथुइ विवाद जुइवं वंगु वैशाख २४ गते किपूलिइ उगु मूर्ति लिकया नगरपालिकाय् तःगु खः।

मूर्ति दयकेगु लागि येँ महानगरं झीगु लाख ध्यवा आर्थिक ग्वाहालि याःगु खः। प्यंगःथामय् मूर्ति लिकायेवं किपू नगरपालिकाय् तयातःगु उगु मुर्ति येँ महानगरया नगर प्रहरी प्रमुख राजु पाण्डेपि लितकायेगु निति वःगु खः।

थुगु मुर्ति बिवादयात कया थौं यल महानगरपालिकाय् बैंठक च्वनेत्यःगु दु।

नेवाः न्ह्यलुवाः डा.महेश मान श्रेष्ठं नेपाःया राजनीतिइ शुद्धिकरण यायेमाःगु दु धका धयादीगु दु।

येँ जुगु छगु ज्याझ्वलय् न्ववानादीसे लिपागु इलय् भुटानी शरणार्थी प्रकरणं नेपाः अन्तर्राष्ट्रिय स्तरय् हे बेइज्जत जूगु दु धका धयादीगु खः। ‘बिबिसी, सीएनएन, अलजजिरा, फोक्स न्यूजय् लिपागु इलय् नेपाः नेपालय् भ्रष्टाचार सम्बन्धि बुखँ यक्को प्रशारण जुयावया च्वंगु दु। थुकियाना नेपाःया छवि अन्तर्राष्ट्रिय स्तरमा स्यंगू दु।’ धका डा. श्रेष्ठं धयादीगु खः।

अथेहे येँ महानगरपालिकाया प्रवक्ता नविन मानन्धरं लिपागु इलय् येँ च्वपि रैथानेपिनिगु भाय्, तजिलजि, संस्कारय् विलचन वंगुलि च्यूता प्वकादीसे दक्को मिले जुया संरक्षण यायेमाःगुलि बः बियादीगु खः। विशेषयाना नेवाः समुदायपिन्स राजनीति व प्रशासनिक ख्यलय् च्यूता मतगुलि लिउने लानाच्वंगु धका धयादीगु खः।

अथेहे वयलकं लोकसेवा, नेपाःया प्रशासन नाप राजनीति सम्बन्धिइ माःगु महसुस यासे झीगु सन्ततीपिन्त विदेश छ्वयेगुलि रोके यायेमाःगुलि बः बियादीगु खः।

नेवाः ग्वहालि पुचः येँ महानगर १७ वडा कमिटीइ वैशाख ६ गतेनिसे क्षमता अभिवृद्धि प्रशिक्षण ज्याझ्वः सचाःकःमि केके मानन्धरं सहजिकरण यानादीगु खः।

सेयर बजाः छगु अकं कुहावःगु दु। थौं जुग कारोबारय् नेप्से न्हिच्छियकं थहाकुहावया ३.३४ अंकया सामान्य कुहावःया १८१८.३१ अंकय् बन्द जुगु दु।

विकास बैंक, वित्त कम्पनी, उत्पादनमुलक व लघुवित्त उपसूचक थहावंसा बजाः लिड याइगु बैंकिङनाप यक्को उपसूचक कुहावया नेप्से न सामान्य कुहावःगु दु।

सोमवाः उत्पादनमूलक उपसूचक सर्वाधिक ०.५२ प्रतिशतं थहावगुलि लघुवित्त उपसूचक ०.३४ प्रतिशत व विकास बैंक उपसूचक ०.३१ प्रतिशतं थहावःगु दु। निर्जीवन बीमा उपसूचक ०.६२ प्रतिशतं कुहवःगुलि बजाः लिड याइगु  बैंकिङ उपसूचक ०.३१ प्रतिशतं कुहावःगु खः। थौं नेप्सेय् कुहावःसा कारोबार रकम धाःसा कुहावःगु मदु।

म्हिगः आइतवाः ९० करोडया कारोबार जुगु बजाः थौं सोमवाः घटे जुया ७२ करोड ६५० लाखय् कुहावःगु खः। २० हजार १५८ गु कारोवारपाखे २३ लाख ४१ हजार २४० कित्ता सूचीकृत धितोपत्र किनबेच जुगु खःसा उलिहे रकमया कारोबार जुगु खः।

उकि मध्ये एनआईसी एशिया बैंकया दकलय् अप्पो ३ करोड ४ लाख २९ हजारया कारोबार जुगुलि सगरमाथा लुम्बिनी इन्स्योरेन्स कम्पनीया २ करोड ९९ लाख व नागरिक लगानी कोषया २ करोड ४४ लाखया कारोबार जूगु खः। सोमवाः नेप्सेय् कुल २१९ गु सूचीकृत कम्पनीया सेयर कारोबार जुगुलि १०४ गु कम्पनीया सेयर भाः कुहावगु व ९६ गु कम्पनीया सेयर भाः थहावःगु दु।

अथेहे १९ गु कम्पनी धाःसा सेयर भाः स्थिर जुगु दु। थौं एनआईसीएल ग्रोथ फण्डया इकाइ भाः दकलय् अप्पो ९.८८ प्रतिशतं थहावःगु दु सा आत्मनिर्भर लघुवित्तया सेयर भाः ६.११ प्रतिशत व राप्ती हाइड्रोपावर जनरल कम्पनीया सेयर भाः ६.०४ प्रतिशतं थहावःगु दु।

सगरमाथा लुम्बिनी जनरल इन्स्योरेन्स कम्पनीया सेयर भाः ६.४५ प्रतिशतं कुहावगुलि बाराही हाइड्रोपावर कम्पनीया सेयर भाः ५.३५ प्रतिशतं कुहवःगु दु।

वंगु २४ घण्टाया दुने देयन्यक थप २१ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं १ हजार ९१ म्हेसिगु नमुनामध्ये २५२ म्हेसिगु पीसीआर परीक्षण यागुलि १४ म्ह व ८३९ म्हेसिगु एन्टीजेन परीक्षण याउगुलि न्ह्यम्हयाना २१ म्हेसित कोरोना संक्रमण पुष्टि जुगु दु।

अथेहे थ्व नाप आःतक कोरोनाया सक्रिय संक्रमितपि ११२ म्ह थ्यःगु दु।