प्रधानमन्त्री पुष्पकमल दाहाल प्रचण्ड व राष्ट्रियसभाया अध्यक्ष गणेशप्रसाद तिमिल्सिना दथुइ नापलायेगु ज्या जुगु दु।

प्रधानमन्त्री निवास बालुवाटारय् थौं नापलायेगु झ्वलय् संघीय संसदया ज्या प्रभावकारी दयकेगु विषय सहलह जुगु खः।

राष्ट्रियसभा अध्यक्षया सचिवालय कथं उगु नापलाय्गु झ्वलय् संघीय संसदया चालु बजेट अधिवेशनयात प्रभावकारी दयकेगु व सरकारया नीति नाप कार्यक्रम पेश यायेत मंकाः बैठक लगायतया विषय सहलह जुगु धका धाःगु दु।

नेकपा माओवादी केन्द्रया नेतापि उत्तरी छिमेकी देश चीनय् भ्रणम वनिइगु जुगु दु।

अनुभव आदान–प्रदानया लागि धासे धका माओवादी केन्द्रया उपाध्यक्ष नाप पूर्वसभामुख अग्निप्रसाद सापकोटा नेतृत्वय् चीन वनेत्यःगु खः।

थ्व हे वएगु शुक्रवाःनिसे सापकोटाया नेतृत्वय् करिब २० म्ह नेतापि चीन भ्रमणय् वनेत्यःगु खः धका  माओवादी केन्द्रया केन्द्रीय कार्यालय पेरिसडाँडा स्रोतं धाःगु दु।

उगु भ्रमण पुचलय् माओवादीया जनवर्गीय संगठनया प्रमुख व प्रदेश अध्यक्षपि वनेत्यःगु खः।

नक्कली भुटानी शरणार्थी प्रकरणय् एमालेया नेता टोपबहादुर रायमाझीयात थौं अदालतय् पेस याइगु जुगु दु। म्हिगः चान्ह्यः येँया बुढानीलकण्ठय् टोपबहादुरयात ज्वःगु खः।

थौं अनुसन्धानया लागि म्याद थप यायेत काठमाडौं जिल्ला अदालतय् पेस याइगु जुगु दुु धका काठमाडौं प्रहरी परिसर स्रोतं धाःगु दु। नक्कली भुटानी शरणार्थी प्रकरणय् मुछे जुइवं रायमाझी व वया काय् सन्दीपविरुद्ध वंगु वैशाख २० गते पक्राउ पुर्जी जारी याःगु खः । तर, वयालिपा निसे टोपबहादुर फरार जुगु खः। काय्म्ह सन्दीप धाःसा थ्व स्वया न्ह्यः हे ज्वने धुकुगु दु ।

अदालतं म्याद बिइ धुका रायमाझीयात प्रहरीं थप अनुसन्धान याइ।

काठमाडौं जिल्ला अदालतं नक्कली भुटानी शरणार्थी प्रकरणय् ज्वनातःपि पूर्वगृहमन्त्री बालकृष्ण खाँणनाप झीम्हनिम्हेसित मेगु प्यन्हु हिरासतय् तयेगु अनुमति बिःगु दु।

आइतवाः थौं अदालतं हाकन अनुसन्धानया लागि प्यन्हु हिरासतय् तया अनुसन्धान यायेत म्याद थपे यानाबिःगु दु।

नक्कली भुटानी शरणार्थी प्रकरणय् खाँणनाप वया स्वकीय सचिव नरेन्द्र केसी, तत्कालीन गृहसचिव टेकनारायण पाण्डे, पूर्वगृहमन्त्री रामबहादुर थापाया सुरक्षा सल्लाहकार इन्द्रजित राईनाप झीनिम्हेसित ज्वनातःगु खः।

अथेहे एमाले सचिव टोपबहादुर रायमाझी धाःसा फरार जुयाच्वंगु दु।

वंगु २४ घण्टाया दुने देयन्यक थप झीम्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं ८४४ म्हेसिगु नमुना मध्ये २२३ म्हेसिगु पीसीआर परीक्षणय् खुम्ह व ६२१ म्हेसिगु एन्टीजेन परीक्षण यागुुलि प्यम्ह याना झीम्हेसित कोरोना पुष्टि जुगु दु।

थ्व नाप आः कोरोनाया संक्रिय संक्रमितपि १२० म्ह थ्यःगु दु ।