शेयर बजाः थौं झन्डै २९ अङ्कं कुहावःगु दु।

शेयर बजाः परिसूचक नेप्से थौं बिहीवाः २८ दशमलव ९२ अङ्कं घटे  जूया १ हजार ९ सय ३२ दशमलव ४५ विन्दुइ कुहावःगु दु। थौं दक्को समूहया शेयर कुहावःगु दु।

जलविद्युत्, होटल, बीमा व उत्पादन समूहया शेयर तसकं कुहावःगु खः। दलकय् अप्पो थौं बाराही पावर कम्पनीया शेयर झन्डै १० प्रतिशत व सिटिजन्स म्युचल फन्ड २ व अपर सोलु हाइड्रोया शेयर ९ प्रतिशतं कुहावःगु दु।

समग्र बजाः कुहावःगु खःसा दकलय् अप्पो शुभम् पावर कम्पनीया शेयर थौं १० प्रतिशतं थहावःगु दु। ३७ लाख ६९ हजार कित्ता शेयर १ अर्ब १५ करोड ९ लाख रुपैयाया थौं कारोबार जूगु दु।

दकलय् अप्पो लिबर्टी इनर्जी कम्पनीया ६ करोड १५ लाख रुपैयाँया शेयर कारोवार जूगु खः।

जनमत पार्टीं चिनियाँ राजदूत छेन सोङयात लित छ्वय्त माग याःगु दु।

पार्टीया उपाध्यक्ष अब्दुल खानं बिहीवाः प्रतिनिधिसभाया बैठकय् विशेष ई कया न्वनादीसे थथे माग यानादीगु खः।

नेपाः व भारतया सम्बन्धय् न्ववायेगु अधिकार चिनियाँ राजदूतयात मदुगु धका वयकलं धयादीगु खः।

उपाध्यक्ष खानं चिनियाँ राजदूतयात स्पष्टीकरण तक कायेमाः धका धयादीगु खः।

येँ महानगरपालिकां कन्ह्यः शुक्रवाः शोक बिदा बिःगु दु।

महानगरया प्रशासन विभागया प्रमुख दिपक अधिकारीया कथं वडा नम्बर १६ या वडाध्यक्ष मुकुन्द रिजाल मदुगुलि महानगरं महानगरय् शोक बिदा बिःगु दु धका धाःगु दु।

धापासीस्थित ग्राण्डी अस्पतालय् वासः यायेगु झ्वलय् रिजाल थौं बिहीवाः ७ः३० बजे मदुगु खः।

नेपालभाषा मिसा खलं न स्वीप्यदँया बुदिं हना ज्याझ्वः याःगु दु। उगु ज्याझ्वलय् समाजसेवी व उद्योगपति अम्बिका श्रेष्ठ मूपाहाँ कथं झायादीगु खः।

मिसा खलःया छ्याञ्जे मयजु प्रेमहिरा तुलाधरं लसकुस यानादीगु उगु ज्याझ्वलय् मूपाहाँ श्रेष्ठपाखें खलःया प्रतिकय् स्वां देछाया त्वाः देवाय् मत च्याका ज्याझ्वःया उलेज्या यानादीगु खः । खलःया आजिवन जः डा. ज्योतिप्रभा तुलाधर, मोतिलक्ष्मी शाक्य, कमला बज्राचार्य, अमृता रञ्जितपिन्त हनेगु ज्या याःगु खः।

खलःया नायः धर्मशोभा तुलाधरं स्वांमा क्वखाय्कादीगु खःसा मूपाहाँ श्रेष्ठपाखे पलिंगाः न्ययका हनापौ देछाया हनेज्या याःगु खः । थुकथं हे खलःपाखें सदिक्षा कारंजितयात वयकलं यानादीगु समाजसेवाया ज्यायात कदर याना सुभाय् पौं लःल्हाःगु खः । ज्याझ्वलय् थीथी ख्यलय् थीथीकथं योगदान बिया समाजयात तिवः बियादीपिं व्यत्तित्वपिन्त थीथी सिरपा, सम्मान नं लःल्हायगु ज्या याःगु खः । ज्याझ्वलय् प्यक्वःगु कमला लुृमिन नेपालभाषा हःपा सिरपा मेनुका देवी तुलाधरयात लःल्हाःगु खः ।

सिरपा लःल्हायगु झ्वलय् मूपाहांपाखें पलिंगा न्ययका हनापौ देछायादीगु व लुमिन कुमारपाखें दांप्वः लःल्हाःगु खः । थुकथं हे वरिष्ठ मिसा ल्वय् विशेषज्ञ डा।कोकिला बैद्ययात प्यक्वःगु रमा,कौसल्य सिरपा लःल्हाःगु खःसा वयकःयात नं मूपाहांपाखें पलिंगा न्ययका हनापौ देछाया आव्यानकार मथुरा सायमिजुं दांप्वः लःल्हानादीगु खः ।

वरिष्ठ बाखं च्वमि राजा शाक्ययात हनेज्या याःगु खः। खलःया दांभरिं पूर्णिमा डंगोल शाक्यं न्ह्याकादीगु उगु ज्याझ्वलय् सुवर्ण केशरी चित्रकार, मेनुका देवी तुलाधर, डा कोकिला वैद्य, मोतिलक्ष्मी शाक्य, राजा शाक्य, मथुरा कृष्ण सायमि, साहु पञ्चवीरसिंह तुलाधर, खलःया निवर्तमान नायः मंगला कारजितपिन्सं भिंतुना बियादीगु खः ।

मन्त्रिपरिषद् बैठक थौं च्वनिइगु जुगु दु। थौं न्हिनय् च्वनिइगु बैठकं बहुप्रतिक्षित संघीय निजामती सेवा विधेयकयात संघीय संसदय् छ्वयेगु निर्णय याइगु सम्भावना दु ।

थ्व स्वया न्ह्यः छगु सार्वजनिक ज्याझ्वलय् प्रधानमन्त्री पुष्पकमल दाहाल प्रचण्डं वइगु मन्त्रिपरिषद बैठकं संघीय निजामती सेवा विधेयक स्वीकृत याना संसदय् छ्वयेगु धका धयादीगु खः।

विधेयक प्रतिनिधि सभाय् दर्ता जुइ धुकां माःगु सहलह याना व ऐन निर्माणया प्रक्रियाय् वनिइ। थ्व स्वया न्ह्यः न संघीय निजामती सेवा विधेयक संसदय् दर्ता जूसां हाकनं लिहावःगु खः।