शेयर बजाः च्याला लिपा दकलय् अप्पो कुहावःगु दु। वंगु असोज ९ गते शेयर बजाः परिसूचक नेप्से १ हजार ८ सय १५ विन्दुइ कुहावःगु दु।

वयालिपा नेप्से १ हजार ८ सय ३० विन्दइ कुहावःगु खः। तर थौं आइतवाः नेप्से १६ दशमलव ९५ अङ्कय् कुहावया १ हजार ८ सय २१ दशमलव ६५ विन्दुइ थ्यःगु खः।

थौं लगानीबाहेक दक्को समूहया शेयर थहावःगु खः। २६३ गु कम्पनीया २७ लाख ८८ हजार कित्ता शेयर ९० करोड रुपैयाँ न कारोबार जुगु खः । दकलय् अप्पो नागरिक लगानी कोषय् ५ करोड ३५ लाख रुपैयाँया शेयर किनबेच जुगु दु।

दकलय् अप्पो राष्ट्र उत्थान लघुवित्तया शेयर ६ प्रतिशत स्वया अप्पो दोर्दी हाइड्रो व हिमालयन ऊर्जा विकास कम्पनीया शेयर साढे ५ प्रतिशत स्वया अप्पो कुहावःगु दु ।

समग्र बजाः कुहावसा थौं दकलय् अप्पो आत्मनिर्भर लघुवित्तया शेयर १० प्रतिशतं थहावःगु दु।

नक्कली भुटानी शरणार्थी प्रकरणय् ज्वनातःपिन्त थौं आइतवाः प्रहरीं जिल्ला अदालत येँय् पेश याःगु दु।

ठगी, संगठित अपराध लगायतया थीथी मुद्दाय् अनुसन्धान जुयाच्वंगुलि जिल्ला प्रहरी परिसर काठमाडौं न अनुसन्धान क्वमाचाःगु धाःसे ई थपे यायेगु अनुमति माग यासे जिल्ला अदालतय् पेश यागु दु।

जिल्ला अदालत काठमाडौया सूचना अधिकारी दीपक दाहालया कथं प्रहरीं थुगु प्रकरणय् ज्वनातःपिन्त अदालतय् पेश याःगु खः। तर म्याद थपे यायेगु निर्णय जुगु मदुनि।

थुगु प्रकरणय् पूर्वगृहमन्त्री बालकृष्ण खाँण, गृह मन्त्रालयया पूर्वसचिव टेकनारायण पाण्डे, पूर्वगृहमन्त्री रामबहादुर थापा बादलया सुरक्षा सल्लाहकार इन्द्रजित राई, केशव दुलाल, सानु भण्डारीलगायतपिन्त प्रहरीं ज्वंगु खः।

उपि दक्कोसित थप ई हिरासतय् तयेत अनुमति माग यासे प्रहरीं अदालतय् उपस्थित याःगु खः।

भुटानी शरणार्थी प्रकरणय् ज्वनातःम्ह पूर्वगृहमन्त्री बालकृष्ण खाँणयात नेपाली कांग्रेसपाखे निलम्बन यायेत मागयासे नेविसंघया कार्यकर्तापिन्स थौं येँ छगु प्रदर्शन याःगु दु।

येँया त्रिचन्द्र क्याम्पसय् नेविसंघया छगु पुचलं ‘सभापतिज्यु खाँणयात छाय् निलम्बन मयानगु ?’ धका च्वयातःगु प्लेकार्ड ज्वना प्रदर्शन याःगु खः।

नाता व नेता मस्वसे भ्रष्टाचारीयात कठघराय् थनेत मागयासे उमिसं नेविसंघया ध्वाँय् ज्वना प्रतिकात्मक रुपं भ्वँया हत्कडी व कैदीबन्दीपिन्स पुनिइगु वसःफिना प्रदर्शन याःगु खः।

नेपाःपिन्त नक्कली शरणार्थी दयका अमेरिका छ्वंगु गिरोहनाप ध्यवाया लेनदेन याःगु द्धपनय् प्रहरीं कांग्रेस केन्द्रीय सदस्य खाँणयात वंगु बैसाख २७ गते ज्वंगु खः।

प्रमुख स्वगू दलया शीर्ष नेतापि थौं न बैठक च्वंगु दु।

प्रधानमन्त्री नाप माओवादी केन्द्रया अध्यक्ष प्रचण्ड, नेपाली कांग्रेसया सभापति शेरबहादुर देउवा व नेकपा एमालेया अध्यक्ष केपी शर्मा ओली दथुइ थौं बालुवाटारय् छलफल जूगु खः।

प्रधानमन्त्री निवास बालुवाटारय् जुयाच्वंगु उगु सहलह ज्याझ्वलय् समसामयिक राजनीतिक अवस्थाबारे छलफल जूयाच्वंगु दु धका प्रधानमन्त्री प्रचण्डया सचिवालयं धाःगु दु।

नक्कली भुटानी शरणार्थी प्रकरणय् प्रभावशाली नेतापि मुछ्य जुइवं स्वगू प्रमुख दलया शीर्ष नेतापि पटक–पटक सहलह याना वयाच्वंगु खः।

छु छु विषय सहलह जुगु धका धासा सार्वजनिक याःगु मदुनि।

थौं सुथय् साढे सात बजे खुसिबुँइ स्टकूटर व मोटरसाइकल ल्वाना निम्ह घाःपाः जूगु दु।

स्टकूटर बा ७९ प ५७९८ गया १२ कक्षाया जाँच बिउवम्ह खःसा बा २२ प ६६५१ उदयपुरयाम्ह खः। निम्ह घाःपाः जुपिन्त अस्पतालय् यकूगु दु।