वंगु २४ घण्टाया दुने देयन्यक थप ५१ म्हेसित कोरोना संक्रमण पुष्टि जूगु दु ।

स्वास्थ्य मन्त्रालयया कथं १ हजार ९०२ नमूना मध्ये ६६९ म्हेसित पीसीआर परीक्षण याउगुलि २६ म्ह व १ हजार २३३ म्हेसिगु एन्टीजेन परीक्षण याउगुलि २५ म्ह याना ५१ म्हेसित कोरोना संक्रमण जूगु दु।

स्वगु प्रमुख दलया शीर्ष नेतापि दथुइ बैठक प्रधानमन्त्री निवास बालुवाटारय् च्वंगु दु।

बैठकय् प्रधानमन्त्री नाप माओवादी केन्द्रया अध्यक्ष पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा व नेकपा एमालेया अध्यक्ष केपी शर्मा ओली सहभागी जूगु दु।

थौं च्वंगु बैठकय् समसामयिक राजनीतिबारे छलफल जुगु दु धका प्रधानमन्त्रीया सचिवालयं धाःगु दु।

ललितपुर तयारी पोशाक ब्यापार संघं पलिस्था जूगु २५ दुगु लसताय् थीथी ज्याझ्वः यासें रजत जयन्ती हनीगु जूगु दु । संघं छगू पत्रकार सम्मेलनया ग्वसाः ग्वसें आयकर सम्बन्धी अन्तरक्रिया, ब्यावसायिक लेखा प्रणाली तालिम, बैंक व इन्सुरेन्स सम्बन्धी सहजीकरण, सुस्वास्थ्यया नितिं थीथी ज्याझ्वः, असाहाय, अपाङ्ग व ज्येष्ठ नागरिकपिन्त ग्वाहालि यायेगु, अन्तर संघ कासा, स्मारिका प्रकाशन, मोहनी स्वन्तिया विशेष उपहार ज्याझ्वः व सदस्यता बीगु थें जाःगु थीथी ज्याझ्वः याइगु जूगु दु ।

२५ दँ न्ह्यः पुष्परत्न शाक्यया नायःसुइ यल जिल्लाया तयारी पोशाक, ब्याग व कस्मेटिक्स ब्यवसायपिं मुनाः थुगु संगठन स्थापना याःगु खः ।

पत्रकार सम्मेलनय् संघया नायः मिलन श्रेष्ठं प्रेस विज्ञप्ति ब्वनादीगु खःसा संस्थापक नायः शाक्यं संघया इतिहास कँसें पत्रकारपिनिगु न्ह्यसःया लिसः बियादीगु खः । ज्याझ्वलय् प्रथम उपाध्यक्ष शेरबहादुर महर्जनं सुभाय् देछानादीगु खः ।


 

स्वतन्त्र सांसद अमरेशकुमार सिंहं प्रतिनिधिसभा बैठकय् थःगु लं त्वतूगु दु । थौं सोमवाः सिहं न्ववायेगु ई फ्वःगु खः।

सभामुख देवराज घिमिरें न्ववायेगु ई मबिइवं थःगु लं त्वताः विरोध याःगु खः। सभामुख घिमिरें आकस्मिक व विशेष ई मदुगु जानकारी बिउसा सिंहं ई फ्वंगु खः।

वयालिपा लं त्वताः विरोध याःगु खः। सिंहं लं त्वताः विरोध याउगुलि संसदय् अभद्र व्यवहार याये दइमखुगु नियमावलीइ व्यवस्था दु धका सभामुखं ध्यानाकर्षण याउगु खः।

लुँ तोलां थौं स्वसः थहावंगु दु। लुँ तोलां स्वसः थहावना थौं १ लाख १० हजार ९ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाःगु दु।

वहःया भाः थौं स्थिर जुगु दु। वहः थौं न तोलाया १ हजार ४ सय ४५ रुपैयाँ न कारोबार जूगु दु धका महासङ्घं धाःगु दु।