थौं बुगंद्यःया रथ मिसापिन्स सालाः यलया इतित्वालय् थ्यकूगु दु। बुगंद्यःया रथं नइक्या क्वफागुया कन्ह्य कुन्हु मिसापिन्स जक सालिइगु परम्परा (याक मिसाया भुज्या) कथं थौं सुथय् मिसापिन्स जक रथ सालाः इतित्वालय् थ्यकूगु खः।

बुगंद्यःया कुलद्यःया पूजा थ्व हे वइगु २८ गते याइगु जुगु दु। कुलद्यःया पूजा प्यन्हु तक याइ। कुलद्यःया पूजा जुइगु दिं थ्व हे वैशाख २८ गते रथ सालाः ज्यावलाख्यलय् यकेत साइत न स्वइ।

रथ ज्यावलाख्यलय् थ्यगूया प्यन्हुलिपा भोटो क्यनिइगु याइ।

किपूया प्यंगःथामय् बुगंद्यः व याकःमिसाया मूर्ति स्थानीयपिन्स चिइकूगु दु। किपू नगरपालिकां उपमहेश्वर फेदी प्यंगःथांया सुखी गँछेः समाजं स्थापना याःगु बुगंद्यःया प्रतिमूर्ति व याकःमिसाया मूर्ति स्थानीयपिन्स चिइकूगु दु।

थौं आइतवाः किपूलिइ च्वपिन्स सुखी गँछेः समाजयात हस्तक्षेप याना याकःमिसाया मूर्ति व बुगंद्यः अन चिइकूगु खः। स्थानीयपि, जनप्रतिनिधि, नेपाल प्रहरी, नगर प्रहरीपिनिगु उपस्थितिइ उगु मूर्ति चिइकूगु खः। समाजं वंगु मंसिर १५ गते बुगंद्यः व याकःमिसाया मूर्ति स्थापना यायेवं पानेजुपिन्स विरोध यानावया च्वंगु खः।

विवाद तचाया वनेवं ह्यगृब भैरवनाथ व ३२ पानेजु (पुजारी) संघं लिखित रुपं असहमति क्यसे किपूलिइ याकः मिसायात स्वां तमवयेगु धका धाःगु खः। किपू नगरपालिकाया मेयर राजकुमार नकर्मीें मूर्ति स्थापनां यलय् च्वपिनाप विवाद वयेफु व जात्राय् न असर जुइफुलि उगु थासं द्यः चिइकेमाः धका धाःगु खः। ‘सुखी गँछेः समाजं स्थापना याःगु मूर्ति किपूलि च्वपिन्स हे चिइकूगु दु, उगु मूर्ति ढलान याना तःगु दु, थुकियात चिइका आः नगरपालिकाय् तयेगु जुइ’ धका मेयर नकर्मी धाःगु खः। उगु थासं मूर्ति चिइकूलि आः पानेजु संघं स्वां छायेहयेत लँ चाःगु दु।

याकःमिसायात स्वां छाय् हयेगु सलसं दँनिसे न्ह्याना वयाच्वंगु इतिहास हान न्ह्याइगु जुगु दु धका मेयर नकर्मी धाःगु दु। अथेहे वकयलं मूर्ति गुठी संस्थानय् लःल्हायेगु सहलह जुयाच्वंगु दु धका धाःगु दु ।

मूर्ति स्थापना यायेवं हे ह्यगृब भैरवनाथ व ३२ पानेजु (पुजारी) संघं वंगु मंसिर १९ गते असहमति प्वकूसे विज्ञप्ति पिकाया विरोध याःगु खः। संघं मंसिर २१ गते गुठी संस्थानया कार्यालय वना ध्यानाकर्षण पौं लःल्हाःगु खः।

अथेहे पुस ३ गते मेगु विज्ञप्ति पिकया संघं बुगंद्यः व याकःमिसाया मूर्ति मचिइकूतले अन स्वां तयेमहयेगु धका चेतावनी बिःगु खः । अथेहे पानेजु संघं स्वां तयेमयकेगु धका वैशाख १२ गते आधिकारिक निर्णय याःगु खः।

करिब १६०० दँ निसे न्ह्याना वयाच्वंगु परम्परा खः।

वाःया न्हापागु दिं शेयर बजाः दोहोरो अङ्कं कुहावःगु दु। शेयर बजाः परिसूचक नेप्से थौं १९ दशमलव १२ अङ्कं कुहावया १ हजार ८ सय ५० दशमलव ६१ बिन्दुइ कुहावःगु दु।

थौं दक्को समूहया शेयर थहावंगुलि फाइनान्स व जलविद्युत् समूहया शेयर तसकं कुहावःगु दु। बजाः नाप कारोबार रकम न म्हो जुगु दु। २ सय ६३ गु कम्पनीया २० लाख १५ हजार कित्ता शेयर ६० करोड ८१ लाख रुपैयाँ कारोबार जूगु दु। दकलय् अप्पो शिवम् सिमेन्ट ३ करोड २२ लाख रुपैयाँया शेयर किनबेच जूगु दु।

दकलय् अप्पो मकर जितुमाया सुरी हाइड्रोपावर कम्पनीया शेयर झण्डै साढे ८ प्रतिशत व घलेम्दी हाइड्रो, मन्दाकिनी हाइड्रो व श्वेत गंगा हाइड्रोया शेयर साढे ५ प्रतिशतं कुहावःगु दु। समग्र बजाः कुहवःसां थौं दकलय् अप्पो लघुवित्तको शेयर ८ण् प्रतिशत व इर्स्टन हाइड्रोपावर कम्पनीया शेयर साढे ७ प्रतिशत थहावःगु दु।

येँ महानरपालिकां लँ सिथय् पार्किङ याका मबिइ वं ट्याक्सी व्यावसायीपिन्स थौं आन्दोलन याःगु दु।

व्यवसायीपिन्स थौं थपिन्स हे पार्किङ बोर्ड तया ट्याक्सी पार्किङ याना विरोध याःगु खः। महानगरया थीथी थासय् ट्याक्सी व्यवसायीपिन्स विरोध यासे थःपिन्स हे पार्किङ च्वयातःगु स्ट्यान्ड तःगु खः ।

ट्राफिक प्रहरीया कथं ट्याक्सी चालकपिन्स तःगु स्ट्यान्ट चिइकेत स्वयेवं भचा तनाब जूगु खः।

नवनियुक्त महिला, बालबालिका नाप ज्येष्ठ नागरिक मन्त्री सुरेन्द्रराज आचार्यं थौं आइतवाः पद व गोपनियताया शपथ काःगु दु।

नवनियुक्त मन्त्री आचार्ययात राष्ट्रपति रामचन्द्र पौडेलं राष्ट्रपति भवन शितल निवासय् जुगु छगु ज्याझ्वलय् शपथ याकूगु खः। महिला, बालबालिका नाप ज्येष्ठ नागरिक मन्त्रालय कःघाना वयाच्वंगु नेसपाया महिन्द्रराय यादवयात धाःसा आः खानेपानी मन्त्रालयया जिम्मा बिःगु दु।

नवनियुक्त मन्त्री आचार्य कपिलवस्तु क्षेत्र नम्बर २ पाखे विजयी जूम्ह खः। राष्ट्रपति रामचन्द्र पौडल निकट धयाच्वम्ह आचार्य थ्व स्वया न्ह्यने सिंचाइ राज्यमन्त्री जुइ धुकुम्ह खः।