राष्ट्रपति निर्वाचनय् उम्मेदवारपिन्स उम्मेदवारी लित कायेगु थौं लिपागु दिं खः। उम्मेदवारी लित कायेगु निति उम्मेदवारपिन्स थौं सुथय् १० बजेनिसे न्हिनय् ४ बजेतक ई बियातःगु दु।

थ्व हे वइगु २५ गते जुइगु राष्ट्रपति पदय् निर्वाचनया लागि च्यागु दलीय गठबन्धनया पाखे नेपाली कांग्रेसया नेता रामचन्द्र पौडेल व नेकपा एमालेया उपाध्यक्ष सुवास नेम्वाङया उम्मेदवार दुगु खः।

उम्मेदवारी लित कायेगु ई क्वचायेवं थौं बहनि ५ बजे हे लिपागु नां प्रकाशित याइ धका राष्ट्रपति नाप उपराष्ट्रपति निर्वाचन कार्यालयया सहायक निर्वाचन अधिकृत अमृता कुमारी शर्मां जानकारी बिःगु दु।

राष्ट्रपति पदया निर्वाचन थ्व हे फागुन २५ गते जुइत्यःगु खः। राष्ट्रपति विद्यादेवी भण्डारीया कार्यकाल थ्व हे फागुन २८ गते क्वचाइगु खः।

नेपाल विद्युत प्राधिकरणं ग्राहकपिन्त याउक व अपूगु सेवा यायेगु निति मोवाइल एप सञ्चालनय् हःगु दु।

ग्राहकपिनिगु खँ न्यनेगु व्यवस्थापन यायेत अपुइगु कथं मोबाइल एम ‘एनई एप’ सञ्चालनय् हःगु दु धका प्राधिकरणं धाःगु दु। थुगु एप छ्यलिइगु निति मोबाइलया ‘प्ले स्टोर’ य् वना ‘NEA Official App’ सर्च यासे डाउनलोड यायेफइ।

थुगु एपपाखे मिटर रिडिङ, बिलिङ, मसहसुल भुक्तानी, चार्जिङ स्टेशनया जानकारी बिइगु नाप विद्युत आपूर्तिसम्बन्धी जानकारी बिइ धका प्राधिकरणं धाःगु दु। सेवा याउक व अपूकः कायेगु निति थुगु एप छ्यलेत प्राधिकरणं सेवाग्राहीपिन्त इनाप याःगु दु।

अर्जेन्टिनाया विश्वकप विजेता फुटबलर लियोनल मेसीं फिफाया सर्वश्रेष्ठ मिजं कासामिया उपाधि त्याकूगु दु।

मेसीं फ्रान्सया किलियन एम्बाप्पे व करिम बेन्जेमायात लिउनेलाका थुगु उपाधि त्याकूगु खः। ३५ दँया मेसीं सर्वश्रेष्ठ मिजंया कासामि त्याकूगु थ्व नाप निकः जुगु दु।

अथेहे सर्वश्रेष्ठ मिसा कासामिया उपाधि धाःसा स्पेनया अलेक्सिया पुटेलसं त्याकूगु दु। मेसीया कप्तानीइ अर्जेन्टिनां कतार विश्वकप २०२२ या उपाधि त्याकूगु दु।

नेपाल प्रज्ञा प्रतिष्ठानं दोहोरो सुविधा बयाच्वपि थःगु आजीवन सदस्यपिन्त बिया वयाच्वंगु मासिक पारिश्रमिक कटौती याइगु जुगु दु।

सोमवाः येँ छगु पत्रकार सम्मेलनयासे प्रतिष्ठानं थुकिया बारे जानकारी बिःगु दु। प्राज्ञपि पाखे हे उन्नत नैतिकताया पाठ स्यकिपि थःपिन्स थुगु निर्णय यानागु धका प्रतिष्ठानया कुलपति भूपाल राई न धयादीगु दु। वयकलं दोहोरो सुविधा कयातःपि आजीवन सदस्यपिन्त बियाच्वंगु पारिश्रमिक रोके याना ल्यः दुगु ध्यवा प्राज्ञिक क्षेत्रय्, सृजनशील क्षेत्रय् लगानी यायेगु योजना दु धका जानकारी बियादीगु दु।

वहे झ्वलय् प्रतिष्ठानया पदाधिकारीपाखे थःपिन्स राज्यपाखे दोहोरो सुविधा मकायेगु घोषणा यानादीगु खः। नेपाःमि जुगु तधःगु नैतिकता स्यनिइपि थःपिपाखे थथे निर्णय यानागु धका कुलपति राई न धयादीगु खः। प्रतिष्ठानया आजीवन दुजःपाखे ५१ हजार ४ सय ४७ रुपैयाँ मासिक पारिश्रमिक कयावया च्वंगु खः।

प्रतिष्ठानपाखे दँच्छिया १ करोड २० लाख रुपैयाँ बराबर दोहोरो सुविधा कया वयाच्वंगुलि थुकिपाखे बचेयाना बजेटं प्राज्ञिक क्षेत्रय् छु याये धइगु भावना दु धका प्रतिष्ठानं धाःगु दु। अथेहे प्रतिष्ठानया परिषद् सदस्यपिनिगु न कार्य विभाजन याःगु दु। कुलपति राईयात संस्कृति, लोकवार्ता नाप मौलिक इतिहास विभागया जिम्मेवारी बिःगु दु।

अथेहे बाल साहित्य विभागया जिम्मेवारी उपकुलपति विमल निभा, साहित्य प्राज्ञ डा. मधुसूदन गिरी, दर्शन शास्त्र विभाग प्राज्ञ डा. कृष्णराज अधिकारी, साहित्य (मातृभाषा) प्राज्ञ राजन मुकारुङ, साहित्य पद्यकाव्य विभागया जिम्मेवारी प्राज्ञ बाबा बस्नेतयात बिःगु दु।

प्रा. डा. कौशिला रिसालयात सामाजिक शाष्त्र, प्राज्ञ हंसावती कुर्मीयात अनुवाद, प्राज्ञ अमर न्यौपानेयात साहित्य (गद्य), प्राज्ञ त्रैलोक्यमान बनेपालीयात भाषा (मातृकोष, कोश व व्याकरण), व सदस्य सचिव डा. धनप्रसाद सुवेदीयात भाषा (कोष व व्याकरण) विभाग स्वयेगु जिम्मेवारी बिइगु निर्णय जूगु दु धका प्रतिष्ठानं धाःगु दु।

सेयर बजाः थौं परिसूचक नेप्सेय् छगू अंकं सामान्य कुहावःगु दु। सोमबाः बजाः परिसूचक नेप्से ३.६५ अंकं कुहावया २०२३.५४ अंकय् बन्द जूगु दु।

सोमबाः होटल व पर्यटन, निर्जीवन बीमा, मेमेगु व व्यापार उपसूचक धाःसा थहावःगु दु सा दक्को उपसूचक कुहावःगु दु। अथे हे कारोबार रकम न कुहावःगु दु।

होटल नाप पर्यटन उपसूचक १.३८ प्रतिशतं थहावःगु दु सा वित्त कम्पनी उपसूचक १.६५ प्रतिशतं कुहावःगु दु। अथे हे लघुवित्त उपसूचक ०.९८ प्रतिशतं घटे जुगु दु। सोमबाः नेप्से ३७ हजार ३३८ गु कारोबारपाखे ५१ लाख २० हजार ८८८ कित्ता धितोपत्र किनबेच जुगुलि १ अर्ब ८९ करोड ३७ लाखया कारोबार जूगु खः।

हिमालयन डिष्टिलरीया दकलय् अप्पो ६ करोड ६८ लाखया कारोबार जुगुलि  एनआईसी एशिया बैंकया ५ करोड ८ लाख व अरुण भ्याली हाइड्रोपावरया ४ करोड ७९ लाखया कारोबार जूगु दु। सोमबाः नेप्सेय् २१७ गु कम्पनीया सेयर कारोबार जूगुलि १३५ गू कम्पनीया सेयर भाः कुहावःगुलि ७१ गु कम्पनीया  सेयर भाः थहावःगु दु। अथेतु ११ कम्पनीया सेयर भाः स्थिर जूगु दु।

स्वाभिमान लघुवित्तया सेयर भाः दकलय् अप्पो ९.७३ प्रतिशतं थहावःगुलि समालिङ पावर कम्पनीया सेयर भाः ९.३५ प्रतिशत व तारागाउँ रिजेन्सी होटलया सेयर भाः ७.९६ प्रतिशतं थहावःगु दु।

राप्ती हाइड्रोपावर कम्पनीया सेयर भाः ६.४३ प्रतिशतं कुहावःगुलि सीवाईसी नेपाल लघुवित्तया सेयर भाः ५.३३ प्रतिशत व समिट लघुवित्तया सेयर भाः ४.९० प्रतिशतं कुहावःगु दु।