जिल्ला सरकारी वकिलया कार्यालय काठमाडौं न नक्कली भुटानी शरणार्थी प्रकरणय् ज्वम्ह नेकपा एमालेया नेता टोपबहादुर रायमाझीयात बयान कायेगु सुरु जुुगु दु।

जिल्ला अदालत काठमाडौं न न्यायाधीश केशवप्रसाद अधिकारीया इजलासं रायमाझीयात स्वन्हु हिरासतय् तया अनुसन्धान यायेत प्रहरीयात अनुमति बिइवं वयागु बयान कायेगु सुरु जुगु दु।

जिल्ला सरकारी वकिलया कार्यालय उपन्यायधिवक्ता नाप जिल्ला प्रहरी परिसर काठमाडौंया मुद्दा शाखाया डीएसपी निरञ्जन भट्टया टोलीं रायमाझीया बयान कायेगु सुरु यागु दु।

थुगु मुद्दा बुधवाः तक अनुसन्धान क्वचायेका  फाइल तयार यायेमाःगुलि बयान सुरु यानागु धका जिल्ला सरकारी वकिल कार्यालयया प्रमुख अच्युतमणि न्यौपाने न जानकारी बिःगु दु।

वैदेशिक अध्ययन अनुमति शाखा (एनओसी) न विद्युतीय प्रणालीयात छ्यला वैदेशिक अध्ययन स्वीकृति पत्र कायेफइगु व्यवस्था कार्यान्यवनय् हःगु दु।

एनओसी कार्यालयय् छगु ज्याझ्वःयाना थौंनिसे विद्युतीय प्रणालीयात छ्यला नो अब्जेक्सन सर्टिफिकेट कायेफइगु व्यवस्थाया सुरुवात याःगु खः।

थौंनिसे लागू जुइकथं शाखां विद्युतीय प्रणालीयात छ्यला वैदेशिक अध्ययन स्वीकृति पत्र डाउनलोड यायेफइगु कथं सेवा प्रवाहयात फेसलेस, पेपरलेस व क्यासलेस दयकूगु दु। शिक्षा, विज्ञान नाप प्रविधिमन्त्री अशोककुमार राई न नो अब्जेक्सन सर्टिफिकेट माःपि विद्यार्थीपिन्स अभिभावक धाये म्वाय्क व छेँ हे च्वना फर्म भरे यायेफइगु व थःम्हेसिया हे सर्टिफिकेट प्रिन्ट यायेफइ धका धाःगु दु।

वयकलं थौंनिसे विद्यार्थीपिन्स छेँय् च्वना एनओसी फर्मया लागि तुइगु  शुल्क पुलेफइगु व्यवस्था जुगु दु धका धयादीगु खः। वयकलं धाःगु दु थुगु प्रक्रिया पूरा यायेत अझ न ४० प्रतिशत ज्या ल्यःदनिइ व याकन हे ल्यःदुगु ज्या यायेगु तयारी दु धका धयादीगु खः।

नेकपा एमालें भ्रष्टाचारविरुद्ध येँ छगु प्रदर्शन याःगु दु। भृकुटीमण्डपय् एमाले नेता–कार्यकर्तापिन्स थौं न्हिनय् प्रदर्शन याःगु खः।

उमिसं ‘दोषी छुटे मजुइमाः, निर्दोष फसेमजुइमाः’ धका च्वयातःगु ब्यानर ज्वना वःगु खः। नक्कली भुटानी शरणार्थी प्रकरणय् मुछे जुम्ह एमाले नेता टोपबहादुर रायमाझीयात प्रहरीं ज्वःगु कन्ह्य कुन्हु हे एमाले न भ्रष्टाचार विरुद्ध प्रदर्शन याःगु खः।

उगु प्रदर्शनय एमाले नेतापि महेश बस्नेत, ठाकुर गैरे, विशाल भट्टराई, सुजाता शाक्य, अनेरास्ववियु अध्यक्ष समिक बडाल लगायतपि सहभागी जुगु खः।

साझा यातायातं न्हुगु रुटय् विद्युतीय बसपाखे सेवा सुरु याःगु दु।

साझा यातायातं पाटनध्वाका–रत्नपार्क–ज्ञानेश्वर–रातोपुल–गौशाला–चाबहिल–बौद्ध–जोरपाटी–दक्षिणढोका रुटय् थौं सोमवाःनिसे स्वगः बिजुली बस चले यायेत्यःगु दु। साझा यातायातया महाप्रबन्धक महेन्द्रराज पाण्डेयया कथं थुगु रुटय् लिपा १५ गः बिजुली बस चले यायेगुे योजना तयातःगु दु।

‘स्वगः बसया लागि जिमितं रुटया इजाजत बिगु दु,’ वयकलं धाःगु दु,‘लिपा मेगु बिजुली बसपाखे सेवा न्ह्याके ।’ साझा यातायातं ४० गः बिजुली बस हगुलि स्वगः थ्व स्वया न्ह्यः हे सञ्चालन याये धुकुगु दु।

थौं सोमवाः निसे मेगु स्सगः बस सञ्चालनय् हयेत्यःगु खः। थौं सोमवाः साढे २ बजेनिसे पाटनध्वाका बसया सेवा बिइत्यःगु खः।

लुँ तोलां थौं निसः थहावःगु दु। लुँ तोलां निसः थहावना थौं १ लाख ११ हजार रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहःया भाः धाःसा स्थिर जुया थौं नं तोलाया १ हजार ३ सय ७५ रुपैयाँ न कारोबार जुगु दु धका महासङ्घं धाःगु दु।