नवनिर्वाचित राष्ट्रपति रामचन्द्र पौडेलयात निर्वाचन आयोगं निर्वाचित जूगु दसिपौ लःल्हाःगु दु। न्हुगु बानेश्वरया सङ्घीय संसद् भवनय् पौडेलयात थौं बिहीवाः निर्वाचन आयोगया प्रमुख आयुक्त दिनेशकुमार थपलियां निर्वाचित जूगु दसिपौ लःल्हाःगु खः।

ज्याझ्वलय् निर्वाचन अधिकृत महेश शर्मा पौडेलं चुनावया लिच्वः घोषणायासे नेता रामचन्द्र पौडेल निर्वाचित जूगु जानकारी बिःगु खः। उगु ज्याझ्वलय् प्रधानमन्त्री पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा, नेकपा (एकीकृत समाजवादी) या अध्यक्ष माधवकुमार नेपाल, लोकतान्त्रिक समाजवादी पार्टीया अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ, जनमत पार्टीया अध्यक्ष डा.चन्द्रकान्त (सीके) राउत, निर्वाचन आयोगया आयुक्तपि नाप थीथी राजनीतिक दलया नेता व कार्यकर्तापिनिगु ब्बति दुगु खः।

थौं जुगु राष्ट्रपतिया निर्वाचनय् गुगू दलपाखे राष्ट्रपतिया उम्मेदवार जूम्ह नेपाली कांग्रेसया वरिष्ठ नेता पौडेलं ३३ हजार ८ सय २ व प्रतिस्पर्धी सुवासचन्द्र नेम्वाङं १५ हजार ५ सय १८ मतभार काःगु खः।

जनता समाजवादी पार्टी न उपपराष्ट्रपतिया उम्मेदवार क्वछिःगु दु।

बिहीबाः च्वंगु पार्टीया केन्द्रीय कार्यकारिणी समिति बैठकं नेता रामसहाय प्रसाद यादवयात उपराष्ट्रपतिया उम्मेदवार दयकेगु निर्णय याःगु दु धका सांसद प्रदीप यादवं जानकारी बिःगु दु।

रामसहाय प्रसाद यादव आःतक जसपाया संसदीय दलया नेता खः। नेपाली कांग्रेस, नेकपा माओवादी केन्द्र, नेकपा एकीकृत समाजवादी नाप च्यागु दलीय गठबन्धनय् उपराष्ट्रपति जसपायात बिइगु सहमति जूगु खः।

उपराष्ट्रपतिया चुनाव थ्व हे वइगु चत्रै ३ गते जुइत्यःगु खः।

राष्ट्रपतिइ नेपाली कांग्रेसया उम्मेदवार रामचन्द्र पौडेल निर्वाचित जूगु दु। बिहीबाः संघीय संसदय् जूगु निर्वाचनय् पौडेलं ३३ हजार ८०२ मतभारं निर्वाचित जूगु दु।

वयकलं २१४ संघीय सांसद व ३५२ प्रदेश सांसदपिनिगु मत काःगु खः। पौडेलं नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा एकीकृत समाजवादी, राष्ट्रिय स्वतन्त्र पार्टी, जनमत पार्टी, नागरिक उन्मुक्ति पार्टी, राष्ट्रिय जनमोर्चां मत बिःगु खः।

अथे हे मेम्ह उम्मेदवार एमालेया सुवासचन्द्र नेम्वाङं १५ हजार ५१८ मत भार काःगु दु। वयकलं ९६ संघीय सांसद व १६२ प्रदेश सांसदपिनिगु मत काःगु दु धका निर्वाचन कार्यालय स्रोतं धाःगु दु।

निर्वाचन कार्यालयया आधिकारिक लिच्वः सार्वजनिक जुइ ल्यः दनिइ।

येँ महानगरपालिका २७ वडा महाबौद्धय् लुँचुुभुलु अजिमा द्यःछेँ पुनःनिर्माण क्वचाःगु दु ।

येँ महानगरपालिकाया उपप्रमुख सुनिता डंगोलं छगू विशेष ज्याझ्वःया दथुइ ल्वहंपौ अनावरण यानाः उलेज्या यानादीगु खः। २०७३ सालनिसें पुनःनिर्माण शुरु जूगु द्यःछेँ मुक्कं छगू करोड ५७ गू लख तका लागतय् दयेकूगु खः ।

कुल लागतय् १७ गू लाख ५० द्वः येँ महानगरं ग्वाहालि याःगु खःसा मेगु जनस्तरं म्हःगु खः । द्यःछेँ उलेज्या लिपा नवासे उपप्रमुख डंगोलं अत्याधिक जनसहभागितापाखें आर्थिक संकलन यानाः पुनःनिर्माण याःगु द्यःछेँ सम्पदा संरक्षणया क्षेत्रय् समुदायया योगदानया निंतिं मेगु छगू नमूना ज्या जूगु खँ धयादीगु दु ।

वय्कलं थ्व द्यः छेँ दयेकेत मेमेगु निकाय स्वयां नं समुदायया थःगु हे ग्वाहालि व योगदान आपालं दु धयादिल । लुँचुभुलु अजिमा महाबूया अध्यक्ष पंचनारायण महर्जनं द्यःछेँ निर्माणया ज्याय् स्थानीय समुदायया तःधंगु योगदान दुगु चर्चा यानादिसें द्यःछेँ निर्माणया इलय् सम्बन्धित गुथिया दुजःपिंसं श्रमदान यायेगु व श्रद्धालु भक्तजनपिंसं आर्थिक ग्वाहालि याःगु जानकारी बियादिल ।

द्यःछेँ निर्माणया इलय् गुथिपाखें नियमित रुपं यायेमाःगु भ्वय् खर्च तकं क्वपालाः पुनःनिर्माणय् लगानी यानागु जानकारी नं वय्कलं बियादिल । येँ महानगर २५ वडा केलत्वालय् विराजमान लुँचुभुलु अजिमायात लुँमधि अजिमाकथं नं कायेगु यानातःगु दुसा पुनःनिर्मित द्यःछेँय् जात्रासम्बन्धी हलंज्वलं तयेगु व न्हू पुस्तायात बाजं स्यनेगु याना वयाच्वंगु दु ।

नेपाःया स्वम्हम्ह राष्ट्रपति ल्ययेगु निति थौं निर्वाचन जुइत्यःगु दु। निर्वाचन आयोगं संसद भवन न्हुगु बानेश्वरय् थौं सुथय् १० बजेनिसे न्हिनय् ३ बजे तक मतदान यायेगु ई तयातःगु दु।

राष्ट्रपतिया निर्वाचनय् सत्ता गठबन्धनपाखे नेपाली कांग्रेसया नेता रामचन्द्र पौडेल व नेकपा एमालेया उपाध्यक्ष सुवास नेम्वाङ न उम्मेदवार बिःगु खः।

निर्वाचन क्वचाय्वं हे संसद भवन दुन् मतगणना सुरु यायेगु व थौं हे बहनि ७ बजे दुने मतपरिणाम सार्वजनिक यायेगु निर्वाचन अधिकृत महेश शर्मा पौडेलं जानकारी बिःगु दु।