नेकपा एमाले केन्द्रीय कमिटीया बैठक थौंनिसे यलय् न्ह्याइगु जुगु दु। यलया च्यासलया पार्टी केन्द्रीय कार्यालयय् थौं सुथय् १० बजेनिसे बैठक न्ह्याइगु जुगु दु।

स्वन्हु तक न्ह्याइगु उगु बैठकय् झीगु कार्यसूचीइ छलफल यायेगु निर्णय याःगु ददु धका नेकपा एमालेया केन्द्रीय सदस्य नाप केन्द्रीय प्रचार विभाग उपप्रमुख विष्णु रिजालं जानकारी बिःगु दु।

बैठकय् अध्यक्ष केपी शर्मा ओलीं राजनीतिक प्रतिवेदन, केन्द्रीय निकायपिनिगु प्रतिवेदन, मिसन ग्रासरुट अभियानया प्रतिवेदन, प्रदेशया कार्ययोजना, केन्द्रीय सदस्यपिनिगु कार्यविभाजन, पार्टी प्रवेशीपिनिगु व्यवस्थापन लगायतया झीगु कार्यसूची दु धका नेता रिजालं जानकारी बिगु दु।

एमाले केन्द्रीय कमिटीइ ३३५ (निम्ह निलम्बित) सदस्य, प्यम्ह केन्द्रीय निकायया अध्यक्ष व गुम्ह प्रदेश कमिटी अध्यक्ष (निम्ह गैरभौगोलिक) पिनिगु सहभागी दइ।

थ्व स्वया न्ह्यः एमालेया केन्द्रीय कमिटी बैठक झापाय् च्वनिइगु धका धाःगु खः।

निगुगु जनआन्दोलनय् घाःपाः जुम्ह काभ्रेका मुकेश कायस्थ मन्त।

‘म्वाम्ह शहीद’ धका म्हसिउम्ह कायस्थ बनेपाया शिर मेमोरियल अस्पतालय् वासः यायेगु झ्वलय् म्हिगः बुधवाः बहनि मदुगु खः। २०६२ चैत २७ गते जूगु आन्दोलनय् कायस्थयात छ्यनय् सुरक्षाकःमिपिन्स गोली क्यकूगु खः।

उगु इलय् वयकः १४ दँ निति दुम्ह खः। वयकः ३२ दँय् म्हिगः मदुगु खः। कायस्थयात थौं विहीवाः अन्तिम संस्कार याइ धका मुकेश कायस्थ प्रतिष्ठानया अध्यक्ष हिरा शर्मा नेपालं जानकारी बिःगु दु।

बनेपा नगरपालिका वडा नम्बर ८ य् च्वम्ह वयकः मुकेश २०४८ साल भदौ ९ गते बुम्ह खः। २०७५ असारय् आकाझाकां बिरामी जुइवं हाकनं अर्धचेत अवस्थाय् थ्यःगु खः। ताः ईनिसे शिर मेमोरियल अस्पतालय् वासः यानाच्वम्ह वयकः म्हिगः बहनि ७ः३० बजेमदुगु खः।

सरकारं  वयकःयात उपचार खर्च, १५ हजार मासिक भत्ता, छम्ह सुसारेया लागि ६ हजार २ सय भत्ता व छम्ह नर्स नियमित उपलब्ध याना बिःगु खः।

यल महानगरपालिका १६ वडाया ग्वसालय् गोर्जियस इन्स्टिच्यूट अफ फेशन टेक्नोलोजीपाखें बिउगु स्वरोजगार व महिला आत्मनिर्भरताया निंतिं डिजाइनिङ्ग, सिलाई तालिम क्वचाःगु दु।

उगु समापन ज्याझ्वलय् १६ वडाया वडाध्यक्ष निर्मलरत्न शाक्यं तालिमपाखें सीप सयेकाः उत्पादन याःगु वसःया बजाः व्यवस्थापनय् नं वडापाखें ग्वाहालि याये धकाः धासें मिसा उद्यमीया संख्यात्मक वृद्धि यानायंकेत इलय् ब्यलय् मेला आयोजना यायेगु लक्ष्य दु धकाः धयादिगु खः।

वडा सदस्य नाप वडाया मिसा समिति कजि बबिता श्रेष्ठं मिसा उद्यमीपिन्स आयआर्जनया सोचयात नालाः कायेमाः धकाः धयादीसे स्थानीय सरकारपाखें ग्वसाः ग्वःगु थज्याःगु थीथी कथंया तालिमयात लगानी कया न्ह्याःवनेमा धकाः धयादिगु खः ।

समापन ज्याझ्वलय् गोर्जियस इन्स्टिच्यूट गिफ्टया शोभा महर्जनं मिस्त छेँया तिसा जक जुयाच्वनेगु मखुसे आत्मनिर्भर जुया उद्यमशील नं जुया च्वनेमाः धकाः धासें स्थानीय तहपाखें ग्वसाः ग्वःगु तालिमं मिस्तयेगु सीप विकास व आत्मनिर्भर जुइत ग्वाहालि जुइ धकाः धयादिल।

नेपाली कांग्रेसया नेता नाप पूर्व गृहमन्त्री बालकृष्ण खाँणयात प्रहरीं ज्वंगु दु।

नक्कली भुटानी शरणार्थी प्रकरणय् स्वायेवं खाँणयात प्रहरीं बुधबार सुथय् ज्वंगु खः।

प्रहरीं खाँण गृहमन्त्री जुगु इलय् मन्त्रालयया सचिव जुयाच्वंम्ह टेकनारायण पाण्डे, पूर्व गृहमन्त्री रामबहादुर थापा बादलया सुरक्षा सल्लाहकार इन्द्रजित राई लगायतपिन्त ज्वना अनुसन्धान यानाच्वंगु दु।

छु दिं न्ह्यःनिसे कुहावना च्वंगु शेयर बजाः थौं धासा भचा थहावंगु दु। शेयर बजाः परिसूचक नेप्से थौं १० दशमलव ६६ अङ्कं थहावना १ हजार ८ सय ४४ दशमलव ३६ विन्दुइ थ्यःगु दु।

दक्को समूहया शेयर थहावंगुलि उत्पादन व होटल समूहया शेयर थहावंगु दु। थौं २६९ गु कम्पनीया २८ लाख ३६ हजार कित्ता शेयर ७७ करोड ४७ लाख रुपैयाँया कारोबार जूगु दु।

दकलय् अप्पो हिमाल दोलखा हाइड्रोपावर कम्पनीया ६ करोड ९६ लाख रुपैयाँया शेयर किनबेच जूगु दु। पिपुल्स पावर कम्पनीया थौं दकलय् अप्पोे शेयर साढे ६ प्रतिशतं थहावंगु दु।

समग्र बजाः थहावंसा युनिक नेपाल लघुवित्तया शेयर साढे ८ प्रतिशत स्वया अप्पो कुहवःगु दु।