थ्व हे वइगु मङ्सिर ४ गते जुइगु प्रतिनिधिसभा व प्रदेशसभा सदस्य निर्वाचनया लागि थौं चान्ह्यः निसे मौन अवधि सुरु जुगु दु ।

निर्वाचन (कसूर व सजाय) ऐन, २०७३ य् सू ना नं मतदान जुइगु स्वया ४८ घण्टा न्ह्यः मतगणनाया ज्या पूमवतले दल व उम्मेदावरया पक्षय् प्रचारप्रसार याये मदइगु व्यवस्था दु। थुगु इलय् उम्मेदवार वा राजनीतिक दलया पक्ष वा विपक्षय् मतदान यायेगु वा मयायेगु उद्देश्यं सभा सःतेगु वा ग्वसाः ग्वयेगु, जुलुस पिकायेगु वा नाराबाजी यायेगु नाप मेमेगु छु कथंया न प्रचारप्रसार यायेगु वा याये मदइगु कानुनी व्यवस्था दु।

मौन अवधि उल्लङ्घन यातकि आयोग, निर्वाचन अधिकृत वा अनुगमनकर्तापिन्स २५ हजार रुपैयाँ तक जरिवाना जुइ धका आयोगं धाःगु दु। निर्वाचन आचारसंहिता, २०७९ य् मतदान जुइगु दिं स्वया ४८ घण्टानिसे मतदानया दिं मतदान केन्द्र बन्द मजुतले पालना याये माःगु विशेष आचरणसम्बन्धी व्यवस्था दु धका आयोगं धाःगु दु। बैठकं चान्ह्यः १२ बजेनिसे निर्वाचन प्रचारप्रसार सम्बन्धी वा राजनीतिक दल वा उम्मेदवारया गतिविधि वा प्रचारप्रसार सम्बन्धी छु न समाचार प्रकाशन वा प्रसारण मयागु नाप मयाकेगु प्रबन्ध यायेत सञ्चार नाप सूचना प्रविधि मन्त्रालय व नेपाल प्रेस काउन्सिलयात पौ च्वयेगु निर्णय याःगु दु।

मतगणनाया ज्या पूरा मजुतले छु न कथंया छलफल, अन्तरक्रिया, सभा, सम्मेलन, कार्यशाला गोष्ठी, मस्तिष्क मन्थनलगायत निर्वाचन प्रचारप्रसार सम्बन्धी छु न गतिविधि मयायेत व मयाकेत राजनीतिक दल नाप उम्मेदवारपिन्त निर्देशन बिःगु दु।

आयोगं फेसबुक, ट्वीटर, युट्युब थे जाःगु सामाजिक सञ्जालय् निर्वाचन प्रचारप्रसार सम्बन्धी छु कथं सामग्री प्रकाशन व प्रसारण, शेयर, ट्याग, लाइक, कमेन्ट व प्रतिकमेन्ट मयायेत व मयाकेत थःगु सामाजिक सञ्चालय् सामग्री जुलकि तत्काल हटे यायेत उम्मेदवार, राजनीतिक दललगायत दक्को सरोकारवालापिन्त निर्देशन बिःगु दु।

बैठकं निर्वाचन प्रचारप्रसार सम्बन्धी छु न सामग्री फेसबुक, ट्वीटर, युट्युब थे जाःगु सामाजिक सञ्जालय् मतयेत, शेयर, ट्याग, लाइक, कमेन्ट मयायेत व मयाकेत सर्वसाधारणपिन्त इनाप यायेगु निर्णय याःगु दु।

निर्वाचन आयोगं देयन्यक थीथी थासय् घुम्ती टोली परिचालन याइगु जुगु दु। आयोगया अधिकार तक छ्यला सहसचिव वा उपसचिवया नेतृत्वय् सरकारी कर्मचारी व प्रहरी लगायत दुगु कथं घुम्ती टोली परिचालन यायेगु जुइ धका निर्वाचन आयुक्त ईश्वरीप्रसाद पौड्यालं धाःगु दु।

‘यक्को संवेदनशील थासय् व म्हिगः इतिहासय् न थीथी कालखण्डय् भौगोलिक विकटय् दुगु थासय् वयकःपिन्त दक्को अधिकार बिया छ्वये,’ पौड्यालं धाःगु दु, ‘शान्ति सुरक्षा भंग यायेगु कुतः जूसा गोली चले यायेगु तक आदेश बिइ फइगु अधिकार प्रत्यायोजन जुगु दु।’

मौन अवधिइ गैरकानूनी व आचारसंहिता विपरीत ज्या यातकि तत्काल कारकाही यायेगु टोलीयात येँ, यल महानगरपालिका लगायत सुगम व तुलनात्मक रुपं शान्तिसुरक्षा दुगु थासय् छ्वइगु मदु। दुर्गम, मतदान केन्द्रय् कब्जा जुइगु स्थिति दु सा जोखिमपूर्ण थासय् टोली खटे यायेगु तयारी दु ।

मतगणना सम्पन्न याना जक लिहावयेगु उगु टोलीयात म्याण्डेट बिइगु आयोगं धाःगु दु।

निर्वाचन आयोगं प्रतिनिधि सभा व प्रदेश सभा निर्वाचनया दक्को लिच्वः मंसिर २२ गते न्ह्यः हे वइ धका दाबी याःगु दु।

छगु पत्रकार सम्मेलनयासे प्रमुख निर्वाचन आयुक्त दिनेशकुमार थपलियां मंसिर २२ गते दुने दक्को लिच्वः राष्ट्रपतिया थाय् लःल्हायेगु तयारी दु धका धयादीगु खः।

आयोगया कथं प्रतिनिधि सभा व प्रदेश सभाया समानुपातिक मत तक ल्यायेगु क्वचायेका विजयी जुपिनिगु नां धलः २२ गत न्ह्यः हे तयार यायेगु धका धयादीगु खः।

शान्तिपूर्ण व निष्पक्ष रुपं चुनाव यायेगु थःगु प्रतिवद्धता दु धका धयादीसे आयोगं थ्व स्वया न्ह्यः गडबड खनेदुगु थासय् हवाई गस्ती यायेगु धका धयादीगु दु।

अथेहे आयोगं मौनअवधि सुरु जुइ न्ह्यः हे थाय् थासय् अनुगमनया लागि घुम्ती टोली खटे याये धुकागु दु धका धयादीगु खः।

नेकपा एमालेपाखे प्रतिनिधि सभा सदस्यया लागि येँ क्षेत्र नम्बर ६ या उम्मेदवार सर्वेन्द्र खनालं येँयात पर्यटकीय व सांस्कृतिक कथं म्हसिकेगुलि थम्हेसिया माःगु कथं ज्या यायेगु जुइ धका धयादीगु दु।

येँ हना वया च्वंगु संस्कृति, परम्परा थःत तसक यः धका धयादीगु दु। उम्मदेवार खनालं थःम्हेसिया प्रहरी सेवाय् न थीथी जात्रापर्वय् स्थानीय जनतानाप समन्वय यासे सुरक्षा व्यवस्था कायम यायेगु निति व जात्रायात व्यवस्थित ढङ्गं सम्पन्न यायेगु ज्या न उगु इलय् यानागु दु धका धयादीगु खः। ‘उगु इलय् प्रहरीया रुपं समाजसेवा यानागु धका धयादीगु खः।

आः हाकन छकः स्थानीय जनताया ग्वाहालि दत धाःसा जनप्रतिनिधि जुया देय् व राष्ट्रया सेवा यायेत धका वयागु दु, भलसा दु सकसिया ग्वाहालि दइ’ धका खनालं धाःगु दु। स्थानीय संस्कृति न थःम्हेसिया यक्को खँ सय्काःगु दु धका धयादीगु खः । वयकलं न उगु इलय् २०६५ दँया येँया जात्राय् जुगु काण्डयात लुमकादीगु खः । ‘उगु ईया परिस्थिती मेगु आन्दोलन स्वया बिस्क खः।

उगु ईलय् थःगु परम्परा, संस्कृति बचे यायेगु माग यासे स्थानीय जनसमुदाय आन्दोलनय् कुहावःगु खः। दमन यायेगु खँ हे मजुल, स्थानीय समुदायनाप मिले जुया जि समन्वयकारी भूमिका म्हिता’ खनालं १५ दँ पुलागु ई लुमकादिसे धयादीगु दु तत्कालीन अर्थमन्त्री बाबुराम भट्टराई न येँया लागि बियावया च्वंगु बजेट क्वपागुलि तं चाया स्थानीय जन समुदायपिन्स जात्रा हे रोकेयाना आन्दोलनय् कुहावःगु खः। उगु इलय् स्थितीयात नियन्त्रणय् काःगु खनालया भूमिकायात यक्कोसिया च्वछाउगु खः।

पूर्व संघीय मामिला तथा सामान्य प्रशासन मन्त्री नाप जनता समाजवादी पार्टीया नेता राजेन्द्र श्रेष्ठ प्रतिनिधि सभा सदस्यया नितिं येँ क्षेत्र नम्बर ७ पाखें कुसा चिं ज्वनाः उम्मेदवारी बियादीगु दु।

नेपालभाषा मंकाः खलःया दुजः कथं वय्कलं ताः ई न्ह्यःनिसें हे थीथी नेवाः आन्दोलनय् न्ह्यज्याना च्वनादीगु खः । म्ये च्वय्गु, हालेगुलिइ नं जाःम्ह राजेन्द्र श्रेष्ठं थ्वयां न्ह्यः सांसद जूबलय् संसदय् थीथी मुद्दा ल्ह्वनाः जनताया सः न्ववाइम्ह नेता कथं थःगु छवि दय्केधुंकूगु दु । राज्यं ययःथे लालाःथाय् डोजर चले यानाः विना क्षतिपुर्ति जनताया छेँ थुनाच्वंगु इलय् वय्कलं उकिया विरुद्ध संसदय् सः तयादीम्ह खः।

नापं आवास सम्वन्धि विधेयकय् संशोधन प्रस्ताव तयाः विना क्षतिपुर्ति जनताया छेँ थुने मदइगु व्यवस्था सुनिश्चित यानादिल । शिक्षा सम्वन्धि विधेयकय् नं वय्कलं हे संशोधन प्रस्ताव तयाः मातृभाषा शिक्षा सुनिश्चित याकादिल । थ्व हे विधेयकय् चुयाः आः येँ महानगरपालिका, किपू नगरपालिका, यल महानगरपालिकां स्थानीय मातृभाषां स्थानीय पाठ्यक्रम लागू याय्धुंकूगु दु ।

वय्कः मन्त्री मखुबलय् वा पदय् मदुबलय् नं २०७२ सालय् भुखाचं पिडित जूपिं पुलां गुह्येश्वरीया परिवारयात वय्कलं पहल यानाः १२० खा छेँ दय्कादीगु दु ।