नेपाःया पश्चिमी क्षेत्रय् भुखाय् ब्बःगु दु।

थौं न्हिनय् २ बजे जुया ४३ मिनेटय् बाजुराया मेला केन्द्रबिन्दु जूया ५ दशमलव ९ रेक्टर स्केलया भुखाय् ब्बःगु दु धका भूकम्प मापन तथा अनुसन्धान केन्द्र नेपालं धाःगु दु।

उगु भुखाचं नेपाः नाप भारतया जःखः न महसुस जूगु दु धका धाःगु दु।

लुँया भाः आःतकया हे न्हुगु रिकर्ड जुगु दु। लुँ तोलां थौं द्धःछि थहावःगु दु।

लुँ तोलां थौं द्धःछि थहावना १ लाख ६ हजार ३ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाःगु दु।

अथेहे वहः तोलां झीन्यातका कुहावःगु दु। वहः तोलां झीन्यातका कुहावःया १ हजार ३ सय ६५ रुपैयाँ न कारोबार जुयाच्वंगु दु धका महासङ्घं धाःगु दु।

स्वयम्भूया आनन्दकुटी विहारय् महापरित्राण पाठ ज्याझ्वः जुगु दु।

सकल प्राणीया सुख, शान्ति व समृद्धिया कामना यासें उगु महापरित्राण पाठ ज्याझ्वः जूगु खः । बुद्ध विहारया प्रमुख भिक्षु कोण्डन्य महास्थविरं शील प्रदानलिसें बुद्ध पुजा यानाबिज्यासें न्ह्याःगु ज्याझ्वलय् भिक्षु महासंघलिसें थीथी विहारया भिक्षु गणपाखें महापरित्राण पाठ यानाबिज्याःगु खः ।

भिक्षु कोण्डन्यं महापरित्राणया विषय नापं थौंया सामाजिक परिस्थितियात कयाः धर्मदेशना नं बिया बिज्याःगु ज्याझ्वः न्ह्यःखाया दिनेशरत्न स्थापित व पद्महिरा स्थापितं ग्वसाः ग्वयादीगु खः ।

उगु इलय् भिक्षु धम्मशोभन महास्थवीर, भिक्षु कोण्डन्य महास्थवीर, भिक्षु शीलभद्र महास्थवीर, भिक्षु सद्धातिस्स महास्थवीर, भिक्षु कोलित महास्थवीर, भिक्षु राहुल, भिक्षु उपतिस्स, भिक्षु सुद्धिको, भिक्षु चन्द्र गुप्त, भिक्षु सुख, भिक्षु शान्त सिद्धार्थ, भिक्षु नागित, भिक्षु लक्खण, भिक्षु विमल रतन, भिक्षु नारद व भिक्षु पियरतनं लगायतं महापरित्राण पाठ यानाबिज्याःगु खः ।

आनन्दकुटी विहारया भिक्षु धम्ममूर्ति महास्थविरं सहजीकरण यानाबिज्याःगु ज्याझ्वलय् भिक्षु गणयात अष्टपरिष्कार व अनागारिका गुरुमांपिंत दान यानाः पुण्यानुमोदन यासें ज्याझ्वः क्वचायेकूगु खः ।

येँ महानगरपालिकाया नगरप्रहरी प्रमुख एसपी राजुनाथ पाण्डेयात छानबिन यायेगु ई छवाः म्याद थप याःगु दु।

महानगरया छानबिन समितिं म्याद थप याःगु खः। एसपी पाण्डे न छम्ह मिसा नगरप्रहरी हवल्दारयात मचा बुउगु बिदा मबिउगु धासे नाप दुर्व्यवहार याःगु द्धपः बियगु खः।

वंगु पुस ८ गते महानगरं छानबिन यायेत समिति गठन याःगु खः। अनुसन्धान क्वमचाःगु धासे न्हापागु पटक पुस २२ गते म्याद थप याःगु खः।

उगु म्याद कथं छानबिन समितिं १५ न्हु दुने प्रतिवेदन लःहायेमाः। तर, छानबिनया लागि ई मगागु धासे हाकन म्याद थप याउगु धका समितिया सदस्य कुमारी राई न धाःगु दु ।

संघीय संसद् सचिवालयं नेपाली कांग्रेसयात प्रमुख प्रतिपक्षी दलया मान्यता बिउसे प्रमुख प्रतिपक्षी दलया नेता याःगु सेवा सुविधासम्बन्धी पौ छ्वःगु दु।

कांग्रेसया संदसीय दलया कार्यालयय् उपसचिव होमनाथ पहाडीया पौंया लिसः बिउसे संसद् सचिवालयया नामय् तोके याना प्रमुख प्रतिपक्षी दलया नेता याःगु सेवा सुविधासम्बन्धी जानकारी बिउगु खः।

संघीय संसद् सचिवालयया सांसद सुविधा व्यवस्थापन महाशाखाया प्रमुख रामहरि थापां पौं छ्वया प्रमुख प्रतिपक्षी दलया नेता शेरबहादुर देउवायात वइगु सेवा सुविधाया विषय जानकारी बिःगु खः।

उपसचिव थापां पौं च्वया धाःगु दु, “न्ह्यः ब्बःगु विषय दलया कार्यालयय् पौं ल्याः २०७९।०८० च.नं. ४५ तिथि २०७९।०९।२९ या पतिइ प्रतिनिधिसभाय् विपक्षी दलया नेता माननीय श्री शेरबहादुर देउवाजुं प्रमुख विपक्षी दलया नेताया हैसियतं वइगु सुविधाया माग जुयावया च्वंगु सन्दर्भय् उगु सुविधा संघीय संसदया पदाधिकारी नाप सदस्यपिनिगु पारिश्रमिक व सुविधा सम्बन्धी ऐन, २०७३ या सम्बन्धित दफा व अनुसूची–१ नाप अनुसूची–२ कथं जुइगु व्यहोरा कथं जुइ।”

सचिवालयं विपक्षी दलया नेता याःगु हैसियतं नां हे तोके याना जानकारी बिइवं आः कांग्रेस प्रमुख प्रतिपक्षी दलया हैसियत खः कि मखु धइगु बहस क्वचाःगु दु ।