Display Style:
Column Style
मंसिर ४ व ५ गते सार्वजनिक बिदा
लहनान्युज | कछलागा सप्तमी ११४३, कार्तिक २९ मंगलवाः
सरकारं मंसिर ४ व ५ गते सार्वजनिक बिदा बिइगु निर्णय याःगु दु।
प्रतिनिधि सभा व प्रदेश सभा सदस्य चुनावया लागि सरकारं वइगु मंसिर ४ व ५ गते सार्वजनिक बिदा बिइगु निर्णय याःगु दु। मतदान जुइगु थासय् शिक्षण संस्था धाःसा २ गतेनिसे ५ गते तक बन्द हे जुइगु दु।
गृह मन्त्रालयं मंसिर ४ गते जुइगु प्रतिनिधि सभा व प्रदेश सभा सदस्य चुनावया लागि मतदान जुइगु शिक्षण संस्था २ गतेनिसे ५ गते तक सरकारी कार्यालय व सार्वजनिक निकाय नाप ४ व ५ गते बन्द जुइगु धका विज्ञप्ति बिया धाःगु दु।
संघीयता बल्लाकेगु व नीति निर्माणयात पूर्णता बिइगु जिगु निति जिगु उम्मेदवारी खः –प्रेमभक्त महर्जन
नृपेन्दलाल श्रेष्ठ | कछलागा सप्तमी ११४३, कार्तिक २९ मंगलवाः
देश संघीयताया वने धुकुगु दु। देश संघीय संरचनाये वंंसा छु न कथं संघीयता उलि परिचालन जुगु मदुनि। थन यक्को हे नीति दयके ल्यः दकिइ। जिगु न्हापागु प्राथमिकता धइगु हे संघीयतायात गयेयाना बलाकेगु धइगु खँये ध्यान जृुइ ज्या यायेगु जुइ। गुलि मनैत आः संघीयता म्वाः धाइपि दु। झीसं उलिमछि आन्दोलन याना हयाःगु संघीयतायात बचे यायेमाःगु दु। थ्व हे संघीयतायात परिचालित याना व थुकिइ दुगु नीति निर्माणयात पूर्णता बिइगु जिगु उम्मेदवारी खः।
थुगु क्षेत्रय् मू समस्या धइगु निगु स्वंगु दु । गुसिगाः, सानेपा, पुच्वः, जावलाख्यः, कुपण्डोल, सैँँबु, नःटोल, खोकना, बुङमती, सँैबु भैंसेपाटी जिगु क्षेत्रय् लाः । थुगु क्षेत्रया मू समस्या धइगु नख्खुं सैँबु आवास वनेगु सतक खः। जिपि विजय जुलकि थुगु सतकया लागि गन वनेमाः व छु यायेमाःगु याये । थ्व नाप बुङमतीपाखे फर्सिडोल वनेगु लँ व बुङमतीं चुनिख्यः वनेगु सतक तसकं अस्तव्यस्तय् दु । ठेक्कापट्टा जुइ धुकुगु सतक मर्मत नाप सुधारया लागि इलये ब्यलये छु न अवलोकनयाना स्वया च्वंगु मदुनि जिपि वये धुका पटक–पटक अवलोकन यायेगु जुइ । मेगु समस्या धइगु कृषि क्षेत्रया सिँचाइया व्यवस्थापन मजुगु खः। मेगु समस्या छगु शहरीकरण अप्पोया वना लःया हाहाकार खः ।
जिपि मत फ्वने छेँ छेँये वनेगु झेवलय् अन च्वपि जनतां स्वास्थ्य, शिक्षा, खानेपानी, रोजगारी व विकासया माग न्ह्यने हयाच्वंगु दु । थुगु समस्यामध्ये न मतदातापिन्स न्ह्यने हःगु धइगु लःया व्यवस्था यायेत धयाच्वःगु दुृ। जिमिगु जिम्मेवारी छगु अनच्वपि जनताइपिन्त लःया व्यवस्था यानाबिइगु न खः।
जि प्रदेशया सांसदया उम्मेदवार जुया विजय हासिल जुलकि हरेक जनतायात शुद्ध लःया व्यवस्था यानाबिइ । मू खँ सतक नाप सहायक सतकयात मर्मत सुधार यायेगु खः । स्थानीय उत्पादन लगायत हस्तकलायात बजारीकरण यानाबिइत माग यानाच्वंगु दु । ल्याय्म्हपि नाप मिसासपिनिगु रोजगारया लागि साना तथा घरेलु उद्योग स्थापना यानाबिइमाःगु जुगु दु ।
जि निगु कार्यकाल २०४९ व २०५४ सालय् खोकनाया तत्कालीन गाउँ विकास समितिया अध्यक्ष न जुइ धुकागु दु । अध्यक्ष जुयागु इलये उगु थासय् यक्को ज्या यानागु दु । जिं समुदायया लागि यक्को यानागु दु । २०७२ सालय् तःभुखाय् ब्बःगु इलय् जिमिसं बुङमतीइ झन्डै स्वसःति छेँ –टहरा दयका बियाबियागु दु । बुङमतीइ लःया समास्या जुयाच्वंगु इलय् २ करोड रुपियाँ खर्च याना ६ इन्च पाइपलाइन लाना लःया ब्यवस्थापन यानाबियागु खः ।
जि पर्यटननाप सम्बन्धित जुगुलि आः होमस्टे महासंघया बागमती प्रदेशया उपाध्यक्ष न खः । पर्यटन विकासया लागि जि थिथि तालिम बिइगुृ नाप प्रदेशयकं समन्वय याना ज्या याये । हालसम्म कोही पनि व्यक्ति नेकपा एमालेसँग मैदानमा एक्लै खडा हुन सक्नुभएको छैन ।
दान्यहिरा सिरपाः लःल्हात
लहनान्युज | कछलागा षष्ठी ११४३, कार्तिक २८ सोमवाः
नेपालभाषा एकेदेमिं दान्यहिरा सिरपाः लःल्हाःगु दु ।
उगु ज्याझ्वलय् दान्यहिरा जीवंकाःछि सिरपाः, दान्यहिरा संगीत सिरपाः व दान्यहिरा विज्ञान प्रविधि सिरपाः लःल्हाःगु खः । एकेदेमिया चान्सलर यज्ञरत्न धाख्वाःया सभाध्यक्षताय् जूगु ज्याझ्वलय् मूपाहां कथं झायादीम्ह पुलांम्ह मन्त्रीलिसें बुद्धिराज वज्राचार्यं उगु सिरपाः लःल्हानादीगु खः ।
ज्याझ्वलय् मदुम्ह वाङमय शताब्दी पुरुष सत्यमोहन जोशीयात ‘दान्यहिरा जीवंकाःछि सिरपाः’ (लाइफटाइम एचिभेन्ट), नांजाःम्ह वरिष्ठ संगीतकार मनराजा नकःमियात ‘दान्यहिरा संगीत सिरपाः’ व डा. केशरीलक्ष्मी मानन्धरयात ‘दान्यहिरा विज्ञान प्रविधि सिरपाः’ लःल्हाःगु खः । वय्कःपिं स्वम्हेसितं न्यय्द्वः तका दां व दसिपौलिसें उगु सिरपाः लःल्हाःगु खः ।
सिरपाः एकेदेमिया चान्सलर धाख्वाः स्वनादीगु खः । एकेदेमिया सदस्य सचिव डा. पुष्पराज राजकर्णिकारं थःगु जीवन एकेदेमिया निंतिं पानादीगु नापं एकेदेमि दुने हे कलाकार अरनिको ग्यालरी, नेवाः एफएमया संचालन, नेवाः खँग्वः धुकूया प्रकाशन थेंज्याःगु ज्वःमदुगु योगदानया कदर यासें शताब्दी पुरुष जोशीयात जीवंकाःछि सिरपाः लःल्हानागु जानकारी बियादिल ।
अथे हे संगीतकार नकःमियात नेपालाभाषा संगीत ख्यलय् बियादीगु योगदान व डा. मानन्धरयात नेपालय् न्हापांखुसी म्हुकंचा खेती व न्हू न्हूगु प्रविधि दुत हयादीगुलिं सिरपाः लःल्हाःगु जानकारी बिउगु दु । शताब्दी पुरुष जोशीयात लःल्हाःगु सिरपाः वय्कःया कायपिं अनुराज जोशी, हेमन्त जोशी व म्ह्याय् गंगा मुल्मीं लःल्हाना कयादीगु खःसा डा.मानन्धरं थःत लःल्हाःगु सिरपाःया दां नेपालभाषा परिषदयात लःल्हानादीगु खः ।
नाष्टया प्राज्ञिक दुजः डा. दिनेशराज भुजुं लिसें थीथी व्यक्तित्वपिंसं नुगःखँ तयादीगु ज्याझ्वलय् मनराजा नकःमि, रत्नशोभा महर्जन, सरिता शाही लगायतं सांगीतिक प्रस्तुति न्ह्यब्वयादीगु खः ।
यलय् १६ वडाय् फिजियोथेरापी उपचार केन्द्र सञ्चालन
नृपेन्दलाल श्रेष्ठ | कछलागा चौथी ११४३, कार्तिक २६ शनिवाः
यल महानगरपालिका– १६ वडा कार्यालयं ईलाननीइ फिजियाथेरापी उपचार केन्द्र सञ्चालन याःगु दु। रचना आयुर्वेद नाप अर्थो न्यूरो रिहाबिलिटेशन व ईलाननी टोल सुधार समितिनाप मिले जुया ईलाननी रचना फिजियोथेरापी उपचार केन्द्र नामं न्ह्याकूगु खः।
टोल सुुधार समितिया भवनय् प्यंगु शैय्यानाप फिजियोथेरापीया सामग्री सञ्चालनय् हःगु खः। थुकिया लागि वडां २० लाख रुपैयाँ विनियोजित याःगु दु धका वडां धाःगु दु। केन्द्रया व्यवस्थापन व दीर्घकालीन सञ्चालन यायेत राज बज्राचार्यया अध्यक्षताय् छगु समिति गठन याःगु दु। वडाअध्यक्ष संरक्षक व वडा सदस्यपि पदेन सदस्य दुगु कथं उगु समितिइ स्वःगु हे पक्षया प्रतिनिधित्व जुगु दु।
थौं शनिबाः जुगु ज्याझ्वलय् वडाअध्यक्ष निर्मलरत्न शाक्यं उगु केन्द्रया उलेज्या यानादीगु खः। वडाध्यक्ष शाक्यं उगु ज्याझ्वलय् फिजियोथेरापी सञ्चालन यायेत स्वदँनिसे कुतः यानागु आः न्ह्याःगु दु धका धयादीगु खः। स्वास्थ्य क्षेत्रय् नमूना योग्य वडा दयकेगु बिचाः कथं थुगु केन्द्र सञ्चालन यानागु धका वडाअध्यक्ष शाक्यं धयादीगु खः।
केन्द्रया स्थापनां समुदायस्तरय् स्वास्थ्य सेवाय् याउक पहुँच स्थापित जुइ धका वयकलं धयादीगु खः। उगु ज्याझ्वलय् रचना रिहाबिलिटेशन सेन्टरया सञ्चालक डा चन्द्रदीपकुमार महतो केन्द्रं क्वँय् ज्यःपि, नशा च्यापे जुगु, म्हुतु ब्यक्वःगु, जोर्नी स्यागु, प्यारालाईसिस, ल्हात तुतिइ झमझम जुगु, पोलेजुगु व सुस्त मनस्थिति जूपि मस्तय्त सहुलियत दरं उपचार जुइगु जानकारी बियादीगु खः।
समितिया अध्यक्ष राज बज्राचार्य न स्वास्थ्य सेवाय् याउक दयकेगु कथं वडाया ज्याय् समुदायपाखे ग्वाहालि यानगु खँ धका धयादीगु खः। उगु ज्याझ्वलय् वडा सदस्य बबिता श्रेष्ठ, वडा समितिया सल्लाहकार धर्मेन्द्र शाक्य लगायतपिन्स न खँ तयादीगु खः।
थुगु शिविर वइगु शुक्रबाः तक सञ्चालन जुइ।
नेवाः मंकाः मुद्दा राजनीतिक दलंनिसें उम्मेदवारतयत बिइगु अभियान
लहनान्युज | कछलागा चौथी ११४३, कार्तिक २६ शनिवाः
नेवाःतयगु मंकाःगु राष्ट्रिय संगठन नेवाः देय् दबू स्वनिगः विशेष प्रदेशपाखें वाग्मती प्रदेशया नितिं उम्मेदवार जुयादीपिं नापं सम्वन्धित राजनीतिक दलया नेतातयत नेवाःतगु भिस्वंगू बुँदा सहिता पौ लःल्हायेगु अभियानयात तिब्रता बिउगु दु । वाग्मती प्रदेशपाखें कन्हय् वना ज्या यायेमाःगु अले याये फइगु खँ दुथ्याका अथे नेवाः मंकाः मुद्दा लःल्हायेगु ज्या याना वयाच्वंगु खः ।
स्वनिगःन्यंकं न्ह्याकाच्वंगु थुगु अभियानया झ्वलय् नेपाली कांग्रेस, एमाले, माओवादी केन्द्र, जनता समाजवादी पार्टी नेपाल, नेकपा (एकीकृत समाजावादी), राप्रपा नेपाल, राष्ट्रिय जनमुक्ति पार्टीया नेतानिसें उम्मेदवारपिन्त तकं उगु कथंया पौ बिइगु ज्या जुइ धुंकूगु दु । नेवाः देय् दबू स्वनिगः विशेष प्रदेशया नायः श्रीकृष्ण महर्जनं थुगु अभियान चुनावया अन्तिम इलय् तक नं न्ह्याइ धयादिसें ल्यंदनिगु राजनीतिक दल व उम्मेदवारपिन्त नेवाः देय् दबूया स्वनिगः विशेष प्रदेश, जिल्ला समितिनिसें पालिका समिति सक्रिय जुया बिइगु ज्या न्ह्यानाच्वंगु दु धयादिल । नेवाः मंकाः मुद्दाया बुँदात थुगु कथं दुः
१) भाषा आयोगया सिफारिस कथं प्रदेशया कामाजि भाषा नेपालभाषा कथं नाला लागू यायेमाःगु ।
२) नेपाःया संविधानया धारा ५६ या ५ सं व्यवस्था जुयाच्वंगु कथं नेवाः बाहुल्यता दुगु लागाय् स्वायत्त क्षेत्र, संरक्षित क्षेत्र व विशेष क्षेत्रत घोषणा यायेमाःगु ।
३) प्रदेश प्रज्ञा प्रतिष्ठान गठन यायेमाःगु ।
४) नेपाल संवतयात वाग्मती प्रदेशय् कार्यान्वयन यायेमाःगु ।
५) १२ कक्षा तक ऐछिक विषय नेपालभाषा वा तामाङभाषा याना अनिवार्य यायेमाःगु ।
६) भु उपयोग नीति लागू यायेमाःगु ।
७) प्रदेशय् विकशित लिपियात प्रदेशय् लागू यायेगु नितिं कानुन दयेकेमाःगु ।
८) प्रदेश दुनेया संचार माध्यमय् प्रदेशया भाषायात विशेष थाये बिइकेगु कथं भाषिक समावेशीता नीति लागू यायेमाःगु ।
९) नेवाःतयगु प्रथाजन्य संस्था गुथियात कानुनी मान्यता बिइमाःगु ।
१०) आदिवासी नेवाःतयगु परम्परागत ज्ञान पुस्तान्तरण व हस्तान्तरणया नितिं विशेष योजना हायेमाः।
११) आदिवासी नेवाःतगु परम्परागत लजगाः, प्रविधि, कला लगायतयात विशेष स्थान बिइगु कथंया नीति निर्माण यायेमाःगु ।
१२) समुदायया सरोकार दइगु व प्रभावित जुगु न्ह्यागु ज्याखँया निर्णय यात कया नं समुदायया अग्रिम जानकारी सहितया मन्जुरी (एफपिक) कया यायेमाःगु।
१३) नेपालं अनुमोदन यानातःगु अन्तर्राष्ट्रिय कानुन आइएलओ १६९, आदिवासी जनजाति अधिकार सम्वनिध संयुक्त राष्ट्रसंघीय घोषणा पौ (युएनड्रिप) यात कार्यान्वयन यायेगु प्रतिबद्धता प्वंकेमाःगु ।
