धार्मिक आस्थाया केन्द्रविन्दु् जुयाच्वंगु ऐतिहासिकया लिसें विश्व सम्पदाया धलखय् लाःगु स्वयम्भूइ वंगु तःभुखाचं क्षति जूगु सम्पदात भिंके क्वचायकेगु यानाहःगु दु ।

थ्वहे झ्वलय् स्वयम्भू महाचैत्य लिक्क च्वंगु दोङ्क् छ्योलिङ देवा धर्म पुलांगु गुम्बा राष्ट्रिय ध्याङ श्रद्धेय गुरु कुश्यो छेच्युजुया अवतारी गुरु जिग्मे छोइङ नोर्बु रिम्पोछेजु अले गुठी संस्थानया प्रशाशक किरण शाक्य मंकाः कथं उलेज्या जुगु दु।

२०७२ साल बैशाख १२ गतेया तःभुखाचंं क्षतिग्रस्त जूगुलिं उगु गुम्बाया पुजारी तेन्दर लामाया न्ह्यज्यां, भूटान सरकार व मेमेगु थीथी संस्था व ब्यत्तित्वपिनिगु आर्थिक ग्वहालि व पुरातत्व बिभागया प्राबिधिक ग्वहालिइ गुम्बाया ल्ह्वनेज्या क्वचाःगु खः ।

उगु गुम्बा दयकेत भुटान सरकार, बुद्ध धर्म महाबिहार साङ्गे छ्योलिङ गुम्बा, पुजारी तेन्दर लामा व भक्तजनपिनिगु आर्थिक ग्वहालि याःगु खः।

मंगलवाः ग्रस्तोदित खग्रास चन्द्रग्रहण जुइगु दु । थौं सनिलया ५ः११ ताः इलय् चन्द्रोदय जुइधुंकाः सनिलया ५ः१३ ताः इलय् सूर्यास्त जुइ धुंकाः ग्रहण स्पष्ट रुपं खनेदइ ।

नेपाल पंचांग निर्णायक विकास समितिं सनिलया ५ः२७ ताः इलय् ग्रहणया सुरु जुइगु जानकारी बिःगु दु। अथेहे, सनिलया ६ः३४ ताः इलय् ग्रहण क्वचाइगु जूगु दु । नेपाल पंचांग निर्णायक विकास समितिया कथं, मंगलवाः जुइगु ग्रस्तोदित खग्रास चन्द्रग्रहण भरणी नक्षत्र व मेष राशिया मनूतय्त अतिकं कष्टदायक जुइ धका धाःगु दु।

चन्द्रग्रहण मेष राशियात घात, वृष राशियात व्यय, मिथुन राशियात लाभ, कर्कट राशियात सुख, सिंह राशियात माननाश, कन्या राशियात कष्ट फल बिइगु योग दु धका समितिं पिथंगु राष्ट्रिय पंचांगय् न्ह्यथनातःगु दु । अथेहे, तुला राशियात स्त्रीपीडा, वृश्चिक राशियात सुख, धनु राशियात चिन्ता, मकर राशियात व्यथा, कुम्भ राशियात श्रीप्राप्ति व मीन राशियात क्षतिया फल जुइगु नं राष्ट्रिय पंचांगय् न्ह्यथनातःगु दु ।

धर्मशास्त्रविद् प्रा.डा. रामचन्द्र गौतमया कथं, चन्द्रग्रहणया गुघौ न्ह्यःनिसें सुतक जुइगु धर्मशास्त्रया ग्रन्थय् न्ह्यथनातःगु दु । वकथं मंगलवाः सुथय् ८ः११ ता ईनिसें मचा, बृद्ध व ल्वगिपिं बाहेकयात भोजन निषेध यानातःगु दु।

राष्ट्रपति विद्यादेवी भण्डारी आइसल्याण्ड प्रस्थान याःगु दु।

हलियकं मिसा नेतापिनिगु पुचः वुमेन पोलिटिकल लिडर डब्लूपीएलया ग्वसालय् ८–१० नोभेम्बरय् तक जुइगु रेक्जाभिक ग्लोबल फोरमय् ब्बति कायेगु निति थौं सोमबाः बहनि आइसल्याण्ड प्रस्थान याःगु खः।

राष्ट्रपति भण्डारीयात त्रिभुवन अन्तर्राष्ट्रिय विमानस्थलय् उपराष्ट्रपति नन्दबहादुर पुन, राष्ट्रिय सभाया अध्यक्ष गणेशप्रसाद तिमिल्सिना लगायतपिन्स विदाइ याःगु खः।

डब्लूपीएल न भण्डारीयात थुगु दँया डब्लूपीएल ट्राइलब्लेजर अवार्ड लःल्हाइगु ज्याझ्वः दु।

वंगु चान्ह्य नेपाः–चीन सीमा क्षेत्रय् भुखाय् ब्बःगु दु। उगु भुखाचं नेपाःया पूर्वी क्षेत्रय् न महसुस जुगु खः।

राष्ट्रिय भूकम्प मापन केन्द्रया कथं वंगु चान्ह्यः १० बजे जुया १३ मिनेटय् ताप्लेजुङयो चीननाप सीमा क्षेत्रय् ५ दशमलव ३ रेक्टर स्केलया खः धका धाःगु दु।

येँ महानगरनाप इजरायलं खुल्ला व्यायामशाला दयकेगु थाय् माग याःगु दु।

नेपाःया लागि इजरायली राजदूत खनान गोडेरं, खुल्ला व्यायामशाला दयकेगु लागि माःगु प्रक्रिया मिलेयाना बिइत महानगरनाप इनाप याःगु दु।

महानगरया उपप्रमुख सुनिता डंगोलया ज्याकूथीइ राजदूत गोडेरं अथे प्रस्ताव याःगु खः। उपप्रमुख डंगोलं गोडेरयात वडा ३, ४ वा ८ य् जुइ फइगु धका धयादीगु खः।

अथे नापलायेगु झ्वलय् राजदूत गोडेरं, थ्व स्वया न्ह्यः न महानगरनाप सहकार्य यायेगु कुत यायेत स्वसां कार्यान्वयन याये मफुगु धका धयादीगु खः । थुगु पटक सहरी स्वास्थ्यया लागि खुल्ला व्यायामशाला दयकेगु ज्याझ्वः दु धका धयादीगु खः।

इजरायलं नेपाःया किसानपिनिगु लागि तर्जुमा यासे आयय् आधारित सीप विकासया ज्याझ्वःयात लिच्वः बिइगु कथं कुतः यायेगु जुइ धका राजदूत गोडेरं धयादीगु खः।