येँ क्षेत्र नं ७ य् प्रतिनिधि सभा सदस्य पदया लागि जनता समाजवादी पार्टी (जसपा) नेपालया पाखे उम्मेदबार जूयादीम्ह राजेन्द्रप्रसाद श्रेष्ठं थःगु उम्मेदबारी समग्र येँ विकासया लागि खः धका धयादीगु दु।

वयकलं गैरन्यायिक सतक विस्तार पीडित जूपिन्त पुनस्थापित यायेमाः धका धयादीगु दु। येँय् यक्को स्ववासी सतक विस्तारया नामय् दुगु छेँ विना मुआव्जा थुनाबिइवं पीडित जुगु धका धयादीसे श्रेष्ठं थः त्यातकि अज्यापि पीडितपिन्त पुनस्थापित यायेगु प्रतिवद्धता यानादीगु खः।

बिहीबाः राजधानीइ जुगु छगु पत्रकार सम्मेलनय् श्रेष्ठं बाबुराम भटराई प्रधानमन्त्री जुगु इलय् सतक विस्तारया नामय् यक्को येँय् च्वपि विच्चली जुगु धका धयादीगु खः। सडक विस्तारं येँया स्ववासीपिन्त तसकं अन्याय जूगु दु धका धयादीसे वयकलं सतक विस्तार यायेगु स्वया येँ च्वपिनिन्त बचे यायेमाःगु धका धयादीगु खः।

वयकलं थः न्यागु ज जल, जमिन, जंगल, जडिवुटी व जनशक्तिया यक्को सदुपयोग याना विकासया आधार तय यायेत तत्पर दु धका धयादीगु खः। येँया ७ नम्वर क्षेत्रय्  ६१ हजार मतदातापि दु।

थौं येँ महानगरपालिका १८ वडाया पुष्पलाल पार्कय् नेपाल संवतया प्रबद्र्धक शंखधर साख्वा व नेपालभाषा मंकाः खलःया नायः नाप मानवअधिकारकःमि पद्मरत्न तुलाधरया झ्वाताः छगु ज्याझ्वः दथुइ मंकाः खलःया नायः जनकबि दुर्गालाल श्रेष्ठं उलेज्या यानादीगु खः।

येँ महानगर १८ वडाध्यक्ष हुच्छेकाजी महर्जनया सभाध्यक्षताय् जुगु उगु ज्याझ्वलय् येँ महानगरपालिकाया निवर्तमान मेयर बिद्यासुन्दर शाक्य, नरेशबीर शाक्यपिनिगु न उपस्थिति दुगु खः। उगु झ्वाताः कलाकार श्याम तुलाधरं दयकूगु खः।

युवा नेत्र सेवां किपुया नगर मण्डप श्रीकीर्ति विहारय् मिखाया ल्वगिपिनिगु निःशुल्क उपचारया नापनापं निःशुल्क हे मोतिबिन्दु अप्रेशन शिविर न्ह्यागु दु।

विहिबाःनसें न्ह्याःगु उगु शिविरय् थीथी थासं मिखा जाँचय् यायेगु नाप मोतिबिन्दुया नं अप्रेशन यानागु धका संस्थाया नायः सिद्धार्थ रन्जितं धयादीगु दु। नीन्यादँ न्ह्यःनिसें मिखा ल्वयया ख्यलय् सामाजिक सेवायाना वया च्वंगु थुगु संस्था खः। विहिबाः न्ह्यागु शिविरय् न्हापांगु दिं मिखा परिक्षण व थौं मोतिबिन्दु अप्रेशन याइगु खँ संस्थाया न्वकु श्रीकुमार महर्जनं जानकारी बियादिगु खः।

संस्थाया निखुक्वःगु बुदिंया लसताय् किपुलिइ विहिबाः न्ह्याःगु शिविर शनिबार छगू औपचारिक ज्याझ्वः याना क्वचायेकिगु जुउगु दु ।

उगु ज्याझ्वलय् अप्रेशन जूपिनिगु मिखाया पत्ति चायेकेगु व मिखा सुसाकुसा या विधि नं स्यनिगु खँ ग्वसाखलःपाखें जानकारी बिउगु दु ।

नेकपा (एकीकृत समाजवादी) येँ महानगरपालिका १५ या शाखा अध्यक्ष राजा शाक्ययात कारवाही याःगु दु।

शाक्यं स्वतन्त्र उम्मेदवारी बिइवं पाटीया निर्णय अःखः ज्या याःगु धासे येँ जिल्ला कमिटीं पार्टीया साधारण सदस्य तक मजुइगु कथं कारवाही न्ह्याकूगु खः।

बिहीबाः जिल्ला कमिटी अध्यक्ष एलपी श्रेष्ठं छगु पत्र जारीयासे शाक्ययात कारवाही यानागु धका जानकारी बिःगु खः। श्रेष्ठं जारी याःगु पत्रय् शाक्ययात पार्टीया निर्णय विपरित ज्या याःगु धका धासे साधारण सदस्य तक मजुइगु कथं कारवाही यानागु धका उल्लेख याःगु दु।

नेकपा (एकीकृत समाजवादी) येँ जिल्ला निर्वाचन क्षेत्र नम्बर ८ अन्तरगत महानगरपालिका १५ या शाखा अध्यक्ष तक जुयादीम्ह शाक्यं पार्टीया निर्णय अःखः स्वतन्त्र उम्मेदवारी घोषणा याःगु खः।

नेकपा एमाले क्षेत्र न ८ य् थौंनिसे घरदैलो ज्याझ्वः न्ह्याकुगु दु।

क्षेत्र न ८ य् थौं येँया नबहीनिसे सुरुयाना दफतर, न्हुसा, लाय्कूसा, झोछेँ जुया नबहीलय् क्वचायकूगु खः।

थौं जुगु घरदैलो ज्याझ्वलय् एमाले ८ या प्रतिनिधि सभाय् शिवसुन्दर राजबैध व बागमती प्रदेशसभा क्षेत्र न ८ (१) य् राजेश शाक्यं उम्मेदवारी बिःगु खः।