नेकपा माओवादी केन्द्रया अध्यक्ष पुष्पकमल दाहाल ‘प्रचण्ड’ प्रधानमन्त्रीइ नियुक्त जूगु दु।

राष्ट्रपति विद्यादेवी भण्डारीं थौं आइतबाः सनिलय् पुष्पकमल दाहालयात प्रधानमन्त्रीइ नियुक्त याःगु खः। आइतबाः प्रचण्डं थःगु दल नेकपा माओवादीनाप  नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी व राष्ट्रिय उन्मुक्ति पार्टीया समर्थनय् प्रधानमन्त्रीया दाबी पेश याःगु दु।

स्वतन्त्र सांसदपि प्रभु साह, किरणकुमार साह व अमरेशकुमार सिंह न  समर्थन यायेवं २७५ म्ह प्रतिनिधिसभाया सदस्यपिन्स प्रचण्डं १६९ म्ह सांसदपिनिगु समर्थन दुगु खः। प्रतिनिधसभाया निर्वाचनय् छु न छगु दलया बहुमत मवयेवं राष्ट्रपति विद्यादेवी भण्डारीं संविधानया धारा ७६ (२) कथं मिलिजुली सरकार दयकेत आइतबाः बहनिया ५ बजेतक ई बिःगु खः।

सरकार गठनया लागि नेकपा एमालेया अध्यक्ष केपी शर्मा ओलीया निवास बालुवाटारय् जुयाच्वंगु प्यंगु दलया बैठकय् नेकपा माओवादी केन्द्रया उपमहासचिव वर्षमान पुन न ब्बति काःगु दु।

मेपि नेता स्वया लिपा थ्यम्ह पुनयात लसकुस यासे ओलीं धाःगु दु, ‘भिं उसाँय् यासे लिहा झायादीगु दु। आः न्ह्याः वनेनु।’ चुनावलिपा स्वास्थ्य उपचारया लागि चीन झाम्ह वर्षमान पुन छु दिं न्ह्यः जक स्वदेश लिहा झायादीगु खः।

नेकपा एमालेया अध्यक्ष केपी शर्मा ओलीं निवास बालकोटय् प्यंगु दल दथुइ छलफल सुरु जुगु दु।

एमाले अध्यक्ष ओली, माओवादी केन्द्रया अध्यक्ष पुष्पकमल दाहाल प्रचण्ड, राष्ट्रिय स्वतन्त्र पार्टीया सभापति रवि लामिछाने व जनता समाजवादी पार्टीया नेता अशोक राई लगायतया नेतापि दथुइ छलफल सुरु याःगु दु।

नेपाली कांग्रेसं राष्ट्रपति व प्रधानमन्त्री निगु हे पद त्वःत्येत तयार मदु धका धायेवं माओवादी सत्ता गठबन्धनया वार्ता त्वःता एमालेनाप छलफल याःगु दु। रास्वपा व जसपा पन .थपे जुइवं प्यंगु दलनाप सरकार गठनया लागि माःगु बहुमत थ्यनिइ।

एमालेनाप ७८, माओवादी केन्द्रनाप ३२, रास्वपानाप २० व जसपानाप १२ म्ह सांसदपि दु। २७५ सदस्यीय प्रतिनिधिसभाय् सरकार गठनया लागि १३८ म्ह सांसदपिनिगु समर्थन माः। मिलिजुली सरकार गठनया लागि राष्ट्रपति विद्यादेवी भण्डारीं बिःगु ई थौं आइतबाः सनिलया ५ बजे क्वचाइ।

१४ म्ह सांसद दुगु दल राप्रपा न एमाले नाप खँ ल्हानाच्वंगु दु। राप्रपाया अध्यक्ष राजेन्द्र लिङ्देन एमाले अध्यक्षनाप वार्तायाना पिहावःगु दु।

नेकपा माओवादी केन्द्रया अध्यक्ष पुष्पकमल दाहाल प्रचण्ड एमाले अध्यक्ष केपी शर्मा ओलीया निवास बालकोटय् वःगु दु।

प्रधानमन्त्रीया सरकारी निवास बालुवाटारया बैठकं पिहावया प्रचण्ड ओलीयात नाप लायेत बालकोटय् वःगु खः। राष्ट्रपति विद्यादेवी भण्डारीं सरकार गठनया लागि बिःगु ई थौं आइतबाः सनिलया ५ बजे क्वचाइगु जुगु दु।

माओवादी अध्यक्ष प्रचण्ड प्रधानमन्त्री जुइ कुतः जुयाच्वंगु खः। सत्तारुढ गठबन्धनया सहमति मजुइवं एमालेनाप सहकार्यया लागि बालकोटय् वःगु धका माओवादी निकट स्रोतं धाःगु दु।

वन बालुवाटारय् बैठक त्वःता नेकपा माओवादी केन्द्रया अध्यक्ष पुष्पकमल दाहाल प्रचण्ड थःगु निवास खुमलटारय् लिहावःगु दु।

नेकपा एमालेया अध्यक्ष केपी शर्मा ओलीयात नापलायेगु निति बालकोट वने धाःसा थःगु हे निवासय् वःगु खः। अय्न माओवादीया महासचिव देव गुरुङ नाप मेपि नेतापि ओली निवास बालकोटय् वःगु दु।

आइतबाः प्रधानमन्त्री शेरबहादुर देउवाया सन्देश ज्वना नेपाली कांग्रेसया नेता विमलेन्द्र निधिं प्रचण्डया निक्वःगु पालय् प्रधानमन्त्री पद कायेत इनाप याःगु खः।

निधिं राष्ट्रपति व प्रधानमन्त्री त्वते फइ मखुगु धका धाःगु खः। वया लिपा प्रचण्डं पार्टी पदाधिकारीपिन्त गठबन्धनय् संकट वःगु दु धका धाःगु दु।