शक्ति बाँडफाँटया विषय छलफल यायेत सत्ता गठबन्धनया बैठक सुरु जूगु दु। प्रधानमन्त्री निवास बालुवाटारय् जारी जूयाच्वंगु बैठकं वइगु सरकारया नेतृत्व सू ना यायेगु धइगु निति सहलह यानाच्वंगु खः।

बहुमतया सरकारं नेतृत्व दाबी यायेगु निति राष्ट्रपति विद्यादेवी भण्डारीं बिःगु ई थौं सनिलया ५ बजे बजे क्वचाइगु जुगुलि शक्ति बाँडफाँटया सहमति यायेगु कुतः जुयाच्वंगु खः। सहमति यायेगु निति शीर्ष नेतापि बिस्कं बिस्कं व मंकाः बैठक च्वनाच्वंगु दु।

बैठकय् सहभागी छम्ह नेताया कथं गठबन्धनया हे सरकार दयकेत कांग्रेस, माओवादी केन्द्र व एकीकृत समाजवादीया शीर्ष नेतापि सहमत जूगु दु।

कांग्रेस सभापति शेरबहादुर देउवा व माओवादी अध्यक्ष प्रचण्डं निदँ निदँ सरकारया नेतृत्व याये धुका प्रतिनिधिसभाया ल्यःदनिइगु कार्यकालया दँच्छि एकीकृत समाजवादीया अध्यक्ष माधवकुमार नेपालं सरकार चले यायेगु विकल्पय् छलफल जुयाच्वंगु खः। अय्न देउवा व प्रचण्डमध्ये न्हापा सू प्रधानमन्त्री जुइगु विषय छगु मत जुइ फुगु मदुनि ।

सत्ता गठबन्धनया बैठक च्वने न्ह्यः प्रधानमन्त्री शेरबहादुर देउवा व माओवादी केन्द्रया अध्यक्ष पुष्पकमल दाहाल प्रचण्डपि छलफल याःगु दु।

प्रधानमन्त्री निवास बालुवाटारय् देउवा व प्रचण्ड दथुइ अलग्गै छलफल याःगु खः। प्रचण्डया स्वकीय सचिव रमेश मल्लं सत्ता गठबन्धनया छलफल याये न्ह्यः कांग्रेस व माओवादी केन्द्रया नेतृत्वया दथुइ छलफल याःगु खः।

राष्ट्रपति विद्यादेवी भण्डारीं थौं सनिलया ५ बजे दुने बहुमतनाप सरकारय् नेतृत्वया दाबी यायेत दलपिन्त ई बिःगु खः।

नेपाल पत्रकार महासंघया केन्द्रीय साधारण सभा कर्णाली प्रदेशया राजधानी वीरेन्द्रनगरय् सुरु जूगु दु।

राष्ट्रपति विद्यादेवी भण्डारीं छगु ज्याझ्वः दथुइ केन्द्रीय साधारण सभा उलेज्या यानादीगु खः।

साधारणसभाय् नेकपा एमालेया महासचिव शंकर पोखरेल, नेकपा माओवादी केन्द्रया प्रवक्ता कृष्णबहादुर महरा, कर्णाली प्रदेश सरकारया मुख्यमन्त्री जीवन बहादुर शाही लगायतया नेतापिनिगु सहभागी दुगु खः।

उगु केन्द्रीय साधारण सभाय् देयन्यकं खुसः स्वया अप्पो पत्रकारपिनिगु ब्बति दुगु खः। महासंघया साधारण सभा निन्हुयकं न्ह्याइ।

थौं बिहीबाः शपथ ग्रहण याये त्वःफूपि प्यम्ह मध्ये निम्ह प्रतिनिधि सभा सदस्यपिन्त शपथ ग्रहण याकूगु दु।

माओवादी केन्द्रया महिन्द्र राय यादव व रामकुमार राई न थौं पद व गोपनियताया शपथ ग्रहण याःगु दु। निम्हेसित प्रतिनिधि सभाया ज्येष्ठ सदस्य पशुपति शमशेर जबरां संघीय संसद सचिवालय सिंहदरबारय् शपथ याकूगु खः।

आः निम्ह प्रतिनिधि सभा सदस्यपि त्वःफिना च्वंगु दनिइ। एकीकृत समाजवादीया प्रेमबहादुर आले व नेपाली कांग्रेसया माया राई न शपथ ग्रहण समारोहये छुटे जुयाच्वंगु दनिइ। आले पारिवारिक शोकय् दु सा राई अस्पतालय् भर्ना जूयाच्वंगु दु ।

उपिसं थःगु अनुकूलता कथं शपथ काये फइ धका संसद सचिवालयं धाःगु दु। प्रतिनिधि सभाया मेपि सदस्यपिन्स संसद भवन न्हुगु बानेश्वरये म्हिगः बिहीबाः शपथ ग्रहण याःगु खः।

स्वनिगलय् मेगु छवाः तक फोहोरया व्यवस्थापन यायेत समस्या जुइगु दु । फोहोर वायेगु थाय् नुवाकोटया सिसडोलंनिसें दीर्घकालीन रुपं फोहोर व्यवस्थापन यायेगु कथं दयेकूगु बञ्चरेडाँडा तक वनेगु निगू किलोमिटर ताःहाकःगु लँ दयेकेमाःगुलिं वइगु छवाः तक फोहोर व्यवस्थापन याये मफइगु खँ धाःगु दु ।

सहरी विकास मन्त्रालयं फोहोरया गाडी वयेवने याइबलय् लँ दयेकेगु ज्याय् समस्या वःगु धासें येँ महानगरपालिकायात छुं न्हि फोहोरया गाडी छ्वया महयेत याःगु इनाप कथं आःया नितिं फोहोर व्यवस्थापनया ज्या दिकेत्यंगु खः । थुकिं यानाः आः थनिंनिसें स्वनिगःया झिंच्यागू स्थानीय तहया फोहोर व्यवस्थापनया ज्या दीगु खँ धाःगु दु ।

स्वनिगलं न्हिं १२०० मेट्रिक टन फोहोर सिसडोलय् वांछ्वयाः व्यवस्थापन यायेगु ज्या जुयाच्वंगु दु । थुकी मध्ये नं दकलय् अप्वः येँ महानगरपालिका दुनें न्हिं ५०० मेट्रिक टन फोहोर उत्पादन जुयाच्वंगु दु । निजी व येँमनपाया निसः गः गाडीं फोहोर यंकेगु यानाच्वंगु खःसा थौंकन्हय् धाःसा न्यय्गः गाडी जक सिसडोल थ्यनाच्वंगु दु ।

स्वनिगलय् उत्पादन जुइगु फोहोर मध्ये ७५ प्रतिशत फोहोर सिसडोलय् व्यवस्थापन याना वयाच्वंगु दु ।