कालीमाटीइ खाद्य पसलय् म्याद सिधःगु, ओसे जूगु व किलं नःगु जाँकी व बजी लगायतया खाद्यबस्तु बरामद याःगु दु।

येँ महानगरपालिकां बजार व्यवस्थापन नाप उपभोक्ता हित संरक्षण समितिया संयोजक नाप उपप्रमुख सुनिता डंगोलया नेतृत्वय् अनुगमन यासे डी एण्ड डी खाद्य सप्लायर्सपाखे ७७ बोरा÷प्याकेट व अमन खाद्य किराना पसलय् प्यंगू बोरा÷प्याकेट बरामद याःगु दु।

सप्लायर्सय् एप्पल ब्राण्डया १० बोरा जाकी विक्री यायेत रोक लगे याःगु दु। सप्लायर्सपाखे बरामद यागु खाद्य सामग्री १० केजीया खुगु बोरा व ५ केजीया छगु बोरा मस्यौरा, २५ किलो तौलया ४९ बोरा व १ किलोया ५० प्याकेटया छगु बोरामा प्याक यानातःगु खुगु बोरा लङ्ग्रेन जाकी खः।

अथेहे १२ लिटरया छगु कार्टुनय् प्याक यानातःगु गुगुं कार्टुन चिकं, २५ किलो तौल दुगु निगु बोरा चना, ५ कार्टुन साबुन बरामद याःगु खः। न्ह्यगू पसलय् अनुगमन यागु खः।

परराष्ट्रबिद नाप पुर्व राजदुत हिरण्यलाल श्रेष्ठया जहान मायादेवी श्रेष्ठ म्हिगः बहनि ८ बजे मन्त।

थौंकन्ह्यः बुढानिलकण्ठ नगरपालिका वडा नं. ८ भंगाल च्वनादीम्ह श्रेष्ठया जहान म्हिगः ७२ दँय् मदुगु खः। सासः ल्ह्यायेगु समस्या जुयाच्वंगु खः।

न्हापानिसे सासः ल्ह्यायेगु समस्या दुम्ह वयकःया स्वास्थ्य छक्वल स्यना गंगालाल अस्पताल यकूगु खः। मदुम्ह मायादेवी श्रेष्ठयात म्हिगः हे पशुपति आर्यघाटया विद्युतिय शवदाहगृहय् अन्त्यष्टि याःगु खः।

वयकः काय् मुजः श्रेष्ठ व भौं लिलि राजभण्दारी चिकित्सक जुयादी।

नेपाल संवत राष्ट्रिय न्हूदँ समारोह समिति ११४३ या अध्यक्षय् बौद्ध बिद्धान प्रा. डा. नरेशमान बज्राचार्ययात ल्यंगु दु ।

न्हूदँ समारोह समिति ११४२ या अध्यक्ष नीरञ्जनरन्त शाक्यया सभाध्यक्षताय् जुगु मुँज्यां प्रा. डा. बज्राचार्ययात ल्यंगु खः।

प्रा. डा. बज्राचार्ययात बज्राचार्य लुम्बिनी बिश्व बिद्यालयया उपकुलपति जुयादिइ धुंकुम्ह खःसा बौद्ध बिद्वान लिसें लुम्विनी दयेकुगु नेवाः म्हसिका दुगु बज्रयान बिहारया कजि कथं ज्या यानादिम्ह ब्यक्ति खः ।

मध्यपुर थिमि बचत तथा ऋण सहकारी संस्थाया झिंन्याक्वःगु वार्षिक साधारणसभा क्वचाःगु दु। उगु साधारण सभाय् थिमिइ न्हय्गू ऐतिहासिक, धार्मिक व सांस्कृतिक खलः पुचःयात सम्मान याःगु खः ।

सांस्कृतिक ख्यलय् योगदान बिउगुपि थिमिइ ऐतिहासिक नीलबाराही गंप्याखं (मध्यपुर, बोडे), लाय्कू भैलः प्याखं संचालन समिति, महाकाली प्याखं व्यवस्थापन समिति (दिगुत्वाः), थिमि गुंला बाजं खलः (वज्राचार्य समुदाय), मध्यपुर थिमि गुंला बाजं (प्रजापति समुदाय), येँयाः पुन्हिया म्ये प्वाः खनेगु जात्रा व्यवस्थापन समिति व मानन्धर गुंला बाजं (सिवा साय्मि खलःयात सम्मान याःगु खः ।

ज्याझ्वलय् मूपाहां बागमति प्रदेशया खानेपानी, उर्जा व सिँचाइ मन्त्री वसन्त मानन्धरं दोसल्लां न्ययेकाः हनापौ लःल्हानादीगु खः। थिमि नगरपालिका ८ वडाअध्यक्ष रमेश थापा श्रेष्ठं स्थानीयस्तरय् संचालन जुयाच्वंगु सहकारी जक बचत यायेत इनाप यानादिल ।

संस्थाया अध्यक्ष कृष्णकाजी मानन्धरया सभापतित्वय् मध्यपुर थिमि नगरपालिका सहकारी शाखाया छगू हे सत्रं साधारण सभा सिधयेकेगु कार्यविधिं न्ह्याःगु ज्याझ्वलय् शेयर सदस्यपिनिगु सुझाव संकलन यानाः निर्णय पारित याःगु खः ।

संस्थाया कोषाध्यक्ष प्रेमसुन्दर श्रेष्ठ व लेखा सुपरिवेक्षण समितिया सुन्दर श्रेष्ठं थःथःगु प्रतिवेदन न्ह्यब्वयादीगु ज्याझ्वलय् मिसा उपसमितिया संयोजक ललिता यलायं लसकुस यानादीगु खः ।

दल्लु च्वंगु जय माता भगवती बचत तथा ऋण सहरकारी संस्थाया २३ क्वःगु दँमुज्या क्वचाःगु दु।

उगु दँमुज्याय् संस्थाया सल्लाहकार लक्ष्मण राजोपाध्याय न न्ह्यब्बायादीगु “श्री बिजयश्र्वरी माता” नां या सफू संस्कृति, पर्यटन नाप नागरिक उड्डयन मन्त्री जीवनराम श्रेष्ठं छगु ज्याझ्वः दथुइ उलेज्या यानादीगु दु।

उगु ज्याझ्वलय् येँ महानगरपालिका १५ वडाध्यक्ष ईश्वरमान डंगोलया न उपस्थिति दुगु खः।