नेवाः पत्रकार राष्ट्रिय दबु सिन्धुपाल्चोक शाखाया अबिधेसन क्वचाःगु दु। पत्रकार दबु सिन्धुपाल्चोक शाखाया अध्यक्षय् रबिन्द्र श्रेष्ठ सर्वसम्मत निर्वाचित जुगु दु।

अथेहे उपाध्यक्ष सरु श्रेष्ठ, सचिबय् सुप्रीन्स कसजू व कोषध्यक्षय् कल्पना श्रेष्ठ सर्वसम्मत निर्वाचित जुगु दु। सदस्यय् शान्ती श्रेष्ठ, सुमित्रा श्रेष्ठ, दुर्गा श्रेष्ठ निर्वाचित जुगु दु।

प्रदेश प्रतिनिधिइ हेमन प्रधान पूर्ण श्रेष्ठ व केन्द्रिय प्रतिनिधिइ सुरेश कसजू व जीवन श्रेष्ठयात ल्यःगु दु।

येँ महानगरपालिकाय् न्याम्ह विभागीय प्रमुखपि हेरफेर याःगु दु।

महानगरया कथं महानगरया सामाजिक विकास विभागया दीपक अधिकारी प्रशासन विभागय् व वित्त विभागका यादव घिमिरे आन्तरिक लेखा परीक्षण विभागय् सरुवा याःगु दु।

विभागया गोपाल पोखरेलयात सामाजिक विकास विभागय्, नुरनिधि न्यौपाने मेयरको सचिवालय व विभागीय प्रमुखय् व सहायक प्रवक्ता जुयाच्वम्ह प्रशासन विभागया महेश काफ्लेयात सार्वजनिक निजी साझेदारी कार्यक्रम (पीपीपी) सरूवा याःगु दु।

प्रमुख प्रशासकीय अधिकृत बसन्त अधिकारी वये धुका महानगरका थीथी विभागय् नियमित रिर्पोटिङ जुयाच्वंगु दु। अधिकारीं कार्यसम्पादन सम्झौता कथं ज्या अपुइ मखु धका निर्देशन बिःगु खः।

शिक्षाविद् लक्ष्मण राजवंशीं च्वयादीगु बाखंया लिधंसाय् दयेकुगु बहुभाषिय् संकिपा सनाखतया ट्रेलर पितब्वज्या छगू ज्याझ्वःया दथुुइ रसियन कल्चर सेन्टरय् जुगु दु।

उगु ज्याझ्वलय् ख्यालिजुजु मदनकृष्ण श्रेष्ठया मूपाहाँ कथं झायादीगु खःसा राजवंशीयात लुमंका च्वयातःगु लुमन्ति खँ मुनाया नं पितब्वज्या जुगु खः।

ज्याझ्वलय् सनाखत संकिपाया निर्देशक आर्यम नकःमिं लक्ष्मण राजवंशी छम्ह ज्वमदुम्ह साहित्यकार खः धयादीसे वय्कया बाखं लाशया सनाखत ब्वना थः तसंक प्रभावित जूगु खँ कनादिगु खः।

डा सर्वोत्तम श्रेष्ठया सभाध्यक्षताय् जुगु उगु ज्याझ्वलय् जयदेव कृष्ण श्रेष्ठं लसकुस यानादीगुलि समालोचक लक्ष्मीप्रसाद गौतम व परराष्ट्रविद् प्रा हिरण्यलाल श्रेष्ठं राजवंशीया स्मृतिग्रन्थयात कया थःगु नुगः खँ तयादीगु खः।

नेवाः न्ह्यलुवाः निरञ्जनरत्न शाक्यं च्वयादीगु न्यापु म्येया म्यूजिक भिडियो पिहां वयेत्यःगु दु।

शाक्यं थीथी इलय् च्वयादीगु न्यापु म्येया म्यूजिक भिडियोया निर्माण नांजाःम्ह निर्देशक नाप कलाकार रामकृष्ण खड्गीं निर्देशन यानादीगु खः।

थुगु म्यूजिक भिडियोया उलेज्या जनगायक भृगुराम श्रेष्ठं थ्व हे वइगु मंसीर ९ गते शनिवाः सीटीसी मलय् यानादी त्यःगु दु।

लोकतान्त्रिक समाजवादी पार्टी लोसपा नेपालया संसदीय दलया नेताय् महन्थ ठाकुर सर्वसम्मत जूगु दु।

ठाकुर पार्टीया अध्यक्ष न खः। लोसपां प्रतिनिधि सभाय् प्यःगु सिट त्याकूगु खः। ठाकुरनाप, सर्वेन्द्रनाथ शुक्ला, शरत सिंह भण्डारी व रामप्रकाश चौधरी लोसपापाखे सांसद निर्वाचित जुगु खः।

समानुपातिकय् थ्रेस होल्ड कटे याये मफुगुलि लोसपा राष्ट्रिय दल जुइ मफुगु खः।