सेयर बजाः परिसूचक नेप्से थौं बुधबाः ५.८९ अंकं कुहावया १८६७.२२ अंकय् बन्द जूगु दु।

बैंकिङ उपसूचक ०.२७ प्रतिशतं थहावगुलि वित्त कम्पनी उपसूचक धाःसा १.५ प्रतिशतं कुहावःगु दु। अथेहे मेमेगु उपसूचक १.३९ प्रतिशतं कुहावया दक्को उपसूचक १ प्रतिशत स्वया म्हो कुहावःगु खः।

बुधबाः नेप्सेय् २४ लाख ४० हजार ३०७ कित्ता सूचीकृत धितोपत्र किनबेच जुगुलि कारोबार रकम ८६ करोड ३८ लाख १७ हजार थ्यःगु दु। उकि मध्ये एनआईसी एशिया बैंकया दकलय् अप्पो ११ करोड ८२ लाख ४६ हजारया कारोबार जुगुलि नबिल बैंकया ३ करोड ९५ लाख ९ हजारया कारोबार जुगु खः।

अथेहे शिवम् सिमेन्टया ३ करोड ८५ लाख ७७ हजारया कारोबार जूगु दु। नेप्सेय्  २१२ कम्पनीया सेयर कारोबार जूगुलि १४० कम्पनीया सेयर भाः कुहावःगु दु। ६३ कम्पनीया सेयर भाः थहावःगु दु सा गुंगु कम्पनया सेयर भाः स्थिर जूगु दु।

उकि मध्ये आँधीखोला व सृजनशील लघुवित्तया सेयर भाः थहावना सकारात्मक सर्किट लेभलय् बन्द जुगु दु सा इस्टन हाइड्रोपावरेया सेयर भाः ९.८५ प्रतिशतं थहावःगु दु। पञ्चकन्या माई हाइड्रोपावरया सेयर भाः ६.२८ प्रतिशतं कुहावःगु दु सा गुडविल फाइनान्सइया सेयर भाः ३.६० प्रतिशत व सिनर्जी पावरया सेयर भाः ३.५० प्रतिशतं कुहावःगु दु।

प्रतिनिधिसभाया ज्येष्ठ सदस्य पशुपतिशमशेर जबरां पद व गोपनीयताया शपथ काःगु दु।

जबरायात थौं बुधबाः न्हिनय् राष्ट्रपति विद्यादेवी भण्डारीं पद व गोपनीयताया शपथ बिःगु खः। प्रतिनिधिसभाया सदस्य ज्येष्ठ सदस्यपाखे शपथ ग्रहण याकेगु प्रचलन दु।

थ्व स्वया न्ह्यः ज्येष्ठ सदस्यं राष्ट्रपति कार्यालयपाखे शपथ कायेमाःगु प्रावधान कथं जबरां शपथ काःगु खः।

वंगु मंसिर ४ गतेया चुनावं निर्वाचित प्रतिनिधिसभाया सदस्यपिन्स कन्ह्यः बिहीबाः न्हिनसिया १ बजे शपथ काइगु जुगु दु।

राष्ट्रिय प्रजातन्त्र पार्टीया संसदीय दलया नेताय् पार्टी  अध्यक्ष राजेन्द्र लिङदेन ल्यःगु दु।

थौं च्वंगु राप्रपा संसदीय दलया वैठकया लिङदेनयात सर्वसम्म दलया नेता ल्यःगु खः।

राप्रपां निर्वाचनया प्रत्यक्षय् ७ व समानुपातिकय् ७ याना १४ गु सीट संघिय निर्वाचित जुगु खः।

नेकपा एमाले न संसदीय दलया नेताय् अध्यक्ष केपी शर्मा ओलीयात निर्विरोध ल्यःगु दु।

थौं मंगलबाः च्वंगु संसदीय दलया बैठकं ओलीयात निर्विरोध दलया नेता ल्यःगु दु धका सांसद ठाकुर गैरे न धाःगु दु। उपाध्यक्ष विष्णुप्रसाद पौडेलं प्रस्ताव व मेम्ह उपाध्यक्ष सुवास नेम्वाङया समर्थनय् अध्यक्ष ओली दलयात नेता ल्यःगु खः।

दलया उपनेता, प्रमुख सचेतक व सचेतक धासा मेगु बैठकं ल्यइगु जुइ धका अध्यक्ष ओलीं सांसदपिन्त जानकारी बिःगु दु।

कमल प्रकाश मल्ल फाउण्डेशनया ग्वसालय् प्रज्ञा भवनय् विद्वान डा. कमल प्रकाश मल्ल विषय स्मृति ग्रन्थ छगु ज्याझ्वः दथुइ आनन्द सिद्धि तुलाधर, हेरम्व बहादुर राजभण्डारी, अच्यूत बहादुर राजभण्डारीपिन्सं मंकाः कथं उलेज्या यानादीगु दु।

फाउन्डेशनया नायः जनकवि दुर्गालाल श्रेष्ठं त्वाःदेवाय् मत च्याका ज्याझ्वःया उलेज्या यानादीगु खः । वरिष्ठ साहित्यकार फणीन्द्र रत्न बज्राचार्य, हेरम्व बहादुर राजभण्डरी, फाउण्डेशनया संरक्षक केदार भक्त माथेमा, आनन्द सिद्धि तुलाधर, अच्यूत बहादुर राजभण्डारी, डा.ज्योतिप्रभा तुलाधरपिन्सं मदुम्ह डा.कशल प्रकाश मल्ल नापया स्वापु व कमल प्रकाशया व्यत्तित्वया विषययात कया थःपिनिगु बिचाः तयादीगु खः।

पत्रकार सुरेश किरण मानन्धरं न्ह्याकादीगु उगु ज्याझ्वलय् मदुम्ह डा. मल्लया जहान लक्ष्मी मल्लं सु्भाय् न्वचु तयादीगु खः। प्रो. निर्मल मान तुलाधर प्रधान सम्पादक व प्रा. प्रेमशन्ति तुलाधर, भूषण प्रसाद श्रेष्ठ, रमेशकाजी स्थापित, राजेन्द्र महर्जन व सुरेश किरणपिनिगु सम्पादकय् उगु सफू पिथगु खःसा वरिष्ठ कलाकार चन्द्रमान मास्के सफूया देवः तयार यानादीगु खः।