येँ महानगरपालिकां थौं अनामनगर व धोबीखोला खुसि सिथय् दयकातःगु अवैध संरचना थुनेगु ज्या जुगु दु।

शुक्रबाः महानगपालिकां डोजर चले याना अनामनगरय् अवैध संरचना हटे याःगु खः। अनामनगरया अक्सिडेन्टल पब्लिक स्कुलं दयकातःगु अवैध संरचना थुनेगु ज्या जुगु दु।

नक्सा विपरीत दयकातःगु पःखाः महानगरपालिकां थुनेगु ज्या न्ह्याकाच्वंगु दु।

संस्कृति, पर्यटन नाप नागरिक उड्डयनमन्त्री जीवनराम श्रेष्ठ थौं शुक्रवाः शताब्दीपुरुष सत्यमोहन जोशीया नापलायेगु निति वयकःया छेँ वंगु दु

हलि नेवाः दबू न समन्वय याना मन्त्री श्रेष्ठयात शताब्दीपुरुष जोशी स्वास्थ्य अवस्थायात कया वयकःया छेँ वंगु खः। थौं शताब्दीपुरुष जोशी थःगु थौं कन्ह्यः स्वास्थ्य अवस्था कमजोर जुयावःगुलि स्वास्थ्य हेरचाह यायेत सरकारपाखे स्वास्थकःमिया ब्यवस्था याना बिउसा ज्यु धका धयादीगु खः।

मन्त्री श्रेष्ठं शताब्दीपुरुष सत्यमोहन जोशी नेपाःया धरोहर खः। वयकःया स्वास्थ्ययात कया सरकार गम्भीर जुगु दु। वयकःया माग कथं सरकारं २४ हे घण्टाय् स्वास्थ्यकःमिया ब्यवस्था याये। वयकः इच्छा कथं नेपाःया इतिहासय् चक्रसवंतया चित्रया कया बागमती प्रदेशया सरकार नाप खँल्हा थुगु ज्या पूरा यायेगु थःम्हेसिया बचं बियादीगु दु।

अथेहे हलि नेवाः दबुया अध्यक्ष सुरेन्द्रभत्त श्रेष्ठं शताब्दीपुरुष जोशीया स्वास्थ्य स्थितिया जानकारी सरकारयात बिउगु कथं नेपाल सरकारया प्रतिनिधि कथं संस्कृति, पर्यटन नाप नागरिक उड्डयनमन्त्री जीवनराम श्रेष्ठयात थःपिन्स समन्वययानागु खँ धका लहनान्युजयात धयादीगु खः।

अथेहे थौं च्वंगु मन्त्रीपरिषदया बैठकं शताब्दीपुरुष सत्यमोहन जोशीयात स्वम्ह स्वास्थ्यकःपिन्स हेरबिचाः यायेगु कथं ब्यवस्था जूगु दु धका मन्त्री श्रेष्ठं लहनान्युजयात जानकारी बियादीगु दु।

स्वास्थ्य क्षेत्र सुधारया माग यासे त्रिवि शिक्षण अस्पतालय् अनशन च्वनाच्वम्ह डा. गोविन्द केसीयात सासः ल्हाायेगलि समस्या खनेदुगु दु।

थ्व स्वया न्ह्यःयाःगु सम्झौता कार्यान्वयनया माग तया डा. केसी ११ दिं निसे अनशन च्वना च्वंगु खः।

डा. केसीया रक्तचापय् छु भचा ह्यूपाः वया छाति स्याइगु, प्वाः स्वायेगु लगायतया समस्या खनेदुगु खः।

धनगढीइ अनशन च्वना च्वम्ह केसीया स्वास्थ्यय् समस्या खनेदुलि झीन्हु कुन्हु म्हिगः येँ हःगु खः।

डा. केसीयात शिक्षण अस्पाल महाराजगञ्जय् एनेक्स १ भवनया कोठा नम्बर ५०१ या स्पेसल क्याबिनय् तयातःगु दु।

डेंगू संक्रमणं सीपि २५ म्ह थ्यःगु दु। इपिडिमियोलोजी नाप रोग नियन्त्रण महाशाखाया तथ्यांक कथं असोज ५ गते तक संक्रमित जूपिनिगु ल्याः १९ हजार ७६६ म्ह थ्यःगु दु।

अथेहे येँ दकलय् अप्पो ५ हजार ४२२ म्हेसित संक्रमण पुष्टि जूगु दु। यलय् ५ हजार २०६ व ख्वपय् ७८६ म्ह याना स्वनिगः दुने डेंगू संक्रमित जूपिनिगु ११ हजार ४१४ म्ह थ्यःगु दु।

वंगु २४ घण्टाया दुने देयन्यक ६६ म्हेसित कोरोना भाइरसया सङ्क्रमण पुष्टि जूगु दु।

पीसीआर व एन्टिजेन याना ३ हजार २ सय ६२ म्हेसिगु नमुना परीक्षण याउगुलि ६६ म्हेसित सङ्क्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

अथेहे १ सय ३७ म्ह कोरोना सक्रमणमुक्त जुगु दु।