यल महानगरपालिकां थःगु १०४ क्वःगु स्थापना दिवसया लसताय् ‘ललितपुर महानगर गौरव पुरस्कार’ लःल्हागु दु।

थौं शनिबाः छगु ज्याझ्वः दथुइ प्रधानमन्त्री शेरबहादुर देउवां वरिष्ठ धातु मूर्तिकार राजकुमार शाक्य, वरिष्ठ साहित्यकार छत्रबहादुर कायस्थ, प्राज्ञ कालु कुमाले व यल महानगरपालिकाया पूर्वप्रमुख बुद्धिराज बज्राचार्ययात उगु सिरपाः लल्हागु खः।

महानगर दुने कला, साहित्य व संस्कृतिया ख्यलय् महत्वपूर्ण योगदान बिउगुलि म्हतिइ १ लाख नगद नाप हनापौ लःल्हागु खः। उगु ज्याझ्वलय् प्रधानमन्त्री देउवां महानगर दुने उत्कृष्ट करदाताया सम्मान संस्थागत रुपं जेम्स स्कुल व व्यक्तिगत रुपं टाँसी तेन्जिङयात लःल्हागु दु।

प्रधानमन्त्री नाप नेपाली कांग्रेसया सभापति शेरबहादुर देउवां संसदय् प्रभावकारी भूमिका निर्वाह यायेत पार्टीपाखे निर्वाचित प्रतिनिधिसभाया सांसदपिन्त निर्देशन बिःगु दु।

प्रधानमन्त्री देउवां पार्टीपाखे निर्वाचित प्रतिनिधिसभाया सांसदपिन्त शनिबाः थःगु हे सरकारी निवास बालुवाटारय् सःता भिंतुना बिउसे संसदय् प्रभावकारी भूमिका निर्वाह यायेत निर्देशन बिउगु दु धका कांग्रेस नेता ज्ञानेन्द्रबहादुर कार्की न जानकारी बिःगु दु। 

नेपाली कांग्रेसं कन्ह्यः आइतबाः केन्द्रीय कार्यसम्पादन समितिया बैठक सःतूगु दु।

उगु बैठक कन्ह्यः न्हिनय् ३ बजे सानेपास्थित पार्टी कार्यालयय् च्वनिइगु जुगु दु धका पार्टी कार्यालयया मुख्यसचिव कृष्णप्रसाद पौडेलं जानकारी बिःगु दु।

वंगु ४ मंसिरया चुनावलिपा थ्व निक्वःगु कार्यसम्पादन समितिया बैठक खः । थुगु बैठकं संसदीय दलया नेता ल्ययेगु व न्हुगु सरकारया विषय छलफल जुइ धका धाःगु दु।

कांग्रेसय् आःतक सभापति शेरबहादुर देउवा, महामन्त्री गगन थापा लगायतपिन्स संसदीय दलया नेताय् दावी यानादीगु दु।

नेवाः पत्रकार राष्ट्रिय दबू, येँ जिल्लाया प्यक्वःगु मुँज्यां अरर्बिन्द्र मान सिंयात सर्वसम्मतं नायः ल्यःगु दु। अथेहे उपाध्यक्षय् प्रबिन महर्जन व बिमला मानन्धर, सचिवय् मनोजरत्न शाहीयात ल्यःगु दु।

अथेतु कोषाध्यक्षय् राजेन्द्र मानन्धर, सह सचिबय् हरिशरण डंगोल व सुष्मा महर्जनयात ल्यःगु दु। दुजलय् उद्धव खड्गी, सहयोग रंजित, बिजय सिं, सुबिन्द्र श्रेष्ठ, किचः सिं डंगोल, मोनिका मल्लयात ल्यःगु दु।

दबू येँ जिल्लाय् जुगु उगु ज्याझ्वलय् निर्वाचन कमितया संयोजक व दुजलय् केके मानन्धरं याकादीगु खः।

थौं शनिवाः सुथय् जगत सुन्दर ब्बनेकुथिइ जुगु छगु ज्याझ्वः दबूया केन्द्रिय नायः सुरजबीर बज्राचार्यं उलेज्या यानादीगु खः। उगु उलेज्या ज्याझ्वलय् दबूया सल्लाहकारपि पुष्कर माथेमा व सुरेशकिरण मानन्धर नाप बरिष्ठ पत्रकार नातिकाजी महर्जनपिन्स भिंतुना न्वचु तयादीगु खः।

वंगु चान्ह्यःसिया १२ बजेनिसे लागु जुइगु कथं पेट्रोल, डिजेल व मचिकंया भाः लिटरं स्वतका स्वतका कुहावंगु दु धका नेपाल आयल निगमं धाःगु दु।

न्हुगु भाः कथं आः पेट्रोल लिटरं १७८ व डिजेल÷मचिकंया भाः लिटरं १७५ तक थ्यःगु दु।

हवाई इन्धन व एलपी ग्याँसया भाः धाःसा यथावत हे धका निगमया प्रवक्ता विनितमणि उपाध्यायं जानकारी बिःगु दु।