जिल्ला प्रशासन ज्याकुथि, येँय् दर्ता जूगु सङ्घसंस्थाया पदाधिकारीपिंसं आर्थिक नापं प्रशासनितक अनियमितता याःगु ध्याचू अप्वःया वःगुलिं छानबिन न्ह्याकूगु दु।

येँया सहायक प्रमुख जिल्ला अधिकारी लिसें प्रवक्ता खिमराज भूसालं अनियमिताया ध्याचू अप्वःया वःगुलिं छानबिन न्ह्याकागु धयादिल। वय्कःया कथं आः येँय् दर्ता जूगु छुं सङ्घ संस्थाय् विधान अःखःया गतिविधि जुइगु, ज्यासना पुचलं मतिवःवः कथं ज्या याइगु, आर्थिक अनियमितता याइगु लिसेंया विषय तःक्वः हे ध्याचू वःगु दु।

उगु ध्याचू नापं उजुरीया सम्बोधत यायेत समिति हे दयेकाः छानबिन न्ह्याकूगु दु।प्रवक्ता भूसालं ध्याचू सम्बन्धय् छानबिन यानाः प्रतिवेदन न्ह्यब्वयेत जिल्ला प्रशासन ज्याकुथिया प्रशासकीय अधिकृतया संयोजकत्वय् स्वम्ह दुजः दूगु समिति नीस्वंगु दु व समितिं ज्या न्ह्याके धुंकूगु धयादिल।

नेकपा एमाले इलामय् दक्को महाधिवेशन प्रतिनिधि सर्वसम्मत कथं ल्यःगु दु।निम्ह प्रतिनिधि सभा दुजः दुगु इलामपाखे खुल्ला, आरक्षित कोटा याना नीम्ह प्रतिनिधि ल्यःगु खः।

इलाम–१ पाखे युवाय् टीका पौडेल निरोज, मिसापाखे उमादेवी सुनुवार, शकुन्तला लेप्चा व सावित्रा शिवा निर्विरोध जूगु खः। खुल्ला पाखे उदयबहादुर राई, उमेश गुरुङ, काजीमान कागते, खम्बसिंह लिम्बु व दीपककुमार थेबेयात ल्यःगु खः।इलाम–२ य् युवापाखे रामप्रसाद सुवेदी (रविन्द्र), मिसाय् टीकादेवी घिमिरे, दिलकुमारी लिम्बु व पबिमाया राईयात ल्यःगु खः।विघटित प्रतिनिधि सभाया सांसद सुहाङ नेम्वाङ खुल्लापाखें प्रतिनिधिइ ल्यःगु दु।

अथेहे नेम्वाङ नापं केशवकुमार धौराली, गणेशप्रसाद बराल, दिपेन्द्र खनाल, महेश बस्नेत व हेमन्त राईयात सर्वसम्मत प्रतिनिधि ल्यःगु खः। दलित कोटापाखे देवेन्द्र विश्वकर्मा न निर्विरोध प्रतिनिधि ल्यःगु खः।

नेपालभाषायात कामकाजि भाषा कथं लागू यायेमाःगु, साइनवोर्ड, लेटरहेडय् रञ्जना लिपि छ्यलेमाःगु, नेपाल संवतयात छ्यलेमाःगु व स्थानीय पाठ्यक्रम स्थानीय भाषा नेपालभाषां ब्वंकेमाःगु माग याना गोकर्णेश्वर नगरपालिकाय् ज्ञापन पौ लःल्हाःगु दु।

नेवाः देय् दबू गोकर्णेश्वर नगरपालिकाया नेतृत्वय् वंगु पुचलं बुधवाः मंसीर १० गते नगरपालिकाया मेयर दिपक कुमार रिसालयात ज्ञापन पौ लःल्हाःगु खः।भाषा आयोगं कामकाजि भाषाया रुपय् लागू यायेत छ्वःगु पौ, नेपाल सरकाया संघीय मामिला तथा सामान्य प्रशासन मन्त्रालयपाखें स्थानीय सरकारयात नेपाल संवतयात छ्यलेत जारी याःगु परिपत्र, शिक्षा, विज्ञान तथा प्रविधि मन्त्रालयपाखं मातृभाषां शिक्षाया नितिं संघीय मामिला तथा सामान्य प्रशासन मन्त्रालययात छ्वःगु पौ नापं घाना ज्ञापन पौ लःल्हाःगु खः।

देय् दबू गोकर्णेश्वर नगरपालिकाया नायः शिवहरी श्रेष्ठं मेयर रिसालयात ज्ञापन पौ लःल्हाये धुंकाः दबू स्वनिगः विशेष प्रदेशया नायः नविन थेच्वमि व निर्वतमान नायः श्रीकृष्ण महर्जनं भाषा, लिपि, संवत लागू यायेमाःगु नापं नेपालभाषां स्थानीय पाठ्यक्रम ब्वंकेमाःगु कारण व कानुनी आधारत कनादीगु खः।

उगु इलय् मेयर दिपक रिसालं ज्ञापन पौयात कार्यापालिकाया मँुज्याय् यंकाः ठोस निर्णय याना कार्यान्वयन यायेगु बचं बियदीगु खः।

जेनजी फ्रन्टया संयोजक रक्षा बमं प्रधानमन्त्री सुशीला कार्कीया सचिवालयं नैतिक भ्रष्टाचार याःगु धासे प्रमुख स्वकिय सचिव आदर्श कुमार श्रेष्ठयात तत्काल पदमुक्त यायेत माग याःगु दु।

बमया कथं प्रमुख स्वकिय सचिवं नातावाद व कृपावादयात थाय् बिउसे थः जहान नाप नातेदार तय्त सचिवालय नियुक्त याउगुलि सचिवालयया नैतिक भलसा गुकथं यायेगु धासे न्ह्यसः तःगु दु। बमं थुकियात “नैतिक भ्रष्टाचारया स्पष्ट उदाहरण” धासे प्रधानमन्त्रीया ध्यानाकर्षण याःगु दु।

बमं जेनजी आन्दोलन केवल आर्थिक भ्रष्टाचारविरुद्ध जक मखु नातावाद, कृपावाद व नैतिक अपवित्रता विरुद्ध जुगु धासे, संवेदनशील परिस्थितिइ गठन जुगु नागरिक सरकार हे नामय् स्वार्थपूर्ति यायेत स्वंगू द्धपः बिउगु खः। थज्यागु व्यवहारं “ह्यूपाःया निति बाहा वःगु हिंया अपमान” धका धाःगु दु।

प्रधानमन्त्री सुशीला कार्कीया प्रमुख स्वकीय सचिव आदर्शकुमार श्रेष्ठं थः परिवार व नातेदार तयेत सचिवालय नियुक्ति यायेगु ज्या न्ह्याकूगु दु।

प्रधानमन्त्री ना मन्त्रिपरिषद् कार्यालयसम्बद्ध स्रोतया कथं, नेपाल सरकारया सचिव सरहया सुविधा कयातम्ह आदर्शं थः जहान संगीता श्रेष्ठयात सहसचिव सरहया स्वकीय सहसचिव दयकूगु दु।

स्रोतं बिउगु जानकारी कथं, नातेदार कमला श्रेष्ठ न स्वकीय सहसचिवय् नियुक्त याःगु दु। संगीता व कमला निम्हेसितं असोज २ गते नियुक्त याःगु खः।अथेहे नासु सरहया प्रशासन सहायकय् पुनम श्रेष्ठ व रविना श्रेष्ठ न व हे दिं नियुक्त याःगु खः।