प्रधानमन्त्री सुशीला कार्की व पूर्वराष्ट्रपति विद्यादेवी भण्डारी थौं प्रधानन्त्री लिसें मन्त्रिपरिषद्या ज्याकुथि सिंहदरबारय् नापलानादीगु दु।

वंगु भदौ २४ गतेया आन्दोलनं क्षतिग्रस्त जूगु सिहंदरबारया संरचनाया अवलोकन लिपा पूर्वराष्ट्रपति भण्डारीं प्रधानमन्त्री कार्कीनाप नापलानादीगु खः।

वय्कःपिं दथुइ देय् याःगु समसामयिक राजनीतिक विषय खँल्हाबल्हा जूगु प्रधानमन्त्रीया सचिवालयं धाःगु दु।

सञ्चार लिसें सुचना प्रविधिमन्त्री जगदीश खरेलं सुशासनपाखे भ्रष्टाचारया अन्त्य व क्वःछिनातःगु मितिइ निर्वाचन क्वचायेकेत आःयागु सरकारं उच्च प्राथमिकता ब्यूगु धयादीगु दु।

श्रीकृष्ण प्रणामी जिल्ला सेवा समिति यलपाखें यलया इमाडोलय् च्वंगु कृष्ण मन्दिरय् थनिनिसें न्ह्याकूगु ‘श्रीमत्तारतम’ सागर पाठपारायण सप्ताह ज्ञान महायज्ञ २०८२ या सुभारम्भया लसताय् वय्कलं आः वइगु निर्वाचनय् सही प्रतिनिधित ल्ययेत इनाप यानादिल। वय्कलं धयादिल, “वर्तमान सरकार जेनेजि आन्दोलनया जगय् नीस्वंगु खः। सरकारया मू आज्जु निर्वाचन क्वचायेकीगु हे खः।

थुकी ग्वाहालि यायेत सकसितं इनाप यनाच्वनाः।” मन्त्री खरेलं धर्मया महत्व व महिमा उच्चकोटीया जूगु धयादिल। महालक्ष्मी नगरपालिकाया उपप्रमुख लक्ष्मी महर्जनं सत्कर्मया भावयात नालाकासें समाजसेवाय् जुइत बः बियादिल। ग्वसाः खलःया नायः राजन थापां असक्तयात ग्वाहालि यायेत सप्ताह ज्ञान महायज्ञ ग्वसाः ग्वयागु धयादिल।

सडक डिभिजन हेटौंडाया मू बजार याःगु सतक विस्तार ज्या तत्कालया निति स्थगित जूगु दु। हेटौंडा उपमहानगर  दुने याःगु राष्ट्रिय लोकमार्ग सतक सीमा संरक्षण ज्याझ्वः, २०८२ यात सर्वाेच्च अदालतं उत्प्रेषण आदेशया कारण स्थगित जूगु दु धका सडक डिभिजन प्रमुख गुरुप्रसाद अधिकारीं जानकारी ब्यूगु दु। सडक डिभिजनं शनिवाः छन्हु हे ५०० छेँखा थुना बिउगु दु।

थुनेगु निति छेँ सामान लिकात निन्हु ई बिउगु खः ।सर्वोच्च अदालतं हेटौंडाया सतक विस्तार सम्बन्धी सूचना कार्यान्वयन मयायेत मंसिर १९ गते उत्प्रेषण आदेश बिउगु खः।

सतक डिभिजनं वंगु मंसिर ५ गते महेन्द्र राजमार्गया रातोमाटेनिसे बुद्धचोक जुया राप्तीया ताँ तक व त्रिभुवन राजपथया बुद्धचोकनिसे सामरी ताँ तक सतक सीमा २५/२५ गज (७५/७५ फिट) विस्तार यायेगु धासे सतक दुने छेँ टहरा, संरचना चिइकेगु निति १५ दिं दुने सूचं पिकागु खः।

थौं दार्चुलाय् भुखाय् ब्वःगु दु। उगु जिल्लाया घुसा जःखः केन्द्रविन्दु जुयाः भुखाय् ब्वःगु खः।

थौं सुथसिया ८ः२८ ताः इलय् अपिहिमाल गाउँपालिकाया घुसा केन्द्रबिन्दु जुयाः ४.६ म्याग्निच्युडया भुखाय् ब्वःगु धकाः सुर्खेतय् च्वंगु भूकम्प मापन केन्द्रया प्रमुख चिन्तन तिमिल्सिनां राससयात जानकारी बियादिल।

भुखाय्या धक्का दार्चुला, बैतडीलिसेंया जःखःया जिल्लाय् वाः चायेकूगु खः।

ख्वप नगरपालिकां म्हिगः शनिबाः थन योमरी उत्सव, नसात्वँसा महोत्सव, स्थानीय उत्पादनया प्रदर्शनी नापं सांस्कृतिक ज्याझ्वः जूगु दु।

ख्वपया सूर्यमढीइ नगरप्रमुख सुनिल प्रजापतिं थीथी सवाःया योमरीया नापनापं सांस्कृतिक ¥यालीं नगरया थीथी लागाय् चाः हिलाः दत्तात्रय् थ्यंकाः महोत्सव जूगु खः। नेपाल मजदुर किसान पार्टीया नायः नारायणमान बिजुक्छेँनं उलेज्या यानादीगु छन्हु न्हिच्छिया महोत्सवय् स्थानीय नसा त्वँसाया सवाः कायेत स्वदेशी लिसें विदेशी पर्यटकत तःल्याखय् थ्यंगु खः।

ज्याझ्वलय् नायः बिजुक्छेँ नं ख्वप नगरपालिका थःथम्हं हे ऐतिहासिक, सांस्कृतिक व धार्मिक महत्व क्वबिनाः च्वंगु नगर जूगु धयादिसें थनया इतिहास, सम्पदा, सांस्कृतिक प्याखँलिसें नं पर्यटकयात सालाकाया च्वंगु धयादिल।नगरप्रमुख प्रजापतिं कला, तजिलजि, सम्पदा व थीथी सवाःयात स्वानाः पर्यटकतय्त सालाकायेत नगरपालिकां थुजाःगु ज्याझ्वः ग्वसाः ग्वयाःगु धयादिल। थुकीं स्थानीयतय्गु सवाः, कला, तजिलजिया म्हसिका अप्वःयेकेत व व्यावसायिधक कथं थनया नसाँ त्वँसाया प्रवद्र्धनय् तिवः दः वइगु वय्कलं धयादिल।

महोत्सवय् ब्वति कायेत स्वनिगःया थीथी थाय्या नापनापंया आन्तरिक पर्यटकत म्वःम्वः थ्यंगु खः। नगरपालिकां दत्तात्रयलिसें थासय् योमरी ब्वज्या, सल्ला गणेश, क्वाठण्डौँ, सूर्यमढी, जेलाँ लिसेंया थासय् नसात्वँसा महोत्सव व स्थानीय उत्पादनया प्रदर्शनी नापं याःगु खः। उगु प्रदर्शनीइ योमरी, वः, चताँमरी, जुजु धौ, ममःलिसें थीथी स्थानीय नसाँ त्वँसाया स्टलत तयातःगु खः।