नेकपा (एमाले)या नायः केपी शर्मा ओलीं नवगठित राष्ट्रिय स्वयंसेवक फोर्स (एनभिएफं) मुलुकय् सङ्कट व विपत्ति जुइबलय् जनताय् सुरक्षा व ग्वाहालिया निंतिं ज्या याइगु धयादीगु दु।

उगु सङ्गठनया केन्द्रीय कमाण्डया घोषणा यायेत थौं बबरमहलय् ग्वसाः ग्वःगु ज्याझ्वलय् पूर्वप्रधानमन्त्री ओलीं थ्व सुयागु नं विरुद्ध मखुसे हिंसा व अराजकताविरुद्ध गठन जूगु धयादिल। थुकिं जनधनया रक्षा, औद्योगिक प्रतिष्ठानया सुरक्षाय् ग्वाहालि यायेगु न्ह्यथनादिसें वय्कलं सुरक्षा निकाय व सामाजिक संस्थालिसे मिले जुया ज्या याइगु धयादिल।

नायः ओलीं विघटित प्रतिनिधिसभाया पुनःस्थापनापाखें मुलुकया राजनीतिक निकास जुइ धइगु पार्टीया अडान कनादिल। ज्याझ्वलय् राष्ट्रिय युवा सङ्घया पूर्वउपाध्यक्ष पुष्पराज श्रेष्ठया कजिसुइ राष्ट्रिय स्वयंसेवक फोर्सया केन्द्रीय कमाण्ड घोषणा याःगु खः।

येँ महानगरपालिका ७ वडाय् लाःगु सिफल (तपाः ख्यः) ख्यलय् फुटबल ग्राउण्ड दयेकेत्यंगु खँयात कयाः स्थानीय वासिन्दां विरोध याःगु दु। न्हापा २५ रोपनी जग्गाय् न्यनाच्वंगु तपा ख्यः थौंकन्हय् अतिक्रमण जुया १४ रोपनी जग्गाय् लिकुनाच्वंगु दु। सिफल ख्यलय् छगू अभिलेख कथं उगु थाय् प्यसः दँ न्ह्यवंनिसें थीथी जात्रा पर्व यायेगु यानाच्वंगु थाय् खः।

अन लक्ष्मीनर सिं मल्ल कालीन अभिलेख नं लूगु दु। नेपाल संवत ७४५ (वि.सं. १६८१) उगु अभिलेखय् दिगु द्यः व गुथिया जग्गा धकाः स्पष्ट उल्लेख यानातःगु दु। लिसें उगु ख्यःयात ‘इन्द्रबल खेत १ कर्ष’ धकाः जग्गाया प्रकृति नं न्ह्यथनातःगु दु। येँ महानगरपालिकां टेण्डर आह्वान यानाः अन रंगशाला दयेकेत्यंगु खः।

उकियात कयाः स्थानीय जनतां विरोध यायेगुया लिसें मेयर बालेन साहं दोहोरो मापदण्ड नालाकाःगु धासें विरोध नं याःगु दु। विरोधया झ्वलय् स्थानीय वासिन्दां मेयर साहं जग्गा लित हयेगु निंतिं थीथी ज्या यानाच्वंगु खःसां नं तपा ख्यःया जग्गा धाःसा थम्हं हे अतिक्रमण यानाः अनया सांस्कृतिक क्षेत्रयात नष्ट यायेत्यंगु द्वपं बिउगु दु। महानगरं गुमे जूगु ११ रोपनी जग्गा लित हयेगु पलेसां रंगशाला दयेकाः ल्यनाच्वंगु जग्गायात नं मदयेकेगु कुतः यानाच्वंगु द्वपं नं स्थानीय वासिन्दां बिउगु दु। स्थानीय वासिन्दाया कथं सिफल ख्यलय् ग्वलया नांजाःगु जात्रा मचाती जात्रा यायेमाःगु थाय् खः।

उकथं हे बच्छलेश्वर व चाःबही गणेद्यःया खः जात्रा थीथी थासय् चाःहिकेधुंकाः सिफल ख्यलय् हयाः भण्डारखालया पखालय् ल्वाकीगु परम्परा दु। उकथं हे नंसाः भगवतीयात ग्वलय् हइगु इलय् सिफल ख्यलय् दिकाः समय्बजी नयेमाःगु परम्परा दु। लिसें सिफल ख्यलय् थीथी समुदायया दिगु द्यः नं दुसा दँय्दसं सम्बन्धित समुदाय वयाः पुजा यायेमाःगु चलन दु। चौरय् हयाः जात्रा क्वचायेकेमाः। उकथं हे ख्यलय् पुजा यायेगु, प्याखँ हुइगु दबू जक मखुसें पशुपति क्षेत्र विकासया बफर जोनलय् लाःगुलिं उगु थासय् गुगुं नं कथं हानी नोक्सानी यायेमजिउगु धासें स्थानीय जनतां तत्काल टेण्डर लित कायेमाःगु माग याना वयाच्वंगु दु।

उगु थासय् रंगशाला दयेकल धाःसा नेवाः पहिचान हे म्हासे जुइगु धासें स्थानीय जनतां विरोध यानाच्वंगु दु। स्थानीय जनतां सिफल ख्यः बचे यायेगु निंतिं वडाय् ज्ञापन पौ बीगु ज्या जुइधुंकूगु दुसा पशुपति क्षेत्र विकास कोषयात नं उगु ज्या तत्काल दिकेत माःग यानाः ज्ञापन पौ बीधुंकूगु दु।मेखे येँ महानगरापालिका ७ वडाया वडा अध्यक्ष विमलकुमार होडां धाःसां थम्हं अन फुटबल ग्राउन्ड दयेकाः जग्गाया संरक्षण यायेत्यनागु खँ धायेगु यानाच्वंगु दु । वय्कलं अन रंगशाला दयेकेधुंकाः उगु जग्गा संरक्षणया लिसें जात्रा पर्वयात नं अपुइगु दाबी यानादीगु दु।

थ्वहे झ्वलय् सिफल ख्यलय् रंगशाला दयेकेत्यंगु खँयात कयाः नेवाः देय् दबू येँ जिल्ला समितिं विरोध प्वंकूगु दु। जिल्ला समितिया अध्यक्ष धनबहादुर महर्जन तिमिलां विज्ञप्ति जारी यानाः विरोध याःगु खः। देय् दबुलिं जारी याःगु विज्ञप्तिइ नेपाल संवत ७४५ या शिलापत्र तकं दुगु तपाख्यःया संस्कृति नाप स्वापू दुगु आदिवासी नेवाःतय् प्रथाजन्य संस्था गुथिया पूर्व सूसुचित जानकारी सहित स्वतन्त्र मन्जुरी मकासें सांस्कृतिक भूमिइ ‘फुटबल रंगशाला’ दयेकेगु धकाः येँ महानगरपालिका व सम्बन्धित वडा ज्याकूया यःति कथं न्ह्यागुलिं आपत्ति नं प्वंकातःगु दु।

थ्व हे वइगु फागुन २१ गते जुइत्यःगु प्रतिनिधिसभा चुनावया निति मतदाता नामावलीइ नां तय्गु थौ लिपागु दिं खः। थ्व स्वया न्ह्यः कात्तिक मसान्त तक ई तःगु खः।

राष्ट्रिय परिचयपत्र दुपिन्स अनलाइनपाखे हे नाम दर्ता याये फइगु ब्यवस्था आयोगं मिले याःगु खः।

अथेहे निर्वाचन आयोगं मतदाता नां भिंकेगु निति थ्व हे मङ्सिर २१ निसे २७ गते तक ई तयातःगु दु।पुस १५ गते सम्बन्धित निर्वाचन कार्यालय व वडा कार्यालयय् लिपागु मतदाता नामावली प्रकाशन याइ धका आयोगं धाःगु दु।

थौ विश्व टेलिभिजन दिवस खः। थुगु दिवस संयुक्त राष्ट्रसङ्घया इनापय् दँय् दँसं नोभेम्बर २१ य् हनिइगु यानाच्वंगु खः।

निर्णय प्रक्रिया, जनमत निर्माण, शान्तिसुरक्षा व विकास सम्बन्धी विषय टेलिभिजनपाखे यक्को प्रभाव दइगु मान्यता बिउसे राष्ट्रसङ्घया महासभां सन् १९९६ या डिसेम्बर १७ य् प्रस्ताव पारित यासे थुगु दिवस हनिइगु घोषणा याःगु खः।

संयुक्त राष्ट्रसङ्घं सन् १९९६ या नोभेम्बर २१ व २२ य् न्हापागु विश्व टेलिभिजन फोरमया ग्वसाः ग्वया न्हापांगु ज्याझ्वः याःगु खः।वया लिपा दँय् दँसं न्ह्यावलय् २१ नोभेम्बरय् विश्व टेलिभिजन दिवस हनिइगु याःगु खः।

नेपाल भाषा मंका खलः यलया अध्यक्ष पदय् निम्हेसिया प्रतिस्पर्धा याइगु जुगु दु। नायः पदय् बाबुराजा महर्जन व महेन्द्रलाल महर्जन निम्हेसिया थः थःगु प्यानल ज्वना चुनावी प्रतिस्पर्धा यायेत्यःगु दु।

चुनाव कन्ह्यः मंसीर ६ गते शनिबा जुइत्यःगु दु। अध्यक्ष छम्ह, निम्ह मिसा दुजः व गुम्ह खुल्ला सदस्यया निति १२ पदय् कन्ह्यः सुथ ८ बजेनिसें मतदान जुइत्यःगु दु।बाबुराजा आःयागु कार्यसमितिया उपाध्यक्ष खःसा महेन्द्र सचिव खः।

बाबुराजाया प्यानलय् न्हुच्छेलाल महर्जन (कपुर), उकुलाल महर्जन, अमिर महर्जन (चन्द्र), राजु महर्जन (जुजु), कृष्णबहादुर महर्जन (माजाः) विकास महर्जन, बेखारत्न महर्जन, प्रवीण महर्जन व विनोद ताम्रकार खः सा मिसा दुजलय् नानी हिरा शाक्य व मञ्जु बज्राचार्यपिन्स प्रतिस्पर्धा याइगु जुगु दु।

अथेहे महेन्द्रया प्यानलय् रजिन सिं, विनोद महर्जन, प्रेम महर्जन (चिरी) राजेन्द्र महर्जन, राजु ताम्रकार, रुबिन शाक्य, कृष्णभक्त डंगोल, रविन्द्र बाराही व दिलबहादुर चित्रकार (तुयु पु) खःसा मिसा दुजलय् फरिन्दा महर्जन, रमना महर्जन बज्राचार्यपिन्स उम्मेदवारी ब्यूगु दु।

मंकाः खलः यलया दुजलय् १ हजार २ सय ४४ म्ह कुल मतदाता दु।