ग्रामीण आदर्श क्याम्पस नेपालटारयात पत्रकारितासम्बन्धी सफू लःल्हागु दु।मिडिया प्वाइन्ट व राष्ट्रिय विकास सञ्चार केन्द्रपाखें सङ्कलन याःगु पत्रकारितासम्बन्धी पुलांगु नापं न्हूगु सफूत थौं लःल्हाःगु खः।

उगु पुस्तक मिडिया प्वाइन्टया संस्थापक लिसें राष्ट्रिय समाचार समिति (रासस) या पूर्वमहाप्रवन्धक लिसें वरिष्ठ पत्रकार श्रीरामसिंह बस्नेतं क्याम्पस प्रमुख राजेन्द्रध्वज थापायात लःल्हानादीगु खः। लःल्हाःगु उगु सफुतिइ हिन्दी, नेपाली व अङ्ग्रेजी भाषाया ५८० पाः सफूत दुथ्याःगु दु।

सफू लःल्हायेगु ज्याझ्वलय् वरिष्ठ पत्रकार बस्नेतं पत्रकारिताया सफू क्याम्पसय् ब्वनाच्वंपिं विद्यार्थीया निंतिं फाइदा जुइगु जुयाः थःम्हेसिनं लःल्हानाःगु धकाः धयादिल। वय्कलं सफू गुबले नं पुलां जुइमखूगु जूगुलिं अप्वः धइ थें पुलांगु सफूत आः वयाः लुइके थाकूगु खँ न्ह्यथनादिल।

क्याम्पस पमुख थापां सफू लःल्हानाः ग्वहालि यागुलिं विद्यार्थीया शैक्षिक विकासय् ग्वहालि दइगु धासें मिडिया प्वाईन्टयात सुभाय् बियादिल। तारकेश्वर नगरपालिका वडा नं ११ नेपालटारय् न्ह्याःगु उगु क्याम्पसय् स्वद्वः व निसः स्वयां अप्वः विद्यार्थी ब्वनाः च्वंगु दु। 

नेपाल भाषा मंका खलः यलया अध्यक्ष पदय् महेन्द्रलाल महर्जन ३७६ मत हया निर्वाचित जुगु दु। अथेहे मेम्ह उम्मेदवार बाबुराजा महर्जनंं ३७३ मत हःगु खः।

अथेहे दुजलय् विनोद महर्जनं ४४३, प्रेम महर्जन (चिरी) न ३९३, राजेन्द्र महर्जनं ३८९, राजु ताम्रकार ३९३, रविन्द्र बाराहीं ३७९, न्हुच्छेलाल महर्जन (कपुर) ३८४, उकुलाल महर्जनं ४१७, बेखारत्न महर्जनं ४२५ व प्रवीण महर्जनं ३९२ मत हया बिजयी जूगु दु।

अथेहे मिसा दुजलय् फरिन्दा महर्जनं ४५८ व रमना महर्जन बज्राचार्यं ४०९ मत हया बिजयी जुगु दु।

यल नेपालभाषा मंकाः खलः न्हुगु नेतृत्वया निति थौ चुनाव जुगु दु।

थौ सुथसिया ८ बजे निसे न्ह्यागु मतदान ज्याझ्वलय् ९ सय ७६ मत कुहावःगु दु धका निर्वाचन कमितिया दुजः सुरजबीर बज्राचार्यं जानकारी बिउगु दु।

नायः पदय् बाबुराजा महर्जन व महेन्द्रलाल महर्जन निम्हेसिया थः थःगु प्यानल ज्वना चुनावी प्रतिस्पर्धा याःगु खः। आः छु ई लिपा हे मतगणना जुइ। थौ हे लिच्वः घोषणा याइगु ज्याझ्वः दु।

मुकं दुजः १ हजार २ सय ४४ म्ह मतदाता दुगु मंकाः खलः दुजः दु।

सतकय् हे ट्रक फातापूबलय् हेटौँडा–येँ स्वाइगु कान्तिलोकपथ सतक थौं सुथंनिसें पूवंक हे अवरुद्ध जूगु दु।

वीरगञ्जं येँपाखे वासः लोड यानाः वनाच्वंगु ना३ख ३१९२ नम्बरया ट्रक मकवानपुरया भीमफेदी गाउँपालिका–८ बगुवाया सतकय् ब्रेकफेल जुयाः अनियन्त्रित जुयाः फातापूबलय् उगु सतक पूवंक अवरुद्ध जूगु जिल्ला प्रहरी ज्याकुथि मकवानपुरया प्रवक्ता प्रहरी नायब उपरीक्षक पुष्कर बोगटीं जानकारी बियादिल।

सतक अवरुद्ध जूगुलिं हेटौँडां येँय् वया च्वंगु व येँपाखें हेटौँडा वनाच्वंगु सवारी साधन लँय् हे दिनाच्वंगु खः। दुर्घटनास्थलपाखें ट्रक चीकाः लँ चायेकेगु कुतः जुयाच्वंगु वय्कलं धयादिल।

थी थी ४६ गू संस्थातय्सं मंकाः कथं ग्वसाः ग्वःगु ‘नेपाल संवाद शिखर सम्मेलन–२०८२’ येँ घोषणापत्र पितब्वयाः क्वचाःगु दु। घोषणापत्रय् वंगु भदौ २३ व २४ या जेनजी प्रदर्शन लिपा मुलुकय् न्यायोचित शान्तिया निंतिं संवाद मजिमगाःगु ठहर याःगु खः।“

संवाद असहमतियात ह्वःतालय् हिइकेगु सिर्जनशील साधन व प्रक्रिया जूगु ध्वाथुइकाः सम्मेलनं राष्ट्रिय समस्या कथं खनेदूगु विवादित मुद्दाया निकासया निंतिं मंकाः आधार” जुइफइगु सम्मेलनया घोषणापत्रय् धयातःगु खः।करुणाभाव, समानुभूति, सहिष्णुता, मेपिनिगु बिचाः, दृष्टिकोण वा इनाप न्यनेगु धैर्य व संस्कृतिया हनाबनालिसें  संवाद प्रक्रियापाखें हे सत्य व हित लुइकाः न्ह्याःवनेत तत्पर जुइत द्वन्द्व वा विवाद याना च्वंगु फुक्क पक्षतय्त थ्व सम्मेलनं इनाप याःगु खः।

शान्तिया पूर्वाधार, संवाद प्रक्रिया व सहजकर्तातय् संयन्त्र नापं भूमिकाया बारे राज्यं संबोधन याइगु प्रावधान मदूगुलिं संवाद व सहजकर्तालिसे सम्बन्धित राष्ट्रिय नीति, कानुन व संयन्त्रया व्यवस्थाया निंतिं आवश्यक कानुनी प्रावधानया तर्जुमा यानाः विधायनप्रक्रिया न्ह्याकेत सम्मेलनं सरकारयात माग याःगु खः।

शान्ति स्थापना, सुशासन व नागरिक अधिकारयात पूवंकेगु हे सामाजिक सद्भाव व न्यायया मजिमगाःगु स्तम्भ जूगु मानवअधिकारया हना, संरक्षण व परिपूर्तिलिसेंया सुशासन कायम यानाः नागरिकप्रति उत्तरदायी सेवा प्रवाहया निंतिं सम्मेलनं राज्यया फुक्क संयन्त्रयात अपिल याःगु खः।

सम्मेलनं नेपाःया संवाद प्रक्रियायात सुदृढ जुइकेत आवश्यक प्रमुख प्रतिबद्धता दुथ्याकातःगु औपचारिक घोषणापत्र पारित यानाः क्वचाःगु न्ह्यथनातःगु खः।सम्मेलनया उलेज्या थनया संयुक्त राष्ट्रसङ्घया आवासीय प्रतिनिधि हाना सिङ्गर हम्दी Ms. Hanna Inger Hamdy यानादिल। सम्मेलनया मुख्य वक्ताकथं कूटनीतिज्ञ डा शम्भुराम सिम्खडां नेपाःया लोकतान्त्रिक यात्राय् समावेशी व निरन्तर संवादया मूल्य मजिमगाःगु धयादिल।