प्रधानमन्त्री केपी शर्मा ओलीं मुक्कं कृषियात आधुनिक व प्रविधिया छ्यलाबुलापाखें उत्पादन अप्वयेकेगु लँय् यंकेमाःगु धयादीगु दु।

‘राष्ट्रिय धान दिवस’या लसताय् थौं भिंतुना सन्देश पितबियादिसें वय्कलं धयादीगु दु, “थौं असार १५, झीगु उत्पादन व चःतिया नखः, धान दिवस, चाय् जीवनया नस्वाः, लःखय् चःतिया पुजा व थुकियापाखें वाया माः हुस्लुं पुइकेगु झीगु म्हगस थ्व झीगु परम्परानिसें न्ह्याना वयाच्वंगु बुँज्या संस्कृति खः, थौं देय् पिने जुसां मचाबलेनिसेंया बँुज्याया लुमन्ति वयाच्वंगु दु।”

प्रधानमन्त्री ओलीं सन्देशय् बुँज्या व मुक्कं कृषियात आधुनिक व प्रविधिया छ्यलाबुलापाखें उत्पादन अप्वयेकेगु निंतिं सरकारं कृषि आधुनिकीकरणया ज्याझ्वः हयागु नापं न्ह्यथनादीगु दु। सन्देशय् धयातःगु दु, “कृषियात आधुनिक व प्रविधिइ आधारित यानाः उत्पादन अप्वयेके, असार १५, धौ बजि नयेगु दिं नापं ‘धान दिवस’या लसताय् सकसितं भिंतुना।”

राष्ट्रपति रामचन्द्र पौडेलं श्रम शक्ति लिसें मेमेगु जनशक्तियात स्वदेशय् क्रियाशील यानाः आधुनिक कृषि प्रविधिया विकास नापं विस्तार यायेमाःगु खँ कुलादीगु दु।

‘राष्ट्रिय धान दिवस’या लसताय् थौं भिंतुना सन्देश बियादिसें वय्कलं वा नापं सम्बन्धित खाद्य प्रविधिया विस्तार यायेत इनाप यानादिसें वा लिसें जाकि आयात दँय् दसं अप्वया वयाच्वंगु चिन्ताया विषय खः धकाः धयादिल। राष्ट्रपति पौडेलं बुँ अथे तया तयेगु अवस्थाया अन्त्य यानाः श्रम यायेगु संस्कृतिया विकास नापनापं वा उत्पादनय् आत्मनिर्भर जुइगु यानाः झीगु कुतःयात केन्द्रित यायेमाःगु खँ कुलादीगु दु।

भिंतुना सन्देशय् धयातःगु दु, “वा बालीइ जलवायुमैत्री प्रविधितय्त छ्यलाः वा नापं जाकिया उत्पादन अप्वयेकाः आयात प्रतिस्थापन, खाद्य सुरक्षाया सुनिश्चितता व कृषि श्रमया सम्मान यायेगु संस्कृति निर्माण यायेत थौंया थ्व दिं सकसितं हःपाः बिइमाः धकाः भिंतुना देछानाच्वना।”

नेपालय् कृषिया महत्व अप्वयेकाः खाद्य सुरक्षाय् वाया भूमिकायात महत्व बिइगु यानाः वाया उत्पादन अप्वयेकेत नापं थुकियात आधुनिकीकरण व व्यवसायीकरण यानाः किसानया मनोबल तच्वयेकेगु तातुना २०६१ सालनिसें दँय्दसं असार १५ गतेयात ‘राष्ट्रिय धान दिवस’या कथं न्यायेकेगु यानाहःगु खः।

थुगुसी ‘धान बालीमा सघनताः खाद्य सुरक्षा व आत्मनिर्भरता’ धइगु आदर्श खँग्वया नापं ‘राष्ट्रिय धान दिवस, २०८२’ न्यायेकाच्वंगु दु।

प्रधानमन्त्री केपी शर्मा ओलीं तान्जानियाया उपराष्ट्रपति डा फिलिप एम पाङ्गोयात थौं नापलानादीगु दु।

सयुक्त राष्ट्रसङ्घया ‘विकासया निंतिं वित्त (फाइनान्सिङ फस डेभलपमेन्ट)या प्यक्वःगु सम्मेलन’य् ब्वति कायेगु झ्वलय् स्पेनया औपचारिक भ्रमणय् वय्कलं उपराष्ट्रपति फिलिपयात कतारया दोहाय् च्वंगु हमाद अन्तरराष्ट्रिय विमानस्थलय् नापलानादीगु खः।

नापलायेगु झ्वलय् निगू देय् दथुइ थःथवंय् स्वापूया थीथी बिषय खँल्हाबल्हा जूगु खः। उगु झ्वलय् प्रधानमन्त्रीनापं वय्कःया सल्लाहकार विष्णुप्रसाद रिमालया नं उपस्थिति दूगु खः।

प्रधानमन्त्री केपी शर्मा ओली स्पेन प्रस्थान यानादीगु दु। संयुक्त राष्ट्रसंघया ‘विकासया निति वित्त (फाइनान्सिङ फर डेभलपमेण्ट) प्यक्वःगु अन्तर्राष्ट्रिय सम्मेलन’ य् ब्बति कायेगु निति प्रधानमन्त्री उखे पाखे झायादीगु खः।

स्पेनया सेभिया शहरय् जुइगु उगु अन्तर्राष्ट्रिय सम्मेलन छगु दशकय् जुइगु ज्याझ्वः खः। संयुक्त राष्ट्रसंघया महासभा थे उगु सम्मेलनय् दुजः राष्ट्रया सरकार लिसे राष्ट्र प्रमुख तयेस ब्बति काइगु ज्याझ्वः खः।

भ्रमण टोलीइ २१ म्हेसिया ब्बति कागु दु धका प्रधानमन्त्रीया सचिवालयं धाःगु दु।

कार्यबाहक प्रधानमन्त्रीया जिम्मेवारी उपप्रधानमन्त्री नाप शहरी विकासमन्त्री प्रकाशमान सिंहयात ब्यूगु दु।

प्रधानमन्त्री केपी शर्मा ओली स्पेनया औपचारिक भ्रमणमा ब्बति कायेगु निति शनिवाः झायादीगुलि राष्ट्रपति रामचन्द्र पौडेलं सिंहयात कार्यबाहकया जिम्मेवारी तोके याःगु खः।

प्रधानमन्त्री थ्व हे वइगु असार २० गते लिहा झाइगु ज्याझ्वः दु।