मेचीनगर नगरपालिका–२ बौद्धमोडपाखें निम्ह दुर्लभ प्रजातिया काउलिया आइतबाः उद्धार यानाः उपिं काउलियात बाहुनडाँगी प्रहरी चौकीइ सुरक्षित यानातःगु दु।

स्थानीय सुरेन्द्रकुमार महतं लुइकूपिं कउलि निगू ब्यागलं प्रजातिया कउलि थःगु हे छेँय् तयातइगु धयादिल। वन्यजन्तु संरक्षणकःमि शंकर लुइँटेलं दुर्लभ प्रजातिया काउलिया संरक्षण यायेमाःगु धासें महतया छेँनं उपिं काउलिया उद्धार यानादीगु खः।संरक्षणकःमि लुइँटेलं डिभिजन वन ज्याकुथि झापाय् काउलि उद्धार यानागु धकाः जानकारी बियादिल।

उद्धार याःपिं काउलियात डिभिजन वन ज्याकुथिपाखें अर्जुनधाराय् च्वंगु काउलि प्रजनन लिसें संरक्षण केन्द्रय् तयेगु वय्कलं धयादिल।

नेपालय् च्वंगु पाकिस्तानी दूतावासया ग्वाहालिइ येँया बाफलय् च्वंगु ज्ञानोदय माध्यमिक विद्यालयलय् कम्प्युटर प्रयोगशाला निर्माण जूगु दु।

नेपाःया निंतिं पाकिस्तानया राजदूत अब्रार एच हाशमीं शनिबाः न्हूगु प्रयोगशालाया उलेज्या नापं लःल्हायेगु ज्या यानादिल। वय्कलं पाकिस्तानया जनतापाखें वःगु ग्वाहालिं नेपालय् शिक्षा व डिजिटल स्यनेज्याया निंतिं मदिक्कं ग्वाहालि बियाः वया च्वनागु धयादिल।

ज्याझ्वलय् पूर्वगर्भनर दीपेन्द्रबहादुर क्षेत्री, येँ महानगरपालिका–१३ या वडाध्यक्ष ध्रुवनारायण मानन्धर, जिल्ला शिक्षा समन्वय एकाइया प्रमुख समन्तमणि आचार्य, महानगरया शिक्षा विभागया प्रमुख केशल ज्ञवालीलिसेंया ब्वति दूगु खः।

ब्वनेकुथिया प्रधानाध्यापक विष्णु घिमिरे रिमालं ब्वनेकुथियात शिक्षण ग्वाहालिया कथं दयेकूगु न्हूगु प्रयोगशाला भवनय् ४०२ गः न्हूगु कम्प्युटर, न्हूगु फर्निचरलिसेंया सामग्रीत दूगु धयादिल।

नेकपा एमालेया झीछक्वःगु महाधिवेशनया निति प्रेस चौतारी नेपालपाखे निर्विरोध महाधिवेशन प्रतिनिधि ल्यःगु खः।

सचिवालयया बैठकं अध्यक्ष गणेश पाण्डे, निर्वतमान अध्यक्ष गणेश बस्नेत व पूर्वअध्यक्ष राजेन्द्र अर्यालयात महाधिवेशन प्रतिनिधि कथं छ्वयेगु निर्णय याःगु खः।

अथेहे मिसापाखे प्रतिमा सिलवाल व मीना विश्वकर्मा निर्विरोध कथं ल्यःगु खः।

लुँ तोलां थौ १ हजार ६ सय तका थहावंगु दु। लुँ तोलां थौ १ हजार ६ सय तका थहावना २ लाख ५२ हजार २ सय तका न कारोबार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां १ सय ४५ तका थहावंगु दु।वहः तोलां १ सय ४५ तका थहावंना ३ हजार ४ सय ९० तका कारोबार जुयाच्वंगु दु धका महासङ्घं धाःगु दु।

गृहमन्त्री ओमप्रकाश अर्यालं जेनजी आन्दोलनया इलय् क्षतिग्रस्त जूगु प्रहरी वृत्त बौद्ध व प्रहरी प्रभाग सक्वया अवलोकन यानादीगु दु। म्हिगः वय्कलं भदौ २४ गतेया जेनजी आन्दोलनया हुनिं क्षतिग्रस्त प्रहरी वृत्त बौद्ध व प्रहरी प्रभाग सक्वया अवलोकन यानाः प्रहरीं याःगु ज्या व उगु क्षेत्रया शान्ति सुरक्षाया बारेय् जानकारी कयादिल।

अवलोकनया झ्वलय् गृहमन्त्री अर्यालं देसय् शान्ति सुरक्षा न्यंका तयेत व अपराध नियन्त्रणया निंतिं प्रहरीयात उच्च मनोबल तयाः ज्या यायेत निर्देशन बियादिल। वय्कलं जेनजी आन्दोलनया हुनिं क्षतिग्रस्त जूगु संरचना पुननिर्माणय् नागरिकस्तर पाखें नेपाल प्रहरीयात तःधंगु ग्वाहालि दयाच्वंगु धयादिसें आः प्रहरीं शान्ति सुरक्षाया नापनापं सुशासन प्रवद्र्धनय् न्ह्यचिलेमाःगु खँय् बः बियादिल।

गृहमन्त्री अर्याल नापं काठमाडौँ उपत्यका प्रहरी ज्याकुथि रानीपुखूया प्रमुख लिसें प्रहरी अतिरिक्त महानिरीक्षक ईश्वर कार्की व जिल्ला प्रहरी परिसर येँया प्रमुख नापं प्रहरी वरिष्ठ उपरीक्षक रमेश थापां नापं उगु लागाया अवलोकन यानादीगु खः।