राष्ट्रपति रामचन्द्र पौडेलं फागु पुन्हि (होली) नखः न सामाजिक सद्भाव व राष्ट्रिय छवाःयात अझं क्वातुकेत योगदान बिइगु विश्वास प्वंकादीगु दु।

होली नखःया लसताय् भिंतुना सन्देश बियादिसें वय्कलं होली नखः न समाजय् दयाच्वंगु थी थी विकृति, विसङ्गति व कुरीतियात निर्मूल यानाः मौलिक संस्कृतिया संरक्षण व संवद्र्धन यायेत हःपाः बिइ फयेमाः धकाः भिंतुना देछनादीगु दु। राष्ट्रपति पौडेलं जातीय, भाषिक व सांस्कृतिक कथं विविधतां जाःगु नेपाली समाजयात विविधताया दथुइ छवाः ल्यंकातयेत नखःलं ग्वाहालि याइगु विश्वास प्वंकादिल।

“विविधता दथुया छवाः हे झी नेपाःमिया म्हसिका व छायेपिया नं खः। थ्व नखः न सकल नेपाःमि दथुइ थःथवय् दूगु तंसु व द्वन्द्वयात प्रेम व आत्मियतापाखें सामाजिक सद्भाव व राष्ट्रिय छवाःयात अझं क्वातुकेत योगदान बिइगु विश्वास कयागु दु”, भिंतुना सन्देशय् धयातःगु दु।

राष्ट्रपति पौडेलं होली म्हितीगु थी थी रङ थें हे नेपाली समाज नं जातीय, भाषिक व सांस्कृतिक कथं विविधतां जाःगु धयादिसें थ्वहे विविधता दथुया छवाःहे झी नेपाःमिया म्हसिका व बांलागु पक्ष खः धयादिल। वय्कलं नेपाःमिया विशेष नखः होलीया लसताय् देय् दुने व विदेशय् च्वनादीपिं सकल नेपाःमि दाजुकिजा व तताकेँहेयात सुख, शान्ति व समृद्धिया निंतिं भिंतुना देछानादीगु दु।थी थी रङया कापतं छायपियातःगु चीर स्वायेधंका न्ह्याइगु होली नखः पुन्हिया बहनी चीर क्वथला क्वचाइ।

रङया नखः कथं दँय्दसं थःथवय् सौहार्द व सद्भावया सन्देश बिइगु होली नखः देय्न्यंकं थी थी रङ व अबिर म्हिताः न्ह्यैपुक न्यायेकेगु परम्परा दु। होली पर्व असत्ययात सत्यं, अन्याययात न्याय, दूराचारयात सदाचार व अधर्मयात धर्मं त्याकूगु लसताय् न्यायेकेगु याइ।

मुक्कुमलुङय् केबुलकार निर्माण खारेजी यायेगु निति जुयाच्वंगु आन्दोलनय् पूर्वगृह राज्यमन्त्री मो.रिजवान अन्सारी नेतृत्वया नेपाल संघीय समाजवादी  पार्टी न समर्थन याःगु दु।

माइतीघर मण्डलाय् मुक्कुमलुङया जनतां नो केबुलकार आन्दोलनयात समर्थन यासे नेपाल संघीय समाजवादी पार्टीया अध्यक्ष अन्सारीं सम्बोधन याःगु खः।

वयकलं थ्व आन्दोलन लिम्बु तयेगु जक आन्दोलन मखु सकल नेपाःमिपिनिगु व उत्पीडित जनता, आदिवासी जनजाति, मधेशी, मुस्लिम, दलित, महिला नाप आर्थिक उत्पीडन तयेगु आन्दोलन खः धका धयादीगु खः।

नेपाल बार एशोसिएशनया २७ क्वःगु केन्द्रीय कार्यसमितिया निर्वाचन निति अध्यक्ष पदया न्याम्हेसिया उम्मेदवार ब्यूगु दु।

प्रमुख निर्वाचन अधिकृत वरिष्ठ अधिवक्ता रामकृष्ण निरौलाया कथं वरिष्ठ अधिवक्ता प्राडा विजयप्रसाद मिश्र, वरिष्ठ अधिवक्ता रमण कुमार श्रेष्ठ, अधिवक्ता राजु कैती, अधिवक्ता उज्वल घिमिरे व अधिवक्ता आशीष पौडेलं उम्मेदवार ब्यूगु दु।

थ्व हे वइगु चैत २३ गते न्हुगु कार्यसमितिया निति निर्वाचन जुइत्यःगु खः। महासचिवय् वरिष्ठ अधिवक्ता केदारप्रसाद कोइराला, अधिवक्ता हरिशरण कार्की व अधिवक्ता यज्ञमणि न्यौपाने न उम्मेदवारी ब्यूगु खः।

येँ महानगरपालिकाया प्रमुख प्रशासकीय अधिकृतय् सहसचिव सरोज गुरागाईंयात हे निरन्तर यायेगु संघीय मामिला लिसे सामान्य प्रशासन मन्त्रालयं पौ छ्वया हःगु दु।

बुधवाः प्रमुख प्रशासकीय अधिकृत सरोज गुरागाईंयात संघीय मामिला नाप सामान्य प्रशासन मन्त्रालयय् ज्या यायेत वातावरण दयका बिइत इनाप याना पौ च्वंगु दु।

पौ वये कथं बुधवाः हे मन्त्रीस्तरीय निर्णयपाखे गुरागाईयात हे निरन्तरता बिइगु येँं महानगरय् पौ छ्वया हःगु संघीय मन्त्रालयया प्रवक्ता कालिप्रसाद पराजुली धाःगु दु।

सेयर बजाः लगातार घटे जुयाच्वंगु दु। म्हिगः बिहीवाः स्वया २.७० ल्याखं कुहावया नेप्से परिसूचक २८१८ ल्याः कायम जुगु खः। अथेहे कारोबार रकम न कुहावःगु दु।

म्हिगः १० अर्ब ९७ करोडया कारोबार जुगुलि थौ १० अर्ब १० करोड जुगु दु। मुक्क ९९ गु कम्पनीया भाः थहावःगुलि १३२ गु कुहावःगु दु सा १२ गु स्थिर जूगु दु।विकास बैंक सेक्टर दकलय् अप्पो १.८६ प्रतिशत थहावःगु दु सा बैंकिङ ०.०३, उत्पादन ०.२४, माइक्रोफाइनान्स ०.०५ प्रतिशतं थहावंगु दु।

फाइनान्स ०.२३, होटल लिसे पर्यटन ०.५७, हाइड्रोपावर ०.०६, लगानी ०.१४ लिसे जीवन बीमा ०.८०, निर्जीवन बीमा ०.०४, मेमेगु ०.७१ नाप व्यापार ०.२४ प्रतिशत घटे जूगु दु। स्वंगू कम्पनी गार्डियन माइक्रोलाइफ इन्स्योरेन्स, भूगोल इनर्जी, उपकार लघुवित्तया भाः १० प्रतिशतं थहावंगुलि राप्ती हाइड्रोपावर ९.९१, महालक्ष्मी विकास बैंकया भाः ७.८४ प्रतिशतं थहावःगु दु।

गुराँस लघुवित्त ७.६ व लाइफ इन्स्योरेन्स कर्पोरेसन ६.३५ प्रतिशतं भाः कुहावःगु दु। निगु पुनर्बीमा कम्पनी हिमालयन रिइन्स्योरेन्स व नेपाल पुनर्बीमाया १–१ अर्ब स्वया अप्पो कारोबार जूगु दु।

हिमालयन रिको १ अर्ब १२ करोड लिसे नेपाल पुनर्बीमा १ अर्ब ८ करोडया कारोबार जूगु दु। उगु कम्पनीलिपा कारोबारया आधारय् एनआरएन इन्फ्रास्ट्रक्चर, घलेम्दी हाइड्रोपावर लिसे फस्र्ट माइक्रोफाइनान्स न्ह्यने लागु दु।