सडक डिभिजन हेटौंडां म्हिगः शनिवाः सुथनिसे हेटौंडा उपमहानगरया मू बजाः क्षेत्रय् सतक विस्तारया ज्या न्ह्याकूगु दु।

तःधंगु ल्याखय् सुरक्षाकर्मी परिचालन यानाः सडक डिभिजन हेटौंडां सतक सीमाया केन्द्र रेखापाखें जवं ७५ खवं ७५ फिट दुने चिं तयेधुंकूगु छेँ व संरचनात थुनाब्यूगु दु।महेन्द्र राजमार्गया रातोमतेनिसें बुद्धचोकनिसें राप्तीपुल तक व त्रिभुवन राजमार्गया बुद्धचोकनिसें समरीपुल तक ८.५ किलोमिटरया सतक विस्तार यायेगु नितिं थथे सतक विस्तारया ज्या न्ह्याकूगु खः।सर्वोच्च अदालतं म्हिगः हे हेटौंडाय् सतक विस्तार सम्बन्धी सुचं कार्यान्वयन मयायेत १५ न्हुया अल्टिमेटम जारी याःगु खः।

पूर्व सांसद विन्दबासिनी कंसाकारं दर्ता याःगु रिटय् अदालतया न्यायाधीश मेघराज पोखरेलया एकल इजलासं सतक विभाजन ज्याकुथि हेटौंडाया नामय् आदेश जारी यासें यथास्थिति कायम यायेत व सतक विस्तारया सुचं कार्यान्वयन मयायेत धाःगु दु। सडक डिभिजन आदेश मवःगु धासें सडक महाशाखां शुक्रवाः बहनी हे छगु सुचं जारी याःगु खःसा सतक विस्तार मदिकेगु धासें सतक विस्तारया ज्यायात निरन्तरता बिउगु खः।

अथेहे सडक डिभिजनं जनताया छेँ बिना मुआब्जा आतकं न्यंका कायेत्यंगु व सर्वोच्च अदालतं हेटौंडाय् सतक विस्तार तत्काल कार्यान्वयन यायेमते धकाः ब्यूगु आदेश सरकारं पालना मयाःगु धासें सतारुढ दल उज्यालो नेपाल पार्टीया केन्द्रीय दुजः बिद्या श्रेष्ठं उगु पार्टी पाखें राजीनामा ब्यूगु दु।

बुढानीलकण्ठ नगरपालिकां धार्मिक नापं पर्यटकीय गन्तव्य कथं दूगु भुइजःसि नारांद्यःया देगःयात विश्व सम्पदा धलखय् दुथ्याकेत कुतः याना वयाच्वंगु दु।संयुक्त राष्ट्रसङ्घीय शैक्षिक, सांस्कृतिक नापं वैज्ञानिक सङ्गठन (युनेस्को)लिसे भुइजःसि नारांद्यःया देगःयात विश्व सम्पदा धलखय् दुथ्याकेत कुतः जुयाच्वंगु उगु नगरया प्रमुख मीठाराम अधिकारीं धयादिल।

नगरया १२ क्वःगु स्थापना दिवसया झ्वलय् ग्वसाः ग्वःगु ज्याझ्वलय् प्रमुख अधिकारीं नेपाल सरकारया सम्बन्धित निकाय व पक्षलिसे उगु विषयय् थी थी चरणय् खँ जूगु धयादिल। वय्कलं अधिग्रहण जूगु सार्वजनिक जग्गा लित हयेत पालिका सक्रिय जुयाच्वंगु धयादिल।प्रमुख अधिकारीं शिक्षा, स्वास्थ्य, पूर्वाधार व खेलकूदयात प्राथमिकता बियातःगु व शिक्षा ख्यःया बजेट अप्वयेकाः १३ क्वतितक थ्यंकूगु कनादिसें तगिं १० गू तकया विद्यार्थीतय्त न्हिनेसिया खाजा उपलब्ध याकूगु धयादिल।

उगु पालिकां ४ जिपिए हःगु सामुदायिक विद्यालयतय्त न्यागू लाख व विद्यार्थीतय्त छगू लख दां पुरस्कार बियावयाच्वंगु धाःगु खः। नगरपालिकां नगर अस्पतालपाखें न्हिंन्हिं ३०० म्ह स्वयां अप्वः बिरामीतय् उपचार याना वयाच्वंगु खः। स्थापना दिवसया झ्वलय् बागमती प्रदेशया श्रम, रोजगार नापं यातायातमन्त्री जयराम थापां विकास, सुशासन व सेवा प्रवाहय् बुढानीलकण्ठ नगरपालिकां याःगु ज्यायात च्वछानादिल।

नगरया उपप्रमुख अनिता लामां जनतां कायेखनीगु सेवायात लिच्वः वइ कथंया दयेकेत कर्मचारी संयन्त्रं बांलाक ज्या याना वयाच्वंगु धयादिल।

मार्गशीर्ष शुक्ल पुन्हिया दिं थौं वाया थीथी कथं पुजा यानाः नापं दान बियाः धान्यपूर्णिमा पर्व न्यायेकाच्वंगु दु।

वा दुकाये धुंकाः शुक्ल पूर्णिमाय् वा, गणेद्यः, दिगु द्यः, गैडु द्यः, गोठ द्यः, महारुद्र, महालक्ष्मी लिसेंया द्यःपिनिगु नापं पुजा यानाः दुकाना तःगु न्हूगु वाया जाकिचुं नं सेल, बाबर, पुरी मालपुवा दयेकाः द्यःयात छायेगु याइ।थ्वसिबें न्ह्यः नव अन्नप्राशन मयापिंसं थौं हे नवान्नप्राशन यायेमाःगु धर्मशास्त्रविद् नापं नेपाल पञ्चाङ्ग निर्णायक विकास समितिया दुजः प्राडा देवमणि भट्टराईं न धयादिल।

धान्य पुन्हिया लसताय् थौं काभ्रे पलाञ्चोकया धनेश्वर, ख्वपया अनन्तलिङ्गेश्वर, येँया चम्पादेवी, नुवाकोटया शिखरबेँसी व दुप्चेश्वरलिसेंया थासय् नापं मेला लगे जुयाच्वंगु दु।

राष्ट्रियसभाया नायः नारायणप्रसाद दाहालयात अर्थमन्त्री रामेश्वरप्रसाद खनाल व कानुन, न्याय नापं संसदीय मामिलामन्त्री अनिलकुमार सिन्हां थौं नापलानादीगु दु।

सिंहदरबारया राष्ट्रियसभा नायःया कार्यकक्षय् निम्हं मन्त्रीतय्सं नायःलिसे बिस्कं बिस्कं नापलानादीगु वय्कःया सचिवालयं धाःगु खः।

उगु झ्वलय् राष्ट्रियसभाया सभाकक्ष निर्माण, निर्वाचन, सरकार व संसद दथुइ समन्वय, सहकार्यलिसें समसामयिक विषय खँल्हाबल्हा जूगु खः।

प्रधानमन्त्री सुशीला कार्कीं दिगो विकासया आज्जुइ थ्यंकेगु निंतिं अपाङ्गता जूपिनिगु अपनत्व व नेतृत्वलिसें ऐक्यबद्धतायात प्राथमिकताय् तयाः अपाङ्गता समावेशी विकास नापं शासन व्यवस्थाया रूपान्तरणयात न्ह्याकेगु प्रतिबद्धता प्वंकादीगु दु।

अपाङ्गता जूपिनिगु अन्तरराष्ट्रिय दिवसया लसताय् लाकाः थौं पितबियादीगु भिंतुना सन्देशय् वय्कलं उगु प्रतिबद्धाता प्वंकादीगु खः। सन्देशय् प्रधानमन्त्रीं अपाङ्गता जूपिनिगु शिक्षा, स्वास्थ्य, लजगाः, ब्वति, सामाजिक सुरक्षा नापं पुनःस्थापनाय् सहज पहुँचया निंतिं सरकार क्रियाशील दूगु धयादीगु दु।

अपाङ्गता जूपिनिगु आर्थिक–सामाजिक अवस्था नापं अपाङ्गताया गाम्भीर्यया लिधंसाय् अपाङ्गता जूपिंत सेवा सुविधाय् प्राथमिकता बियाः अपाङ्गता जूपिं सकसितं सम्मानजनक व समतामूलक जीवन हयेगु वातावरण निर्माण यायेगु राज्यया नीति दूगु प्रधानमन्त्रीं थःगु सन्देशय् ध्वाथुइकादीगु दु। अपाङ्गता जूपिंसं फयाच्वंगु भौतिक, दृष्टिकोणजन्य, सञ्चारय् दूगु पंगः, कानुनी लिसेंया मेमेगु फुक्कं पंगःत चिइकाः फुक्कं कथंया अपाङ्गता जूपिनिगु निंतिं सहज, पहुँचयुक्त व सम्मानजनक अवस्थाया सिर्जना यायेगु थौंया आवश्यकता जूगु सन्देशय् वय्कलं न्ह्यथनादीगु दु।

अपाङ्गता जूपिनिगु स्वावलम्बी व आत्मर्निर जीवनया निंतिं अपाङ्गता पनेगु लिसें पुनःस्थापनाया नापनापं लजगाः व स्वरोजगारया ज्याझ्वलय् स्वंगूलिं तगिंया सरकारया मंकाः कुतलं बिचाः याना तःगु कथं उपलब्धि हासिल याये फइगु विश्वास प्रधानमन्त्री प्वंकादीगु दु।नेपाःया संविधान, नेपाल पक्ष राष्ट्र जूपिं अपाङ्गता जूपिनिगु अधिकारसम्बन्धी अन्तराष्ट्रिय सन्धि, महासन्धि, विद्यमान कानुनतय्सं अपाङ्गता जूपिनिगु आर्थिक, सामाजिक, सांस्कृतिक व राजनैतिक अधिकारयात फयांफक्वः अप्वः सम्बोधन याःगु वय्कलं धयादिल।

थौंया थ्व दिवसं अपाङ्गता जूपिनिगु ख्यलय् ज्या यानाच्वंगु सरकारी नापं गैरसरकारी संस्था, सम्बन्धित सकलें सरोकार दुपिंत अपाङ्गता जूपिं व उमिगु हामाया हक, हित, अधिकार, संरक्षण व सुविधाया ख्यलय् अझं यक्वः ज्या यायेत हःपा व ऊर्जा दयेमाः धकाः कामना यानादीगु दु।