प्रधानमन्त्री केपी शर्मा ओली स्पेन सरकारया अध्यक्ष (प्रधानमन्त्री) पेड्रो साञ्चेजपाखें ग्वसाः ग्वगू बेली भोजय् ब्वतिकयादीगु दु।

सयुक्त राष्ट्रसङ्घया ‘विकासया निंतिं वित्त सम्बन्धी प्यक्वःगु अन्तरराष्ट्रिय सम्मेलन’य् ब्वति कयाच्वंपिं देय्या राष्ट्र प्रमुख व सरकार प्रमुखया सम्मानय् ग्वसाः ग्वःगु ज्याझ्वलय् प्रधानमन्त्री ओली व न्हापांम्ह मिसा राधिका शाक्यं ब्वति कयादीगु खः।

प्रधानमन्त्री ओली व प्रधानमन्त्री साञ्चेजया दथुइ आइतबाः निगू पक्षीय नापलायेगु ज्या जूगु खः।

संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डें पशुपति क्षेत्र विकास कोषया निमित्त सदस्य सचिव पदया भाला कार्यकारी निर्देशक सुवासचन्द्र जोशीयात बियादीगु दु।

कोष सञ्चालक परिषदया नायः नापं जुया च्वनादीम्ह मन्त्री पाण्डें मन्त्रिस्तरीय निर्णय यानाः कार्यकारी निर्देशक जोशीयात निमित्त सदस्य सचिवया भाला बियादीगु वय्कःया सचिवालयं धाःगु दु। अख्तियार दुरुपयोग अनुसन्धान आयोगं थ्वहे असार ७ गते विद्युतीय शवदाहगृह यन्त्र खरिद प्रकरणय् सदस्य सचिव डा मिलनकुमार थापालिसेंया विरुद्ध विशेष अदालय् मुद्दा दायर याःगु खः।

विशेष अदालतय् मुद्दा दायर जुइ धुंकाः स्वतः पदपाखें निलम्बन जुइगु कानुनी व्यवस्था कथं सदस्य सचिव पद खाली जूगु खः।नवनियुक्त निमित्त सदस्य सचिव जोशीया पदावधि आः वइगु भदौ १८ गते तक उगु पदय् दइगु कोषं धाःगु दु।

थ्यंमथ्यं निलाजकया निंतिं वयकःयागु निमित्त सदस्य सचिवया कार्यकाल जुइगु जुइ।

प्रधानमन्त्री केपी शर्मा ओलीयात संयुक्त राष्ट्रसंघया महासचिव एन्टेनियो गुटरेसं नापलानादीगु दु। वयकःपि सोमवाः स्पेनय् नापलानादीगु खः।

संयुक्त राष्ट्रसंघया ‘विकासया निति वित्त (फाइनान्सिङ फर डेभलपमेण्ट) प्यक्वःगु अन्तर्राष्ट्रिय सम्मेलन’य् ब्बति कायेगु झ्वलय् प्रधानमन्त्री स्पेनय् झाया च्वनादीगु खः।

उगु ज्याझ्वलय् राष्ट्रसंघया महासचिव गुटरेसयात नापलानादीगु खः।

संयुक्त राष्ट्रसङ्घया ‘विकासया नितिं वित्त’सम्बन्धी प्यक्वःगु अन्तरराष्ट्रिय सम्मेलनया झ्वलय् स्पेनया सेभियाय् झायाच्वनादीम्ह प्रधानमन्त्री केपी शर्मा ओलीं गेट्स फाउन्डेसनं थौं ग्वसाः ग्वःगु विकास ग्वाहालिया भविष्यया नितिं स्वतन्त्र आयोगया घोषणा ज्याझ्वःयात संबोधन यानादीगु दु।

प्रधानमन्त्री ओलीया नापनापं प्रधानमन्त्रीया मुख्य सल्लाहकार विष्णुप्रसाद रिमाललिसें नं ब्वति कयादीगु खः। प्रधानमन्त्री ओलीं थुकथं स्वतन्त्र आयोगं अल्पविकसित व चिचीधंगु देय्या विकासया नितिं खनेदूगु लगानीया गाः जायेकेत योगदान बिइफइ धकाः धयादिल।

“थ्व आयोग स्थापना यायेत कुतः याःगुलिं जि तसकं लसता जुयाच्वना। थुकिं सामाजिक व आर्थिक विकासय् ग्वाहालि अप्वया लगानीया प्राथमिकता व विश्लेषणया नितिं सन्तुलन दयेकेत ग्वाहालि याइ”, प्रधानमन्त्री ओलीं धयादिल, “पेरिस सम्झौताया आधारय् विश्वया मुक्कं आर्थिक अवस्था, जलवायु ह्यूपाः, विपद् जोखिम व्यवस्थापनया मूल्याङ्कन यानाः आर्थिक दिगोपनाय् न्ह्याः वनेमाः।

नेपाः अल्पविकसित मुलुकपाखें स्तरोन्नतिया चरणय् दूगु अवस्थाय् झीगु देय् थें जाःगु देय्तय् नितिं विकासय् दूगु आर्थिक गाः जायेकेत विश्व आर्थिक प्रणालीया पुनरावालोकन यायेमाः।”

संयुक्त राष्ट्र सङ्घया ‘विकासया नितिं वित्त’सम्बन्धी प्यक्वःगु अन्तरराष्ट्रिय सम्मेलनया झ्वलय् स्पेनया सेभियाय् झायाच्वनादीम्ह प्रधानमन्त्री केपी शर्मा ओली व स्तोनियाया राष्ट्रपति अलार कारिस दथुइ निगू पक्षीय खँल्हाबल्हा जूगु दु।

उगु झ्वलय् निगू मुलुक दथुइया थवंथः सम्बन्ध व बहुपक्षीय हितया थी थी विषय सहलह जूगु खः।