नेकपा एमाले निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) न थौ बिहीवाः बहनि येँ मसाल जुलुस पिकागु दु।

सरकारं दलयात निषेध यायेत स्वंगू धासे अनेरास्ववियुं बिहीवाः बहनि मीनभवन क्याम्पस पिने मसाल जुलुस पिकागु खः।

प्रधानमन्त्री सुशीला कार्कीयात नेपाल कम्युनिस्ट पार्टी (माओवादी) या शीर्ष नेतातय्स नापलागु दु।

उगु पार्टीया महासचिव नेत्रविक्रम चन्द ‘विप्लव’ व प्रवक्ता खड्गबहादुर विश्वकर्मा ‘प्रकाण्ड’ नं थौ बालुवाटारय् प्रधानमन्त्री कार्कीयात नापालानां समसामयिक राजनीतिक विषय अ थःपिनिगु खँ तःगु खः।

‘विद्रोहया बलय दयकूगु थुगु सरकारयात जिमिगु ग्वहालि व समर्थन दु,’ महासचिव विप्लवं धाःगु दु, ‘आःयागु अवस्थाया सुरक्षित निकासया निति राजनीतिक समझदारीयात अझ याकनं हे तब्याकं यकिमाः। जेनजीं आन्दोलनं ल्ह्वःगु मागह पूरा याये।’

प्रतिनिधिसभाया सभामुख देवराज घिमिरे व राष्ट्रिय सभाया नायः नारायणप्रसाद दाहाललिसेंया टोलीं थौं सिंहदरबारय् निर्माणाधीन संसद् भवनया अवलोकन यानादीगु दु।

अवलोकनलिपा लिच्वः बियादिसें सभामुख घिमिरें संसद् भवन निर्माणया गति सन्तोषजनक मजूसां नं ज्याय् धाःसा छुंछुं प्रगति जूगु धयादिल। निर्माण कम्पनीं वइगु चैततक निर्माण पूवंकेगु धाःसां नं उगु ई मगाःगू जूसां नं याकनं संसद् भवन निर्माण पूवनीगुलिइ भलसा प्वंकादिल।राष्ट्रिय सभाया नायः दाहालं लिपांगु अवस्थाया तुलनाय् आः निर्माण ज्याय् प्रगति जूगु खनेदूगु धयादिल।

अवलोकन टोलीइ राष्ट्रिय सभाया न्वकू, सङ्घीय संसदया महासचिव, सचिव लिसें कर्मचारीलिसेंया ब्वति दूगु खः।

राहदानी विभागं आः छवाः निवाःया दुने हे राहदानी सेवा अःपुइगु धाःगु दु। विभागं म्हिगः सनिलय् छगू सुचं पिथनाः अन्तरिम व्यवस्थापनया निंतिं विभागलिसें सम्बन्धित सकलेंं निकायपाखें कुतः जुयाच्वंगु व आः छवाः निवाःया दुने हे सेवा अःपुइगु धाःगु दु।

छुं दिं थुखे अन्तरिम व्यवस्थापनया कथं राहदानी वितरणय् छुं कटौती यायेमाःगु विभागं धाःगु दु। विभागं राहदानी दयेकेत विभागय् वइपिं सेवाग्राहीयात थीथी प्रलोभन क्यनाः ठगे याइगु प्रवृत्ति खनेदूगु व आः तक ठगे यायेगु ज्याय् स्वाःपिं शङ्काय् झिंन्याम्हेसित नियन्त्रणय् कयाः अनुसन्धान लिसें माःगु कथंया कारबाहीया निंतिं नेपाल प्रहरीयात लःल्हानागु धकाः नं धाःगु दु।

विभागं धाःगु दु, “थत्थे छुं नं त्वः तयाः जुइ फइगु ठगीपाखें सेवाग्राही तय्सं थः थम्हं तुं सचेत जुइत व छुं नं शङ्कास्पद गतिविधि खने दुसा छुं नं माध्यमं सम्पर्क यानाः जानकारी बिइत इनाप याना च्वना।” सेवाग्राहीयात अःपुक व याकनं सेवा बिइत लिसें राहदानी सम्बन्धी समस्या याकनं ज्यंकेत विभागं ज्या याना च्वंगु धाःगु दु।

जनकपुरधामय् दँय् दसं झःझः धायेक न्यायेकीगु सीताराम विवाह पञ्चमी महामहोत्सवया तयारी लिपांगु चरणय् थ्यंगु दु। थनिंनिसें नगरदर्शन ज्याझ्वः नापं छवाः यंकंया धार्मिक पर्व औपचारिक कथं न्ह्यायेत्यंगु दु।

जानकी मन्दिर लागा, रङ्गभूमि ख्यः लिसें बाह्रबिघा लागाय् सुचुकुचुया नापनापं ल्वःवने पुइक पाल तयेगु ज्या तःगतिं न्ह्याना च्वंगु जानकी मन्दिर व्यवस्थापन पक्षं धाःगु दु। देगः जःखःया गल्ली, देगः देगः पतिकं मत जडान यायेगु ज्या जुयाच्वंगु दु। विवाह पञ्चमीया मू ज्याझ्वः जानकी मन्दिर व बाह्रबिघा रङ्गभूमि ख्यलय् हे केन्द्रित जुइगु जूगु दु, अथे खःसां थुगुसी छुं नं तगिंया सरकारं ग्वाहालि मयाःगु देगःया उत्तराधिकारी महन्थ रामरोशन दासं धयादिल।

न्हापाया दँय् सरकारी निकायं आर्थिक नापं व्यवस्थापकीय ग्वाहालि यायेगु याना च्वंगुलिइ थुगुसी धाःसा छुं नं कथंया ग्वाहालि मजूगु वय्कलं धयादिल। अयोध्या, ऋषिकेश, हरिद्वार लिसें भारतया थीथी धार्मिक केन्द्रपाखें थुगुसी नं तः ल्याखय् साधु–सन्त, महन्त, योगी, सन्यासी, भिक्षु व भिक्षुणीत वइगु जानकी मन्दिरं धाःगु दु।

जनकपुरधामयात मिथिलाञ्चलया सांस्कृतिक राजधानीया कथं म्हसिकीगु थ्व महोत्सव दँ दँनिसें नेपाः–भारत धार्मिक स्वापू क्वात्तुकीगु मू माध्यम जुयाः वयाच्वंगु दु। छवाः यंकंया विवाह पञ्चमी महामहोत्सवया थौं नगरदर्शन, शुक्रबाः फूलबारी लिला, ६ गते धनुषयज्ञ, ७ गते तीलकोत्सव, ८ गते मटकोर, ९ गते स्वयंवर नापं भिं इहिपाः व १० गते रामकलेवा विधिलिसें थुगुसीया महोत्सव क्वचाइगु जूगु दु।

दँय्दसं मङ्सिर शुक्लपक्ष पञ्चमीया दिं न्यायेकीगु थ्व पर्वय् नेपाः व भारतया थीथी थासं लखं लख भक्तजनत जनकपुरधाम वयेगु याइ। प्रमुख जिल्ला अधिकारी प्रेमप्रसाद लुइँटेलया कथं विवाह पञ्चमीयात ताःतया सुरक्षा योजना कडा यानातःगु दु। तः ल्याखय् वइगु लखंलख भक्तजनतय्त बिचाः यानाः नेपाल प्रहरी, सशस्त्र प्रहरी लिसें ट्राफिक प्रहरीयात माःगु ल्याखय् परिचालन यायेगु वय्कलं धयादिल।