राष्ट्रिय प्रजातन्त्र पार्टी (राप्रपा) सरकारं पिहावःगु दु। थौं सुथय् च्वंगु केन्द्रीय कार्य सम्पादन समिति व संसदीय दलया मंकाः बैठकं सरकारं पिहावनेगु व समर्थन तक लित कायेगु निर्णय याःगु दु धका प्रवक्ता मोहन श्रेष्ठं जानकारी बिःगु दु।

सत्ता सहकार्यपाखे वःगु ह्यूपा न हाकन सत्ता केन्द्रित अस्थिरतापाखे घ्वाना यकूगुलि सरकारपाखे पिहावनेगु राप्रपा न धाःगु दु। ‘आः खनेगु दु सत्ता ह्यूपा वयेगु प्रवृत्ति व प्रक्रिया वर्तमान संविधानया संरचनय् निहित अस्थिरताया स्वभाविक चरित्र खः धइगु जिमिगु ठहर खः,’ राप्रपां पिकागु विज्ञप्तिइ उल्लेख याःगु दु।

माओवादी केन्द्रया अध्यक्ष तक जुयादीम्ह प्रचण्ड नेतृत्वया सरकारयात समर्थन यानागु राप्रपा उपप्रधानमन्त्रीनाप सरकारय् सहभागी जूगु खः। पार्टी अध्यक्ष राजेन्द्र लिंदेन उपप्रधान नाप ऊर्जा मन्त्री जूगु खः ।

नेकपा एमालेया सचिव योगेश भट्टराई न राष्ट्रपतिया चुनावय् एमालेया उम्मेदवार सुवास नेम्वाङ विजयी जुइ धका दाबी यानादीगु दु।

पार्टीया पाखे नेम्वाङ उम्मेदवार क्वछिइ धुका सचिव भट्टराई न अथे धयादीगु खः। वयकलंधयादीगु दु, ‘सुवास नेम्बाङ राष्ट्रपती उम्मेदवार ।

भिंतुना दु सुवास दाई, त्याइ।’ नेपाली कांग्रेसया पाखे राष्ट्रपतिइ रामचन्द्र पौडेल उम्मेदवार जुगु दु।

यल महानगरपालिकां जावलाखेलय् उग्रचण्डीमाई नाप स्वाःगु सांस्कृतिक महत्व जाःगु थाय् न्ह्यकें त्यःगु धासे गुथियार व स्थानीय संस्कृति ह्यःमिपिन्स थौं बिहीबाः विरोध प्रदर्शन याःगु दु।

स्थानीय गुथियारपिन्स धार्मिक सांस्कृतिक नखः व पूजा यानाच्वंगु महानगरपालिका– ४ (ङ) या कित्ता नं १३५ दुने दुगु उगु थाय् तयातःगु बार, पखाः नगर प्रहरीं डोजर चले याना थुना बिःगु खः।

महानगरपालिकां उगु थासय् फुटपाथ दयकेगु ध्यवां ल्यः दुगु ध्यवां पार्क दयकेत्यःगु खः। ताम्रकारपिनिगु कुल द्यः कथं कयावयाच्वंगु उग्रचण्डीमाई थाय् सांस्कृतिक महत्त्वं जाःगुयात बेवास्ता यायेत स्वंगु धासे स्थानीयपिन्स थौं बिहीबाः विरोध प्रदर्शन याःगु खः। ताम्रकार समाजया न्ह्यलूवाय् टंगलय् जम्मा जूया स्थानीयपिन्स पुच्वोय् महानगरपालिका घेराउ याःगु खः।

‘खबरदार, ऐतिहासिक चौर व सम्पदा न्ह्यकें दइमखु धइगु’ प्लेकार्ड व ब्यानर ज्वना वःगु खः। धार्मिक पूजा, नखः, संस्कार थे जाःगु अमूर्त संस्कृतिया ज्याझ्वः सञ्चालन यायेगु झ्वलय् मोसिख्याः  नांया चौर खः।‘ ताम्रकार समाजं थःगु धार्मिक पूजा, संस्कार व गुथि सञ्चालन यायेगु झ्वलय् सँच्छि दँ न्ह्यःनिसे छ्यला वया च्वंगुलिय आः जानकारी हे मबिउसे छ्वकलं डोजर चले यायेज्यु ला?’ समाजया अध्यक्ष विनोद ताम्रकारं धयादीगु खः।

उगु थासय् तुँ, लःया परम्परागत भण्डारया रूपं दुगु जःरु (जलद्रोण) यात पुनः स्थापना याना सांस्कृतिक महत्त्व दुगु चौर संरक्षण यायेमाःगुलि अःखतं अतिक्रमण यायेत स्वंगुलि जिमिगु विरोध दु।’ अध्यक्ष ताम्रकारं धयादीगु द ‘छु न हालतय् सांस्कृतिक महत्त्वया थाय् अतिक्रमण याके बिइमखु।

लघुवित्त वित्तीय संस्थायात नेपाल राष्ट्र बैंकं अनियन्त्रित कर्जा लगानी, प्रोभिजन व लाभांश कडा यायेवं वःगु असर सेयर बजारय् खनेदुगु दु।

बिहीबाः लघुवित्त उपसूचक तसक कुहावःगु दु। उकिया कारण समग्र सेयर बजाः ५७.७४ अंकं कुहावःगु दु। लघुवित्तय् जक ९.५४ अंकं कुहावःगु दु।

३९ गु कम्पनीया सेयर भाः नेगेटिभ सर्किट लेवलय् कारोबार जूगु दु। थौं कुहावःगु दक्को लघुवित्त कम्पनी खः। बिहीबाः ४८ हजार १०५ गु कारोबारपाखे ६३ लाख २६ हजार १०५ कित्ता सेयर किनबेच जूगु खः।

बिहीबाः २ अर्ब ५२ करोड २७ लाख १३ हजार रुपैयाँया कारोबार जूगु दु। अप्पो सेयर कुहवसा नेपाल हाइड्रोया भाः दकलय् अप्पो ४.८२ प्रतिशतं थहावःगु दु। सामलिङ पावर कम्पनी ४.७७ प्रतिशतं थहावःगु दु।

बिहीबार छिमेक लघुवित्तया दकलय् अप्पो कारोबार जूगु खः।

लुँ तोलां थौं न्यासः कुहावःगु दु। थौं लुँ तोलां न्यासः कुहावया १ लाख २ हजार ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न झीतका कुहावःगु दु। वहः तोला झीतका कुहावया १ हजार २ सय ८५ रुपैयाँ न कारोबार जूगु दु धका महासङ्घं धाःगु दु।