असन्तुष्ट नेकपा एमालेया अध्यक्ष केपी शर्मा ओलीं सरकारं फागुन १ गतेयात जनयुद्ध दिवसया रुपं सार्वजनिक विदा बिगुयात कया असन्तुष्टि प्वकूगु दु।

अध्यक्ष ओलीं फागुन १ गते हिंसा दिवस जुगु धासे सरकारं राष्ट्रिय दिवसया रुपं हनिइगु निर्णय दुःखद् खः धका धयादीगु दु। बिहीबाः थौं बुदिंया लसताय् बालकोटस्थित निवासय् सफू विमोचन ज्याझ्वलय् वयकलं धयादीगु दु, ‘उगु हिंसा बालक्क खनेदु धका धयादीसे आः याःगु सरकारं न हिंसा दिवसयात राष्ट्रिय दिवस धका हनेत्यःगु हाकन राष्ट्रिय दिवस हकिइगु धका क्यालेन्डरय् त्यःगुयात दुःखद् निर्णय खः।

उकिइ हिंसाया मानसिकता, हिंसाप्रति गर्व यायेगु प्रवृत्ति खनेदत। थुगु खँ बालागु मखु।’ प्रधानमन्त्री पुष्पकमल दाहाल प्रचण्डप्रति संकेतयासे अध्यक्ष ओलीं हिंसाया लँ त्वःता शान्ति प्रक्रियाय् वये धुका हाकन छाय् हिंसाया महिमामण्डन यायेमाःगु? धका न्ह्यसः तक तयादीगु खः। वयकलं हिंसाप्रतिया पुलागु लगाव लुमकेगु छु न अर्थ मदु धका धयादीगु खः।

ओलीं धाःगु दु, ‘सरकारं छाय् अथे यात? आकास्मिक रुपं अथे यायेमज्यु? थःम्हेसिया हे लँ त्वःता शान्ति प्रक्रियाय् वये धुका हाकन उकिया महिमामण्डन यायेमाःगु? व खँ थःम्हेसिया मथु।

परराष्ट्रबिज्ञ हिरण्यलाल श्रेष्ठं च्वयादीगु नेपाल बंगलादेश बुद्धिस रिलेशनस सफू थौ छगु ज्याझ्वः दथुइ पितब्बज्या जुगु दु।

थौं छगु ज्याझ्वः दथुइ नेकपा एमालेया अध्यक्ष नाप पुर्व प्रधानमन्त्री केपि शर्मा ओली वयकःया निवास बालकोटय् बिमोचन यानादीगु खः।

उगु ज्याझ्वलय् संघीय सांसद कृष्णगोपाल श्रेष्ठ, येँ महानगरपालिकाया उपमेयर सुनीता डंगोल, यल महानगरपालिकाया उपमेयर मंजली शाक्यपिनिगु न उपस्थिति दुगु खः। उगु सफूयात कया डा.त्रिरत्न मानन्धर न्ववानादीगु खः।

बाल साहित्यकार नाप शिक्षासेवी शान्तदास मानन्धरयात युद्धप्रसाद मिश्र स्मृति पुरस्कार–२०७९ लःल्हाःगु दु ।

येँ जूगु छगु ज्याझ्वः दथुइ ३३ क्वःगु युद्धप्रसाद मिश्र स्मृति दिवसया लसताय् शान्तदासयात उगु सिरपा लःल्हाःगु खः।

प्रतिष्ठानया अध्यक्ष डा. फणीन्द्रराज निरौलाया अध्यक्षताय् व महासचिव नन्दु उप्रेतीं न्ह्याकूगु उगु ज्याझ्वलय् मूपाहाँ साहित्यकार, पूर्वमन्त्री रघुजी पन्तं वरिष्ठ बाल साहित्यकार नाप शिक्षासेवी शान्तदास मानन्धरयात सम्मान याःगु खः ।

भीमसेन मन्दिर पुनःनिर्माण सरोकार समितिं पत्रकार सुनील महर्जनयात सम्मान याःगु दु।

यलया दरबार क्षेत्रय् दुगु उगु देगःया उपभोक्ता मोडेलपाखे पुनःनिर्माण यायेगु निति विसं २०७२ सालया भुखाय् लिपा पत्रकारिता पाखे महत्वपूर्ण योगदान याउगुलि महर्जनयात सम्मान याःगु खः।

महर्जन नेपाल समाचारपत्रया सहायक सम्पादक नाप नेवाः पत्रकार राष्ट्रिय दबूया वरिष्ठ उपाध्यक्ष न खः। २०७२ सालया भुखाचं क्षतिग्रस्त जूगु खः। ललितपुर उद्योग वाणिज्य संघया ग्वाहालिं निस्वंगु उगु समितिं पाटन संग्रहालय नाप मंगलबाः जूगु छगु ज्याझ्वः दथुइ यल महानगरपालिकाया मेयर चिरिबाबु महर्जनं सहायक सम्पादक महर्जनयात हनापौं लःल्हानादीगु खः।

उगु ज्याझ्वःया अध्यक्ष कृष्णलाल महर्जनं उगु देगः पुनःनिर्माण सम्पदा संरक्षणय् निजी क्षेत्र व स्थनीयपिनिगु भूमिकाया उदाहरण बियादीगु खः। उगु देगः पुनःनिर्माणया कूल लागत ४ करोड ९३ लाख रकम मध्ये अत्यधिक हिस्सा जनस्तरपाखे जूगु खः।

ज्याझ्वलय् देगः पुनःनिर्माणयाःपि ज्यामिपिन्त न सम्मान याःगु खः।

सेयर बजाः थौं बुधबाः १.६४ प्रतिशतं थहावःगु दु। बुधबाः बजाः परिसूचक नेप्से ३३.५७ अंकं थहावना २०८०.३८ अंकय् बन्द जूगु दु।

बुधबाः लघुवित्त व म्युचुअल फण्ड बाहेक दक्को उपसूचक थहावसां बजाः लिड यायगु बैंकिङ उपसूचक १.२५ प्रतिशतं थहावःगु दु।

लघुवित्तं यःयः थे लगानी याना कर्जा असुल याये मफुगु समाचार वयेवं बुधबाः दक्को उपसूचक थःवसां लघुवित्त उपसूचक कुहावःगु खः। लघुवित्त उपसूचक १.४ प्रतिशतं कुहवःगु दु।

बुधबाः नेप्से थहावना कारोबार रकम धाःसा १ अर्ब ८० करोडय् सिमित जूगु दु। सोमबाः नेप्से १ अर्ब ९४ करोडया कारोबार भएको बजारमा बुधबाः कारोबार रकम घटे जुगु दु। बुधबाः नेप्सेय् हिमालयन डिस्टिलरीया १३ करोडया कारोबार जुगुलि जीवन विकास लघुवित्तया ४ करोड ९२ लाख व ग्लोबल आईएमई बैंकया ४ करोड ६१ लाख रुपैयाँया सेयर कारोबार जुगु दु।

नेप्सय् बुधबाः २१७ कम्पनीया सेयर कारोबार जूगुलि १६५ कम्पनीया सेयर भाः थहावःगु दु। अथे हे ४९ कम्पनीया सेयर भाः कुहावःगु दु सा स्वंगु कम्पनीया सेयर भाः स्थिर जूगु दु । उकि मध्ये लिवर्टी इनर्जीया सेयर भाः ९.८० प्रतिशतं थहावःगु दु सा छ्याङ्दी हाइड्रोपावरया सेयर भाः ९.५६ प्रतिशत व दोर्दी हाइड्रोपावरया सेयर भाः ९ प्रतिशतं थहावःगु दु।

अथेतु आदर्श लघुवित्तया सेयर भाः १० प्रतिशतं कुहावया नकारात्मक सर्किटय् बन्द जुगुलि खप्तड लघुवित्तया सेयर भाः ७.८५ प्रतिशत व उपकार लघुवित्तया सेयर भाः ६.९९ प्रतिशतं कुहावःगु दु।