प्रधानमन्त्री पुष्पकमल दाहाल प्रचण्ड फागुन १९ गते कतारया राजधानी दोहा वनेगु तयारीइ दु।

थ्व हे फागुन २१ गतेनिसे सुरु जुइगु अल्पविकसित राष्ट्रपिनिगु सम्मेलनय् ब्बतिइ कायेगु निति प्रधानमन्त्री प्रचण्ड दोहा वनेगु तयारीइ दु धका वयकःया सचिवालयं जानकारी बिःगु दु।

अल्पविकसित राष्ट्रपिनिगु सम्मेलन मार्च ५ निसे ९ तारिख (फागुन २१ निसे २५ गते) तक उगु ज्याझ्वः जुइत्यःगु खः।

दोहाय् जुइगु सम्मेलनय् अल्पविकसित राष्ट्रया सरकारपि नाप राष्ट्र प्रमुखपिनिगु सहभागी दइगु खः।

बागमती प्रदेश सभाया बैठक थौं च्वनिइगु जुगु दु। बैठकय् प्रदेश सरकारपाखे जारी जूगु अध्यादेशया प्रतिस्थापन विधेयक पेस जुइगु सम्भावित कार्यसूचीइ दु।

अय्न सुथय् च्वनिइगु कार्यव्यवस्था परामर्श समितिया बैठकं बैठकया कार्यसूची क्वछिइ। राजेन्द्र पाण्डे नेतृत्वया न्हापागु सरकारं न्यागु अध्यादेश जारी याःगु खः ।

उगु अध्यादेश शालिकराम जम्मकट्टेल नेतृत्वय् वर्तमान सरकारं वंगु पुस १८ गते सदनमा पेस याःगु खः।

अध्यादेश पेस जूगु ६० दिं दुने प्रतिस्थापन विधेयकपाखे पारित याना प्रमाणित यायेमाःगु प्रदेश सभा नियमावलीया व्यवस्था कथं थौं प्रदेश सभा बैठक च्वनेत्यःगु खः ।

येँ महानगरपालिकाया उपप्रमुख सुनिता डंगोलं वडास्तरय् दुगु मेलमिलाप केन्द्रया स्थलगत अनुगमन व निरीक्षण यानादीगु दु ।

वडास्तरय् दुगु केन्द्रया अवस्था बारे जानकारी कायेगु ल्याखं वय्कलं सक्रिय रुपं अनुगमन व निरीक्षण यानादीगु खः । वय्कलं ११, १३, १४, १५, १६ व २६ वडाय् च्वंगु केन्द्रया निरीक्षण यानादीगु खःसा १६ वडाय् मेलमिलाप कक्षया उलेज्या नं यानादीगु खः । निरीक्षण लिपा महानगर उपप्रमुख डंगोलं सम्भव दत्तले वडा ज्याकुथिइ हे मदुसा मेगु गुगुं थासय् बालं कयाः जूसां मेलमिलाप कक्ष तयार यायेत इनाप यानादिल ।उजुरीयात निर्णय प्रक्रियाय् यंकेबलय् विवाद निष्कर्षय् पिहां मवइगु, निर्णय जूसां छगू पक्ष असन्तुष्ट जुइगु तर मेलमिलाप दिगो जुइगुलिं थुकियात प्राथमिकता बिया वयाच्वनागु वय्कलं कनादिल ।

केन्द्रयात प्रभावकारी यायेत उपप्रमुख डंगोलं वडाअध्यक्ष, वडासदस्य लगायतया जनप्रतिनिधिलिसें महिला संजालया संयोजक, वडा सचिवलिसें सहलह यानादीगु खः । त्वालय् वनाः विवाद निरुपण यानागु अनुभव कनादिसें १५ वडाअध्यक्ष ईश्वरमान डंगोलं सैद्धान्तिक ज्ञानयात व्यवहारिक सीपपाखें कार्यान्वयन यायेमाः धासें जनप्रतिनिधि व कर्मचारीया क्षमता विकास जुल धाःसा जक अपेक्षित लिच्वः बी फइ धयादिल ।

थ्व झ्वलय् ११ वडाअध्यक्ष हिरालाल तण्डुकारं दर्ता मयासे नं उजुरीया सुनुवाई यानाः क्वचायेकागु अनुभव कनादिसें थाय्या अभाव जूगुलिं आः लिक्कं बालं कयाः कक्ष संचालन यायेगु योजना दुगु खँ कनादिल । १४ वडाअध्यक्ष सुमन श्रेष्ठं अदालतय् वनेबलय् ध्यबा दुम्हं मुद्दा त्याकी धइगु मानसिकता दयाच्वंगु व थुकथां केन्द्र संचालन लिपा निगुलिं पक्ष त्याइगु जुइ । विवादया निरुपण त्वालय् हे वनाः समाधान यायेगु कुतः याये धयादिल ।

थीथी न्हय्गू चरणय् जुइगु मेलमिलापय् गुगुं नं उजुरी वा मुद्दायात मेलमिलाप यायेत पक्ष वा विपक्ष थःपिंसं हे मेलमिलापकर्ता ल्यये दइगु व्यवस्था दुुसा थुकथं छम्हेसिनं ल्यःम्ह मेलमिलापकर्तायात मेम्हेसिनं सहमति प्वंकेमाःगु जुइ । यदि अथे जुइ मफुत धाःसा स्रम्बन्धित अधिकारीं क्वःछिउम्ह मेलामिलापकर्ता विवाद निरुपण यायेगु ज्या याइ ।

बौद्धमार्गी रतना मालिनोङ व लर्टट्रथ आक्रापास पोङपिंस लुम्बिनीइ मायादेवीया देगलय् लुँयागु गजू छुइगु ज्या याःगु दु।

वय्कःपिन्स थाइल्याण्डं नेपाः वयाः लुम्बिनीइ विशेष पुजायासें उगु लुँयागु गजू छुइगु ज्या यानादीगु खः ।

मायादेवी देगःया पुलांगु गजू हिलेगु खँ जुयाच्वंगु इलय् लाक्क हे थाइ दातापिंसं थ्व गजू छुना बीगु खँ धाःगु दु ।

लुम्बिनी विकास कोषया सदस्य सचिव सानुराजा शाक्यया कथं मायादेवीया देगलय् छूगु गजू ६० लाख तकाया लागत खर्च यानाः दयेकूगु खः ।

अमेरिकाया शिकागोय् च्वनाच्वंपिं नेवाःतय्गु संस्था नेवाः अमेरिकन दबूया न्हूधाः जूगु दु । दबू न छगू मुँज्यां यासे सन् २०२३–२०२५ दँया निंतिं न्हूगु ज्यासना पुचः ल्यःगु खः ।

उगु मुँज्यां सरिता धौभडेलया अध्यक्षताय् झिंस्वम्हेसिया न्हूगु ज्यासना पुचः ल्यःगु खः । न्हूगु ज्यासना पुचलय् सिम्रिकमान तुलाधर व कृति श्रेष्ठ न्वकु, लिना जोशी छ्याञ्जे, गगन पियायात दांभरिंलय् ल्यःगु दुसा ज्यासना पुचःया दुजलय् अञ्जली श्रेष्ठ, रोजिना प्रधान, सुशील तुलाधर, सवनम लाखे, सुरेन्द्र श्रेष्ठ, विजयराज महर्जन, नविन्द्र महर्जन व कृष्णेश्वरी श्रेष्ठ च्वनादीगु दु ।

सन् २०१० य् नीस्वंगु दबुलिं शिकागो व थुकिया जःखः च्वनादीपिं नेवाःतय्त छप्पँ छधी याना तयेगु नापं दँय्दसं नेपाल संवत् न्हूदँ हनेगु, मंकाः म्हपुजा यायेगु, यःमरिपुन्हि हनेगुलिसें थीथी ज्याझ्वः याना वयाच्वंगु दु । नेवाः संस्कृति व नखःचखः हनेगु बाहेकं दबूपाखें दँय्दसं साहित्यिक ज्याझ्वः नं याना वयाच्वंगु दुसा दबूया पुलांम्ह नायः केशरमान ताम्राकारया सम्पादनय् ‘शिकागो नेवाः’ नांया ख्वाःपौ नं पिथना वयाच्वंगु दु ।

अथे हे इलय् व्यलय् नेपालभाषाया सफू लिसें नेपालभाषाया सफू अंगे्रजीं भाय् हिला पिथनेगु नं याना वयाच्वंगु दु । विदेशय् च्वनाः नं नेवाः भाय्, कला, संस्कृति, साहित्यया ख्यलय् ज्वःमदुगु योगदान बिया वयाच्वंगुलिं उकिया कदर यासे दबूयात ने.सं. ११३७ य् चित्तधर सिरपाः व ने.सं. ११४२ य् गिरिधरलाल साहित्य सिरपालं छाय्पी धुंकूगु दु ।