लुँ तोलां थौ खुद्धः व गुसः कुहावःगु दु। थौ लुँ तोलां खुद्धः व गुसः कुहावया २ लाख ४२ हजार ८ सय तका न कारोबार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां १ सय ५० तका कुहावःगु दु। वहः तोलां १ सय ५० तका कुहावया था ३ हजार १ सय ३५ तका न कारोबार जुयाच्वंगु दु धका महासङ्घं धाःगु दु। कछलागा द्धादशी ११४६, कार्तिक ३० आईतवाः

निर्वाचन आयोगं न्ह्यःने वयाच्वंगु निर्वाचनया सुचं व ज्याखँतय्त प्राथमिकता बियाः सम्प्रेषण यायेत स्वम्ह सहायक प्रवक्ता क्वःछ्यूगु दु।आयोगं उपसचिवत प्रकाश न्यौपाने, कुलबहादुर जिसी व सङ्गीता पुन श्रीसयात सहायक प्रवक्ता क्वःछ्यूगु खः।

आयोगं थपे याःपिं स्वम्ह सहायक प्रवक्ता तय्गु विवरण थःगु वेबसाइटय् दुथ्याकातःगु दु।आयोगया प्रवक्ताय् सहसचिव नारायणप्रसाद भट्टराई जुयादीगु दु धाःसा सूचना अधिकारीइ कम्प्युटर अधिकृत सुमन घिमिरें ज्या याना वयाच्वनादीगु खः।

वंगु निर्वाचनय् नं सहायक प्रवक्तात थपे यानाः निर्वाचनया सुचं व ज्याखँयात महत्व बिइगु आयोगया अभ्यास खः। प्रतिनिधिसभा दुजः तय्गु निर्वाचन वइगु फागुन २१ व राष्ट्रियसभा १८ म्ह दुजःया निर्वाचन वइगु माघ ११ गतेया निंतिं क्वःछिनातःगु खः।

गृहमन्त्री ओमप्रकाश अर्याललिसे नेपाःया निंतिं बेलायती राजदूत रोब फेनं नापलानादीगु दु। गृह मन्त्रालय थौं नाप लायेगु झ्वलय् वय्कःपिं दथुइ लिपांगु हिलावना च्वंगु राजनीतिक परिस्थितिबारे विमर्श जूगु गृहमन्त्रीया सचिवालयं धाःगु खः।

उगु झ्वलय् मन्त्री अर्यालं जेनजी विद्रोहलिपा सङ्क्रमणकालीन अवस्थायात सामान्यीकरण यायेत सरकारं कुतः याना च्वंगु धयादिल।

राजदूत फेनं नेपालय् न्ह्यःने वयाच्वंगु फागुन २१ य् जुइगु प्रतिनिधिसभा दुजःया निर्वाचनय् बेलायतया आवश्यक ग्वाहालि दइगु भलसा बियादिल। वय्कलं निगू देय् दथुइ मैत्रीपूर्ण सम्बन्ध वइगु इलय् अझ क्वातुइगु धयादिल।

नेपाल संवत् ११४६ न्हूदँया लसताय् नेपाल रसिया मैत्री लिसें साँस्कृतिक संघं येँया कमलपोखरीइ च्वंगु रसियन हाउसय् बिहिबाः छगू विशेष समारोह ग्वसाः ग्वःगु दु।

संघया नायः ई राजेन्द्रबहादुर अधिकारीपाखें नेवाः परम्परा कथं त्वाः देवाय् मतः च्याकाः ज्याझ्वः उलेज्या यानादीगु उगु समारोहयात सम्बोधन यानादिसें मू पाहाँ रसियन हाउसया निर्देशक आनास्तासिया खोख्लोभां गरिमामय नेपाल संवतया इतिहासं मित्रराष्ट्र नेपाःया हे छवि उच्च जूगु धयादिल।

वय्कलं नेपाल संवत् न्हूदँया लसताय् सकसितं भिंतुना देछानादिसें थुगु ह्वःता चुलाकाब्यूगुलिं नेपाल रसिया मैत्री लिसें साँस्कृतिक संघयात दुनुगलं निसें सुभाय् देछानादिल।

सभाया सभापति लिसें संघया नायः ई अधिकारीं देय्या नामय् सर्वमान्य व्यक्तिपाखें आमजनतायात आर्थिक मुक्तिया निंतिं पलिस्था याःगु नेपाल संवत् नेपाःया हे मौलिक संवत् जूगु खँ न्ह्यथनादिल।

नेपाल रसिया मैत्री लिसें साँस्कृतिक संघया महासचिव स्वराज शाक्यं न्ह्याकादीगु उगु ज्याझ्वलय् शाक्यं नेपाल संवतया बारे विस्तृत कथं म्हसिका नापं न्ह्यब्वयादीगु खः।

येँ महानगरपालिकां कुमारी छेँया पौ जीर्णाेद्वार यायेत छगू क्वति नीन्यागू लख पीन्हय्द्वः च्यासः व खुइप्यतका लागत अनुमान याःगु दु। आर्थिक दँ २०८२÷८३ या भाः तयाः गणना याःबले आँय्पा, पःखाः, सिंलिसें पौ नापं स्वाःगु ज्वलंया जीर्णाेद्वार यायेत थ्व लागत वःगु येँमपां धाःगु दु।

कुमारी छेँया पौ ज्वइगु जुयाः थुकिया प्राविधिक पक्षया अध्ययन यायेत नीस्वंगु समितिं ब्यूगु प्रतिवेदनया कार्यान्वयन यायेत म्हिगः येँमपाया उपप्रमुख सुनिता डङ्गोलया नायःसुइ साझेदार ज्याकुथिया अधिकारीपिं नाप च्वंगु बैठकय् लागत अनुमानया विषय जानकारी ब्यूगु खः। कुमारी छेँ जीर्णाेद्वारया प्राविधिक, सामाजिक नापं मेमेगु पक्षया विषय सरोकारवालापाखें प्रतिक्रिया काये धुंकाः उपप्रमुख डङ्गोलं मौसम प्रतिकूलता जुइ न्ह्यः कुमारी छेँया पौ जीर्णाेद्वार यायेसिधयेके माःगु खँय् बः बिसें जीर्णाेद्वारया प्रक्रिया याकनं न्ह्याकेत हनुमानध्वाखा दरबार संरक्षण ज्याझ्वःयात निर्देशन बियादीगु खः।

बर्खाय् कुमारी छेँया पौ ज्वइगु जुयाः जीर्णाेद्वारया अध्ययन यायेत वंगु साउन २० गते समिति नीस्वंगु खः। समितिया कजीखय् पुरातत्व विभागया पुरातत्वविज्ञ पुरुषोत्तम डङ्गोल च्वनादीगु दु। दुजलय् विभागया इञ्जिनियर रोशन डङ्गोल, हनुमानध्वाखा हेरचाह अड्डाया प्रमुख काजीमान प्याकुरेल, गुठी संस्थानया इञ्जिनियर भीमप्रसाद अधिकारी व येँमपाया हनुमानध्वाखा दरबार संरक्षण ज्याझ्वःया आर्किटेक्ट अमित बज्राचार्य च्वनादीगु दु। अध्ययन समितिं ब्यूगु प्रतिवेदनया कथं कुमारी छेँया नामं म्हसिका दूगु कुमारीबहाःया स्वंगू तगिंया पःखाः चिरिबाना च्वंगु दु।

छुं थां व धलिं नं थाय् त्वतीगु अवस्था जूगु दु। गुलिखय् धलिं कीलं नयाः चिचीधंगु प्वाः दयेधुंकूगु दु। थाय् थासय् च्वंगु सिँ ध्वगिइगु अवस्थाय् दु। निगूगु तगिंमय् न्हाय्कनं तपुयातःगु अंगः किपात म्वाकातयेमाःगु अवस्थाय् दु। थां बाहेकं अप्वःधयाथें सिँया ज्वलंत अग्राखया मखुसें मेमेगु सिँया जूगुलिं याकनं जीर्णाेद्वार यायेमाःगु खनेदु। बैठकय् समितिया दुजः आर्किटेक्ट अमित बज्राचार्यं जानकारी बियादिल।

बज्राचार्यया कथं आँय्पा पौ प्यखेरं थाय्थासय् प्वला वने धुंकूगु दु । गुलिथासय् आँय्पा तःज्यानाः कुतुंवःगु, आइरन वेल्ट लिहांवःगु दु । गुलि थासय् ला आइरन बेल्ट हे मदु। अप्वः धयाथें संरचना स्यंगु अवस्थाय् थ्यने धुंकूगु दु।