मानव अधिकार लिसें शान्ति समाजं २०८२ या स्रष्टा सम्मान पुरस्कार न्हय्म्ह मिसा स्रष्टालिसें न्हय्गू प्रदेशया गुंगू भाय्या झिंछम्ह स्रष्टापिंत सिरपाः लःहाःगु दु।

म्हिग थन छगू ज्याझ्वःया दथुइ डा गोपाल ठाकुरयात महाप्रसाद रिजाल लोकतन्त्र स्रष्टा सम्मान, लक्ष्मी मालीयात राधादेवी दाहाल सद्भाव स्रष्टा सम्मान, भागिरथी श्रेष्ठयात ज्ञानप्रसाद खनाल सहिष्णुता सम्मान, रामबहादुर थापा मगरयात भूमिप्रसाद बराल स्रष्टा सौगात, वागदेवी राईयात जोगमाया बराल स्रष्टा सौगात, पञ्चकुमारी परियारयात श्रीप्रसाद दाहाल स्रष्टा सौगात, शर्मिलाकुमारी चौधरीयात पद्यप्रसाद दाहाल स्रष्टा सौगात, माधव चौलागाईयात राधादेवी दाहाल स्रष्टा सौगात, गौरी तमुयात जनककुमारी रेग्मी स्रष्टा सौगात सिरपाः लःल्हाःगु खः।

अथे हे, प्रा चूडामणि रेग्मीयात पवित्रादेवी चौलागाईं मानव अधिकार स्रष्टा सम्मान, प्राडा गुरुप्रसाद सुवेदीयात चन्द्रकला खनाल अहिंसा स्रष्टा सम्मान, सिरपालं हंपिनिगु छेँजःपिं लिसें प्रतिनिधिपिंसं लःल्हानाकाःगु खः। पुरस्कृत जूपिं स्रष्टापिंसं नेपालीया नापनापं नेपाल भाषा, संस्कृत, मैथिली, भोजपुरी, थारू, राई, मगर व गुरुङ यानाः गुंगू भाषाय् विशेष योगदान यानादीग खःसा अङ्ग्रेजी भाषं नापं वय्कःपिनि कृति पिहांवया च्वंगु दु। शान्ति समाजं विसं २०७७ सालनिसें सिरपाः लःल्हानाः वयाच्वंगु समाजया उपनिर्देशक सरिता पौडेलं धयादिल।

वय्कःया कथं दुर्गालाल श्रेष्ठयात कृष्णकुमारी दाहाल शान्ति स्रष्टा सम्मान, डा तीर्थबहादुर श्रेष्ठयात मानबहादुर रावल वातावरण स्रष्टा सम्मान, करुणा झायात श्रीनारायण दाहाल स्रष्टा सौगात सिरपाः लःल्हाःगु दु। उसाँय्या हुनिं वय्कःपिं उपस्थित जुयादी मपूmगु ग्वसाः खलःनं धाःगु दु। समाजया सभापति रेनुका पौडेलया सभापतित्वय् क्वचाःगु ज्याझ्वलय् समाजया संस्थापक सभापति कृष्ण पहाडी, राष्ट्रिय गानया रचनाकार व्याकुल माइला, पूर्वमुख्य न्यायाधीश शेषराज शिवाकोटी, कवि अर्जुन पराजुली, शान्ति समाजया पूर्वसभापतिपिं होमकान्त चौलागाईं व रामकृष्ण बराल, संस्थापक सदस्य कृष्ण कँडेल, सल्लाहकार रामप्रसाद जोशी, सचिव दिल्ली जैसी, सचिव दिवाकर पुडासैनी, सचिव प्रेम पटेल, सचिव तुुलसीराम सुनार, कोषाध्यक्ष चन्द्रमणि बञ्जारा, पूर्वकोषाध्यक्ष किरण ढकाल व स्रष्टा रामबाबु दाहालया उपस्थिति दूगु खः।

ज्याझ्वलय् उपसभापतिपिं लक्ष्मीनारायण मिश्र व धन थापा, पूर्ववरिष्ठ उपसभापति लिसें अनुशासन समितिया संयोजक कृष्णबहादुर रावलं नुगःखं तयादीगु खःसा ज्याझ्वः सञ्चालन महासचिव प्रकाश शाहीं यानादीगु खः। ज्याझ्वलय् पुरस्कृट स्रष्टापिंसं थःथःगु रचना ब्वनाः न्यंकादीगु खः।

बागमती प्रदेश सरकारं ग्रामीण लागाया नागरिकया निंतिं लजगाःया निंतिं ब्याज म्वायेकं त्यासा बिइगु जूगु दु। जिल्ला समन्वय समिति रसुवां ग्वसाः ग्वःगु झिक्वःगु जिल्ला सभायात सम्बोधन यासें बागमती प्रदेशया आर्थिक मामिला लिसें योजनामन्त्री प्रभात तामाङं छखा छेँय् निम्ह म्येय् न्यायेगु निंतिं सरकारं ब्याज म्वायेकं त्यासा बिइगु धयादिल।

वय्कलं उगु ज्याझ्वलय् युवापिंसं ब्वति कायेत इनाप यानादिल। दुरुया डेरी चायेकेत, दाना व साःया व्यवस्थापन यायेत नापं प्रदेश सरकार ग्वाहालि यायेत तयार दूगु वय्कलं धयादिल। जिल्ला समन्वय समिति प्रमुख अशोककुमार घिमिरेया सभापतित्वय् जूगु सभाय् जिल्लाया सरकारी ज्याकुथिया वार्षिक ज्याया प्रगति न्ह्यब्वःगु खः। ब्वति काःपिंसं राष्ट्रिय गौरवया आयोजना अन्तर्गत लाःगु गल्छी–त्रिशूली–मैलुङ–स्याफ्रुबेँसी–रसुवागढी सतक सुधार आयोजनाया ज्या प्रगति न्ह्यमब्वःगुलिं कुंखिंगु खः।

प्रमुख जिल्ला अधिकारी राजेश पन्थीं जिल्लाय् खुसिबाः चलः थेँ जाःगु विपदया घटना जुयाच्वनीगु व अजाःगु विपदया समस्या ज्यंकेगु निंतिं विपद् व्यवस्थापन समितिया बैठक सःतुबले सदरमुकाम पिने ज्याकुथि दूगु ज्याकुथि प्रमुखपिंसं वास्ता मयाइगु धयादिल।जिल्ला समन्वय समिति नुवाकोटया प्रमुख रजिन्द्र विक्रम सिंह ठकुरीं रसुवा व नुवाकोटाया विकासय् ल्हाःस्वानाः जनहितया ज्याय् न्ह्याः वनेमाःगु खँय् बः बियादिल।

नेपाली कांग्रेसया जिल्ला सभापति पेम्वाछिरिङ तामाङं चिलिमे जलविद्युतं जिल्लायात बिइगु रोयल्टी ध्यबापाखें छुं नं लबः कायेमखंगुलिं उगु ध्यबा मालाः प्रभावित बासिन्दाय् हयेत, पर्यटन प्रवद्र्धन न्ह्याकेत इनाप यानादिल।उगु ज्याझ्वलय् जिल्लाय् बांलागु ज्या याःगु १० मनू÷संस्थायात जिल्ला सभां हंगु खः।

हंपिंखय् नौकुण्ड गाउँपालिकाया उपाध्यक्ष चन्द्रबहादुर गलान, उत्तरगया गापाया अधिकृतस्तर खुगूगु तगिंमय् ज्या याइम्ह रामकृष्ण न्यौपाने, नौकुण्ड गापा–४या सचिव पूर्णबहादुर बुलुन, आमाछोदिङ्मो गापा–३ या वडा सचिव छोवाङदोर्जे तामाङ, श्रेणीविहीन पदय् ज्या यानाच्वंम्ह जिल्ला समन्वय समितिया जयराम देवकोटा, गोसाइँकुण्ड गापाया नुर्पु घले दुसा संस्थापाखे चिलिमे जलविद्युत् आयोजना व माथिल्लो मैलुङ जलविद्युत् आयोजना दु।

प्रधानमन्त्री सुशीला कार्कीं स्वनिगःया मेयरपिंनाप सहलह यानादीगु दु। उपत्यका मेयर्स फोरमया प्रतिनिधि मण्डल नाप बालुवाटारय् नापलानाः स्थानीय तगिंया प्रमुखपिंसं प्रधानमन्त्री कार्कीया नेतृत्वय् निर्वाचन सुथा ंलायेक जुइगु खँय् विश्वास प्वंकुसें उकिया निंतिं थःपिनिगु पूवंकं ग्वाहालि दइगु प्रतिबद्धता प्वंकूगु दु।

नापलायेगु झ्वलय् फोहर व्यवस्थापन, सतक मतया बक्यौता, सुरक्षा हाथ्या व विकास निर्माणया पंगःत लिसेंया स्थानीय तगिंयात लानाच्वंगु थीथी समस्याबारे प्रधानमन्त्रीयात खँ तःगु व सरकारं थुकियाबारे ‘बोल्ड’ निर्णय यायेमाःगु बिचाः तःगु प्रधानमन्त्रीया सचिवालयं धाःगु दु। सहलहय् यल महानगरपालिकाया प्रमुख चिरिबाबु महर्जनं सतक मतया बक्यौता तःदँ थुखे राफसाफ मजूगु धयादिसें ६० प्रतिशत स्थानीय तगिं व ४० प्रतिशत सङ्घीय सरकारं पुलेगु व्यवस्था यानाबीत प्रधानमन्त्रीयात इनाप यानादिल।

गोकर्णेश्वर नगरपालिकाया प्रमुखं नेपाल ट्रष्टया जग्गाय् सतक बिस्तारया निंतिं पहल यायेत इनाप यानादिल। टोखा नगरपालिकाया प्रमुख प्रकाश अधिकारीं टोखा–छहरे सतक तब्याकेगु निंतिं स्थानीययात मुआब्जा बिइगु निर्णय यायेत गैरदलीय सरकारं ऐतिहासिक पलाः न्ह्याकेमाःगु छ्याता बियादिल। बूढानीलकण्ठ नगरपालिकाया प्रमुख मीठाराम अधिकारीं आन्दोलनलिसे तप्यंकं स्वापू मदुपिंसं याःगु लुटपाटय् कडा कारबाही यायेमाःगु धयादिल। चाँगुनारायण नगरपालिकाया प्रमुख जीवन खत्रीं सल्लाघारी–कमलविनायक–नगरकोट सतक तःदँतक पूमवंगुलिं याकनं क्वचायेकेत माग यानादिल।

‘जेनजी’ प्रदर्शनया लिपा पिहांवःगु सुरक्षा अवस्थाबारे नं अप्वः धयाथें मेयरं ध्यानाकर्षण याकुसें स्थानीय तगिंया ज्याकुथि सञ्चालनय् सहजता यानाबीत इनाप याःगु खः। प्रधानमन्त्री कार्कीं थः निर्वाचनय् केन्द्रित जूगु धयादिसें थुकी स्थानीय सरकारया ग्वाहालि माःग धयादिल। “छखे निर्वाचन जक या, मेगु ज्याय् ल्हा तयेमते धकाः खँ पिहां वयाच्वंगु दु।

मेखे छिकपिंसं न्ह्यथनादीगु समस्या ज्यंकेमाःगु माग दु। थुकी छुछु यायेफइ स्वये। ज्यंकेगु ज्या झी नापं जानाः यायेगु खः।”आः वइगु पुस्ताया निंतिं देय्यात च्वनेबहःगु दयेकेगु झी सकसिया मंकाः दायित्व जूगु धयादिसें प्रधानमन्त्री कार्कीं तःदँतकया छगू हे कथंया शासनयात कयाः युवातय्के खनेदूगु असन्तुष्टि आत्मपरीक्षणया विषय जूगु बिचाः तयादिल। न्हूगु पुस्ताया बिचाःकथं न्ह्यायेमाःगु व प्रविधिलिसें तःधिकः जूपिं पुस्ताया अपेक्षा थुइकेमाःगु वय्कलं धयादिल।

पशुपतिनाथया मणि मुकुट, कवज, एकमुखे रुद्राक्षलिसेंया प्राचीन सामाग्रीया ब्वज्या यायेगु दु।

पशुपति क्षेत्र विकास कोषं दँय्दसं मार्गशीर्ष कृष्ण त्रयोदशी व मार्गशीर्ष कृष्ण आमावास्याया दिं नागमणि, मुकुट, कवज, एकमुखे रुद्राक्षलिसें प्राचीन महत्वया तिसालिसेंया सामाग्रीत सर्वसाधारणयात क्यनीगु परम्परा दु। वहे परम्परा कथं सुथसिया १०ः०० ताः ई निसें ११ः३० ताः ई तक सुरक्षा निकायया ग्वाहालिइ नागमणि, मुकुट, कवज, एकमुखे रुद्राक्षलिसेंया प्राचीन महत्वया तिसात ब्वज्या यायेगु खः।

अथे हे, मार्गशीर्ष कृष्ण आमावास्याया दिन मङ्सिर ४ गते बिहिबाः सुथसिया ९ः०० ताः ई निसें ११ः४५ ताःई तक नं सुरक्षा निकायया ग्वाहालिइ नागमणि, मुकुट, कवज, एकमुखे रुद्राक्षलिसेंया प्राचीन महत्वया तिसाया ब्वज्या याइगु जुगु दु।

मार्गशीर्ष कृष्ण त्रयोदशीया दिं वंगु दच्छि न्ह्यःनिसें उगु सामाग्रीत सुरक्षित कथं तयातःगु व मार्गशीर्ष कृष्ण आमावास्याया दिं आः दच्छि तक थुगु सामाग्रीत सुरक्षित कथं तयातयेगु खःसा थुगु क्यनेगु परम्परा दयावया च्वंगु कोषं धाःगु दु।

सरकारं मदुम्ह पत्रकार सुरेश रजकया जहानयात रोजगारीया व्यवस्था याःगु दु। सञ्चार नापं सूचना प्रविधिमन्त्री जगदीश खरेलया कुतलय् मन्त्रालय मातहतया सुरक्षण मुद्रण केन्द्रय् पत्रकार रजकया जहान सुजन मगियायात ‘कम्प्युटर अपरेटर’ पदय् रोजगारीया व्यवस्था मिले याःगु खः।

थौं सञ्चार मन्त्रालयय् ग्वसाः ग्वःगु छगू ज्याझ्वलय् सञ्चारमन्त्री खरेल व मन्त्रालयया सचिव राधिका अर्यालया उपस्थितिइ सुरक्षण मुद्रण कोषया कार्यकारी निर्देशक देवराज ढुङ्गानां सुजन मगियायात कम्युटर अपरेटरय् नियुक्त याःगु पौ लःल्हानादिल। विसं २०८१ चैत १५ गते येँया तीनकुनेय् जूगु प्रदर्शनया झ्वलय् दृश्य कया च्वंबलय् छखाछें मिँ च्याःगुलिइ दुने लानाः पत्रकार रजक मदूगु खः।सञ्चारमन्त्री खरेलं देय् व जनताया निंतिं जोखिम कयाः बुखँ सङ्कलन याइपिं पत्रकारत न्ह्याबलें असुरक्षित जुइगु अवस्थाय् राज्यया अभिभावकीय भूमिका दयेमाःगु बिचाः प्वंकादिल।

वय्कलं धयादिल, “पत्रकार सुरेश क्रियाशील पत्रकारकथं जोखिम कयाः पत्रकारिता यानाच्वंगु सन्दर्भय् मदूगु खः। सुरेशया निंतिं छुं यायेफःसा ज्यू धइगु मन्त्रालययात तायाच्वंगु खः व नेपाल पत्रकार महासङ्घं नं इनाप यानाच्वंगु सन्दर्भय् चीधंक जूसां नं रोजगारीया कुतः जूगु खः।

थुकिं भतिचा जूसां नं सान्त्वना दइगु अपेक्षा यानाच्वंगु दु।”सञ्चारमन्त्री खरेलं मदुम्ह रजकयात पत्रकार सहिद घोषणा यायेगु प्रक्रिया न्ह्याकूगु जानकारी बियादिल। वय्कलं छेँजःपिंत निःशुल्क उच्च शिक्षा अध्ययन यायेगु व्यवस्था यायेत नं कुतः यायेगु प्रतिबद्धता प्वंकादिल।

मदुम्ह पत्रकार सुरेश रजकया थःथिति पुरुषोत्तम मगियां कार्यस्थलय् हे मदुम्ह सुरेशया न्याय बिइत घटनाया दोषीयात कानुनी दायराय् हयेत, सहिद घोषणा यायेत व तीनकुनेय् रजकया झ्वाता निर्माणया निंतिं कुतः यायेत नं इनाप यानादिल।