येँ महानगरपालिकाया नगर प्रहरी प्रमुख राजुनाथ पाण्डेयात निलम्बन याःगु दु। प्रमुख प्रशासकीय अधिकृत सरोज गुरागाई न पाण्डेयात खुलाया निति निलम्बन याःगु खः।

थ्व स्वया न्ह्यः गुरागाईं न पाण्डेयात स्पष्टीकरण न्यःगु खः। गुरागाईं न थःत ज्याकूथि दुहावःगु इलय् अवरोध यागुलि पाण्डेयात स्पष्टीकरण न्यःगु खः।

श्री हल्चोक आकाश भैरव झिनिदँ जात्रा ज्याझ्वः हल्चोकय् भक्तजनपिंत प्रसाद ग्रहण याकाः औपचारिक रुपं क्वचाःगु दु।

श्री हल्चोक आकाश भैरव समाजया अध्यक्ष शेरबहादुर पुतुवारया सभाध्यक्षताय् जूगु ज्याझ्वलय् नार्गाजुन नगरपालिकाया कार्यवाहक मेयर शुशिला अधिकारीं झिनिदँ जात्राय् द्यःजुपिं, गुथियार व आर्थिक ग्वाहालि नाप प्रचार प्रसार यानादीपि संचारकःमि नाप थीथी कथं ग्वहालि याःपिंत सुभाय् पौ लःल्हानादीगु खःसा हल्चोक आकाश भैरव गुथिया नायःपि सागर पुतुवारं स्वांमा व सुरज पुतुवारं खादा न्ययेकादीगु खः।

अथेहे नार्गाजुन नगरपालिका वडा ३ या अध्यक्ष उमेश लामा व येँ महानगरपालिका १८ वडा अध्यक्ष न्हुच्छेकाजी महर्जनपिंस मतिनाया चिं लःल्हानादीगु खः।

प्रसाद ग्रहण ज्याझ्वलय् बागमती प्रदेशया सामाजिक बिकास मन्त्री हरिप्रभा खड्गी श्रेष्ठ, संघीय सांसद विराजभत्त श्रेष्ठ, बागमती प्रदेशया सांसद वसन्त मानन्धर, येँ महानगरपालिकया उपमेयर सुनिता डंगोल, येँ महानगरपालिका १७ वडा अध्यक्ष नविन मानन्धर, १९ या वडा अध्यक्ष राजेश श्रेष्ठ २० वडा अध्यक्ष राजेन्द्र मानन्धर नाप थीथी ब्यक्तिmपिंस ब्वति कयादीगु खः।

लःसा पासा पुचः थसि, यलया ग्वसालय् नेपालभाषा व लिपि स्यने ज्याझ्वः जुगु दु। छगु ज्याझ्वः दथुइ महालक्ष्मी नगरपालिकाया उपमेयर लक्ष्मी महर्जनं उलेज्या यानादीगु खः।

लच्छियक जुगु उगु स्यने ज्याझ्वलय् सुदिन महर्जन व महेन्द्र कुमार महर्जन प्रशिक्षण बियादीगु खः।

भाषा ख्यया कार्यकर्ता सविता मूनिकार मन्त। भाषा ख्यया कार्यकता सविता मूनिकार येँया मनमोृहन हस्पितलय् मदुगु खः।

ताः ई न्ह्यः निसें जलास्येँय् समस्या जुयाच्वम्ह सविता मूनिकारयात छुं न्हिं न्ह्यः ब्रेन ह्युमरेज न जुगु खः। मदुम्ह सविता मूनिकार नेपालभाषा ख्ःया कार्यकर्ता लिसें संस्कृतिकःमि खःसा वयकः नेपाल आर्ट कल्चया सस्थापक दुजः नं जुयादी।

वयकःया जहान रमेश मान मुनिकार न सास्कृतिक ख्यलय् मदिक्क ज्या याना वयाच्वनादीम्ह खः।

विराट नेपालभाषा साहित्य सम्मेलन गुथिया ग्वसालय् ख्वपया थीथी थाय् स्वयेगु व अनया खँ न्यनेगु नापं साहित्य ब्वनेगु न्हूगु अवधारणा ज्वनाः शनिवाः खुन्हु “विराट साहित्य पदयात्रा” ज्याझ्वः क्वचाःगु दु।

ख्वपः देयया तःपुखू सिद्धपुखुलिइ सुथय् ७ः३० ता इलय् मुनाः न्ह्याकुगु उगु पद यात्राय् स्वनिगःया ख्वीम्हं मल्याक्क साहित्यकारपिन्सं ब्वति काःगु खः।

विराटया नायः महेन्द्र गोपाल कर्माचार्यं सकसितं खादा न्येयकाः लसकुस यानादीगु उगु पद यात्रा ऐतिहासिक भाज्यापुखुलिइ कौला याना खौमाया जगतसुन्दर झ्वाता, लायकू व तलेजु दुने, तःमारी व प्रसन्नशील दिपंकर विहार लगायतया थीथी थासय् चाःहिलाः क्वचायेकुगु खः।उगु यात्राय् लोककवि राजभाई जकःमि, स्नेह सायमि, रिता महर्जन रितु, सजना बज्राचार्य, विमल प्रभा बज्राचार्य व विराटया नायः महेन्द्र गोपाल कर्माचार्य लगायतया साहित्यकारपिन्सं थीथी थासय् साहित्य वाचन यानादीगु खः।

अथेहे, उगु यात्राया झ्वलय् ख्वप देयया थीथी ऐतिहासिक, धार्मिक व सांस्कृतिक महत्वं जाःगु थाय् अवलोकन यानाः चाःहुलेगुया नापनापं उकिया बारे नं जानकारी बिइगु ज्याझ्वः नं जूगु खः।उगु ज्यझ्वलय् ब्वतिकाःपिं साहित्यकारपिन्सं थ्व पदयात्रायात छगू उल्लेखनीय यात्रा कथं काःगु दु।

थ्व यात्रा ज्याझ्वःया संयोजन विराटया पुलांम्ह नायः कृष्णभक्त बोडें थुके ब्वतिकाःपिन्त सुभाय् देछासें ख्वप देयया मेमेगु थासय् नं थजाःगु हे पदयात्रा ग्वसाः ग्वयेगु योजना दु धकाः धयादीगु दु।