त्रिभुवन विश्वविद्यालय नेपालभाषा केन्द्रीय विभाग यलध्वाखाय् कात्तिक २६ गते बुधवाः छगू ज्याझ्वःया दथुइ ‘नेपालभाषा जर्नल’ पितब्वज्या जुगु दु।

नेपालभाषा केन्द्रीय विभागया प्रमुख डा. राजनलाल जोशीया सभाध्यक्षताय् जूगु उगु ज्याझ्वलय् मूपाहां पंचवीरसिंह तुलाधरपाखें त्रिवि व थीथी व्यक्तिपिंसं नीस्वनातःगु छात्रवृत्ति लिसें सिरपाः लःल्हायेगु ज्या जूगु खः।

ज्याझ्वलय् छात्रवृत्तिपाखे त्रिवि छात्रवृत्ति न्हापांगु सेमेस्टरपाखे सुजना महजन व महेश्वरी महर्जन, स्वंगुगू सेमेस्टरपाखे समष्टि शाक्य व रामजी बलामी पुष्पदेवी छात्रवृत्ति न्हापांगु सेमेस्टरपाखे नानीहेरा शाक्य, दिलदेवी महर्जन स्वंगुगू सेमेस्टरपाखे नीता तुलाधर व प्रमिला महर्जन खैगुली छात्रवृत्तिपाखे ज्ञानराम श्रेष्ठ व योगवीरसिंह अनुसन्धान वृत्ति पुजा मानन्धरयात मूपाहां पञ्चवीरसिंह तुलाधरं लःल्हानादीगु खःसा सिरपाःपाखे पीयूष पदक रामेश्वर श्रेष्ठ, सत्यहेरा सिरपाः पंचलाल महर्जन व श्रेष्ठ पदक रामेश्वर श्रेष्ठ न्हाप, नितु डंगोल ल्यू व हसना महर्जन लियांल्यू लाःपिंत मूपाहां तुलाधरं सिरपाः लःल्हानादीगु खः।

ज्याझ्वलय् विशेष पाहां माननीय सुरेश मानन्धर, पाहां प्रा.डा. ओमकारेश्वर श्रेष्ठ, पाटन क्याम्पस प्रमुख डा. रघुबीर विष्ट, उप प्रध्यापक राजितबहादुर श्रेष्ठ, पाटन क्याम्पस स्ववियु सभापति रोहित कपाली, लुमन्ति दबूया नायः यादव रंजितपिंसं थःपिनिगु नुगः खँ तयादीगु खः।

नेपाल स्काउटया लैनचौरय् च्वंगु जग्गाय् खड्का ल्याड डेभलपर प्रालिं दयेकूगु संरचनायात येँ महानगरपालिकां थुना छ्वःगु दु।

स्काउटं ल्यंदनिगु वक्यौता पुलेत थ्व हे कात्तिक २० गते उगु कम्पनीयात न्हय् न्हुया सुचं जारी याःगु खः। उगु कम्पनीं बुधबाःतक बक्यौता मपूबलय् स्काउटं उगु संरचना चीकेत येँ महानगरपालिकायात पौ छ्वःगु खः।

स्काउटया इनापय् महानगर प्रहरी बलया टोलीं थौं उगु संरचना थुना छ्वःगु महानगरीय प्रहरी बलया प्रमुख राजुनाथ पाण्डें जानकारी बिउगु दु।

स्काउटया जग्गाय् च्वंगु पार्टी प्यालेस, रेष्टुरेन्टलिसें संरचनाया नक्शा पास तकं मजूनिगु वय्कलं कनादिल।

वीर अस्पतालय् श्वासप्रश्वास सम्बन्धी झिताजि थीथी ल्वय्या भाइरसया छक्वलं परीक्षण न्ह्याकूगु दु।अस्पतालया मेडिकल जेनेटिक्स (अनुवाङ्शिक) प्रयोगशालाय् श्वास प्रश्वास सम्बन्धी झिगू कथंया ल्वय्या भाइरसया छक्वलं छगू हे इलय् परीक्षण न्ह्याकागु धकाः अस्पतालया मेकिल अनुवाङ्शिक विभागया प्रमुख डा निलम ठाकुरं धयादिल।

वय्कलं ल्वगिया छगू ल्वय्या भाइरसया ब्यागलं–ब्यागलं परीक्षण यायेबले ल्वय् म्हसिकेत समस्या जूगुलिं छक्वलं झिगू ल्वय्या भाइरसया परीक्षण न्ह्याकागु धयादिल। “न्हापा उपिं झिताजि ल्वय्या भाइरसया ब्यागलं–ब्यागलं इलय् परीक्षण यायेगु याना च्वनागु खः, आः छक्वलं छगू हे इलय् परीक्षण यायेबले खर्च नं म्हो जक जूगु दु” वय्कलं धयादिल, “छु भाइरसया हुनिं छु ल्वचं कःगु धकाः सिइकेत नं फइगु, तःक्वः परीक्षण नं याये म्वाः।”

वय्कलं भाइरसया हुनिं ल्वय् म्हसिके धुंकाः अस्पतालय् हे वासः न्ह्याकेगु धयादिल। अथे हे प्रयोगशालाय् मस्तिष्क सङ्क्रमण सम्बन्धी खुताजि भाइरसया नापं छक्वलं परीक्षण न्ह्याकागु विभागया प्रमुख डा ठाकुरं धयादिल। प्रयोगशालाय् सोँ बाहेकं मेमेगु ब्वय् जुइगु गंल्वय्या नापं परीक्षण याइ।

विसं २०७३ लय् अनुवाङ्शिक (जेनेटिक) ल्वय्या म्हसिका व वासः यायेत नीस्वंगु प्रयोगशालाय् जनशक्ति नापं उपकरण अभावया हुनिं ल्वय्या परीक्षण नियमित जुइ मफयाच्वंगु खः। जि (वङ्श)य् जूगु अवस्थां ब्वलनीगु ल्वय्यात अनुवांशिक ल्वय् धाइ।

“सरकारी कथं अनुवाङ्शिक ल्वय् म्हसिकेगु थ्वहे प्रयोगशाला जुयाच्वंगु दु”, वय्कलं धयादिल, “अथे खःसां जिमिके स्वम्ह जक जनशक्ति दूगु व उपकरण नं माक्वं मदूगुलिं न्हिया न्हिथं ल्वय्या परीक्षण याये फयाच्वंगु मदु।”वय्कःया कथं छन्हु पाकाः ल्वय्यागु परीक्षण यायेगु यानाच्वंगु दु । आः प्रयोगशालाय् नीन्याताजि अनुवाङ्शिक ल्वय्या भाइरसया नियमित परीक्षण यायेगु यानाच्वंगु दु।

राष्ट्रपति रामसहायप्रसाद यादवं गणतन्त्र कोरियाया राष्ट्रिय दिवसया लसताय् बुधबाः सनिलय् थन ग्वसाः ग्वःगु लसकुस ज्याझ्वलय् ब्वति कयादीगु दु।

उगु झ्वलय् बःचा हाकःगु न्वचु बियादिसें नेपाःया निंतिं कोरियाली राजदूत पार्क थेयङं नेपाःया दिगो आर्थिक विकास व समृद्धिया निंतिं कोरिया सरकार नेपाःनाप मंकाःज्या यानाः न्ह्याः वना च्वनागु धयादिल। वय्कलं जलविद्युत्, सांस्कृतिक सम्पदा व मानव संसाधनय् नेपाःया विकासया निंतिं माक्वं ह्वःताः दूगु लागा जूगुलिं उकियात हे न्ह्यपलाखय् तयाः कोरियां साझेदारीया भूमिका म्हितागु धयादिल।

समारोहय् कोरियाली तजिलजि पिब्वइगु सांस्कृतिक ज्याझ्वः नापं न्ह्यब्वःगु खः। नेपाल सरकारया वरिष्ठ अधिकारी, थनया कूटनीतिक नियोगया प्रमुख, उद्यमी–व्यवसायी, सञ्चारकःमि, ज्याया झ्वल् थन दुपिं कोरियाली नागरिकतय्सं उगु ज्याझ्वलय् ब्वति काःगु खः।

प्रधानमन्त्री सुशीला कार्कीं न्ह्यने थ्यंकः वःगु प्रतिनिधिसभा दुजःया निर्वाचनया तयारीया विषयय् म्हिगः निर्वाचन आयोगया पदाधिकारीनाप सहलह यानादीगु दु।

प्रधानमन्त्री कार्कीं प्रधानमन्त्री लिसें मन्त्रिपरिषद्या ज्याकुथि, सिंहदरबारय् आयोगया कार्यवाहक प्रमुख आयुक्त रामप्रसाद भण्डारी, आयुक्तपिं डा जानकीकुमारी तुलाधर, सगुनशमशेर राणा व मेमेपि अधिकारीपिंनाप सहलह यानादीगु खः। आयोगं निर्वाचन तयारीअन्तर्गत ६० प्रतिशत स्वया अप्वः ज्या सिधये धुंकूगु व आःतकया मूल्याङ्कनय् आः वइगु फागुन २१ गते निर्वाचन याये फइगु विश्वास याःगु धाःगु दु।

आयोगय् दर्ता जूगु व म्होतिं नं वडा दुजः याःगु दललिसे सहलह याःबले आःतक सुनां नं निर्वाचनय् ब्वति काये फइमखु धइगु मधाःगु कार्यवाहक प्रमुख आयुक्त भण्डारीं धयादिल। उकिया थासय् न्हापा न्हापाया निर्वाचन बहिष्कार यानाः पंगः थनाच्वनीगु पुचः व दलतनापं आः आयोगय् दर्ता जुयाः चुनावय् ब्वति कायेत तयार जूगुलिं न्हापासिबें अःपूगु वातावरण जुया वनाच्वंगु भण्डारीया धापू दु। आयोगय् न्हूगु दल दर्ता व मतदाता नांधलखय् दुतिनेगु ज्या नं वहे ल्याखं जुयाच्वंगु धयादिसें वय्कलं क्वःछिनातःगु दिनय् हे निर्वाचन याये फइगु खनेदूगु व आयोग थुकिया निंतिं सक्षम जूगु व थःगु अनलाइन प्रणालीइ मतदाता नांधलः दर्ताया यानाच्वंपिं म्वः म्वः जुयाः सुथसिया ७ ताः ईनिसें सनिलया ७ ताः ई तक निगू सत्रय् ज्या न्ह्याकूगु, जनशक्ति अप्येकूगु व प्राविधिक समस्यायात नापं समाधान यानाः यंकाच्वंगु धाःगु दु।

अथे हे राष्ट्रिय पञ्जीकरण विभागया महानिर्देशक नमराज घिमिरें राष्ट्रिय परिचयपत्र वितरणया निंतिं सङ्कलन याःगु जैविक तथ्याङ्क निर्वाचन आयोगयात उपलब्ध यायेत तयार दूगु धयादिल।आयोगं बिहिबाःनिसें हे राष्ट्रिय परिचयपत्रया विवरणया लिधंसाय् नापं मतदाता नांधलखय् दुथ्याकेगु तयारी न्ह्याकूगु दु।

थुकिया निंतिं म्हिगः बहनीनिसें प्राविधिक तयारी व परीक्षणया फुक्क ज्या यायेधुनेगु आयोगं धाःगु दु। निर्वाचनया निंतिं आःतक नीनिगू राष्ट्रिय व निगू अन्तरराष्ट्रिय पर्यवेक्षक संस्थातय्सं निर्वाचन पर्यवेक्षणया निंतिं आवेदन ब्यूगु दु। अथे हे निर्वाचन आचारसंहिताया मस्यौदा सुजावया निंतिं सकल दलयात छ्वयेधुंकूगु व आः निर्वाचन ज्याझ्वः पिथनेत्यंगु आयोगं धाःगु दु। प्रधानमन्त्री कार्कीं निर्वाचनय् उम्मेदवारया खर्चया सीमा म्हो यायेत व मतदातायात अःपुकेगु निंतिं अन्तरजिल्ला मतदानया व्यवस्था याये फइगु बारे थःगु चिउता प्वंकादीगु खः।