ग्याँस सिलिण्डर मुयां नेपाली कांग्रेसया नेता नाप सांसद चन्द्र भण्डारी व भण्डारीया मां ८६ दँ दुम्ह घाःपाः जूगु दु।

येँया बुद्धनगरय् भण्डारीया थःगु हे निवासय् वःगु चान्ह्यः ग्याँस सिलिण्डर विस्फोट जुगु खः। वःगु चान्ह्यः जा नाया द्यनाच्वंगु इलय् सिलिण्डर विस्फोट जुया भण्डारी व भण्डारीया मां घाःपाः जुगु खः।

निम्ह आः कीर्तिपुर अस्पतालय् उपचार यानाच्वंगु। वःगु चान्ह्यः हे कीर्तिपुर अस्पतालय् वना नेपाली कांग्रेसया महामन्त्री विश्वप्रकाश शर्मा नापलावंगु खः। नापलाये धुका स्वास्थ्य अवस्था गम्भीर दु धका सामाजिक संजालय् च्वःगु दु। चन्द्र भण्डारीया म्हय् करिब २५ प्रतिशत व भण्डारीया मां म्हय् करिब ७० प्रतिशत भाग असर जुगु धका भण्डारीया सचिवालयं धाःगु दु।

येँ महानगरपालिकाया जनप्रतिनिधिपिन्स संघीय व प्रदेश ऐन अखः थःपिनिगु सेवा सुविधा थःपिन्स हे थकाःगु दु।

महानगरं जनप्रतिनिधिया सुविधा सम्बन्धी ऐन–२०७९ हया मेयर, उपमेयरनाप जनप्रतिनिधिपिनिगु प्रदेशं क्वछिगु स्वया अप्पो न्हुगु शीर्षकय् सेवा सुविधा बिइगु व्यवस्था याःगु दु। सेवा सुविधायात व्यवस्थित, न्यायोचित, उपयुक्त व पारदर्शी दयेका स्थानीय सरकारया ज्या प्रभावकारिता यायेगु निति थुगु ऐन हयाःगु दु महानगरं धाःगु दु।

बागमती प्रदेश सभापाखे जारी याःगु स्थानीय तहया पदाधिकारी नाप सदस्यपिनिगु सुविधासम्बन्धी ऐन, २०७५ या दफा १२ व स्थानीय सरकार सञ्चालन ऐन, २०७४ या दफा १०२ या आधारय् थुगु ऐन हयागु धका महानगरं दाबी याःगु दु । स्थानीय सरकार सञ्चालन ऐन २०७४ या दफा १०२ य् गाउँपालिका व नगरपालिकां थःगु अधिकारक्षेत्र दुनेया विषय ऐन दयकेगु व्यवस्था दु ।

तर, स्थानीय तहया जनप्रतिनिधिपिनिगु सेवा सुविधा तोके यायेगु अधिकार नगर नाप गाउँसभाय् मदु। अथे हे बागमती प्रदेश सभापाखे जारी जूगु स्थानीय तहया पदाधिकारी नाप सदस्यया सुविधासम्बन्धी ऐन, २०७५ या दफा १२ य् सुविधा निर्धारण यायेगु इलय् तोकि यानाबिःगु स्वया अप्पो सुविधा सम्बन्धित सभां थःगु अधिकारक्षेत्र दुने आर्थिक स्रोत नाप क्षमताया आधारय् निर्धारण याये फइ धका धाःगु दु।

येँ महानगरया जनप्रतिनिधिपिन्स उगु सीमा छ्यःगु मदु। तर न्हुगु शीर्षक हया थःपिनिगु सेवा सुविधा अप्पोकूगु खः। स्थानीय तहया पदाधिकारी नाप सदस्यया सुविधासम्बन्धी ऐनय् जनप्रतिनिधिया लागि आवास सुविधा तोके यानातःगु मदु। तर महानगरं मेयर व उपमेयरयात आवास सुविधा बिइगु व्यवस्था याःगु दु।

आः मेयर व उपमेयरपिन्त आवासया लागि महानगरया थःगु हे आवासीय भवन मदु। ऐनय् थुकियात न सम्बोधन याःगु दु। निवासया लागि थःगु छेँ मदु  बालं कायेमाःगुलि कार्यपालिकां क्वछिगु कथं रकम उपलब्ध यायेगु ऐनय् उल्लेख दु । अज्यागु छेय् मर्मत–सम्भार खर्च न महानगरं याइगु व सूचु कूचुया निति न कार्यपालिकां क्वछिगु कथं रकम बिइगु जुइ।

थुगु सुविधा प्रमुख व उपप्रमुखपिनिगु पदावधि सिधःगु तिथिं न्ह्यन्हु तक बिइगु ऐनय् उल्लेख दु । थुगु सुबिधा तत्कालीन मेयर विद्यासुन्दर शाक्य व उपमेयर हरिप्रभा खड्गीं आवास सुविधा काःगु मदु।

अथे हे मेमेगु न सुविधा थपे याःगु दु। प्रदेश कानुनय् मदुगु छात्रवृत्ति, स्वास्थ्य बीमा, पोशाक भत्ता लगायतया सुविधा न थपे  याःगु दु। महानगरया जनप्रतिनिधि ज्याया झ्वलय् विदेश व स्वदेश भ्रमण यायेत १० लाख रुपैंयाया बिमा दइ व उडान करबापत लगे जुइगु खर्च न महानगरं हे बिइ।

थ्व स्वया न्ह्यःया जनप्रतिनिधिपिगु पोशाकया कार्यकालय् दच्छि १२ हजार रुपैयाँ पोशाक भत्ता वितरण याःगु खःसा उगु रकम महालेखा परीक्षकया कार्यालयं बेरुजु क्यना जनप्रतिनिधिपिन्स लित बिःगु खः।

मेन्छियाम हाइड्रोपावरं फागुन १० गतेनिसे आइपिओ निष्कासन नाप बिक्री खुल्ला याइगु जुगु दु। कम्पनीं न्हापागु चरणय् आयोजना प्रभावित क्षेत्रया स्थानीयपिन्त व वैदेशिक रोजगारीइ च्वनाच्वपि नेपाःमिपिनिगु लागि आइपिओ निष्कासन यायेत्यःगु खः।

कम्पनीया जारी पुँजी ५४ करोड २५ लाख ८३ हजार ३०० रुपैयाँे १० प्रतिशत अर्थात् ५ करोड ४२ लाख ५८ हजार ३०० रुपैयाँ बराबरया प्रतिसेयर १०० रुपैयाँ दरया ५ लाख ४२ हजार ५८३ कित्ता साधारण शेयर आयोजना प्रभावित क्षेत्रय् च्वपि स्थानीयपिनिगु लागि निष्कासन यायेत्यःगु खः।

उगु मध्ये अप्पो प्रभावित क्षेत्र संखुवासभा जिल्ला साविक सिद्धकाली, सिद्धपोखरी व मावादीन गाविसय् च्वपिन्त २ लाख ७१ हजार २९२ कित्ता सेयर व ल्यःदुगु २ लाख ७१ हजार २९१ कित्ता सेयर उगु बाहेकया क्षत्रमा च्वंगु संखुवासभा जिल्लाय् च्वपिन्त वितरण यायेत्यःगु धका कम्पनीं धाःगु दु।

अथे हे, सर्वसाधारण लगानीकर्तापिन्त सेयरया १० प्रतिशत १ करोड ८ लाख ५१ हजार ७०० रुपैयाँ बराबरया १ लाख ८ हजार ५१७ कित्ता आइपिओ धाःसा वैदेशिक रोजगारी यानाच्वपि नेपाःमिपिनिगु लागि निष्कासन यायेत्यःगु खः। निगु समूहया लगानीकर्तापिन्स म्हति १० कित्ता व अप्पो १० हजार कित्ताया लागि आवेदन बिइ फइगु व्यवस्था दु।

आइपिओ फागुन २५ गते तक आवेदन बिइ फइ। उगु इलय् आइपिओय् पूर्ण आवेदन मवसा आयोजन प्रभावित क्षेत्रय् च्वपिन्स चैत ९ गते तक आवेदन बिइ फइ।

मुस्ताङ जोमसोमपाखे पोखराया लागि वयाच्वंगु बस थासाङ गाउँपालिका–३ या कालीगण्डकीइ कुतुवाना निम्ह भारती व झीन्ह्यम्ह घाःपाः जूगु दु।

मुस्ताङया थासाङ गाउँपालिका धम्पु धइगु थासय् सतकं बस कालीगण्डकीइ कुतुवःगु खः। ना ७ ख ७४४० नम्बरया बस च्वनावःपि दक्को घाःपाः जूगु दु सा निम्हेसिगु अवस्था गम्भीर दु धका प्रहरी नायव उपरीक्षक (डीएसपी) रविन्द्रनाथ पौडेलं जानकारी बिःगु दु।

बस करिब ४५ मिटर क्वय् कुतु वःगु खः। बस तःपिक लखय् कुतु वःगु व प्रहरी कार्यालय नापं जुगुलि याकन उद्धार याःगुलि तधःगु क्षति मजुगु धका पौडेलं धाःगु दु।

गम्भीर घाःपाः जूपि निम्ह नाप १४ म्हेसित थप उपचारया लागि एम्बुलेन्सपाखे पोखराय् छ्वःगु दु सा ल्यः दनिइपि स्वम्ह सामान्य घाःपाः जूपिन्त थासाङ–३ या लेते प्राथमिक स्वास्थ्य केन्द्रय् उपचार जूयाच्वंगु दु धका पोडेलं जानकारी बिःगु दु।

ताम्रकार समाजया ग्वसालय् जूगु मंकाः इहि मुना ज्याझ्वः क्वचाःगु दु । समाजया झिंन्याक्वःखुसी मंकाः इहि मुना ज्याझ्वः जूगु खः ।

समाजया थःगु हे भवन जावलाख्यलय् च्वंगु तमकः द्यः (उग्रचण्डी माई)याथाय् जूगु इहि मुनाय् २१ म्ह मिसा मस्तय् सहभागिता दुगु खः ।

दँय्दसं थुकथं मंकाः इहि मुना ज्याझ्वः याना वयाच्वनागु व कोरोना संक्रमणया कारणं वंगु निदँ थुखे ज्याझ्वः याये मखनाच्वंगु उपसमितिया संयोजक नापं समाजया सह कोषाध्यक्ष मनोज ताम्रकारं कनादिल।

समाजया अध्यक्ष विनोद ताम्रकारं नेवाः समाजय् अनिवार्य कथं कयातःगु थुकथंया संस्कार मंकाःकथं यायेबलय् ई व ध्यबा नितां बचत जुइगु धका धयादीगु खः।