न्यतमरु अजिमाया प्याखं थौं क्यनीगु जूगु दु । न्यतमरु अजिमाया प्याखं थौं बहनि व कन्हय् थनया हनुमानध्वाखाया तलेजु द्यःया न्ह्यने क्यनीगु जूगु दु ।

न्यतमरु अजिमाया प्याखं दँय्दसं पाहांचः¥हे नखःया इलय् न्यत दबुलिइ क्यनेगु याना वयाच्वंगु दु । पाहांचः¥हेया दिनय् बहनिनिसें कन्हय्कुन्हु न्हिछियंकं प्याखं क्यना वयाच्वंगु दुसा न्यत अजिमाया झिंनिदँया जात्राया इलय् नं न्यत दबूलिसें थीथी थासय् क्यनेगु याना वयाच्वंगु दु ।

थ्व झ्वलय् थौं व कन्हय् तलेजु द्यःया न्ह्यने त्रिशुल चोकय् व कात्तिक २ व ३ गते वसन्तपुरया कुमारि छेँया न्ह्यःने दबुलिइ क्यनी । न्यत अजिमाया द्यः छेँय् नं सांस्कृतिक बाजंलिसें द्यःगंछिं पिहां वयाः त्रिशुल चोकय् थ्यंकाः प्याखं क्यनीगु ज्याझ्वः दु । प्याखं क्यनेगु झ्वलय् कन्हय् कुन्हु सुथमाजु (करुणामय)यात बिज्याकाः निन्हुया प्याखं क्यनी ।

प्याखं क्यनेगु झ्वलय् महाद्यःलिसें गणेश व कुमारयात नं ब्वनाः प्याखं क्यनी ।

न्यतमरु अजिमाया प्याखनय् ब्रम्हायणी, रुद्रायणी, इन्द्रायणी, नारायणी, महालक्ष्मी, बाराही, कुमारि, श्वेतकाली आदिया प्याखं क्यनीगु जूगु दु ।

प्याखंया झ्वलय् चण्डासुर दैत्य, दैत्य व कुमारिया युद्ध, महाद्यःयाके वरदान फ्वनेगु, दैत्य संहार प्याखं न्ह्यब्वइगु न्यत अजिमा जात्रा व्यवस्थापन समितिं जानकारी बिउगु दु ।

वाङ्मय शताब्दी पुरूष सत्यमोहन जोशीया जात च्याकां अन्त्येष्टि याःगु दु। थःगु म्ह अध्ययनया निति किष्ट अस्पतालय् बिइगु जोशीया अन्तिम इच्छा खः।

व हे कथं अस्पतालयात शव दानयाना जोशीया तधिकम्ह काय् अनुराज व चिधिकम्ह काय् डा. पूर्णराजं म्हिगः बहनि ६ बजे जुया १४ मिनेटय् शंखमूलया बागमती घाटय् जातं च्याका अन्त्येष्टि याःगु खः।

शेयरबजाः परिसूचक नेप्से थौं आइतवाः ९ दशमलव ६९ अंकं घटे जुया १ हजार ८ सय ६० दशमलव ९४ विन्दुइ थ्यःगु दु।

थौं बैंकिङ व उत्पादनबाहेक मेगु दक्को समूहया शेयर कुहावःगु दु सा विकास बैंक, बीमा व माइक्रोफाइनान्स समूहया शेयर तसकं कुहावःगु दु।

नेप्से सूचक घटे जुगुलि २ सय २१ गु कम्पनीया २५ लाख ७४ हजार कित्ता शेयर ८० करोड ३५ लाख रुपैयाँ न कारोबार जूगु दु।

दकलय् अप्पो एभरेस्ट बैंकया ८ करोड ४७ लाख रुपैयाँया शेयर किनबेच जूगु दु। थौं पिपुल्स पावर कम्पनीया शेयर १० प्रतिशत व सिटिजन्स बैंकया शेयर ७ प्रतिशतं घटे जुगु दु।

समग्र बजाः घटे जूसा अभियान लघुवित्तया शेयर १० प्रतिशत व स्टान्डर्ड चार्टर्ड बैंक शेयर ७ प्रतिशत स्वया अप्पो थहावःगु दु।

डेंगू संक्रमणं आःतक ४८ म्ह सी धुकुगु दु। इपिडिमियोलोजी नाप रोग नियन्त्रण महाशाखाया तथ्यांक कथं असोज २९ गतेतक ४८ म्ह सी धुकुगु दु।

अथेहे आःतक ४० हजार २९म्ह संक्रमित जुइ धुकुगु दु सा ४८ म्हेसिगु ज्यान वःगु दु धका महाशाखाया तथ्यांकं धाःगु दु।

दकलय् अप्पो येँ १२ हजार २५२ म्हेसित संक्रमण पुष्टि जुगु दु।

अथेहे, यलय् ८ हजार ७१४ व ख्वपय् २ हजार ७३० म्हयाना स्वनिगः दुने डेंगू संक्रमित जूपि २३ हजार ६९६ म्ह थ्यःगु दु।

शताब्दी पुरुष सत्यमोहन जोशी मदुगुलि सरकारं छन्हु सार्वजनिक बिदा बिइगुु जुगु दु।

संस्कृति, पर्यटन नाप नागरिक उड्डयनमन्त्री जीवनराम श्रेष्ठं जोशी मदुगु दुःख प्वकूसे सरकारं छन्हु सार्वजनिक बिदा बिइगु निर्णय याःगु दु धका धयादीगु दु।

अय्न सरकारं गुवलय् बिइगु धका धासा निर्णय याःगु मदुनि। आइतबाः न्हिनय् यल महानगरपालिकाय् जोशीयात अन्तिम श्रद्धाञ्जली बिइगु झ्वलय् मन्त्री श्रेष्ठं पत्रकारपि नाप खँल्ह्यायेगु झ्वलय् थःम्हेसिया छन्हु बिदा बिइगु बारे प्रधानमन्त्री शेरबहादुर देउवानाप छलफल यानागु दु धका धयादीगु खः।

‘नकतिनि हे जिं सम्माननीय प्रधानमन्त्रीजु नाप समन्वय यानागु दु। संस्कृति, पर्यटन नाप नागरिक उड्डयन मन्त्रालयपाखे प्रस्ताव याये धुकागु दु’ वयलक धयादीगु दु, ‘शताब्दी पुरुष सत्यमोहन जोशीजु मदुगुलि सरकारया पाखे बिचाः हायके कथं छन्हु राष्ट्रिय बिदा बिइगु निर्णय जूगु दु, थुकिया आधिकारिक सूचं सरकारी माध्यमपाखे वइ।’