अर्थमन्त्री जनार्दन शर्मा न छानबिन समितियात अपूकेगु निति व सत्य–तथ्य संसदय् हयेगु निति थःम्हेसिया पदपाखे राजीनामा बियाउगु खः धका धाउगु दु।

थौं बुधवाः संसदपाखे पिहावनेगु झ्वलय् सञ्चारकःमिपिनाप शर्मां थःम्हेसिया बजेट निर्माण यायेगु झ्वलय् छु न गल्ती मयानागु धका दाबी याउगु खः।

प्रतिनिधि सभां वइगु आर्थिक वर्ष बजेट निर्माणया सन्दर्भमा अनधिकृत मनूया संलग्नताबारे न्ह्यसः वउगुलि छानबिनया लागि संसदीय विशेष समिति गठन यायेवं सदनय् सम्बोधन यासे शर्मा न राजीनामा बिइगु घोषणा याउगु खः।

नेवाः पत्रकार राष्ट्रिय दबूया ग्वसालय् निक्वःगु मातृभाषा पत्रकारिता राष्ट्रिय सम्मेलनय् झीगु बुँदे येँ घोषणापत्र जारी जुगु दु।

येँ महानगरपालिकाया उपमेयर सुनिता डंगोलया मूपाहाँसुइ जुगु उगु ज्याझ्वलय् मातृभाषा पत्रकारिताय् ह्वःता व हाःथ्या विचाः गोष्ठी जुगुलि ‘मातृभाषा पत्रकारिता दिवस’ यात राष्ट्रिय दिवसया रुपय् हने माः धका माग यागु दु। अथेहे भाषा आयोग प्रतिवेदन कार्यान्वयन यायेत आवश्यक कानुन दयेका राष्ट्रिय रुपय् मातृभाषा पत्रकारिताया विकासया निंतिं वातावरण दयेका बिइमाल धका नं माग याउगु खः।

घोषणा पत्र कथं वि.सं १९८२ (नेपाल संवत १०४५) बुद्ध जयन्तिया दिन शुरु जुउगु मातृभाषाया पत्रकारिता यात्रा आः वइगु ने सं १०४४,वि सं  २०८२ सालय् सच्छि दँ पिदनिगु जुउगुलिं उगु दँ यात शताब्दी वर्षया रुपय् थीथी ज्याझ्वः याना हनेगु नं दबूलिं निर्णय याःगु दु। मातृभाषाया पत्रकारिता शुरु जुगु सच्छिदँया लसताय् न्हापांम्ह मातृभाषी पत्रकार धर्मादित्य धर्माचार्यया हुलाक टिकट नं पिकाना बिइत दबुलिं खँ ल्ह्वंगु दु।

मातृभाषां पत्रकारिता याना वया च्वंपिं पत्रकार तयेगु क्षमता विकासया लागि सरकारी तहपाखें “धर्मादित्य मातृभाषा पत्रकारिता विकास प्रतिष्ठान” गठन याना बिइमाल धका दबुलिं माग याःगु खः मंगलबाः जारी याउगु घोषणापत्र कथं सरकारी स्तरया प्रेस काउन्सिल, नेपाल विज्ञापन बोर्ड, न्यूनतम पारिश्रमिक निर्धारण समिति, लगायत सरकारी सञ्चार माध्यमय् मातृभाषी पत्रकार तयेगु समेत अनिवार्य प्रतिनिधित्व जुइगु व्यवस्था मिलेयाना बिइत नं माग यानातःगु दु।

दबूया केन्द्रिय अध्यक्ष सुरजबीर वज्राचार्यं नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठ हे खः धइगु खँ यक्व तथ्यया आधारय् पुष्टि जुइधुंकुगु सन्दर्भय् श्रेष्ठयात महासंघया संस्थापक अध्यक्ष घोषणा यायेत लिबाके मजिल धका धासे इतिहास, तथ्य व प्रमाणयात सम्मान यायेत पत्रकार महासंघ, नेपाल सरकार लगायत सम्बन्धित सरोकारवाला पक्षयात इनाप यात ।

येँ महानगरपालिकाया उपमेयर सुनिता डगोलं नेपालभाषा पत्रकारिता बारे पत्रकार सुरेश किरण मानन्धर, थारु भाषा पत्रकारिताबारे गोरखापत्र दैनिकया पत्रकार नाप नेपाल आदिबासी जनजाती महासंघया बरिष्ठ उपाध्यक्ष लक्की चौधरी, तामाङ भाषा पत्रकारिताबारे तामाङ पत्रकार संघया वरिष्ठ उपाध्यक्ष बुद्ध योञ्जन, शेर्पा पत्रकारिता बारे शेर्पा सञ्चार समूहया पाशाङ शेर्पा, मैथली भाषा रुपा झा, लिम्बु भाषा पत्रकारिताबारे लिम्बु पत्रकार संघया उपाध्यक्ष विष्णु लिुम्ब पिन्सं मातृभाषा पत्रकारिताका बारेया धारणा न्ह्यब्वःगु खः।

ज्याझ्वलय् दबुया येँ जिल्लाया सचिव रत्न मन व केन्द्रयापाखें वरिष्ठ न्वकु नृपेन्द्र लाल श्रेष्ठं लसकुस व केन्द्रिय न्वकु रचना श्रेष्ठं सुभाय् देछानादीगु खः।

नेपाल आयल निगमं पेट्रोल, डिजेल, मचिकं व आन्तरिक पाखेंया हवाइ इन्धनया भाः हाकन थकाःगु दु।

म्हिगः सोमवाः बहनिं आयल निगमं छगू विज्ञप्ति पिकया पेट्रोल लिटरं नितका, डिजेल व मचिकनय् लिटरं गुतका व आन्तरिक हवाइ इन्धनय् लिटरं न्यातका थकाःगु दु।

आः पेट्रोल लिटरं १८१, डिजेल व मतिकया लिटरं १७२ व आन्तरिक पाखेंया हवाइ इन्धनया भाः लिटर १९० थ्यंगु दु।

नेवाः न्ह्यलुवा लिसें वरिष्ठ मानव अधिकारवादी नेता पद्मरत्न तुलाधरया जहान नीलशोभा तुलाधर म्हिगः सोमवाः बहनी ९ बजे आकाझाकां मन्त। मदुम्ह तुलाधर ७८ दँ दुम्ह खः।

मदुम्ह तुलाधरया परिवारया कथं सोमवाः थःगु हे छेँय् द्यनाच्वंम्ह वय्कःयात आकाझाकां हृदयाघातया मदुगु खः धका धाउगु दु। हृदयाघात जूगुयां १५ मिनेटं हे वय्कः मदुगु खः।

अस्पताल यंकूबलय् वय्कः मदयेधुंकूगु खँ चिकित्सकतय्सं धाःगु खः। मंगलवाः हे वय्कःया अन्त्येष्टि याइगु खँ छेँजःपिंसं धाःगु दु। वय्कःया सीम्हयात अस्पतालं तप्यंक लुतिइ यंकेगु ग्वसाः जुयाच्वंगु दु।

लुतिइ सिथं यंकीबलय् ११–१२ बजे जुइफुगु खँ नं छेँजःपिंसं धाःगु दु। येँया असं त्वालय् जन्म जुयादीम्ह मय्जु तुलाधर १४ दँ जक दुबलय् १८ दँ दुम्ह पद्मरत्न तुलाधरलिसे इहिपा जूगु खः।

बागमति प्रदेश सरकारया विषयगत मन्त्रालय अन्तर्गत आ.ब. २०७८÷७९ या योजना कथं येँया निर्वाचन क्षेत्र नं. ८ (क) य् परम्परागत बाजं संचालन वयाच्वगु त्वाः, गुथि व खलःयात छगु ज्याझ्वः दथुइ बाजं लःल्हागु दु।

बागमती प्रदेश सांसद माननीय सासद राजेश शाक्यं छगु ज्याझ्वः दथुइ परम्परागत बाजं लःल्हानादीगु खः। सांसद शाक्यं परम्परा बाजं संरक्षण यायेगु निति प्रदेशया बजेतय् ५० लाख तयादीगु खः।

येँया निर्वाचन क्षेत्र नं. ८ (क) य् २९ परम्परा गुथि व बाजं खलःपिन्त छगु ज्याझ्वः दथुइ लःल्हानादीगु खः। सांसद शाक्यं लिपि संरक्षण यायेगु निति न्हापा ५० लाख नेपाल लिपि गुथियात बजेत तयाबिउगु खः।