कर्णाली प्रदेशया सभामुखय् नेकपा एमालेया नन्दा गुरुङ निर्वाचित जूगु दु।

आइतबाः प्रदेशसभाय् जुगु निर्वाचनय् २४ मत नाप सभामुखय् निर्वाचित जूगु खः।

गुरुङयात नेकपा एमाले न १०, माओवादी केन्द्रं १३, राप्रपा व एकीकृत समाजवादीं छगु गुरुङ मत बःगु खः।

प्रदेश सभाय् ४० सम्ह सदस्यीय सभाय् ३८ म्हेसिगु उपस्थिति दुगु खः।

मन्त्रिपरिषदया आकस्मिक बैठक बालु्वाटारय् सुरु जुगु दु।

प्रधानमन्त्रीया सरकारी निवास बालुवाटारय् च्वंगु मन्त्रिपरिषदया मुख्य एजेण्डा हे पोखरा विमान दुर्घटना जुगु दु।

विमानस्थलया कन्ट्रोल रुम वना लिहावया प्रधानमन्त्रीं मन्त्रिपरिषद् बैठक सःतूगु खः।

पोखराय् थौं आइतबाः दुर्घटना जुगु ९एन–एएनसी जहाज पोखरा अन्तर्राष्ट्रिय विमानस्थलय् दकलय् न्हापागु पटक अवतरण जुगु जहाज खः ।

२२ डिसेम्बरया दिं पोखराया पुलागु विमानस्थलपाखे न्हुगु विमानस्थलय् डेमो उडान याःगु खः । उगु यतीया जहाज हे डेमो उडान याःगु खः।

थौं जहाज ब्बका च्वम्ह क्याप्टेन कमल केसी यक्को जुगु अनुभवी दुम्ह पाइलट खः। त्रिभुवन अन्तर्राष्ट्रिय विमानस्थलपाखे १०ः२५ बजेय् ब्बःगु उगु जहाज २५ मिनेटय् पोखरा अवतरण यायेमाःगु खः।

जहाज दुर्घटनाया कारण अय्न सिइदुगु मदुनि धका त्रिभुवन विमानस्थलस्थित उद्धार नाप राहत केन्द्रं धाःगु दु।

येँ न ६८ म्ह यात्रु व चालक दलया प्यम्ह सदस्य ज्वना पोखराय् वंपि यती एयरलाइन्सया ९ एन एएनसी एटीआर ७२ जहाज पोखराय् दुर्घटनाग्रस्त जूगु दु।

उगु जहाज क्याप्टेन कमल केसीं ब्बकूगु खः। पोखराया सेती खोंचय् दुर्घटनाग्रस्त जूगु उगु जहाजय् मिँच्याःगु खः।

आदिवासी नेवाः राजनीतिक अभियानया ग्वसालय् नेपालभाषाया च्वमि डा. बालगोपाल श्रेष्ठया सफू ‘नेपालय् जातीय पहिचान व भाषिक समान अधिकारया न्ह्यसः’यात कयाः परिचर्चा यायेगु ज्या जुगु दु ।

ज्याझ्वलय् नेवाः न्ह्यलुवा नापं नेपालभाषा ऐकेदेमिया भाइस चान्सलर मल्ल के. सुन्दरं २०४३÷४४ सालपाखे डा. बालगोपाल श्रेष्ठं नेवाः जातिया पहिचान व भाषिक समान अधिकारया सवालयात कयाः जनचेतना थनेगु ज्या यानादीगु खँ न्ह्यथनादिसें वय्कःया उगु ज्या धाथें च्वछायेबहगु ज्या जूगु विचाः तयादिल । लिसें वय्कलं नेवाः ख्यःया शीर्षस्थ व्यक्तिपिंसं हे विचालन हयेगु ज्या यानाच्वंगु इलय् वय्कलं कडारुपं उकिया प्रतिवाद यानादीगु नापं थःगु सही खँ तयाः जनतायात सचेत यायेगु ज्या यानादीगु धयादिल ।

उगु इलय् हे वय्कलं भाषिक समानताया खँ पित हयाः नेवाः ख्यःयात तरंगित यायेगु ज्या गुगु यानादीगु खः, व वास्तवय् सही जूगु विचाः वय्कलं धयादिल ।अथेहे नेवाः न्ह्यलुवा व समालोचक डा. पुष्पराज राजकर्णिकारं नेवाःतय्सं छगू पहिचान, भाषिक समानता व अधिकारया निंतिं थौंया इलय् छुं यानाच्वंगु मदु धकाः धाये मछिं धासें नेवाः आन्दोलन उखेलाः थुखेलाः नं जुयाच्वंगु मदु धयादिल ।

डा. राजकर्णिकारं थौं झी दथुइ पद्मरत्न तुलाधर मदुसां नेवाः जाति व पहिचानया आन्दोलन न्ह्याना हे च्वंगु दु धासें पहिचान व भाषिक समान अधिकारया सवालय् न्हू न्हूपिं नेवाःतय्सं थःत समर्पित याना नेवाः आन्दोलनयात अझ च्वन्ह्याकेगु ज्या यानाच्वंगु दु धयादिल । नेवाः न्ह्यलुवा पद्मरत्न तुलाधरं भाषिक समानताया निंतिं आपालं विषय उत्थान यानादीगु खँ न्ह्यथनादिसें थौंया इलय् नेवाः आन्दोलनया नेतृत्व हे याइपिं मदु धायेमाःगु अवस्था वःगु मदुनि धयादिल । गैर नेवाःतय्सं नेवाःतय्त क्वत्यलेत अनेकथंया रणनीति छ्यला वयाच्वंगु धासें नेवाःत विचलित मजुसे सचेत जुयाः अझ न्ह्याः वनेमाःगु दु धयादिल ।

राजनीतिक विश्लेषक नापं च्वमि राजेन्द्र महर्जनं सफू अतिकं महत्वं जाःगु खँ कनादिसें थुकथंया सफूयात क्वय्या तहतक थ्यंकाः सकल नेवाःतय्त ब्वंकेगु वातावरण दयेकेमाःगु खँय् बः बियादिल । राज्य भाषिक अधिकारया सवालय् गुकथं बेक्व मिखां स्वयाच्वंगु दु धइगु बारे नं वय्कलं चर्चा यानादीगु खः । नेवाः देय् दबूया नायः पवित्र वज्राचार्यं झीसं थःगु भाषिक अधिकार, जातीय पहिचानया खँ ल्हाना च्वनागु थौंया इलय् नं छथ्वः नेवाःत नेवाःतय्गु हे विरोधय् कुहां वनाच्वंगु दु धासें थुकिं नेवाः एकताया सवालय् न्ह्यसः चिं थनेगु ज्या जुयाच्वंगु दु धयादिल । सपूmया च्वमि डा. श्रेष्ठं नेपालय् आपालं जातजातित दुगु व अप्वःसिया थःगु हे भाषा, लिपि, संस्कार, संस्कृति दु ।

राज्यं इमित नं समान अधिकार बीमाः धइगु खँय् व्यापक बहस, चर्चा, परिचर्चा जूसां थ्वपाखे ध्यान बिया मच्वंगुलिं थुकथंया खँय् ध्वाथुइका वनेत थःगु सफू ग्वाहालि जुइगु विश्वास प्वंकादिस । लिसें वय्कलं विश्वय् राष्ट्रपति शासनया व्यवस्था दुगु आपालं देय्या दसु न्ह्यब्वयादिसें नेपाःया निंतिं राष्ट्रपति प्रणाली पाय्छि मजूगु व समानुपातिक चुनाव प्रणाली नालेमाःगु आवश्यक जूगु खँ कुलादिल । अभियानया नायः श्रीकृष्ण मानन्धरया सभापतित्वय् जूगु ज्याझ्वलय् नेवाः न्ह्यलुवा डा. महेशमान श्रेष्ठं लसकुस यासें डा. श्रेष्ठया सफूयात कयाः छाय् परिचर्चा यायेमाःगु धइगु बारे जानकारी बियादीगु खः ।