श्री भाष्करदेव संस्कारित केशचन्द्रकृत पारावत महाविहार संरक्षण समाज, इतुंबहाःया झिंन्हय्क्वःगु साधारण सभा जुगु दु।

समाजया सल्लाहकार प्रा. स्वस्तिरत्न शाक्यया सभाध्यक्षताय् जूगु उगु ज्याझ्वलय् येँ क्षेत्र नं ८ या प्रतिनिधिसभा सदस्य विराजभक्त श्रेष्ठ मूपाहांकथं झायादीगु खः ।साधारणसभाय् समाजया नायः प्रज्ञारत्न शाक्यं वार्षिक प्रगति विवरण न्ह्यब्वयादीगु खःसा दांभरिं रुपकुमार शाक्यं आर्थिक विवरण न्ह्यब्वयादीगु खः ।

महाविहारया चक्रेश्वर, मूथाय्पा, थाय्पापिनिगु विशेष उपस्थितिइ जूगु ज्याझ्वलय् मूपाहां संघीय सांसद श्रेष्ठ व विशेष पाहां बागमति प्रदेशसभा सदस्य शैलेन्द्रमान वज्राचार्यं इतुंबहालय् महाविहारं न्ह्याका वयाच्वंगु व न्ह्यनाच्वंगु आवश्यक ज्याखँया निंतिं थःपिंसं फूचाःगु ग्वाहालि यायेगु जुइ धयादिल । झी नेवाःतय्गु कला, संस्कृति, सम्पदा, सभ्यता ल्यंका तयेत झी थः हे न्ह्याज्यायेमाःगु नापं झीगु थाय्बाय्या अस्तित्व नं ल्यंका तयेगु दायित्व झीगु हे जूगु वय्कःपिंसं धयादीगु दु ।

थौंकन्हय् थःगु त्वाः, थाय्बाय्, बहाः बही त्वःताः पिने च्वं वनेगु प्रवृत्तिं यानाः झीगु थासय् पिनेच्वंपिंसं हाली मुहाली यानाच्वंगु खँय् चिउताः प्वंकादिसें अज्याःगु थाय्बाय्यात नं पुस्तान्तरण याना वनेमाःगु खँय् वय्कःपिंसं बः बियादीगु दु ।

येँ मनपा २४ वडाध्यक्ष विनोदकुमार राजभण्डारीं भिंतुना न्वचु बियादीगु ज्याझ्वलय् महाविहारया चक्रेश्वर ओमरत्न वज्राचार्य, मूथायपा मणिरत्न शाक्य, थायपाजुपिं अमीररत्न शाक्य, बोधिरत्न शाक्य, सानुबावु शाक्य, विजेन्द्र शाक्य, रवि शाक्य, तेजरत्न शाक्यया नं उपस्थिति दुगु खः । साधारण सभां समाजया विधानया छुं छुं दफा संशोधनया निंतिं प्रस्ताव नं पारित याःगु खःसा थीथी व्यक्तिपिंसं आवश्यक सुझाव नं बियादीगु खः ।

सार्क देशया पत्रकारपिनिगु संगठन ‘सार्क जर्नलिस्ट फोरम’ (एसजेएफ) या प्रतिनिधिपि भारतीय जन संचार संस्थानय् अवलोकन याःगु दु।

आईआईएमसीया महानिदेशक प्रो. (डा‘.) संजय द्विवेदीें नेपाल, भूटान, श्रीलंका व बंगलादेशं वःपि पत्रकारपिन्त अंगवस्त्र व लुमन्ति चिं बिया सम्मान याःगु दु। उगु ज्याझ्वलय् संस्थानया डीन (अकादमिक) प्रो. गोविंद सिंह, डीन छात्र (कल्याण) प्रो. प्रमोद कुमार, प्रोफेसर डा. सिमता मिश्र, डा. मीता उज्जैन, डा. अनिरुद्ध सुधान्सू, डा. पवन कौंडल, डा. प्रतिभा शर्मा नाप सहायक कुलसचिव ऋतेश पाठकपिनिगु उपस्थिति दुगु खः।

आईआईएमसीया महानिदेशक स्वामी विवेकानंदया बुण्दिंया लसताय् वयकलं छगु एशियाया अवधारणा प्रस्तुत याःगु खः धका धयादीगु खः। प्रो. द्विवेदीं धाःगु दु ‘छगु एशिया’ जुइ, उवलय् जक शान्ति, अखंडता, विकास व समृद्धि न्ह्या वनइि। वयकलं धयादीगु दु, छगु इतिहास हे थौं न झीगु छगु हे संस्कृति, नसात्वँसा, रहन–सहन तक ज्वला। थ्व हे झीगु ताकत खः।

सांस्कृतिक रूप जुया छप्पं जूया झीसं पाश्चात्य संस्कृतिया अतिक्रमणयात रोक याये फइ। प्रो. द्विवेदीया कथं स्वामी विवेकानंदं न्हापा हे पश्चिमी देशयात धाःगु खः थुगु ई छिमिगु जुइ, आः वइगु ई भारतया जुइ। वयकलं धयादीगु दु ‘सार्क जर्नलिस्ट फोरम’ यात इनाप न याःगु दु पत्रकारपिन्त ‘छगु एशिया’ या विचाःयात साकार यायेगु झीगु सकसिगु जिम्मेदारी खः।

उगु ज्याझ्वलय् सार्क जनालिस्त फोरमया अध्यक्ष राजू लामां आईआईएमसी वया जिपि तसकं लयतागु दु। भारतया यक्को राजनेतापि स्वतंत्रता सेनानिया बारे जित जानकारी दु, तर न्हापागु पटक, थःम्हेसिया भारतय् दकलय् न्हापांहिंदी समाचार पत्र ‘उदंत मार्तंड’ या संस्थापक संपादक पंडित युगल किशोर शुक्लया बारे न्यनागु दु धका धयादीगु खः।

आईआईएमसीया थीथी विभाग, पुस्तकालय व संस्थानं संचालन यानाच्वंगु सामुदायिक रेडियो ‘अपना रेडियो ९६.९ एफएम’ य् अवलोकन याःगु खः।

सार्क जर्नालिस्ट फोरम व गौतम बुद्ध विश्वविद्यालयया मंकाः ग्वसालय् निन्हुयकं भारतया नोयडाय सार्क देशया पत्रकारपिनिगु अन्तर्राष्ट्रिय पत्रकार सम्मेलन पुष २६ मंगलवाः व २७ गते बुधवाः क्वचागु दु ।

उगु सम्मेलय् नेपाल, भारत, बंगलादेश व श्रीलंकाया पत्रकारपिनिगु उपस्थिति दुगु खः। उगु सम्मेलनया उलेज्या भारतीय जन संचार संस्थानया महानिर्देशक संजय द्धिवेदीं यानादीगु खः। मूपाहाँ द्धिवेदीं कन्युनिकेशनया ज्या धैगु हे जोडे यायगु् खः ।

थौंकन्हय् ग्वोवल सिटीजनया खँ जुयाच्वंगु दु । झीत ईश्वरं मानवीय गुण बियातःगु दु । ईश्वरया लँपु धैगु हे एकताया लँपुइ खः धका धयादीसे कम्युनिकेशनया धइगु हसम्वाद यायगु खः ।

ज्याझ्वलय् सार्क जर्नालिष्ट फोरमया नायः राजु् लामां बिश्व सभ्यताया आरम्भ भारतपाखें जूगु व सनातन धर्म पाखे जूगु खः धकाः धयादिसें सनातम धर्मया विचार फुक्क विचार सिवें आपालं प्राचानी खः धकाः धयादीगु दु । भारत एसियाया तधःगु देश खः । थौं २१ क्वःगु शताश्दीया युगय् न अफगानिस्तानय् मिसा पत्रकारपिन्स टेलिभिजनय् बुखँ ब्बनेत बुर्का तया बुखँ ब्बनेमाःगु अवस्था दु ।

थज्यागु खँय् झीसं विरोध याय्माः धका धयादीगु खः। सम्मेलनया मुख्य संरक्षक व गौतम बुद्ध विश्वविद्यालयया कुलपति प्रोफेसर रविन्द्र कुमार सिन्ह राष्ट्र निर्माण छगू निरन्तर न्ह्याः वनाच्वनीगु प्रकिया खः धका धयादिसें राष्ट्र निर्माणय् पत्रकारपि न्ह्यावनेमाः धका धयादीगु खः। अथेहे दकलय् लिपागु दिं भारतया उद्योग मन्त्री डा. रमेशनाथ पाण्डें सार्क जर्नालिस्ट फोरमय् सहभागी जुयादीपिन्त सुभाय् बियादीगु खः।

नेवाः पत्रकार राष्ट्रिय दबूया अध्यक्षय् नृपेन्द्रलाल श्रेष्ठ निर्वाचित जूगु दु । दबूया शनिवाः यलय् जूगु प्यक्वःगु महाधिवेशनं श्रेष्ठयात अध्यक्ष निर्वाचित याःगु खः।

उगु न्हूगु ज्यासना पुचलय् वरिष्ठ उपाध्यक्ष सुनिल महर्जन, उपाध्यक्ष (खुल्ला) सुरेन्द्रभक्त श्रेष्ठ, उपाध्यक्ष (मिसा) रचना श्रेष्ठ, उपाध्यक्ष (स्वनिगः पिनें) संदिप श्रेष्ठयात ल्यःगु दु ।

अथेहे महासचिवय् कृष्णकुमार मानन्धर (केके), सचिवय् राजु नापित, कोषाध्यक्षय् बाबुकाजी साँछे श्रेष्ठ, सहसचिव (खुल्ला)य् प्रजित शाक्य, सहसचिव (मिसा) सुनिता महर्जन, सहसचिव (स्वनिगः पिने) विजयराम कर्माचार्य व सह कोषाध्यक्षय् तेजनारायण महर्जनयात ल्यःगु खः।अथेतु, दुजलय् रत्नकृष्ण श्रेष्ठ, अनुप श्रेष्ठ, मीना वज्राचार्य, दानदास श्रेष्ठ, अनिता डंगोल व पूर्ण दुवालयात ल्यःगु दु ।

अथेहे गण्डकी प्रदेश संयोजकय् उत्तम श्रेष्ठ, लेखा समिति संयोजकय् विगेन तुलाधरयात ल्यःगु खः । ज्यासना पुचःया सकलें निर्विरोध निर्वाचित जूगु खः । दबूया नायः सुरजवीर वज्राचार्यया सभाध्यक्षताय् जूगु ज्याझ्वलय् पत्रकार दबूपाखें नीस्वनातःगु थीथी सिरपाः नं लःल्हाःगु खः ।

मू उपप्रधान व भौतिक निर्माण तथा यातायात मन्त्री नारायणकाजी श्रेष्ठं पुरस्कृतपिंत सिरपाः लःल्हायेगुलिसें दबूया लुमन्ति पौ व काभ्रे जिल्ला शाखापाखें पिदनीगु स्वलापौ सुकुन्दाया विमोचन नं यानादीगु खः । ज्याझ्वलय् वरिष्ठ पत्रकार नरेशवीर शाक्ययात ज्ञानदेवी–मणिरत्न स्मृति पत्रकारिता पुरस्कार, काभ्रेया सूर्यप्रसाद लाकोेजुयात वाङमय शताब्दी पुरुष सत्यमोहन जोशी पत्रकारिता पुरस्कार, सरस्वती कर्माचार्ययात ज्ञानज्योति–लक्ष्मीप्रभा पुरस्कार, अनुशा बज्राचार्ययात भिक्षु कुमार काश्यप स्मृति पत्रकारिता पुरस्कार, सुरेश ख्वाखः श्रेष्ठयात बाबुराजा ज्यापु फोटो पत्रकारिता पुरस्कार, हेटौंडाया सुरेश श्रेष्ठयात श्रीराम स्मृति पत्रकारिता पुरस्कार लःल्हाःगु खः ।

अथेहे ज्याझ्वलय् दबूया संस्थापक व न्हापांगु व निक्वःगु ज्यासुना पुचःया दुजःपिंत नं सम्मान याःगु खः ।

गैरसरकारी संस्था महासंघ व प्रतिष्ठानया मंकाः ग्वासलय् समाजसेवी मनु मोक्तानयात रुद्रलाल समाजसेवा पुरस्कार लःल्हाःगु दु ।

प्रदेश नं. १ या पहाडी क्षेत्रय् शिक्षा, स्वास्थ्य व त्वनेगु लःया निंतिं निःस्वास्र्थ रुपं ज्या याना वयाच्वंम्ह ८० दँया मोक्तानयात छत्रलक्ष्मी–रुद्रलाल प्रतिष्ठानं बिइगु याना वयाच्वंगु थुगु सिरपाः लःल्हाःगु खः । सर्वोच्च अदालतया पुलांम्ह प्रधानन्यायाधीश व राष्ट्रिय मानव अधिकार आयोगया पुलांम्ह अध्यक्ष अनुपराज शर्मां उगु पुरस्कार लःल्हानादीगु खः ।

मोक्तान म्हं मफगुलं नेपाल तामाङ घेदुङ संघया अध्यक्ष मोहन गोलें पुरस्कार लःल्हाना कयादीगु खः । ज्याझ्वलय् गैरसरकारी संस्था महासंघया सल्लाहकार व प्रतिष्ठानया अध्यक्ष शान्तलाल मुल्मीं च्वयादीगु सफू ‘रिलेन्टलेस जर्नी’या विमोचन नं जूगु खः । ज्याझ्वलय् न्ववासें मूपाहाँ शर्मां समाजसेवी रुद्रलाल मुल्मीं व वय्कःया काय शान्तलाल मुल्मीं यानाच्वंगु समाजसेवाया अनुकरण यायेमाः धाःसा समाजसेवाया सिद्धान्त व क्रियाकलाप थुइकेत विमोचित सफू ब्वनेमाःगु खँ धयादिल ।

ज्याझ्वलय् वरिष्ठ मानवाधिकारकर्मी प्रा. कपिल श्रेष्ठ, राष्ट्रिय योजना आयोगया दुजः सलोनी सिंह, नेपाल मानव अधिकार आयोगया पुलांम्ह दुजः गौरी प्रधान, अमेरिकाया निंतिं पुलांम्ह राजदूत डा. अर्जुन कार्कीं समाजसेवी रुद्रलाल मुल्मी व विमोचित सफूयात कयाः न्ववानादीगु खः ।