केन्द्रीय मानन्धर संघं धाः बाजं ब्बज्या याःगु दु। येँ महानगर दुने मानन्धर समुदायया च्यागु त्वालय् च्वंगु धाः बाजं ब्बज्या जुगु खः।

उगु ज्याझ्वलय् चस्वांद्वँ मानन्धर सनाःगू खलः, थँहिटी मानन्धर गुठी, दैसाः टोल मानन्धर समाज, न्यागःमणि फेदी मानन्धर संघ, मानन्धर सानाःगू खलः न्हूसाः, पाक्व पुखूद्याँ सनाः खलः, भिंद्यः गुठी कालिमाटी व लायकूसाः मानन्धर समाजं ब्बति काःगु खः। उगु ज्याझ्वलय् वाग्मती प्रदेशया खानेपानी, ऊर्जा तथा सिंचाइ मन्त्री माननीय बसन्त मानन्धरं पुर्खापिन्स लःल्हाना थकूगु मौलिक बाजं न संस्कृति संरक्षण यायेत ग्वाहालि जुगु दु धका धयादीगु खः।

वीरगञ्ज पर्सौनीया प्रतिनिधित्वयासे केन्द्रीय मानन्धर संघय् सभापति जूयादीम्ह मनोज कुमार मानन्धरया सभाध्यक्षताय् जुगु उगु ज्यझ्वलय् येँ महानगरपालिका वडा नं. १७ या वडाध्यक्ष नाप महानगरया प्रवक्ता नवीन मानन्धर, १३ या ध्रुवनारायण मानन्धर, २० या राजेन्द्र मानन्धर, लेखा प्रमुख बुद्धरत्न मानन्धर, सम्पदा विभाग उपप्रमुख श्रीजु प्रधान, च्याःगु त्वाःया कजि नाप बाजं गुरुपिनिगु न सहभागिता दुगु खः।

ज्याझ्वः केन्द्रीय मानन्धर संघया सञ्चार उपसमिति व युवा तथा क्षमता विकास उपसमितिं संयोजन याःगु खः।

नेकपा माओवादी केन्द्रया अध्यक्ष पुष्पकमल दाहाल प्रचण्डं प्रदीप गिरिया व्यक्तित्व निस्वार्थ रुपं समाजसेवाय् समर्पित जुइत  प्रेरणा बियाच्वनिइ धका धयादीगु दु।

नेपाली कांग्रेसया केन्द्रीय कार्यालय सानेपाय् वना मदुम्ह नेता प्रदीप गिरिप्रति बिचाः हायेकेगु झ्वलय् प्रचण्डं धाःगु दु,‘राजनीति फोहोरी कासा मखु, समाज सेवाया, जनताया सेवा व राष्ट्र सेवाया माध्यम खः धइगु प्रेरणा प्रदीप गिरिपाखे कायेमाः।’ प्रचण्डं गिरिया योगदानपाखे प्रेरणा कायेमाः व समाजवादया लागि यायेमाःगु चिन्तनपाखे शिक्षा कया न्ह्यावनेमाः धका बःबिइमाः।

‘आः  वयकः झी नाप मदु, वयकःया अभाव न्ह्यावलय् जुइ नेपाली समाजय् ।’

नेकपा एमालेया अध्यक्ष केपी शर्मा ओलीं कांग्रेस नेता प्रदीप गिरि मदुगुलि थः मर्माहत जुगु दु धका धयादीगु खः।

वयकलं सामाजिक सञ्जालय् च्वयादीगु दु, ‘चिन्तनशील राजनीतिकर्मी, पासा प्रदीप गिरि मदुगुलि मर्माहत जुयागु दु।’ वयकलं गिरिप्रति बिचाः हायेकादीगु दु।

नेवाःत धाइपिं नाट्य परम्पराय् तःमिपिं खः धका धका धासे ख्यालः धइगु तःजिगु नेवाः नाट्य परम्परा खः धका ख्यालिजुजु मदनकृष्ण श्रेष्ठं धयादिल।

झीगु सः व सुकुण्दा फिल्मसया मंकाः ग्वसालय् जुःगु ख्यालि नखः ११४२ या उलेज्याझ्वलय् वयकः मूपाहाँ कथं झायादीगु खः। ख्यालिजुजु मदनकृष्ण श्रेष्ठं उलेज्या यानादीगु उगु ज्याझ्वलय् ग्वसाखलःया पाखें झीगु सःया संरक्षक विजयरत्न असंबरें लसकुस न्वचु तयादीगु खः।

लसकुस यायेगु झ्वलय् वयकलं छगू इलय् भुखाय् व वयांलिपा कोरोनाया कारणं दिना च्वंगु ख्यालः मन्चन ज्यायात न्ह्याके कथं झीगु सः व सुकुन्दा फिल्म्स जाना थथे ख्यालि नखःया ग्वसाः ग्वयागु खः धका धयादिल। यलया ज्यापु प्रज्ञा भवनय् जुःगु उगु ख्यालि नखः ज्याझ्वलय् ड्याडसन पुचःया मास्टरनी, राजेशमान मान सिंहया राजिनामा, बाशु शाहीया न्ह्यलं चायेकि, सुरेन्द्र मानन्धरया होस याना दिसँ, श्याम सुन्दर शिल्पकारया बुइके मखुला नांयागु ख्यालः न्ह्यब्वःगु खः।

अथेहेतुं ज्याझ्वलय् सुरजबीर बज्राचार्य, यमन श्रेष्ठ व किशोर शाहीपिन्सं म्ये हालादीलसा प्राज्ञ नांजाम्ह कलाकार कृष्णभक्त महर्जनं हुलाप्याखं न्ह्यब्वया दिल । थ्व ख्यालि नखःया ग्वसाखलःया पाखें बिउगु जानकारी कथं थौंकन्हे म्हंफया वासः याका च्वनादीम्ह नांजाम्ह संगीतकःमि सुमन कपालि यात नं आर्थिक ग्वाहालि याइगु जुउगु दु ।

राष्ट्रपति विद्यादेवी भण्डारीं समाजवादी चिन्तक नाप नेपाली कांग्रेसया नेता प्रदीप गिरि सिद्धान्तनिष्ठ बौद्धिक व्यक्तित्व गुमे यायेमाःगु दु धका धयादीगु दु।

वयकलं थौं ट्वीट यानादीसे अथे धयादीगु खः। राष्ट्रपति भण्डारीं च्वयादीगु दु, ‘गिरि मदुग खबर न्यना थः तसकं दुःखी जुयागु दु। झीर्स छम्ह सिद्धान्तनिष्ठ बौद्धिक व्यक्तित्व गुमृ यायेमाःगु दु।’ राष्ट्रपति भण्डारीं गिरिप्रति श्रद्धाञ्जली अर्पण यानादीसे छेँ जःपिन्त न बिचाः हायेकादीगु दु।