ज्यापुन्हियात दकलय् ताः हाकःगु न्हि कथं नेपालय् कायेगु याइ। पश्चिम देशय् जून २१ तारीखयात दकलय् ताःहाकःगु दिं कथं कायेगु याइ।

थौंया दिं यलया मंललया लायकुलिइ विशेष संगीत महोत्सव जुइ। थनिं ४०० दँ न्ह्यः जुजु सिद्धिनर्सिङ मल्लया पालंनिसें यलया लायकूलि संगीत महोत्सव जुया वयाच्वंगु खः।

उगु संगीत महोत्सवय् जुजु सिद्धिनर्सिङ मल्लं चिनातःगु ३२ गु राग हालेगु चलन दु।

थौं सुथंनिसें हे मंगलय् सिद्धिनर्सिङ मल्लया बिलंपौ व श्रीनिवास मल्लया सिंहासन ब्वयाः दाफा भजन हालाः सनिलय् सिंहासन लायकुलिइ हे तययंकिइ।

वागमती प्रदेशय् नेवाः व तामाङ भाषा गुगू कक्षा व झिगू कक्षाय् ऐच्छिक विषय विकल्प भाषा हे अले मेमेगु ब्यागलं कथंया पुचः दयेत माग याःगु दु।

म्हिगः सोमवाः उगु माग सहित ज्ञापन पौं नेवाः देय् दबूया् केन्द्रीय अध्यक्ष पबित्र बज्राचार्यं शिक्षा मन्त्री देवेन्द्र पौडेलयात लःल्हागु दु। मन्त्रालयय् पुलांम्ह राज्यमन्त्री दिलीप महर्जन, दबूया केन्द्रीय न्वकू उमेश स्थापित, स्वनिगः विशेष प्रदेशया अध्यक्ष श्रीकृष्ण महर्जन, दुजः नरेश श्रेष्ठ व विष्णु चित्रकार, विद्या चित्रकार, दिपक तुलाधर, सुजीव बज्राचार्य, तामाङ समुदायपाखें नेपाल तामाङ घेदुङया उपमहासचिव जगत दोङपि उपस्थिति जुगु खः।

उगु ज्ञापन पतिइ नेपाःया संविधान २०७२ या भाग ७ या मौलिक हक व कर्तव्य अन्तर्गत धारा ३१ य् शिक्षा सम्बन्धी हक व कर्तव्यया उपधारा ५ कथं नेपालय् च्वपि प्रत्येक मनू व समुदायपिन्स कानून कथं थःगु मांभाषं शिक्षा कायेगु हक दइ धकाः न्ह्यथनाः तःसां नेपालय् पंचायती शिक्षा नीति २०२८ लादेयानाः माध्यमिक तहया ९ व १० तगिमय् मातृभाषाया विकल्पय् ऐच्छिक कथं गणित व कम्प्युटर विषय तयातःगुलिं उगु विषय तत्काल चिइकेत माग याःगुु खः।

ज्ञापन पौ लःल्हाना कयादीसे मन्त्री पौडेलं नेपाःया संविधानं मातृभाषा शिक्षा ब्वनेदइगु अधिकार प्रत्याभूति जुइधुंकाः शिक्षा ऐन नियमय् वयाच्वंगु व्यवधानयात चिइकाः वनेगु बचं बिसें तत्काल वय्कलं ज्ञापन पतिइ न्ह्यथनातःगु खँ कार्यान्वयन यायेगुु नितिं पाठ्यक्रम विभागया प्रमुखयात तोक आदेश बियादीगु खः।

यल महानगरपालिकां संस्कृति व सम्पदा संरक्षण सम्बद्र्धन नाप स्मार्टसिटीया अवधारणा ज्वना न्ह्या वनाच्वनागु दु धका नवनिर्वाचित मेयर चिरीबाबु महर्जनं धाउगु दु।

ताम्रकार समाजया २४ क्वःगुं सामूहिक भेला नाप १८ क्वःगु साधारणसभाय् अथे धयादीगु खः। अथेहे यल महानगरपालिकाया नवनिर्वाचित उपप्रमुख मञ्जली शाक्य बज्रार्चायं महानगरय् स्थानिय समाजनाप सहकार्य याना न्ह्यावनेगु धका जानकारी बियादीगु खः।

वयकलं महानगर दुने जातिय समाज दुने ताम्रकार समाजया छगु विशिष्ट थाय् दुगुलि ताम्रकार समाजपाखे महानगरपालिका तक यक्को खँ सिएके माः धका धयादीगु खः। उगु ज्याझ्वःया सभाध्यक्षताय् जुगुलि ताम्रकार समाजया अध्यक्ष रविन्द्रराज ताम्रकारं यल नगर धइगु कला, संस्कृति, सम्पदाया संरक्षण, सम्बद्र्धनय् समाजं मदिक्क ज्या यानाच्वनागु दु धका जानकारी बियादीगु खः।

समाजया न्हुगु ताम्रकार मंकाः छेँया समाजया जेष्ठ नागरिक काजीरत्न ताम्रकारं उलेज्या यानादीगु खः। नेवाः देय् दबूया अध्यक्ष पवित्र बज्राचार्य नाप महानगरपालिका निर्वाचित वडा अध्यक्षपि नाप थीथी जातिय समाजया अध्यक्षपिनिगु न उपस्थिति दुगु खः।

उगु साधारणसभां विनोद ताम्रकारया अध्यक्षताय् न्हुगु कार्यसमितिइ निर्विरोध निर्वाचित जुगु खः। अथेहे कार्यसमितिइ शम्भु गोविन्द ताम्रकार, दिपेश ताम्रकार, विमल ताम्रकार, विजय ताम्रकार, मनोज ताम्रकार (नसांः), प्रवल ताम्रकार, मिला ताम्रकार, मनोज ताम्रकार (हौगः), सजेश ताम्रकार, निता ताम्रकार निर्वाचित जुगु खः।

सेयर बजाः थौं न कुहावःगु दु। थौं न १५.८२ अंकं घटे जुया बजाः २०३२.३४ बिन्दुइ कुहावःगु दु।

थौं सोमबाः २३० कम्पनीया २० हजार ७७४ कारोबारपाखे २९ लाख २० हजार ७०५ कित्ता सेयर किनबेच जुगु खः।

सोमबाः धासा ९९ करोड ८६ लाख ७४ हजार २६२ रुपैयाँय् कुहावःगु दु। दकलय् अप्पो जीवन बीमा कम्पनीइ लगानीकर्तापिन्स गुमे याउगु दु।

बलेफी हाइड्रोपावरया भाः ९.९९ प्रतिशतं थहावना २८९.३० रुपैयाँ कारोबार जुगु दु। ग्रिन भेन्चर लिमिटेडया भाः ९.९८ प्रतिशतं थहावना ३२०.७० रुपैयाँ वःगु दु।

निलिभर नेपालया भाः ४.१० प्रतिशतं थहावना १८ हजार १ सयय् थहावःगु दु। अथेहे मानुषी लुघवित्त वित्तीय संस्थाया सेयर भाः दकलय् अप्पो ५.४० प्रतिशतं घटे जुया १०४७.२० रुपैयाँय् थ्यःगु दु।

संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं सुशासन व पारदर्शिता कायम यायेत स्थानीय सरकारयात निर्देशन बिउगु दु। स्थानीय सरकारया सफलता व असफलतां संघीयताया सफलता वा असफलता निर्धारण याइ धका धयादीसे स्थानीय सरकार भ्रष्टाचारमुक्त जुइमाः धका धयादीवु खः।

लुम्बिनी प्रदेशया स्थानीय जनप्रतिनिधिया लागि जुगु ज्याझ्वलय् अभिमुखीकरणया उलेज्या यानादीसे मन्त्री श्रेष्ठं स्थानीय तहय् बेरुजू ४ गुणां थहावना ४० अर्ब थ्यःगू दु धका धयादीसे सार्वजनिक खरिद नाप खर्चयात पारदर्शी व डिजिटलाइज यायेत निर्देशन बिउगु दु। जनप्रतिनिधिपि जनताया अंकुशय् च्वनेमाःगु धका धयादीसे मन्त्री श्रेष्ठं जनताया अंकुशय् मच्वःपि निरंकुश जुइ धका धयादीगु खः।

मन्त्री श्रेष्ठं कानुन व विधिसम्मतया ज्या यायेत स्थानीय जनप्रतिनिधिपिन्त निर्देशन बिउगु खः। संघीय निजामती ऐन इलय् मवःगुदि हे प्रदेश सरकारया कर्मचारीपिन्त समस्या वःगु धका धयादीसे मन्त्री श्रेष्ठं प्रदेश सरकारया मन्त्रालय सचिव व स्थानीय तहया प्रमुख कार्यकारी अधिकृत प्रदेश सरकारं छ्वयगु व्यवस्था कार्यान्वयन मजुगु धका धयादीगु खः।

लुम्बिनी प्रदेश सरकार, मुख्यमन्त्री तथा मन्त्रिपरिषद कार्यालयया ग्वसालय् न्हिन्हु यकं जुगु अभिमुखीकरण ज्याझ्वलय् लुम्बिनी प्रदेश सभाया सभामुख पूर्णबहादुर घर्ती, प्रदेश योजना आयोगया उपाध्यक्ष वामदेव क्षेत्री, मुख्यमन्त्री नाप मन्त्रिपरिषद कार्यालयया प्रमुख सचिव डिल्लीराम शर्मा, प्रदेश प्रशिक्षण प्रतिष्ठानया सीईओ गुरुप्रसाद शर्मापिनिगु न ब्बति दुगु खः।