कमल प्रकाश मल्ल फाउण्डेशनया ग्वसालय् प्रज्ञा भवनय् विद्वान डा. कमल प्रकाश मल्ल विषय स्मृति ग्रन्थ छगु ज्याझ्वः दथुइ आनन्द सिद्धि तुलाधर, हेरम्व बहादुर राजभण्डारी, अच्यूत बहादुर राजभण्डारीपिन्सं मंकाः कथं उलेज्या यानादीगु दु।

फाउन्डेशनया नायः जनकवि दुर्गालाल श्रेष्ठं त्वाःदेवाय् मत च्याका ज्याझ्वःया उलेज्या यानादीगु खः । वरिष्ठ साहित्यकार फणीन्द्र रत्न बज्राचार्य, हेरम्व बहादुर राजभण्डरी, फाउण्डेशनया संरक्षक केदार भक्त माथेमा, आनन्द सिद्धि तुलाधर, अच्यूत बहादुर राजभण्डारी, डा.ज्योतिप्रभा तुलाधरपिन्सं मदुम्ह डा.कशल प्रकाश मल्ल नापया स्वापु व कमल प्रकाशया व्यत्तित्वया विषययात कया थःपिनिगु बिचाः तयादीगु खः।

पत्रकार सुरेश किरण मानन्धरं न्ह्याकादीगु उगु ज्याझ्वलय् मदुम्ह डा. मल्लया जहान लक्ष्मी मल्लं सु्भाय् न्वचु तयादीगु खः। प्रो. निर्मल मान तुलाधर प्रधान सम्पादक व प्रा. प्रेमशन्ति तुलाधर, भूषण प्रसाद श्रेष्ठ, रमेशकाजी स्थापित, राजेन्द्र महर्जन व सुरेश किरणपिनिगु सम्पादकय् उगु सफू पिथगु खःसा वरिष्ठ कलाकार चन्द्रमान मास्के सफूया देवः तयार यानादीगु खः।

नेपाल भाषाया उत्कृष्ट बाखं सङ्ग्रह अङ्ग्रेजी भाषां प्रकाशित जूगु दु।

नेपाल भाषाया बाखं च्वमिपिनिगु संस्था बाखं दबू न पिकागु न्यासः स्वया अप्पो नेपाल भाषाया बाखं अङ्ग्रेजी भाषां अनुवाद याना निगु सङ्ग्रह प्रकाशन याःगु दु।

‘इन्स्पिरेशन’ व ‘डिभाइन’ अनुवाद सङ्ग्रह शनिवाः छगु ज्याझ्वः दथुइ बाखं दबूया संस्थापक राजा शाक्य, साहित्यकार पशुपतिभक्त पमाय्, नागर्जुन पब्लिकेशनया अध्यक्ष डा.सर्वोत्तम श्रेष्ठ, साहित्यकार भूषणप्रसाद श्रेष्ठ व शिक्षाविद् रुपक राजवंशीपिन्स पितब्बज्या यानादीगु खः। उगु ज्याझ्वलय् साहित्यकार भुषणप्रसाद श्रेष्ठ व डा. सर्वोत्तम श्रेष्ठ नाप सफू प्रकाशनयात आर्थिक ग्वाहालियापि शिक्षाविद् रुपक राजवंशी व वसुन्धरा तुलाधरयात न हंगु खः।

उगु ज्याझ्वलय् सफूया सम्पादकपि लोचनतारा तुलाधर, डा. रीना तुलाधर, वर्ल्ड नेवाः अर्गनाइजेशनया संस्थापक अध्यक्ष डा. बालगोपाल श्रेष्ठ, अनुवादक सिल्भिया राजोपाध्याय लगायतपिन्स अनुवाद साहित्य न नेपाल भाषाया बाखं अन्तर्राष्ट्रिय जगतय् म्हसिकेत ग्वाहालि जुगु धका बिचाः तयादीगु खः। इन्स्पिरेशनय् नेपालभाषां च्वया तःगु २३ गु व डिभाइनय् ३१ गु बाखं अनुवाद याना पिकागु खः।

बाखंया अनुवाद डा तेजरत्न कंसाकार, सिल्भिया राजोपाध्याय्, राजेन मानन्धर, रजनी मिला, पुष्कर माथेमा, कमलरत्न तुलाधर, कुमारराजा महर्जन, स्वयम्भू मान तुलाधर, राजेन्द्र शाक्य, पुष्परत्न तुलाधर, प्रनिधि तुलाधर, दिव्यरत्न कंसाकार, बद्रि वेदना, राहुल तुलाधर व निलिसा तुलाधरपिन्स यानादीगु खः।

श्रीघःबहाया नामं म्हसिका वया च्वंगु येँया श्रीशान्तिघट बज्रधातु चैत्य महाविहार सर्वसंघया काय् मस्त, भौमस्त व म्ह्याय् मस्त मुना “श्रीशान्तिघट महाविहार झीगु पहिचान” विषय छगू तःजिगु सहलह मुँज्या शनिवाः क्वचाःगु दु।

श्रीघः शाक्य सर्वसंघया ल्याय्म्ह पुस्तायात जागरुक व सचेतना अभिवृद्धि यायेगु तातुनां सहलह यानागु खँ धका ज्याझ्वःया संयोजक रविन्द्र शाक्यं धयादिगु खः।

सामाजिक आधुनिकीकरणया थ्व इलय् ईयात ल्वयेक धर्म कर्म व सामाजिक व्यवहारय् हिलासु खनेदयेकेगु निंतिं थज्यागु कथंया सहलह श्रीघः सर्वसंघ पाखें नियमित रुपंयाना यंकेगु व ई कथं व्यवहार याना यंकेत थुकथंया सहलह यानावनेमाः धका श्रीशान्तिघट बज्रधातु चैत्य महाविहार संरक्षण समितिया छ्यान्जे पुरन शाक्यं धयादिगु खः।

मुँज्याय् ब्वतिकाःपि सर्वसंघया ल्याय्म्ह पुस्ताया दुजःपिन्त थीथी स्वंगु पुचलय् ब्वथला धार्मिक, आर्थिक व सामाजिक पक्षयाबारे दुग्यंक सहलह न्ह्याकुगु खः।

सेयर बजाः परिसूचक नेप्से थौं आइतबाः २७.५४ अंक (१.४६ प्रतिशत) न कुहावया १८५५.०६ अंकय् बन्द जूगु दु।

दकलय् अप्पो उपसूचकय् कुहवःगु खः। आइतबाः वित्त कम्पनी उपसूचक दकलय् अप्पो २.८८ प्रतिशतं कुहावया विकास बैंक, हाइड्रोपावर व मेमेगु उपसूचकय् न २ प्रतिशत स्वया अप्पो कुहावःगु खःसा बैंकिङ उपसूचक १.५२ प्रतिशतं कुहावःगु खः।

नेप्से ३७ लाख ७८ हजार ९५१ कित्ता सेयर किनबेच जुगुलि १ अर्ब १५ करोड ७१ लाख ५५ हजारं कारोबार जूगु खः। उकि मध्ये कृषि विकास बैंकया दकलय् अप्पो ६ करोड २५ लाख ११ हजारया कारोबार जुगुलि रिडी पावर कम्पनीया ५ करोड ४३ लाख १३ हजार व नबिल बैंकया ५ करोड ४१ लाख १३ हजारया कारोबार जूगु खः। नेप्सेय् आइतबाः बुल २१० सूचीकृत कम्पनीया सेयर कारोबार जुगुलि १८० कम्पनीया सेयर भाः कुहावःगु खः। अथेहे २५ कम्पनीया सेयर भाः थहावःगु दु सा न्याःगु कम्पनीया सेयर भाः स्थिर जूगु दु ।

आइतबाः कारोबार जूगु मध्ये इस्टन हाड्रोपावरया सेयर भाः थहावना सकारात्मक सर्किट लेभलय् बन्द जुगुलि धौलागिरि लघुवित्तया सेयर भाः ८.२० प्रतिशत व खप्तड लघुवित्तया सेयर भाः ६.११ प्रतिशतं कुहवःगु दु। अथेहे ग्लोबल आईएमई ब्यालेन्स फण्ड १ या इकाइ भाः ९.३५ प्रतिशतं थहावःगु दु्। रिडी व पिपुल्स हाइड्रोपावरया सेयर भाः १० प्रतिशतं कुहावया नकारात्मक सर्किट भाः जुया बन्द जुगु दु।

नेकपा माओवादी केन्द्रया पदाधिकारीपिनिगु बैठक थौं च्वनिइगु जुगु दु ।

पार्टी केन्द्रीय कार्यालय पेरिसडाँडाय् बैठक थौं न्हिनय् २ बजे च्वनिइगु जुगु दु। उगु बैठकय् समसायिक राजनीतिक विषयय केन्द्रित जुइ धका धाःगु दु।

संसदीय दलया निर्वाचन, न्हुगु सरकार गठनया कुतः लगायत विषय सहलह यायेत्यःगु खः। माओवादी केन्द्रया अध्यक्ष प्रचण्डं प्रधानमन्त्रीया दाबी यानाच्वंगु खः।

न्हापागु चरणया नेतृत्वय् नेपाली कांग्रेसया सभापति शेरबहादुर देउवा न दावेदारी यानाच्वपंगु खः।