निर्वाचन आयोगं वंगु ४ मंसिरय् जुगु प्रदेश सभा सदस्य निर्वाचनया लिच्वः नाप प्रतिवेदन न्ह्यगु प्रदेशया प्रदेश प्रमुखपिन्त लःल्हागु दु।

आयोगया प्रमुख निर्वाचन आयुक्त, आयुक्तपि, सचिव व सहसचिवपिन्स दक्को हे प्रदेश याःगु राजधानीया प्रदेश प्रमुख कार्यालयय् बिस्क बिस्कं प्रतिवेदन लःल्हागु दु। प्रतिवेदन लःल्हाय्त प्रदेश नं. १ या प्रमुख निर्वाचन आयुक्त दिनेशकुमार थपलिया, मधेस प्रदेशय् आयुक्त सुगनशमशेर जबरा, बागमती प्रदेशया सचिव गोकर्णमणि दुवाडी, गण्डकी प्रदेशय् आयुक्त ईश्वरीप्रसाद पौड्याल, लुम्बिनी प्रदेशय् आयुक्त रामप्रसाद भण्डारी, कर्णाली प्रदेशय् सहसचिव यज्ञप्रसाद भट्टराई व सुदूरपश्चिम प्रदेशय् आयुक्त डा. जानकी कुमारी तुलाधरया नेतृत्वयासे आयोगया पुचः वःगु खः।

प्रदेश सभा सदस्य निर्वाचन ऐन, २०७४ या दफा ६२ य् आयोगं प्रदेश सभा सदस्ययन निर्वाचनय् न्हापां निर्वाचित जुपि निर्वाचन प्रणाली व समानुपातिक निर्वाचन प्रणालीपाखे निर्वाचनया प्रतिवेदन लिच्वः घोषणा जूगु न्ह्यन्हुया दुने प्रदेश प्रमुखया थाय् छ्वय माःगु ब्यवस्था दु।

यल महानगरपालिकां थःगु १०४ क्वःगु स्थापना दिवसया लसताय् ‘ललितपुर महानगर गौरव पुरस्कार’ लःल्हागु दु।

थौं शनिबाः छगु ज्याझ्वः दथुइ प्रधानमन्त्री शेरबहादुर देउवां वरिष्ठ धातु मूर्तिकार राजकुमार शाक्य, वरिष्ठ साहित्यकार छत्रबहादुर कायस्थ, प्राज्ञ कालु कुमाले व यल महानगरपालिकाया पूर्वप्रमुख बुद्धिराज बज्राचार्ययात उगु सिरपाः लल्हागु खः।

महानगर दुने कला, साहित्य व संस्कृतिया ख्यलय् महत्वपूर्ण योगदान बिउगुलि म्हतिइ १ लाख नगद नाप हनापौ लःल्हागु खः। उगु ज्याझ्वलय् प्रधानमन्त्री देउवां महानगर दुने उत्कृष्ट करदाताया सम्मान संस्थागत रुपं जेम्स स्कुल व व्यक्तिगत रुपं टाँसी तेन्जिङयात लःल्हागु दु।

प्रधानमन्त्री नाप नेपाली कांग्रेसया सभापति शेरबहादुर देउवां संसदय् प्रभावकारी भूमिका निर्वाह यायेत पार्टीपाखे निर्वाचित प्रतिनिधिसभाया सांसदपिन्त निर्देशन बिःगु दु।

प्रधानमन्त्री देउवां पार्टीपाखे निर्वाचित प्रतिनिधिसभाया सांसदपिन्त शनिबाः थःगु हे सरकारी निवास बालुवाटारय् सःता भिंतुना बिउसे संसदय् प्रभावकारी भूमिका निर्वाह यायेत निर्देशन बिउगु दु धका कांग्रेस नेता ज्ञानेन्द्रबहादुर कार्की न जानकारी बिःगु दु। 

नेपाली कांग्रेसं कन्ह्यः आइतबाः केन्द्रीय कार्यसम्पादन समितिया बैठक सःतूगु दु।

उगु बैठक कन्ह्यः न्हिनय् ३ बजे सानेपास्थित पार्टी कार्यालयय् च्वनिइगु जुगु दु धका पार्टी कार्यालयया मुख्यसचिव कृष्णप्रसाद पौडेलं जानकारी बिःगु दु।

वंगु ४ मंसिरया चुनावलिपा थ्व निक्वःगु कार्यसम्पादन समितिया बैठक खः । थुगु बैठकं संसदीय दलया नेता ल्ययेगु व न्हुगु सरकारया विषय छलफल जुइ धका धाःगु दु।

कांग्रेसय् आःतक सभापति शेरबहादुर देउवा, महामन्त्री गगन थापा लगायतपिन्स संसदीय दलया नेताय् दावी यानादीगु दु।

नेवाः पत्रकार राष्ट्रिय दबू, येँ जिल्लाया प्यक्वःगु मुँज्यां अरर्बिन्द्र मान सिंयात सर्वसम्मतं नायः ल्यःगु दु। अथेहे उपाध्यक्षय् प्रबिन महर्जन व बिमला मानन्धर, सचिवय् मनोजरत्न शाहीयात ल्यःगु दु।

अथेतु कोषाध्यक्षय् राजेन्द्र मानन्धर, सह सचिबय् हरिशरण डंगोल व सुष्मा महर्जनयात ल्यःगु दु। दुजलय् उद्धव खड्गी, सहयोग रंजित, बिजय सिं, सुबिन्द्र श्रेष्ठ, किचः सिं डंगोल, मोनिका मल्लयात ल्यःगु दु।

दबू येँ जिल्लाय् जुगु उगु ज्याझ्वलय् निर्वाचन कमितया संयोजक व दुजलय् केके मानन्धरं याकादीगु खः।

थौं शनिवाः सुथय् जगत सुन्दर ब्बनेकुथिइ जुगु छगु ज्याझ्वः दबूया केन्द्रिय नायः सुरजबीर बज्राचार्यं उलेज्या यानादीगु खः। उगु उलेज्या ज्याझ्वलय् दबूया सल्लाहकारपि पुष्कर माथेमा व सुरेशकिरण मानन्धर नाप बरिष्ठ पत्रकार नातिकाजी महर्जनपिन्स भिंतुना न्वचु तयादीगु खः।