वंगु २४ घण्टाया दुने देयन्यक ५४२ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं २ हजार ८२ म्हेसिगु पीसीआर परीक्षण याःगुलि २२४ व २ हजार ८४८ म्हेसिगु एन्टिजेन परीक्षण याःगुलि ३१८ म्ह याना ४२१ म्हेसित संक्रमण पुष्टि जुगु दु।

अथेहे २४ घण्टाय् ४२१ म्हेसित कोरोना संक्रमणमुक्त जूगु दु।

राष्ट्रपतिं लित छ्वया हःगु नागरिकता विधेयक प्रतिनिधिसभाय् छलफल सुरु जूगु दु।

संसदय् थौंया बिहीबाः च्वंगु बैठकय् गृहमन्त्री बालकृष्ण खाँणं विधेयकय् बिचाः यायेत प्रस्ताव पेश याःगु खः।

संसदया बहुमतं स्वीकृत याःगु दु। आः विधेयकय् छलफल जुगु दु।

यँयाः पर्व स्वयेगु लागिं थुगुसी नं येँ महानगरपालिकां थःपिंलिसे स्वापू दुगु थीथी देय्या नगर प्रमुखपिन्त ब्वनापौ छ्वःगु दु।

येँ महानगरया मेयर बालेन्द्र साहं थुगुसी थीथी देय्या २५ म्ह नगर प्रमुखपिंत यँयाः स्वः वयेगु लागिं ब्वनापौ छ्वये धुकुगु दु। भारत, चीन, अमेरिका, जापान, जर्मनी, दक्षिण कोरिया व उत्तर कोरियाया थीथी नगर प्रमुखपिंत तकं ब्वनापौ छ्वःगु दु।

येँ महानगरपाखें मेयर विद्यासुन्दर शाक्यया पालय् यँयाःयात अन्तर्राष्ट्रिय रुपं प्रचार यायेगु लागिं थीथी नगरया प्रमुखपिंत येँय् ब्वनेगु ज्या जूगु खः।

अथेहे पञ्चाङ्ग निर्णायक विकास समितिपाखें थुगुसी जुइगु यँयाः जात्राया साइत न सार्वजनिक याःगु दु। समितिं बिःगु साइत कथं वइगु भदौ २२ गते बुधवाः सुथय् ७.१७ बजे हनुमानध्वाखाय् यःसिं थनीगु जूगु दु।

भदौ १९ गते सुथय् ७.२४ बजे यःसिंयात नगर प्रवेश याकीगु ज्याझ्वः दु। यःसिं थनेवं येँय् दीप्याखं, लाखे, पुलुकिसि आदि नं पिहां वइ।

भदौ २४ गते कुमारी रथयात्राया क्वःनेयाः, २५ गते थःनेयाः, २९ गते बुधवाः नानिचायाः व वकुन्हु हे बहनी ७.३३ बजे यःसिं क्वःथली।

संस्कृति पर्यटन तथा नागरिक उड्डयन मन्त्रालयय् इन्द्रजात्रा व्यवस्थापनया विषय छलफल जूगु दु।

पर्यटन मन्त्री जीवनराम श्रेष्ठनाप उगु छलफलय् येँ महानगरया प्रमुख बालेन्द्र शाह (बालेन), उपप्रमुख सुनिता डंगोल, प्रमुख जिल्ला अधिकारी गोविन्द रिजाल, सुरक्षा निकायया अधिकारी, गुठी संस्थान, स्थानीय गुठीयारपिनिगु सहभागी दुगु खः।

उगु सहलहय् मन्त्री श्रेष्ठं इन्द्रजात्रा अन्तरराष्ट्रियकरणं पर्यटन उद्योगय् ग्वाहालि जूगु दु धका धयादीगु दु। ‘थ्व राष्ट्रिय नखः खः । थुगु जात्रा स्वयेत वइपिन्त याउक स्वये दइगु व्यवस्था यायेमाः।’ धका मन्त्री श्रेष्ठ धयादीगु खः। उगु छलफलय् महानगर दुनेया वडाध्यक्षपि नाप सरोकारवाला पिनिगु सहभागिता दुगु खः।

येँया थ्व हे भदौ २४ गते शुक्रबाः कुमारी, भैरब व गणेशया क्वने रथ सालिइगु खः। उगु जात्राय् जीवित द्यःपि गणेश, भैरव व कुमारीया रथ सालिइगु याइ। अथेहे लाखे प्याखं, देवी नाच, पुलुकिसी, हल्चोक भैरव नाप महाकाली प्याखं न पिहावयेगु याइ।

संसदं नागरिकता ऐन संशोधन विधेयक थौं हे पारित याइगु जुगु दु। संसद सचिवालयं सार्वजनिक याःगु थौंया लिपागु कार्यसूचीइ नागरिकता विधेयक पारित यायेगु उल्लेख दु।

राष्ट्रपतिं हाकनं विचाः यायेगु लागि धका प्रमाणीकरण मयासे लित छ्वंगु विधेयक हुबहु पारित यायेत्यःगु दु। ३१ साउनय् च्वंगु सत्ता गठबन्धनया बैठकं राष्ट्रपतिं हाकन विचाः यायेत छ्वया हःगु विधेयक हुबहु न्ह्यने यकेगु निर्णय याःगु खः।

संसदया निगुगु हे सदनपाखे पास जूगु नागरिकता सम्बन्धी विधेयक १५ साउनय् सभामुख अग्निप्रसाद सापकोटां राष्ट्रपतिया थाय् प्रमाणीकरणया लागि छ्वंगु खः।

तर राष्ट्रपति भण्डारीं १५ बुँदे सन्देश नाप २९ गते उगु विधेयक प्रतिनिधिसभाय् लितः छ्वया हःगु खः।