राष्ट्रिय उपभोक्ता मञ्चं पेट्रोलियम पदार्थया भाः न घटे मयागु धासे आयल निगमविरुद्ध संसदीय समितिइ निवेदन बिःगु दु।

प्रतिनिधिसभा अन्तर्गत उद्योग तथा वाणिज्य व श्रम तथा उपभोक्ता हित समितिइ तत्काल इन्धनया भाः घटे याये माःगु माग यासे मञ्चया अध्यक्ष प्रेमलाल मर्हजनं निवेदन बिःगु दु। छु दिं न्ह्यःनिसे इन्धनया भाः निरन्तर घटे जूसा निगमं भाः घटे मयागुलि निवेदन बिःयागु धका धाःगु दु।

‘अन्तर्राष्ट्रिय बजारय् पट्रोलियम पदार्थया भाः स्वला निसे लगातार घटे जुया वया च्वंगु व इन्डियन आयल कर्पोरेसन तक निला न्ह्यःनिसे नेपाल आयल निगमयात घटे याना हे पट्रोलियम पदार्थ आपूर्ति याना वयाच्वंगु खः। तर न नेपाल आयल निगमं धाःसा थीथी त्वहचिना भाः घटे याःगु मदु,’ धका मञ्चं धागु दु।

निगमं बेइमानी कपटपूर्ण व्यवहार याना उपभोक्तायात ठगे यायेगु ज्या जुयाच्वंगु धासे मञ्चं तत्काल समितिं भाः घटेयाना नागरिकपिन्त राहत बिइमाः धका निवेदनय् उल्लेख याःगु दु।

आधुनिक कवि पूर्ण वैद्य मदुगु दकिलाया पूण्य तिथि लाकाः वय्कःया कविता सफू ‘धलिमय् पानातःगु आकाश’ विमोचन जुगु दु।

मदुम्ह वैद्यया प्रतिसरा साय्मि सहितया न्याम्ह शिष्यपिस छगू ज्याझ्वःयासे कुतः पिकाकपाखें पिहां वःगु उगु सफू विमोचन जूगु खः ।

विराट नेभा साहित्य सम्मेलनया अध्यक्ष महेन्द्रगोपाल कर्माचार्यया सभाध्यक्षताय् जूगु उगु ज्याझ्वलय् डा. योगेन्द्रमान प्रधान, हितकरवीर सिं कंसकार, तिलकप्रकाश कायस्थ, डा. दिनेश भुजू, पूर्ण ताम्राकारपिंसं कवि वैद्यया बारे न्ववानादीगु खः ।

ज्याझ्वलय् पूर्ण वैद्यं च्वयादीगु कवितात खस नेपाली, अंग्रेजी, तामाङ, मगर व गुरुङ भाषां अनुवाद यानाः पाठ यायेगु ज्या जूगु खःसा म्येचाः ‘जि बाः वइगु खुसि खः’ नं पिदंगु खः ।

‘श्रीकृष्ण जन्माष्टमी’ थौं देयन्यक श्रीकृष्णया पूजा–आराधना याना हनिइगु याइ। थौं देयन्यक सरकारं सार्वजनिक विदा बिःगु दु।

ज्ञानयोग, कर्मयोग व भक्तियोगया प्रणेता कथं कयातम्ह श्रीकृष्णया जन्म द्वापर युगया भाद्र कृष्ण अष्टमी चान्ह्यः जन्म जुगु दिंयात ‘श्रीकृष्ण जन्माष्टमी’ व चान्ह्य ‘मोहरात्रि’ धाइ।

थौं यलय् श्रीकृष्णया द्यःया दर्शन यायेत राष्ट्रपति वनेगु चलन दु।

शेयर बजारय् थौं बिहीवाः २८ अङ्कं थहावंगु दु। शेयर बजाः परिसूचक नेप्से थौं २७ दशमलव ७२ अङ्कं थहावना २ हजार ६८ दशमलव ४२ विन्दुइ थ्यःगु दु।

थौं दक्को समूहया शेयर सामान्य थहावःगुलि जलविद्युत्, फाइनान्स व माइक्रोफाइनान्स समूहया शेयर यक्को कुहावंगु दु। बजाः थहावंगुलि कारोबारय् न भचा सुधार जूगु दु।

२२० कम्पनीया ५१ लाख १ हजार कित्ता शेयर २ अर्ब ५ करोड ७९ लाख रुपैयाँ कारोबार जूगु दु। दकलय् अप्पो रिडी हाइड्र्रोया १० करोड ४३ लाख रुपैयाँ शेयर किनबेच जुगु खः।

थौं मन्दाकिनी हाइड्रो, अपर सोलु हाइड्रो, अप हेवाखोला हाइड्रो व श्वेतगंगा हाइड्रोया शेयर १० प्रतिशतं थहावंगु दु। समग्र बजाः थहावंगु दु सा सर्पोट लघुवित्तया शेयर दकलय् अप्पो ३ दशमलव २८ प्रतिशतं घटे जुगु खः।

वंगु २४ घण्टाय् स्वनिगलय् १४३ म्हेसित कोभिड भाइरसया संक्रमण जूगु दु।

अथेहे थौं येँ १०७ म्हेसित कोरोना सक्रमण जूगु दु। ख्वपय् खुम्ह व यलय् ३० म्हेसित संक्रमित पुष्टि जूगु दु।

थ्व नाप स्वनिगलय् सक्रिय संक्रमितपि ३ हजार ४८२ म्ह थ्यःगु दु।