नेपालया आदिवासी जनजाति मिसातय्सं लोकल अय्लाःयात ब्राण्डिङ याय्गु बहसय् बिमति क्यंगु दु।

लोकल अय्लाःयात ब्राण्डिङ याय्बलय् आदिवासी जनजाति मिसाया परम्परागत ज्ञान व परम्परागत आर्थिक व्यवस्थाय् लिच्वः लाइगु उमिगु धापू दु। २८औं विश्व आदिवासी दिवसया झ्वलय् राष्ट्रिय आदिवासी जनजाति महिला महासंघं याःगु ज्याझ्वलय् वक्तातय्सं आदिवासी जनजाति मिसायात स्वतन्त्र व निर्वाधपूर्वक लोकल अय्लाः उत्पादन याकेबीमाःगु माग तःगु खः।

ज्याझ्वलय् न्ववासें राष्ट्रिय आदिवासी जनजाति महिला मञ्चया नायः सुनी लामां लोकल य्लाः ब्राण्डिङ याय्गु पलाखं लोकल परम्परागत ज्ञानया मुख्य हकदार आदिवासी जनजाति मिसातय् अधिकार लाकाकाइगु धयादिल। ‘लोकल ब्राण्डिङ याय्गु खःसा उकिया लवः निश्चित व्यापारीतय्त वनी, यदि  याय्गु हे खःसा प्याटर्न राइट्स आदिवासी मिसातय्के दय्माः’ नायः लामां धयादिल।

अथे हे, राष्ट्रिय आदिवासी जनजाति महिला महासंघया संस्थापक नायः स्टेला लामा, राष्ट्रिय आदिवासी जनजाति महिला महासंघया मू छ्यान्जे शान्ति देवानलिसें नं लोकल अय्लाः उत्पादनलिसे आदिवासी जनजाति मिसाया परम्परागत ज्ञान व अर्थ व्यवस्था स्वानाच्वंगु धासें उगु ज्ञानया राज्यपक्षं संरक्षण व प्रवद्र्धन याय्माःगुलिइ बः बियादिल। हलिंन्यंकया आदिवासीतय्सं दँय्दसं ९ अगष्टया ‘विश्व आदिवासी दिवस’ कथं हनावःगु दु।

थ्व हे झ्वलय् थुगुसी नेपालय् दिवसया झ्वलय् कृयाशील आदिवासी जनजातिजन्य संघसंस्थातय्सं मंकाः रुपं सप्ताहव्यापी ज्याझ्वः याःगु खः। थुगुसी दिवसया मूल नारा ‘आदिवासी ज्ञानया संरक्षण व पुस्तान्तरणय् आदिवासी मिसा भूमिका’ तयातःगु दु।

बौद्ध युवा कमिटी यलया ग्वसालय् जुगु २८क्वःगु स्वनिगः व्यापी बौद्ध वक्तृत्वकला धेंधें बल्लाखय् मैत्रीय युवा संघ ख्वपया प्रमिला धुख्वाः न्हाप लाःगु दु।

अथे हे, शाक्यसिंह बौद्ध परियति शिक्षालयया अनिशा श्रेष्ठ ल्यू, धर्म साकच्छा संघ हःखाया प्रतिष्ठा शाक्य लियांल्यू लाःगु दु। दिपावती पुस्तकालयया पारमी शाक्यं हःपाः सिरपाः त्याकादिल। निर्वाणमूर्ति विहारया सजगता मानन्धरं हःपाः सिरपाः हे त्याकादीगु दु। धेंधें बल्लाखय् १० संघसंस्थाया ब्वति दुगु खः। न्हाप लाःम्हेसित १५ हजार तका सिरपाः ब्यूगु खःसा निम्हेसिगु नितिं पोखराया एकतर्फी हवाजजहाज टिकट नं ब्यूगु खः।

ल्यूयात १० हजार लियांल्यूयात ८ हजार तकालिसें सिन्धुपाल्चोकया भोटेकोशीइ बञ्जी जमया कुपुन तकं ब्यूगु खः । सहभागीतय्त द्वःछि द्वःछि ब्यूगु खः। समाजसेवी मोतिलाल शिल्पकारं सकलसित तका सिरपाः लःल्हानादिल सा वाग्मती प्रदेशया सांसद् शोभा शाक्यं दसिपौ लःल्हानादिल। धेंधें बल्लाःया निर्णायक मण्डलय् भिक्षु विमलो, शाक्य सुरेन, मदनरत्न मानन्धर व नरेशवीर शाक्य दुगु खः।

वयां न्ह्यः धेंधें बल्लाःया उलेज्या यासें संस्कृति, पर्यटन तथा नागरिक उडड्यन मन्त्री जीवनराम श्रेष्ठं थुकथंया रचनात्मक ज्याखं किशोर, किशोरी व ल्याय्म्हतय्त बुद्धया ज्ञान थुइके फइगुलिसें व्यक्तित्व विकास जुइगु बिचाः तयादिल। लुम्बिनी विकास कोषया नायः तकं खःम्ह मन्त्री श्रेष्ठं लु्म्बिनीया गुरुयोजना कथं विश्वया शान्ति र पर्यटन केन्द्र दय्केत थम्हं कुतः यानाच्वनागु जानकारी बियादिल। ज्याझ्वलय् ल्याय्म्ह वर्गयात लक्षित यानाः बुद्ध धर्मया विकासय् महत्वपूर्ण योगदान ब्यूगु धासें कमिटीया संस्थापक राजु शाक्य व पूर्वअध्यक्ष सुनील महर्जनयात सम्मान याःगु खः।

सम्मानित निम्हेसितं कमिटीया नायः सतिश शाक्यं स्वांमाः व भिक्षु कौण्डन्यं दोसल्ला न्यय्कादिल सा मन्त्री श्रेष्ठं हनापौ लःल्हानादिल। सभाय् भिक्षु कौण्डन्य, सम्मानितपाखें कमिटिया पूर्वअध्यक्ष महर्जनं बुद्ध धर्मयात व क्षमता विकासया कोणं स्वय्माःगु धासें ल्याय्म्ह वर्गया रुचि, चाहना व आवश्यकतायात सम्बोधन यानावनेमाःगुलिइ बः बियादिल। ज्याझ्वलय् बौद्ध वक्तृत्वकला पर्व मूगुथिया नायः विश्वन्तर शाक्ययात कार्यकालया सफलताया कामना यासें भिंतुना व बधाई पत्र लःल्हाःगु खः।

२०५० सालनिसें दँय्दसं असार पुन्हिया दिनय् जुयावःगु थ्व ज्याझ्वः कोरोना संक्रमणया हुनिं २०७७ व २०७८ सालय् जक द्यूगु खः।

नेपालभाषा साहित्य हाइकूयात कया शनिवाः छगू हाइकु सम्मेलनया ज्याझ्वः जुगु दु।

नेवाः हाइकु नखःया नामं जूगु उगु हाइकु सम्मेलनय् निगू दर्जनसिबें अप्वः हाइकु च्वमिपिन्सं ब्बति काउगु खः। हाइकु ख्यःया कजि सुरेश प्रधानया सभाध्यक्षताय् जुगु उगु ज्याझ्वः यलया सातोआकि भवनय् जुउगु खः।

ज्याझ्वः मूपाहाँ कथं नेपालभाषा एकेदेमिया चान्सलर यज्ञरत्न धाख्वाः नं त्वाःदेवाय् मत च्याकाः उलेज्या यानादीगु खः। ग्वसाःखलःया कजि सुरेश प्रधानं हाइकु साहित्य ख्यः न्हियान्हिथं तब्या जुयाः वयाच्वंगुलिं लसता प्वंकादिल।

अथेहे साहित्यकार भुषणप्रसाद श्रेष्ठ, समान्त श्रेष्ठ, रिता महर्जन, राजेश्वरी राजोपाध्याय, प्रदिप तुलाधर, अनुप श्रेष्ठाचार्य, विमला शर्मा, ज्ञानेन्द्ररत्न बज्राचार्य, सुरेन्द्र लाल भुजु, मंगला तुलाधर, बुद्धरत्न जः, उर्मिला डंगोल, दिव्या ताम्राकार, मन्जुश्री श्रेष्ठ, ज्ञानीदेवी शाक्य, सुमन महर्जनपिन्स हाइकु ब्वना न्यंकादीगु खः।

अन वाचन जुउगु हाइकु लगायत हाइकु साहित्य बारेया थीथी पक्षयात कया समालोचक नेपालभाषा एकेदेमिया सदस्य सचिब डा. पुष्पराज राजकर्णिकार, समिक्षकपिं ध्रुव मधिकःमि व पुर्णकाजी ताम्राकार लगायत हाइजिन तुयु पुंपिन्सं न्वःवानादीगु खः।

प्रधानन्यायाधीश चोलेन्द्रशमशेर जबराविरुद्धया महाअभियोग न्यालालिपा प्रतिनिधिसभाया सचिवालय दर्ता जुया सदनय् न्ह्याउगु दु।

प्रतिनिधिसभाया जारी बैठकय् सभामुख अग्निप्रसाद सापकोटां महाभियोगय् छलफल सुरू याउगु दु। दर्ता जूग्ु न्याला लिपा प्रतिनिधिसभाय् छलफलया लागि हया रित जक पुरेयाउगु धका प्रमुख प्रतिपक्षी दल नेकपा एमाले न द्धपः बिउगु दु। वंगु फागुन १ य् सत्तारुढ दलया सांसदपिन्स प्रधानन्यायाधीश राणाविरुद्ध महाभियोग प्रस्ताव दर्ता याउगु खः।

राणायात सत्तारुढ नेपाली कांग्रेस, नेकपा माओवादी व एकीकृत समाजवादीया ९८ म्ह सांसदपिन्स महाभियोग प्रस्ताव मयकूगुलि प्यख्यं आलोचना जुयाच्वंगु खः।

शहीद गंगालाल राष्ट्रिय हृदय केन्द्रया विशेषज्ञ चिकित्सकपिनिगु उमेर हद थकायेगु निर्णयय् नेकपा एमालें विरोध याउगु दु।

आइतबाः संसदया शून्य समय न्ववासे एमाले सचिव तक जुयादीम्ह सांसद योगेश भट्टराई न उगु निर्णयया विरोध याउगु खः। संचालक समितिं ६० थकाया उमेर हद ६३ दँ याउगु खः।

थुकिया बारे भट्टराई न सरकारं चाहे जूसा ८० दँ न थ्यकेफू धका सचेत याउगु दु। संचालक समितिया छम्ह सदस्यया कथं अस्पतालया कार्डियोलोजिस्ट डा. रवि मल्ल २३ साउन गतेनिसे अवकास जुइवं प्रधानमन्त्रीपाखे आरजु राणां दबाब बिया उमेर हदया ई थकाउगु खः।

अस्पताल कर्मचारी संघं न संचालक समितिया उगु निर्णय छु चिकित्सकया शक्तिया भरय् याउगु धासे उगु निर्णय मभिंकूसा थौं आइतबाः निसे हडताल यायेगु चेतावनी तक बिउगु खः।