लुँया भाः थौं हाकन निसः थहावंगु दु। लुँ तोलां थौं निसः थहावना ९५ हजार ८ सय रुपैयाँ थ्यःगु दु।

अथेह, वहः तोलां न झीतका थहावगु दु। वहः तोलां झीतका थहावना १ हजार २ सय ३० रुपैयाँ न कारोबार जुगु दु।

प्रेस सेन्टर नेपालं केन्द्रीय समितिइ ६१ सदस्यीय पदाधिकारी सर्वसम्मतिं ल्यःगु दु। सेन्टरया निक्वःगु पूर्ण बैठकं सर्वसम्मतिइ पदाधिकारी ल्यउगु खः।

मङ्सिर १९ गते चितवनय् सम्पन्न जुगु राष्ट्रिय महाधिवेशनं अध्यक्षय् विष्णु सापकोटा ‘जुगल’ यात सर्वसम्मतिं ल्यउगु खःसा पदाधिकारी जक ल्यःदनिइगु खः।

सेन्टरया वरिष्ठ उपाध्यक्षय् कमल गिरी ल्यःगु दु। अथेहे समावेशी उपाध्यक्षय् गोरखापत्रया उपेश महर्जन व सुरेश यादव नाप प्रदेशया कथं २० म्ह उपाध्यक्ष ल्यःगु खः। महासचिवय् सन्तोष पौडेलयात ल्यःगु दु।

खुम्ह खुल्ला व प्यम्ह समावेशी नाप झीम्ह उपमहासचिव ल्यःगु खः। समावेशी जनजातिपाखे गोरखापत्रया राजेश चाम्लिङ उपमहासचिवयात ल्यःगु खः। अथेहे, १५ म्ह खुल्ला सचिव ल्यःगु खःसा १२ म्ह समावेशीपाखे सचिव जुगु खः।

आदिवासी जनजाति, दलित, महिला, मधेसी समुदायपाखे निम्ह निम्ह सचिव जुइगु विधानय् व्यवस्था दु।

खोटाङय् थौं सुथय् भुखाय् ब्बःगु दु।

थौं आइतबाः सुथसिया ८ः१३ बजे भुखाय् ब्बःगु दु धका राष्ट्रिय भूकम्प मापन तथा अनुसन्धान केन्द्रं धाउगु दु। केन्द्र बिउगु जानकारी कथं खोटाङया साकेला गाउँपालिका–५ मात्तिम बिर्ता जःखः केन्द्रविन्दु जुया ६ म्याग्नेच्युडया भुखाय् ब्बःगु खः।

नेवाः पत्रकार राष्ट्रिय दबु चितवन शाखाया अध्यक्षय् अनुज जोशी निर्वाचित जुयादीगु दु।

शनिबाः भरतपुरय् जुगु खुक्वःगु साधरण सभा व स्वक्वःगु अधिवेशनं जोशीयात सर्वसम्मत अध्यक्ष कथं ल्यःगु खः। जोशीया नेतृत्वय् गुम्हेसिगु सदस्यीय कार्यसमिति समेत गठन जुगु दु। उपाध्यक्षय् सृजना ताम्राकार, सचिबय् सुनिल कुमार श्रेष्ठ, सहसचिवय् विनिता श्रेष्ठ व कोषाध्यक्षय् राजु श्रेष्ठयात ल्यउगु खः। अथेहे दुजःपि राजेन्द्र श्रेष्ठ, उमेश श्रेष्ठ, मनिषा श्रेष्ठ व निरुता श्रेष्ठयात ल्यःगु खः।

निर्वाचन कमिटिया संयोजक नाप पत्रकार दबुया संस्थापक अध्यक्ष श्रीकृष्ण महर्जन व दुजः नाप पत्रकार दबूया कोषाध्यक्ष सुरेन्द्रभक्त श्रेष्ठं निर्वाचित जुयादीपिन्त खादा व अबिर टिंका भिंतुना बियादीगु खः। उगु ज्याझ्वलय् चिकित्सक व पत्रकारपिन्त न सम्मान यानादीगु खः।

पत्रकार दबू चितवन शाखाया खुक्वःगु साधरण सभा व स्वक्वःगु अधिवेसनया मूपाहाँ पत्रकार दबुया बरिष्ठ केन्द्रीय उपाध्यक्ष नृपेन्द्रलाल श्रेष्ठं त्वाः देवाः मत च्याका उलेज्या यानादीगु खः। मूपाहाँ बरिष्ठ केन्द्रीय उपाध्यक्ष श्रेष्ठं चिकित्सक व पत्रकारपिन्त सम्मान यानादीगु खः। स्वास्थ्य क्षेत्रय् योगदान बियादीपि वरिष्ठ हाडजोर्नी व नसा रोग विशेषज्ञ प्रा डा अर्जुन श्रेष्ठ, वरिष्ठ प्वाः नाप कलेजो रोग विशेषज्ञ डा बरुण श्रेष्ठ, वरिष्ठ क्यान्सर सर्जन प्रा डा भक्तमान श्रेष्ठ, जनरल व ल्याप्रोस्कोपिक डा सुर्यज्योती श्रेष्ठपिन्त हनापौं लःल्हानादीगु खः।

अथेहे पत्रकारिता ख्यलय् ताः ईनिसे योगदान यानादीपि स्वम्ह वरिष्ठ पत्रकारयान त सम्मान याउगु खः। पत्रकार दबु चितवनया संस्थापक अध्यक्ष अमर प्रधान, पत्रकार महासंघ चितवनया पूर्वअध्यक्ष महेन्द्र श्रेष्ठ, वरिष्ठ स्वास्थ्य पत्रकार नाप पत्रकार दबुया केन्द्रीय उपाध्यक्ष सन्दीपकुमार श्रेष्ठयात न सम्मान याउगु खः।

दक्षिण एसियाली देय्या पत्रकारपिनि संस्था सार्क पत्रकार मञ्च (एसजेएफ) या नेपाः कचा निस्वंगु दु।

मञ्चया केन्द्रीय कार्यकारिणी समितिया अध्यक्ष राजु लामा व महासचिव मोहम्मद अब्दुर रहमानं शनिवाः छगू विज्ञप्ति पितबिसें राष्ट्रिय समाचार समिति (रासस) या प्रकाश सिलवालया संयोजकत्वय् ३५ म्ह दुजः दुगु समिति घोषणा याःगु खः।

उगु समितिइ अनन्त सुवेदी, विजय दिमदोङ, चिरञ्जीवी अधिकारी, दिपक श्रेष्ठ, दीपेन्द्र प्रजापति, गोपाल संग्रौला, हेमराज ढकाल, इफ्रान बाबु, जीवन पराजुली, करन ताम्राकार, कौशल घिमिरे, कमल राना, कविता थापा, लक्की चौधरी, लव प्याकुरेल, माधवप्रसाद तिवारी, नृपेन्द्रलाल श्रेष्ठ, पुष्पा अधिकारी, प्रकाश पण्डित, रुद्रश्रीस मगर, रञ्जित तामाङ, रवीन्द्र काफ्ले, रत्नकाजी महर्जन, सुरेन्द्रभक्त श्रेष्ठ, सुनील महर्जन, सुनील आचार्य, सामना वियोगी, टेकेन्द्रबहादुर महत, उद्धवकुमार कार्की, उत्तम श्रेष्ठ व यमन दनुवार दुजः तयातःगु दु।

समितिया दुजःतय् न्हापांगु मुँज्यां थःगु कार्ययोजना व पदाधिकारी क्वःछीगु जूगु दु। सार्क दुने व्यावसायिक पत्रकारिता, प्रेस व अभिव्यक्ति स्वतन्त्रता लिसें पत्रकारपिनि पेशागत हक, अधिकारया निंतिं सन् २०१९ य् भारतय् स्थापित मञ्चं अन्तर्राष्ट्रियस्तरय् पत्रकारिताया गुणस्तर व पहुँचयात बल्लाका यंकेगु आज्जु तयातःगु दु।

संगठनया आतक दक्षिण एसियाया देसय् शाखा विस्तार जुइधुंकूगु दुसा थुकिया मुख्यालय नेपालय् हे दु। दक्षिण एसियाय् व्यावसायिक पत्रकारिताया विकास व प्रवद्र्धन यायेत, पत्रकारया जीवनस्तर थकायेत, सार्क देय्या पत्रकारपिनि दथुइ थवंथवय् भलसा, छम्हं मेम्हेसिया समस्या थुइकेत व मूल्यांकन यायेत मञ्चं भूमिका म्हिती।

मञ्चयात दक्षिण एसियाली सदस्य देय्या पत्रकारं क्षेत्रीय पत्रकार निकायकथं मान्यता ब्यूगु दु । थुगु लागाय् पत्रकारिताया प्रवद्र्धन, विकास, विस्तार, नीतिगत सुधार व सार्क देसय् पत्रकारिता लागाया मंकाः आज्जु चूलाकेत मञ्चं ज्या याइगु धाःगु दु।