डेंगूं आःतक ४१ म्हेसिगु ज्यान वने धुकुगु दु। इपिडिमियोलोजी नाप रोग नियन्त्रण महाशाखाया कथं म्हिगःतक ४१ म्हेसिगु ज्यान वंगु पुष्टि जूगु दु।

३१ हजार स्वया अप्पो डेंगु संक्रमित जुइ धुकुगु दु।

नेपाःया लागि अमेरिकी राजदूतय् डिन थम्प्सन नियुक्त जूगु दु। वयकःयात शुक्रबाः वासिङ्टन डिसीइ शपथ ग्रहण याःगु खः।

वयकःयात र्यान्डी बेरीया थासय् वयेत्यःगु खः। येँया अमेरिकी दूतावासया कथं नव नियुक्त राजदुत थम्प्सन छु ई दुने येँ थ्यकः झाइ धका धाःगु दु।

उपराष्ट्रपति नन्दबहादुर पुनं शताब्दी पुरुष नाप संस्कृतिविद् सत्यमोहन जोशीया भिं उसाँया कामना यानादीगु दु।

थौं सुथय् ग्वार्कोया किष्ट शिक्षण अस्पतालय् वना उपराष्ट्रपति पुनं शताब्दी पुरुष जोशीया स्वास्थ्य अवस्थाबारे जानकारी कयादीगु दु।

जोशीया उपचारय् संलग्न चिकित्सकपिन्के स्वास्थ्यम अवस्थायाबारे जानकारी कयादीगु दु।

शताब्दी पुरुष जोशी डेंगू संक्रमण व स्वास्थ्यय् समस्या खने दुगुलि किष्ट मेडिकल अस्पतालय् उपचार यानाच्वनादीगु खः।

हिसी मिडिया न्ह्यब्बया नेपालभाषाया अनलाइन पत्रिका लहनान्युज खुदँ फुना न्ह्य दँ क्यःगु दु।

पत्रिकायात निरन्तर ग्वाहालि यानादीपि सकसित मिडिया ब्यवस्थापन पुचलं सुभाय् बिःगु दु।

सर्वोच्च अदालतय् विचाराधीन मुद्दा जूयाच्वंगु येँया थाय्मदुइ च्वंगु ४४ दँ पुलागु त्वाः छेँ येँ महानगरपालिकां म्हिगः थुना बिगु दु।

अदालतय् मुद्दा विचाराधीन जूया च्वंगु भ्वँ क्यःसा महानगरया नगर प्रहरी व जनपद प्रहरी बल प्रयोग याना उगु त्वाः छेँ डोजर चले याःगु खः।

स्थानियपिन्स बिरोध याःसा जवरजस्ति महानगरया नगर प्रहरी प्रयोगयासे त्वाः छेँ डोजर चले याःगु खः।

उगु त्वाः छेँ २०३५ सालय् पूरा जूगु खः।