भारतीय राजदूत नविन श्रीवास्तवं राष्ट्रपति विद्यादेवी भण्डारीसमक्ष थौं बिहीबाः ओहदाया प्रमाणपत्र बुझे याउगु दु।

राष्ट्रपति भवन शितल निवासय् ग्वसाः ग्वंगु विशेष समारोहय् नेपाःया लागि भारतीय राजदूत श्रीवास्तवं राष्ट्रपति भण्डारी समक्ष ओहदाया प्रमाण पत्र बुझे याउगु खः।

उगु समारोहय् परराष्ट्रमन्त्री डा.नारायण खड्का लगायत नेपाः सरकारया उच्च पदस्थ कर्मचारीपिनिगु न सहभागिता दुगु खः।

बागमती प्रदेशय् सत्तारुढ नेपाली कांग्रेस व नेकपा माओवादी केन्द्रं मुख्यमन्त्री हिलेगु तयारी सुरु याउगु दु।

सत्तारुढ गठबन्धनया सहमतिइ मुख्यमन्त्री जुम्ह नेकपा एकीकृत समाजवादीया राजेन्द्र पाण्डे न सहमति कार्यान्वयन मयाउगु धासे कांग्रेस व माओवादी केन्द्रं मुख्यमन्त्री हिलेगु लागि दबाव बिइगु कथं थौं बिहीबाः सांसदपिनिगु हस्ताक्षर संकलन याउगु दु।

बागमती प्रदेशय् कांग्रेस, माओवादी केन्द्र व एकीकृत समाजवादी दथुइ पालंपाः सरकार न्ह्याकेगु सहमति जुगु खःसा मुख्यमन्त्री पाण्डे न सहमति कथं राजीनामा मबिउसे आलटाल यानाच्वंगुलि दबाव बिइत हस्ताक्षर संकलन न्ह्याकगू धका सांसद सीता अधिकारीं धाउगु दु। पाण्डेलिपा कांग्रेसया इन्द्रबहादुर बानियाँ मुख्यमन्त्री जुइगु कथं स्वगु दल दथुइ सहमति जुगु खः।

तर पाण्डे धासा सत्ता गठबन्धनया शीर्ष तहया सहमति जूसा जक पद त्वत्येगु धका धयावया च्वंगु खः। थौं बिहीबाः कांग्रेस व माओवादी सांसदपिन्स खाली भ्वँतय् हस्ताक्षर याउगु दु।

देयन्यक वंगु २४ घण्टाया दुने थप ५५ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १ हजार ५३२ म्हेसिगु पीसीआर परीक्षणय् ३६ म्ह व १ हजार १६६ म्हेसिगु एन्टीजेन परीक्षणय् १९ म्ह याना ५५ म्हेसित संक्रमण पुष्टि जुगु दु। 

२४ घण्टाय् १७ म्ह कोरोना सक्रमणमुक्त जुगु दु सा देयन्यक २८० म्ह सक्रिय संक्रमित जुगु दु।

उकि मध्ये २७४ म्ह होम आइसोलेसनय् खुम्ह संस्थागत आइशोलेशन व स्वम्ह आईसीयूलय् च्वनाच्वंगु दु।

यल महानगरपालिकाया मेयर चिरीबाबु महर्जन व ख्वप नगरपालिकाया मेयर सुनिल प्रजापति दथुइ भेटवार्ता जुगु दु।

मेयर महर्जन व प्रजापति दथुइ निगु सहरया सांस्कृतिक महत्वयात कायम यासे सम्पदा पुनःनिर्माणया नीतिबारे छलफल जुगु खः।

छलफल यायेगु निति मेयर महर्जन ख्वप नगरपालिका कार्यालयय् वंगु खः। निम्ह मेयर दथुइ सम्पदा पुननिर्माणय् ख्वप नगरपालिका न्ह्यने जुगु धका धासे सांस्कृतिक महत्वया सम्पदा संरक्षणय् यल महानगरपालिका न विशेष ज्याझ्वः सञ्चालन याना च्वनागु दु धका धयादीगु खः।

मेयर महर्जनं ख्वपया सम्पदा संरक्षणय् यानाच्वंगु नीति व योजनाबारे जानकारी कयादीगु खः।

स्वनिगलय् हैजाया बिरामीपि बढे जुयावंगु दु। म्हिगः थप निम्हेसित हैजा पुष्टि जुगु दु।

थ्व नाप असार २ गतेनिसे असार १५ गते तक येँ जक १४ म्हेसित हैजाको सङ्क्रमण पुष्टि जुइ धुकुगु दु धका स्वास्थ्य तथा जनसङ्ख्या मन्त्रालयया प्रवक्ता डा. सङ्गीता मिश्रां जानकारी बिउगु दु। वयकःया कथं हैजा पुष्टि जुपि प्यम्ह मिसा व झीम्ह मिजंपि खः।

हैजा फैलै जुगु मुख्य कारण दूषित लः खः धका धाउगु दु। हितिं वइगु लः, बोतल\जारया लाः व जमिन दुनेया लःया प्यंगु नमुना परिक्षण याउगुलि कोलिफर्म जीवाणु लुगु खः। अथेहे यलय् १८ गु लखय् नमुना याउगुलि १२ गु नमुनाय् इकोलिन लुगु दु धका धाउगु दु।