वइगु मंसिर ४ गते जुइगु प्रतिनिधिसभा व प्रदेशसभा निर्वाचनया लागि उम्मेदवारी दर्ता थौं जुइगु दु। निर्वाचन आयोगं थौं सुथय् १० बजेनिसे बहनि ५ बजे तक उम्मेदवारी दर्ता याये फइ धका धाःगु दु।

देयन्यक मुख्य निर्वाचन अधिकृतया कार्यालय व निर्वाचन अधिकृतया कार्यालयय् उम्मेदवारी दर्ता यायेगु व्यवस्था मिले याःगु दु।

अथेहे २४ असोजय् उम्मेदवारया विरोधय् उजुरी बिइ फइगु, २४ व २५ असोजय् उजुरीइ जाँचबुझ यायेगु निर्णय व २५ गते नामावली प्रकाशन याइगु जुगु दु। २६ असोजय् उम्मेदवारया नां लित कायेगु ई तयातःगु दु ।

अन्तिम नामावली न उगु हे दिं प्रकाशन याना चुनाव चिं न वितरण यायेगु आयोगया कार्यतालिकाय् उल्लेख दु।

निर्वाचन आयोगं वइगु मंसिर ४ गते जुइगु चुनावया लागि प्रत्यक्षपाखे उम्मेदवारी मनोनयनया तयारी पूरा याःगु दु।

प्रमुख निर्वाचन आयुक्त दिनेशकुमार थपलियां पत्रकार सम्मेलन यासे कन्ह्यः सुथय् १० बजे बहनि ५ बजे तक  उम्मेदवारी दर्ताया लागि आयोग तयारी अवस्थाय् दु धका जानकारी बिःगु दु ।

वयकलं ७७ गु जिल्लाय् निर्वाचन कार्यालय स्थापना याना दक्को सामग्रीनाप निर्वाचन अधिकृत व कर्मचारी न तयारी अवस्थाय् दु धका धयादीगु दु।

वइगु मंसिर ४ गते जुइगु प्रतिनिधि सभा व प्रदेश सभा चुनावया लागि कन्ह्यः प्रत्यक्षपाखे उम्मेदवारया मनोनयन दर्ताया ज्याझ्वः दु।

नेपालभाषा संकिपा व म्युजिक भिडियोख्यलय् नांजाम्ह क्यामेरामाएन व एडिटर सोहन मानन्धरया मां ईन्द्र शोभा मानन्धर आकाझाकां मन्त।

मदुम्ह ईन्द्र शोभा मानन्धर ब्लड प्रेशरया ल्वचं पिडित जुयाच्वम्ह वयकः ७७ दँय् मदुगु खः।

मदुम्ह ईन्द्र शोभा मानन्धरया सोहन मानन्धर काय् नाप निम्ह म्ह्याय्दी।

मध्यपुरथिमिइ मल्लकालीन हताः थे लुमकेगु कथं थौं खाँ पिहाँवइगु जात्रा सुरु जूगु दु।

लाय्कुया तलेजु द्यःया थाय् द्यः छेँय् खड्ग, तरबार, ढाल, युद्धकवज लगायत मल्लकालीन युद्धय् छ्यलिइगु साधन ज्वना युद्ध कला प्रदर्शन याइगु उगु जात्रा क्वचाःगु दु।

दरबारनाव स्वापू दुगु खाँ पिहाँवइगु जात्राय् गुथीयारपिन्स जामा फिना खड्ग, ढाल व तरबार ल्हातय् ज्वना थीथी त्वालय् तत्कालीन युद्धकला प्रदर्शन याइगु खः। तत्कालीन दरबारपाखे पिकाइगु थुगु जात्रा थहनेया त्वाः इनाए त्वाः, निगु पूखु जुया दिगु भैरव तक व क्वहनेया त्वाः रूपय् दथु त्वाः जुया बालकुमारी तक प्रदर्शन याइ।

थुगु जात्रा मोहनीया नवमी कुन्हु तलेजु द्यःया थाय् बिःगु बलि व कोत दुने द्यः व दरबारया राजदण्डयात दुथ्याका देँय् चाःहिकिइ याइ ।

विशेष याना थुगु जात्राय् नायः पःमां (तत्कालीन दरबारका प्रशासक, श्रेष्ठ थर), कर्माचार्य, जोशी, कुटु, प्याथः (प्रजापति), खड्गी समुदायपि दुथ्याइ।

किपा सुरेश खाक्वः श्रेष्ठ

मदिक्क वाः वयाच्वंगु कारण नारायणी लः थहावया त्रिवेणीया गण्डक ब्यारेजय् २२ गु लुँखा चायकूगु दु।

थौं चान्ह्यः नारायणी खुसिइ जलसहत थहावःगुलि जोखिमपाखे मध्यनजर यासे गण्डक ब्यारेजया ३६ गु लुँखा मध्ये २२ गु लुँखा चायकूगु दु धका इलाका प्रहरी कार्यालयया प्रहरी नायब निरीक्षक रजिन रानां जानकारी बिःगु दु।

थौं सुथय् ७ बजे नारायणी खुसिया ब्यारेजय् लःया सतह २ लाख ४० हजार क्युसेक थ्यःगु खः। गण्डक ब्यारेजय् २ लाख ५० हजार क्युसेक लः थ्यःनकि चेतावनीया तह व ३ लाख क्युसेक लः थ्यनकि खतराया तह माने याइ।

लःया सतहं चेतावनीया तह पार याये न्ह्यः हे ब्यारेजया २२ गु लुँखा चाय्कूगु खः। बाढी सूचना केन्द्रं नारायणी खुसिइ जलाधार क्षेत्रय् थप वाः वइगु पूर्वानुमान यासे नवलपरासी व चितवनया तटीय क्षेत्रय् थौं बहनितक सतर्कता नाप सुरक्षित थासय् वनेत इनाप याःगु दु।