स्वनिगलय् नेवारी समुदायपिन्स महत्त्वपूर्ण कथं काइगु पचली भैरव जात्रा व पचली भैरवनाप स्वागु किंवदन्तीयात कया सांस्कृतिक नाटक ‘पचली भैरव’ मञ्चन याउगु दु।

वंगु कात्तिक महिनाय् टेकु कौसी थिएटरय् बज्र कला कुञ्जं न्ह्यब्बःगु नाटकय् पचली भैरव व स्थानीय नेवार समुदायया म्ह्याय् मचा रुकमणि दथुइ मतिनाया बाखंयात कया सांस्कृतिक नाप धार्मिक कथं न्ह्यब्बःगु खः।

उगु नाटकयात कया सफू छगु ज्याझ्वः दथुइ पितब्बज्या जुगु दु। शनिबाः जुगु कौसी थिएटरय् येँ महानगरया उपप्रमुख सुनिता डंगोल, संगीतकार राजु सिंह लगायतपिन्स सफू पितब्बज्या यानादीगु खः।

नेपाःया कला, संस्कृति, धार्मिक परम्परागत नाप सांस्कृतिक मौलिकताया संरक्षण व संवद्र्धन यायेगु कथं उद्देश्य कया नाटकयात लिपिबद्ध याना न्हुगु पुस्तासमक्ष न्ह्यब्बगु कथं सफू तयार यानागु धका च्वमि, नाटकया परिकल्पनाकार व निर्देशक चन्द्रमान मुनिकारं धयादीगु खः। येँ सांस्कृतिक सहरया कथं म्हसिगु थनया मूर्त सम्पदा न उलि हे महत्त्वपूर्ण दु धका उपप्रमुख डंगोलं  धयादीगु खः।

पेट्रोलियम पदार्थया भाः घटे जुगु दु।

सत्ता गठबन्धनया निर्णय कथं नेपाल आयल निगमं पेट्रोलियम पदार्थया कटौती यउागु दु।

थौं शनिबाः च्वंगु निगम सञ्चालक समितिया बैठकं भाः घटे यायेगु निर्णय याउगु दु। निगमं पेट्रोलय् २० रुपैयाँ व डिजेल–मचिकनय् २९ रुपैयाँ भाः घटे याउगु दु।

आः न्हुगु भाःकथं पेट्रोल लिटरं १७९ व डिजेल–मतिकंया लिटरं १६३ कायम याउगु दु। घटे जुगु भाः थौं चान्ह्यः १२ बजेनिसे लागू जुइ धका निगमं धाउगु दु।

थौं सुथय् च्वंगु सत्ता गठबन्धनया बैठकं कर कटौती याना पेट्रोलियम पदार्थया भाः घटे याउगु खः।

नेकपा एमाले निकट युवा संघं पेट्रोलियम पदार्थया भाः थकाउगु विरुद्ध येँ छगु प्रदर्शन जुगु दु।

युवा संघं पेट्रोलियम पदार्थया भाः थकाउगु विरुद्ध म्हिगः येँ छगु मसाल जुलुस पिकाउगु दु।

बौद्ध युवा कमिटी ललितपुरया ग्वसालय् नेपाल संवत्या प्रवर्तक शंखधर साख्वाःया लोक कल्याणकारी पक्षयात कयाः छगू विचाः गोष्ठी जुगु दु।

उगु ज्याझ्वलय् न्ववासें भिक्षु कोण्डन्यं बुद्ध जुइत माःगु थीथी पारमिता मध्ये न्हापांगु पारिमिता धइगु दान पारमिता खः, शंखधर साख्वालं थःगु सम्पत्तिं जनताया ऋण मुक्त यानाः दानपारमिता पूवंकूगु दु धयाबिज्यात।

अथेहे नेवाः पत्रकार दबूया पुलांम्ह नायः श्रीकृष्ण महर्जनं शंखधर साख्वालं नेपाल संवत् जक नीस्वंगु मखुसें जनताया सेवा यायेगु लोककल्याणकारी भावना नं स्यना बिउगु दु धका धयादिगु खः।

‘नेपालभाषा टाइम्स’ या सम्पादक सुरेश किरण मानन्धरं नेपाल संवत्बारे प्रचलित आपालं सिद्धान्तत मध्ये शंखधर साख्वालं जनताया त्यासा पुला बिल धइगु सिद्धान्तयात यक्वस्यां पत्याः याःगु खँ कनादिल।

यल महानगरपालिका ३ वडाया अध्यक्ष श्रीगोपाल महर्जन मूपाहां कथं झाःगु ज्याझ्वः समितिया नायः सचित शाक्यया सभापतित्वय् जूगु खः।

नेपालभाषाया वाःपौ लहना प्रकाशन गृह लहना मिडियाया ग्वसालय् छगू अन्तक्र्रिया ज्याझ्वः जुगु दु।

‘कोरोना प्रभावित पत्रकार व नेवाः मिडिया हाउस’ विषयय् उगु अन्तक्र्रिया ज्याझ्वः जूगु खः । लहना मिडियाया अध्यक्ष नृपेन्द्रलाल श्रेष्ठया सभाध्यक्षताय् जूगु उगु ज्याझ्वलय् मूपाहां कथं येँ महानगरपालिकाया पूर्व मेयर विद्यासुन्दर शाक्य झायादीगु खः ।

ज्याझ्वलय् न्ववानादीसे पूर्व मेयर शाक्यं थःगु कार्यकालय् भाषा, कला, संस्कृति व सम्पदालिसें थीथी क्षेत्रय् जूगु बांलाःगु ज्यायात निरन्तरता मबिल धाःसा सतक संघर्षय् कुहां वयेगु जुइ धका धयादिगु खः। परम्परागत व सांस्कृतिक बाजं गुरुया सम्मान, पत्रकारिता ख्यःया विकास, मूर्त व अमूर्त संस्कृति सम्पदा संरक्षण यायेगु ज्यायात निरन्तरता बिया वनेमाःगु खँय् वय्कलं बः बियादीगु दु ।

ज्याझ्वःया कजि सुुरेन्द्रभक्त श्रेष्ठं लसकुस यानादीगुु उगु ज्याझ्वलय् नेवाः पत्रकार राष्ट्रिय दबूया सल्लाहकार सुरेश किरण मानन्धर, विजयरत्न असंबरे, दबूया केन्द्रीय नायः सुरजवीर वज्राचार्य, मूछ्याञ्जे सुनिल महर्जन, निवर्तमान नायः श्रीकृष्ण महर्जन, न्वकु रचना श्रेष्ठ, दुजः नबिन जोशी, सुरतरत्न सिन्दुराकार, बिराजकाजी राजोपाध्यायो,नेपाल आदिवासी जनजाति पत्रकार महासंघया न्वकु अमरध्वज लामा, लगायतया संचारकःमिपिंसं थःथःगु धारणा तयादीगु खःसा ज्याझ्वः रत्नकाजी मनं न्ह्याकादीगु खः ।