येँ महानगरपालिकां २५ वडाया थाय्मदु त्वालय् लाःगु त्वाःछेँ थुनेगु निर्णयया विरोधय् स्थानीयपिन्स विरोध प्रदर्शन याःगु दु।

बिहीवाः सुथय् स्थानीय थाय्मदु त्वालय् टायर च्याकाः विरोध प्रदर्शन याःगु खः । ऐतिहासिक महत्वं जाःगु थाय्मदुया त्वाःछेँ थुनेत येँ महानगरपालिकां बुधवाः सुचं पिकाःगु खः ।

उगु त्वाःछेँ मथुनेत स्थानीयं थ्वः स्वया न्ह्यः नं येँ महानगरपालिकाया सम्बन्धित निकायलय् तःकःमछि इनाप यायेधुंकूगु खः । स्थानीयया उगु इनापयात बेवास्ता याःगु धासें थाय्मदु त्वाःया स्थानीयबासीं थाय्मदु दुवातय् उकथं विरोध प्रदर्शन याःगु खः ।

त्वाःछेँ पियाः येँ महानगरपालिकां २५ वडा कार्यालयया भवन दयेकेगु धासें ताः ई न्ह्यवनिसें कुतः यानाच्वंगु खःसा स्थानीयबासीं त्वाःछेँ गथे खः अथे हे तयाः ल्यंदनीगु जग्गाय् वडाभवन दयेकेत इनाप यानावयाच्वंगु खः ।

स्ट्रिट सिंगर मञ्जदरस (एमजे) तामाङयात म्हिगः बुधबाः बसन्तपुरय् येँ महानगर प्रहरीं ज्वःगु दु।

उमिसं यलय् च्वम्ह १३ दँ दुम्ह सुभिता खड्काया उपचार याःगु लागि ग्वाहालि यायेत बसन्तपुरय् म्ये हालाच्वंगु इलय् येँ महानगरपालिकां महानगरय् दुने फ्वने दइ मखु धका तामाङ याःगु माइक, लाउडस्पिकर थे जाःगु सामग्री नाप ज्वना यकूगु खः।

तामाङयात जाउलाख्यलया क्यान्सर अस्पतालय् उपचार यानाच्वम्ह खड्काया उपचारया निति ग्वाहालि यायेगु निति म्ये हालाच्वंगु खः। म्ये हाला उमिसं १४ हजार रुपैयाँ जम्मा याये धुकुगु खः।

नेपाल संवत् ११४३ न्हूदँ तःजिक हनिइगु नितिं नेपाल संवत राष्ट्रिय न्हूदँ समारोह समितिं थीथी समिति व उपसमिति यानाः २६ गू समितित नीस्वंगु दु ।

समारोह समितिया नायः प्रा.डा. नरेशमान बज्राचार्यया उपस्थितिइ येँया नेपाः ब्यांक्वेटय् च्वंगु मुँज्या थीथी समिति व उपसमिति नीस्वंगु खः । समारोह समितिं ब्यूगु जानकारी कथं थ्वहे वइगु कछलाथ्व पारुया दिं येँया बसन्तपुरय् जुइगु भिंतुना ¥याली व भिंतुना सभा ताःलाकेगु नितिं व न्हूदँया भिंतुना सभा व ¥याली लिपा दच्छियंकं थीथी ज्याझ्वः यायेगु नितिं थथे उपसमिति नीस्वंगु खः।

समारोह समितिं संचार उपसमिति, आर्थिक उपसमिति, स्वयंसेवक उपसमिति, सांस्कृतिक बाजा समन्वय उपसमिति, देय् न्यंक न्हूदँ ज्याझ्वः धलः उपसमिति, मिसा दुजः मनोनयन उपसमिति, क्रियाशील व्यक्तित्व मनोनयन उपसमिति, जातीय खलः पुचः उपसमिति, मञ्च व माइक व्यवस्थापन उपसमिति, गैरनेवाः मनोनयन उपसमिति, नासः पूजा ज्याझ्वः उपसमिति, न्हिल्याःपौं प्रकाशन उपसमिति, सांस्कृतिक ज्याझ्वः उपसमिति, मू नारा क्वःछिना उपसमिति, क्लब संघसंस्था परिचालन उपसमिति, नसात्वसा व ज्याझ्वःया थाय् ब्यवस्थापन उपसमिति, माइन्युट पुस्तिका व्यवस्थापन उपसमितिलिसें थीथी उपसमितित नीस्वंगु खः ।थथे नीस्वंगु उपसमितिया मुँज्या मोहनी नखः क्वचायेवं हे न्ह्याकेगु खँया जानकारी न्हूदँ समारोह समितिं ब्यूगु दु ।

अथेहे, न्हूदँ ११४३ या सकतां ज्याझ्वः न्ह्याकेगु नितिं १९ म्ह दुजः दूगु व्यवस्थापन समिति नीस्वंगु दु।

लुँ तोलां थौं १ हजार २ सय रुपैयाँ थहावंगु दु। थौं लुँ तोलां १ हजार २ सय रुपैयाँ न थहावना ९२ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोला न २५ रुपैयाँ थहावंगु दु। वहः तोलां नीन्यातका थहावना १ हजार १ सय ७० रुपैयाँ न कारोबार जूगु दु धका महासङ्घं धाःगु दु।

राष्ट्रिय प्रजातन्त्र पार्टी (राप्रपा) प्रवेशयाम्ह रवीन्द्र मिश्रं थुगु पटक येँया क्षेत्रनम्बर १ पाखे हे प्रतिनिधि सभा सदस्यया लागि चुनाव ल्वाइगु जुगु दु।

मिश्रं थौं शुक्रबाः छगु औपचारिक रुपं थःगु उम्मेदवार घोषणा याइगु ज्याझ्वः तःगु दु। वंगु निर्वाचनय् मिश्र क्षेत्र नम्बर १ य् विवेकशील साझा पार्टीपाखे चुनाव ल्वाःगु खः।

उगु इलय् तराजु चिंकया मिश्रं १० हजार ११८ हःगु खः। आः राप्रपाय् दुहावना हलो चिं ज्वना चुनाव ल्वायेत्यःगु खः । राप्रपाय् मिश्रयात वरिष्ठ उपाध्यक्षया जिम्मेवारी बिइगु निर्णय याःगु दु।