नेपाल संवत राष्ट्रिय न्हूदँ समारोह समिति ११४३ या अध्यक्षय् बौद्ध बिद्धान प्रा. डा. नरेशमान बज्राचार्ययात ल्यंगु दु ।

न्हूदँ समारोह समिति ११४२ या अध्यक्ष नीरञ्जनरन्त शाक्यया सभाध्यक्षताय् जुगु मुँज्यां प्रा. डा. बज्राचार्ययात ल्यंगु खः।

प्रा. डा. बज्राचार्ययात बज्राचार्य लुम्बिनी बिश्व बिद्यालयया उपकुलपति जुयादिइ धुंकुम्ह खःसा बौद्ध बिद्वान लिसें लुम्विनी दयेकुगु नेवाः म्हसिका दुगु बज्रयान बिहारया कजि कथं ज्या यानादिम्ह ब्यक्ति खः ।

मध्यपुर थिमि बचत तथा ऋण सहकारी संस्थाया झिंन्याक्वःगु वार्षिक साधारणसभा क्वचाःगु दु। उगु साधारण सभाय् थिमिइ न्हय्गू ऐतिहासिक, धार्मिक व सांस्कृतिक खलः पुचःयात सम्मान याःगु खः ।

सांस्कृतिक ख्यलय् योगदान बिउगुपि थिमिइ ऐतिहासिक नीलबाराही गंप्याखं (मध्यपुर, बोडे), लाय्कू भैलः प्याखं संचालन समिति, महाकाली प्याखं व्यवस्थापन समिति (दिगुत्वाः), थिमि गुंला बाजं खलः (वज्राचार्य समुदाय), मध्यपुर थिमि गुंला बाजं (प्रजापति समुदाय), येँयाः पुन्हिया म्ये प्वाः खनेगु जात्रा व्यवस्थापन समिति व मानन्धर गुंला बाजं (सिवा साय्मि खलःयात सम्मान याःगु खः ।

ज्याझ्वलय् मूपाहां बागमति प्रदेशया खानेपानी, उर्जा व सिँचाइ मन्त्री वसन्त मानन्धरं दोसल्लां न्ययेकाः हनापौ लःल्हानादीगु खः। थिमि नगरपालिका ८ वडाअध्यक्ष रमेश थापा श्रेष्ठं स्थानीयस्तरय् संचालन जुयाच्वंगु सहकारी जक बचत यायेत इनाप यानादिल ।

संस्थाया अध्यक्ष कृष्णकाजी मानन्धरया सभापतित्वय् मध्यपुर थिमि नगरपालिका सहकारी शाखाया छगू हे सत्रं साधारण सभा सिधयेकेगु कार्यविधिं न्ह्याःगु ज्याझ्वलय् शेयर सदस्यपिनिगु सुझाव संकलन यानाः निर्णय पारित याःगु खः ।

संस्थाया कोषाध्यक्ष प्रेमसुन्दर श्रेष्ठ व लेखा सुपरिवेक्षण समितिया सुन्दर श्रेष्ठं थःथःगु प्रतिवेदन न्ह्यब्वयादीगु ज्याझ्वलय् मिसा उपसमितिया संयोजक ललिता यलायं लसकुस यानादीगु खः ।

दल्लु च्वंगु जय माता भगवती बचत तथा ऋण सहरकारी संस्थाया २३ क्वःगु दँमुज्या क्वचाःगु दु।

उगु दँमुज्याय् संस्थाया सल्लाहकार लक्ष्मण राजोपाध्याय न न्ह्यब्बायादीगु “श्री बिजयश्र्वरी माता” नां या सफू संस्कृति, पर्यटन नाप नागरिक उड्डयन मन्त्री जीवनराम श्रेष्ठं छगु ज्याझ्वः दथुइ उलेज्या यानादीगु दु।

उगु ज्याझ्वलय् येँ महानगरपालिका १५ वडाध्यक्ष ईश्वरमान डंगोलया न उपस्थिति दुगु खः।

लिपागु २४ घण्टाय् थप ५३ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं २ हजार ६२४ म्हेसिगु पीसीआर परीक्षणय् ५३ म्हेसित कोरोना संक्रमण जूगु दु।

८२५ म्हेसिगु पीसीआर परीक्षण याःगुलि ३९ म्ह व १ हजार ७९९ म्हेसिगु एन्टीजेन परीक्षण याःगुलि १४ म्ह याना ५३ म्हेसित संक्रमण पुष्टि जूगु दु धका मन्त्रालयं धाःगु दु।

लिपागु २४ घण्टाया दुने डेंगूया कारण १ हजार ५१ म्ह संक्रमितपि थपे जूगु दु।

स्वास्थ्य तथा जनसंख्या मन्त्रालयया कथं, सोमबाःतक २५ हजार ५४३ म्हेसित डेंगू पुष्टि जुइ धुकुगु दु। थ्व स्वया न्ह्यः म्हिगः तक २४ हजार ४९२ म्हेसित डेंगू संक्रमण जूगु खः।

डेंगू संक्रमणं आःतक ३२ म्ह सी धुकुगु दु। मन्त्रालयया कथं आःतक दकलय् अप्पो बागमती प्रदेशय् ९ हजार ९१० म्ह डेंगू संक्रमण जुगु दु।

\अथेहे लुम्बिनी प्रदेशय् २ हजार ८८७, सुदूरपश्चिमय् ८०४, प्रदेश १ य् ७७५, गण्डकीइ ५५६, मधेशय् ३८० व कर्णालीइ २३१ म्ह डेंगू संक्रमण जुइ धुकुगु दु।